მოქალაქეთა პოლიტიკური გაერთიანებების (პარტიების) რეგისტრაცია

სააღსრულებო საქმიანობის ლიცენზიის გაცემა

 

 

---

 

მოქალაქეთა პოლიტიკური გაერთიანებების (პარტიების) რეგისტრაცია

მოქალაქეთა პოლიტიკური გაერთიანებების (პარტიის) რეგისტრაცია ხორციელდება საქართველოს იუსტიციის სამინისტროში.

 

მოქალაქეთა პოლიტიკური გაერთიანებების (პარტიების) რეგისტრაციისათვის წარსადგენი დოკუმენტაცია:

 

მოქალაქეთა პოლიტიკური გაერთიანებების (პარტიის) დამფუძნებელი ყრილობის ჩატარებიდან ერთი კვირის ვადაში საქართველოს იუსტიციის სამინისტროს რეგისტრაციისათვის წარედგინება შემდეგი დოკუმენტები:

    ა) განცხადება პარტიის რეგისტრაციის შესახებ, პარტიის ხელმძღვანელი პირის (პირების) ხელმოწერით (ხელმოწერებით);

    ბ) ნოტარიუსის მიერ დამოწმებული პარტიის დამფუძნებელი ყრილობის ოქმი;

    გ) პარტიის არანაკლებ 1000 წევრის სია, სახელის, გვარის,დაბადების თარიღის, პირადობის მოწმობის ნომერის, სამუშაო ადგილის, საცხოვრებელი ადგილის მისამართისა და ტელეფონის მითითებითა და მათი ხელმოწერებით;

    დ) პარტიის წესდება;

    ე) ცნობა პარტიის იურიდიული მისამართისა და ტელეფონის შესახებ;

    ვ) პარტიის წარმომადგენლობაზე უფლებამოსილი პირის (პირების) ხელმოწერის (ხელმოწერების) ნოტარიულად დამოწმებული ნიმუშები;

    ზ)  პარტიის ბეჭდის, ემბლემის და სხვა სიმბოლიკის ესკიზები, თუ ასეთები გამოიყენება.

    თ) სარეგისტრაციო მოსაკრებლის (500 ლარის) გადახდის დამადასტურებელი ქვითარი.

 

მოქალაქეთა პოლიტიკური გაერთიანებების (პარტიის) რეგისტრაციის ვადა

გადაწყვეტილება მოქალაქეთა პოლიტიკური გაერთიანებების რეგისტრაციის შესახებ მიიღება ერთი თვის ვადაში განაცხადების შეტანის დღიდან.

 

რეგისტრაციისათვის წარდგენილი მოქალაქეთა პოლიტიკური გაერთიანების (პარტიის) წესდება უნდა შეიცავდეს:

    ა) პარტიის სახელწოდებას, აგრეთვე მის შემოკლებულ დასახელებას, თუ ასეთი გამოიყენება;

    ბ) პარტიის იურიდიულ მისამართს;

    გ) პარტიის საქმიანობის მიზნებს (ამოცანები) და მათი განხორციელების ფორმებს;

    დ) პარტიის წევრად მიღებისა და წევრობის შეწყვეტის წესსა და პირობებს;

    ე) პარტიის წევრის უფლება-მოვალეობებს;

    ვ) პარტიის ორგანიზაციულ სტრუქტურას;

    ზ) პარტიის ხელმძღვანელი, აღმასრულებელი და მაკონტროლებელი ორგანოების შექმნის წესს, მათ კომპეტენციას და უფლებამოსილების ვადას;

    თ) პარტიის ზოგად და სპეციალურ წარმომადგენლობაზე უფლებამოსილ თანამდებობის პირთა ჩამონათვალს და წარმომადგენლობის ფარგლებს;

    ი) პარტიის ქონების შექმნის წყაროებსა და მისი გამოყენების წესს;

    კ) წესდებაში ცვლილებებისა და დამატებების შეტანის წესსა და პირობებს;

    ლ) პარტიის საქმიანობის შეწყვეტის საფუძვლებს (რეორგანიზაციისა და თვითლიკვიდაციის წესები);

    მ) პარტიის სიმბოლიკის აღწერილობას, თუ ასეთი გამოიყენება.

