არჩევნების შემდეგ იუსტიციის სამინისტრომ მიზნად დაისახა, რომ ნოტარიუსი საქართველოს ყველა რაიონს ჰყავდეს. წელს, იანვარში, ნოტარიუსი დაინიშნა ოზურგეთში, აპრილში კი - თერჯოლაში, თიანეთსა და წყალტუბოში. მართალია, კანონი ნოტარიუსს არ ავალდებულებს, კარიერის დასაწყისში რომელიმე ერთ ადგილს ან რაიონს დაუკავშიროს თავისი საქმიანობა, მაგრამ ამ მხრივ კანონის დახვეწამდე საქართველოს არაერთი რაიონი რჩება ნოტარიუსის გარეშე, რადგან ნოტარიუსობის კანდიდატების უმრავლესობას თბილისში დაფუძნება სურს.

საქართველოს იუსტიციის მინისტრი თეა წულუკიანი  საქართველოს პრემიერ-მინისტრ ბიძინა ივანიშვილთან ერთად სტრასბურგში იმყოფება. ქართული დელეგაცია ევროსაბჭოს საპარლამენტო ასამბლეის საგაზაფხულო სესიას ესწრება, 23 აპრილს კი, ადგილობრივი დროით 12.00 საათზე, ევროსაბჭოს დეპუტატების წინაშე საქართველოს პრემიერი წარდგება. სიტყვით გამოსვლის შემდეგ ბიძინა ივანიშვილი ასამბლეის წევრების შეკითხვებს უპასუხებს.

საქართველოს იუსტიციის მინისტრი თეა წულუკიანი სტამბულში ბუდაპეშტის პროცესის ფარგლებში მიმდინარე კონფერენციას ესწრება. სამიტი „აბრეშუმის გზის პარტნიორობა მიგრაციისთვის" თურქეთის მთავრობის ორგანიზებითა და მიგრაციის პოლიტიკის განვითარების საერთაშორისო ცენტრის მხარდაჭერით იმართება. მას 50-მდე სახელმწიფოს მინისტრები და აღმასრულებელი ხელისუფლების  წარმომადგენლები ესწრებიან.

საქართველოს იუსტიციის მინისტრის 2013 წლის 18 აპრილის ბრძანების თანახმად, ნოტარიუსთა საკვალიფიკაციო გამოცდა დაინიშნა. გამოცდა  18 მაისს დაიწყება და ორ ეტაპად ჩატარდება. პირველი ეტაპი  ზოგად უნარ-ჩვევებს მოიცავს (ვერბალური და მათემატიკური ნაწილები), მეორე ეტაპი კი - პროფესიულ ტესტირებას.

მთავრობის კანცელარიაში დღეს საქართველო-ამერიკის სტრატეგიული პარტნიორობის ქარტიის დემოკრატიის სამუშაო ჯგუფის შეხვედრა გაიმართა. შეხვედრას თანათავმჯდომარეობდა იუსტიციის მინისტრის მოადგილე გოჩა ლორთქიფანიძე, საგარეო საქმეთა მინისტრის პირველ მოადგილე დავით ზალკალიანთან ერთად.

11 აპრილს იუსტიციის სამინისტროში ყოფილ მსჯავრდებულთა რესოციალიზაცია-რეაბილიტაციის ფარგლებში ორი საგრანტო პროგრამა გამოცხადდა, რომლებიც ორიენტირებულია ყოფილ მსჯავრდებულთა რეაბილიტაციაზე, კერძოდ, ფსიქოლოგიურ დახმარებაზე, სოციალური უნარების განვითარებასა და დასაქმებაზე.

8 აპრილს ქ.გორში, დემოკრატიული ჩართულობის ცენტრში, იუსტიციის მინისტრმა ჟურნალისტებისათვის პრესკონფერენცია გამართა. თეა წულუკიანი მედიას იუსტიციის სამინისტროს მიერ განხორციელებულ და დაგეგმილ რეფორმებზე ესაუბრა. მართლმსაჯულების სისტემის რეფორმა, კანონი „პროკურატურის შესახებ", შრომის ახალი კოდექსი, ელექტრონული პირადობის მოწმობა; იუსტიციის სახლები, პრობლემური იპოთეკური სესხები - ამ ძირითად საკითხებზე შეაჩერა იუსტიციის მინისტრმა საზოგადოების ყურადღება.

5 აპრილს საქართველოს იუსტიციის მინისტრი, თეა წულუკიანი და სასჯელაღსრულების, პრობაციისა და იურიდიული დახმარების მინისტრი სოზარ სუბარი, პატიმართა რეაბილიტაცია-რესოციალიზაციის პროექტის ფარგლებში, ავჭალაში მდებარე არასრულწლოვანთა კოლონიას ესტუმრნენ.