 

---

 

შემოქმედებითი კავშირის დაფუძნება

შემოქმედებითი კავშირის დამფუძნებელი შეიძლება იყოს შემოქმედ მუშაკთა (ქმედუნარიან ფიზიკურ პირთა) საინიციატივო ჯგუფი, რომელშიც არანაკლებ 5 პირია გაერთიანებული. დამფუძნებელი არ შეიძლება იყოს სახელმწიფო ან ადგილობრივი თვითმმართველობის ორგანო. შემოქმედებითი კავშირის დამფუძნებელი საინიციატივო ჯგუფი, რომელშიც არანაკლებ 5 პირია გაერთიანებული, ატარებს დამფუძნებელ ყრილობას (კონფერენციას) და მისი ჩატარების დღიდან 10 დღის ვადაში საქართველოს იუსტიციის სამინისტროს წარუდგენს სარეგისტრაციო დოკუმენტაციას. დამფუძნებელ ყრილობას (კონფერენციას) უნდა დაესწროს და მისი ოქმი უნდა დაამოწმოს ნოტარიუსმა.

 

შემოქმედებითი კავშირის რეგისტრაცია

შემოქმედებითი კავშირის სახელმწიფო რეგისტრაციას ახორციელებს საქართველოს იუსტიციის სამინისტრო.

შემოქმედებითი კავშირის რეგისტრაციისათვის წარსადგენი დოკუმენტები:

    ა) განცხადება კავშირის ხელმძღვანელი ორგანოს წევრთა ხელმოწერით და მათი საცხოვრებელი ადგილის მისამართების მითითებით;

    ბ) კავშირის დამფუძნებელი ყრილობის (კონფერენციის) ოქმი;

    გ) კავშირის დამფუძნებელთა სია, სახელის, გვარის, დაბადების თარიღის, პირადობის მოწმობის ნომრის, სამუშაო ადგილის, საცხოვრებელი ადგილის მისამართისა და ტელეფონის მითითებითა და მის წევრთა ხელმოწერით;

    დ) კავშირის წესდება;

    ე) კავშირის სიმბოლოს ესკიზი (მისი არსებობის შემთხვევაში);

    ვ) კავშირის იურიდიულ მისამართი;

    ზ) კავშირის წარმომადგენელი უფლებამოსილი პირის (პირთა) სანოტარო წესით დამოწმებულ ხელმოწერის ნიმუში;

    თ) კავშირის ეროვნულ-ისტორიული წარსულისა და მოღვაწეობის დამადასტურებელ საარქივო თუ სხვა სახის დოკუმენტები (მისი არსებობის შემთხვევაში).

წესდების რეკვიზიტები

რეგისტრაციისათვის წარდგენილი წესდება უნდა შეიცავდეს:

    ა) შემოქმედებითი კავშირის სრულ სახელწოდებას, შემოკლებულ სახელწოდებას (მისი არსებობის შემთხვევაში);

    ბ) შემოქმედებითი კავშირის საქმიანობის მიზნებსა და ამოცანებს;

    გ) შემოქმედებით კავშირში გაწევრიანებისა და წევრობიდან გასვლის წესს;

    დ) შემოქმედებითი კავშირის წევრთა უფლებებსა და მოვალეობებს;

    ე) შემოქმედებითი კავშირის მართვის ორგანოთა შექმნისა და საქმიანობის საფუძვლებს, მათ უფლებამოსილებებს;

    ვ) შემოქმედებითი კავშირის მიერ გაწეულ საქმიანობაზე კონტროლის წესს;

    ზ) შემოქმედებითი კავშირის ლიკვიდაციისა და რეორგანიზაციის წესს;

    თ) წესდებაში ცვლილებისა და დამატების შეტანის წესს.

    შემოქმედებითი კავშირის წესდებით შეიძლება გათვალისწინებულ იქნეს სხვა საკითხებიც, რომლებიც არ ეწინააღმდეგება საქართველოს კანონმდებლობას.

 

 

შემოქმედებითი კავშირების რეგისტრაციისათვის „სარეგისტრაციო მოსაკრებლების შესახებ" საქართველოს კანონით დადგენილია  შემდეგი მოსაკრებლები:

საერთაშორისო შემოქმედებითი კავშირის რეგისტრაციისათვის - 60 ლარი;

საქართველოს შემოქმედებითი კავშირის რეგისტრაციისათვის - 50 ლარი;

ადგილობრივი შემოქმედებითი კავშირის რეგისტრაციისათვის - 40 ლარი;

 

შემოქმედებითი კავშირების რეგისტრაციის ვადა

შემოქმედებითი კავშირის სარეგისტრაციო დოკუმენტაციას მისი წარდგენიდან 1 თვის ვადაში განიხილავს საქართველოს იუსტიციის სამინისტრო. გადაწყვეტილება რეგისტრაციაზე ან მასზე უარის თქმის შესახებ განმცხადებელს ეცნობება წერილობით გადაწყვეტილების მიღებიდან 7 დღის ვადაში, უარის თქმის დასაბუთებული მითითებით. გადაწყვეტილება რეგისტრაციაზე უარის თქმის შესახებ შეიძლება გასაჩივრდეს სასამართლოში 1 თვის ვადაში.

 

---

 

სააღსრულებო საქმიანობის ლიცენზიის გაცემა:

 

კერძო აღმასრულებელზე სააღსრულებო საქმიანობის ლიცენზიას გასცემს საქართველოს იუსტიციის სამინისტრო.      ლიცენზიანტს უფლება აქვს სააღსრულებო საქმიანობა განახორციელოს საქართველოს მთელს ტერიტორიაზე. სააღსრულებო საქმიანობის ლიცენზიის მისაღებად ფიზიკური პირი უნდა იყოს/ჰქონდეს:

• ქმედუნარიანი საქართველოს მოქალაქე;
• უმაღლესი იურიდიული განათლება;
• ჩაბარებული აღმასრულებლის საკვალიფიკაციო გამოცდა ან მოსამართლის საკვალიფიკაციო გამოცდა საერთო ან სამოქალაქო და ადმინისტრაციული სამართლის სპეციალობით;
• საქართველოს იუსტიციის მინისტრის ბრძანებით დადგენილი წესის შესაბამისად აღჭურვილი სამუშაო ადგილი (ოფისი, ბიურო).
• კერძო აღმასრულებელისათვის სავალდებულოა სადეპოზიტო ანგარიში ბანკში.
• ორ ან ორზე მეტ კერძო აღმასრულებელს შეიძლება ჰქონდეს საერთო სამუშაო ადგილი (ოფისი, ბიურო). კერძო აღმასრულებელთა უფლება-მოვალეობანი საერთო სამუშაო ადგილის მიმართ განისაზღვრება მათ შორის დადებული ხელშეკრულებით. ასეთ შემთხვევაში თითოეული კერძო აღმასრულებელი სააღსრულებო საქმიანობას ახორციელებს საკუთარი სახელით და პირადად აგებს პასუხს თავისი სამსახურებრივი საქმიანობისათვის.
• სამუშაო ადგილის შეცვლის შემთხვევაში კერძო აღმასრულებელი ვალდებულია დაუყოვნებლივ აცნობოს ამის თაობაზე საქართველოს იუსტიციის სამინისტროს და წარუდგინოს მას სამუშაო ადგილის მისამართი და ცნობა იმ უძრავი ქონების საკუთრების თაობაზე (მესაკუთრის ვინაობა), სადაც უნდა განთავსდეს კერძო აღმასრულებლის სამუშაო ადგილი და ამ უძრავი ქონების მესაკუთრის თანხმობა სააღსრულებო საქმიანობის განხორციელებაზე.
• კერძო აღმასრულებლის ოფისი (ბიურო) უნდა იყოს არანაკლებ 20 მ2 კაპიტალური ფართობის, სათანადოდ დაცული (ხმოვანი სიგნალიზაციით ან სპეციალური დაცვით) და საკომუნიკაციო_საოფისე ტექნიკით (ტელეფონი, ინტერნეტის ქსელში ჩართული კომპიუტერი, პრინტერი, დოკუმენტაციის განთავსებისა და სათანადო შენახვისათვის აუცილებელი სხვა ინვენტარი) აღჭურვილი.
• აკრძალულია ოფისის (ბიუროს) განთავსება საჯარო სამართლის იურიდიული პირის, სანოტარო ბიუროს, საგანმანათლებლო ან გასართობი დაწესებულების შენობაში.
• ოფისის შესასვლელში უნდა იყოს განთავსებული შესაბამისი აბრა, სააღსრულებო საქმიანობისა და კერძო აღმასრულებლის (საერთო ოფისის შემთხვევაში, თითოეული მათგანის) სახელისა და გვარის აღნიშვნით. აბრა შეიძლება შეიცავდეს დამატებით აღნიშვნებსაც. კერძო აღმსრულებლის ოფისში თვალსაჩინო ადგილას უნდა იყოს გამოკრული სააღსრულებო საქმიანობის ლიცენზია.

 

სააღსრულებო საქმიანობის ლიცენზიის გაცემაზე უარის თქმის საფუძვლები:

 

1. სააღსრულებო საქმიანობის ლიცენზია არ გაიცემა იმ ფიზიკურ პირზე რომელიც:

• ნასამართლევია განზრახ დანაშაულის ჩადენისათვის ან რომლის მიმართაც მიმდინარეობს სისხლისსამართლებრივი დევნა განზრახ დანაშაულის ჩადენის ფაქტზე;
• განთავისუფლებულია საჯარო სამსახურიდან ან ნოტარიუსის თანამდებობიდან ან შეუწყდა ადვოკატთა ასოციაციის წევრობა დისციპლინური გადაცდომის, კანონის უხეში ან/და არაერთგზის დარღვევის, თანამდებობრივი მდგომარეობის მართლმსაჯულებისა და სამსახურებრივი ინტერესების საზიანოდ გამოყენების ან კორუფციული სამართალდარღვევის გამო;
• მოქმედი ნოტარიუსი ან ადვოკატია;

ასევე:

• მის მიმართ სისხლის სამართლის საქმე განზრახ დანაშაულის ჩადენის ფაქტზე შეწყდა ხანდაზმულობის ან ამნისტიის გამო;
• მისი საქმიანობა ითვლება საჯარო სამსახურად „საჯარო სამსახურის შესახებ" საქართველოს კანონის თანახმად;
• საქართველოს იუსტიციის სამინისტრო მიერ გაუქმებული აქვს სააღსრულებო საქმიანობის ლიცენზია;
• თუ სასამართლოს კანონიერ ძალაში შესული გამამტყუნებელი განაჩენით ჩამოერთვა სააღსრულებო საქმიანობის უფლება

2. კერძო აღმასრულებელი არ შეიძლება იყოს არბიტრაჟის წევრი.

 

ლიცენზიის გასაცემად წარმოსადგენი დოკუმენტების ნუსხა:

 

1. ლიცენზიის მაძიებლის წერილობითი განცხადება;
2. ლიცენზიის მაძიებელი ფიზიკური პირის პირადობის დამადასტურებელი, კანონმდებლობით დადგენილი დოკუმენტის ასლი (პირადობის მოწმობა, პასპორტი);
3. სალიცენზიო მოსაკრებლის გადახდის დამადასტურებელი დოკუმენტი;
4. სამუშაო ადგილის მისამართი და ცნობა იმ უძრავი ქონების საკუთრების თაობაზე, სადაც უნდა განთავსდეს კერძო აღმასრულებლის სამუშაო ადგილი, ან ამ უძრავი ქონების მესაკუთრის თანხმობა სააღსრულებო საქმიანობის განხორციელებაზე;
5. უმაღლესი იურიდიული განათლების დამადასტურებელი დოკუმენტი;
6. აღმასრულებლის საკვალიფიკაციო გამოცდის ან მოსამართლის (საერთო ან სამოქალაქო და ადმინისტრაციული სამართლის სპეციალობით) საკვალიფიკაციო გამოცდის ჩაბარების დამადასტურებელი დოკუმენტი;
7. ლიცენზიის მაძიებლის ქმედუნარიანობის დამადასტურებელი დოკუმენტი (ცნობა ნარკოლოგიური და ფსიქოლოგიური ჯანმრთელობის შესახებ).
8. ცნობა ნასამართლობის არარსებობის შესახებ;
9. ცნობა, რომ  იგი არ ირიცხება საქართველოს ადვოკატთა ასოციაციის წევრად, ან აღნიშნული ასოციაციის წევრობა შეუჩერდა პირადი განცხადების საფუძველზე.

 

სააღსრულებო საქმიანობის ლიცენზიის გაცემის ვადა:

თუ ლიცენზიის მაძიებელი დააკმაყოფილებს ზემოთ ჩამოთვლილ და „ლიცენზიებისა და ნებართვების შესახებ" საქართველოს კანონით დადგენილ პირობებს, იუსტიციის სამინისტრო განცხადებით მიმართვიდან 5 სამუშაო დღის ვადაში გასცემს სააღსრულებო საქმიანობის ლიცენზიას.

 

        კერძო  აღმასრულებელთა რეესტრში კერძო აღმასრულებლის რეგისტრაციისათვის წარსადგენი დოკუმენტების ნუსხა:

საქართველოს იუსტიციის სამინისტროს მიერ სააღსრულებო საქმიანობის ლიცენზიის გაცემიდან 5 დღის ვადაში კერძო აღმასრულებელი საქართველოს იუსტიციის სამინისტროს წარუდგენს:

1. სამსახურებრივ ბეჭედს (მასზე სავალდებულო წესით აღინიშნება კერძო აღმასრულებლის სახელი და გვარი, სამუშაო ადგილის მისამართი, კერძო აღმასრულებლის სააღსრულებო საქმიანობის ლიცენზიის ნომერი) და საქართველოს კანონმდებლობით დადგენილი წესით დადასტურებულ ხელმოწერის ნიმუშს;
2. ბანკში გახსნილი სადეპოზიტო ანგარიშის დამადასტურებელ დოკუმენტს და ანგარიშის ნომერს;
3. სამოქალაქო პასუხისმგებლობის სავალდებულო დაზღვევის დამადასტურებელ დოკუმენტს, რომლის ოდენობასა და პირობებს ადგენს საქართველოს იუსტიციის მინისტრი.

ზემოთ აღნიშნული ყველა დოკუმენტის წარდგენის შემდეგ საქართველოს იუსტიციის სამინისტრო დაუყოვნებლივ, მაგრამ არა უგვიანეს 2 სამუშაო დღისა, ახორციელებს კერძო აღმასრულებლის რეგისტრაციას კერძო აღმასრულებელთა რეესტრში, რის შემდეგაც კერძო აღმასრულებელი უფლებამოსილია განახორციელოს სააღსრულებო საქმიანობა. კერძო აღმასრულებელთა  რეესტრის ფორმასა და წარმოების წესს განსაზღვრავს საქართველოს იუსტიციის მინისტრი.