საქართველოს იუსტიციის მინისტრი პაატა სალია ქართულ-სომხური სამართლებრივი ფორუმის ფარგლებში სომხეთის რესპუბლიკის იუსტიციის მინისტრ სრბუი გალიანს შეხვდა. ორმხრივ შეხვედრაზე მინისტრებმა საქართველოსა და სომხეთს შორის სტრატეგიული პარტნიორობისა და სამართლებრივი თანამშრომლობის საკითხები განიხილეს.

აღინიშნა, რომ საქართველოს გამოცდილება ევროინტეგრაციისა და ვიზალიბერალიზაციის მიმართულებით მნიშვნელოვან პრაქტიკულ მაგალითს წარმოადგენს პარტნიორი ქვეყნისთვის. შეხვედრაზე ასევე განიხილეს საჯარო სერვისების განვითარებისა და იუსტიციის სისტემის მოდერნიზაციის პროცესში ციფრული ინოვაციების დანერგვის საკითხები.

შეხვედრის დასასრულს მხარეებმა თანამშრომლობის კიდევ უფრო გაღრმავების მზადყოფნა გამოთქვეს.

ღონისძიება საქართველოს იუსტიციის მინისტრმა პაატა სალიამ და სომხეთის რესპუბლიკის იუსტიციის მინისტრმა სრბუი გალიანმა გახსნეს.

მინისტრებმა ხაზგასმით აღნიშნეს იუსტიციის სფეროში საქართველოსა და სომხეთს შორის არსებული მჭიდრო თანამშრომლობის მნიშვნელობა.

„ჩვენს ქვეყნებსა და სამინისტროებს შორის სექტორული თანამშრომლობის ეს ფორმატი არის მრავალწლიანი, მეგობრული, საქმიანი და შედეგზე ორიენტირებული ურთიერთობის ნათელი მაგალითი. მჯერა, რომ ფორუმის ფარგლებში გაზიარებული გამოცდილება დაეხმარება ჩვენი ქვეყნების სამართლებრივი სისტემების მეტად დაახლოებას და ღონისძიებაზე გამართული მრავალფეროვანი დისკუსიები გზას გაუხსნის მეტად ინტენსიურ თანამშრომლობას“, – განაცხადა პაატა სალიამ.

სომხეთის იუსტიციის მინისტრმა მადლობა გადაუხადა საქართველოს იუსტიციის მინისტრს მასპინძლობისთვის და ხაზგასმით აღნიშნა, რომ ფორუმი მნიშვნელოვან როლს ასრულებს ორ ქვეყანას შორის პარტნიორობის გაღრმავებაში. მისი თქმით, საქართველოს გამოცდილება ევროინტეგრაციისა და ვიზალიბერალიზაციის პროცესში სომხეთს დაეხმარება რეფორმების წარმატებით განხორციელებაში.

ფორუმი ქვეყნებს შორის თანამშრომლობის წარმატებულ პლატფორმას წარმოადგენს. ორი ქვეყნის სამართლებრივი ინსტიტუტების წარმომადგენლები თემატურ სესიებზე განიხილავენ ისეთ აქტუალურ საკითხებს, როგორიცაა: ადამიანის უფლებების დაცვა, ციფრული სერვისების განვითარება, ხელოვნური ინტელექტის როლი სამართლებრივ სფეროში, მედიაცია და სხვა.

ორდღიანი ვიზიტის განმავლობაში სომხეთის იუსტიციის სამინისტროს დელეგაცია გაეცნობა საქართველოს იუსტიციის სამინისტროს დაქვემდებარებაში მყოფ უწყებებში დანერგილ პრაქტიკასა და მუშაობის გამოცდილებას, მათ შორის, დაგეგმილია ვიზიტები იუსტიციის სახლსა და ქალთა პენიტენციურ დაწესებულებაში.

საქართველოს იუსტიციის მინისტრმა პაატა სალიამ, აზერბაიჯანის კონსტიტუციის მიღების 30 წლის იუბილესადმი მიძღვნილი ღონისძიების ფარგლებში, აზერბაიჯანის იუსტიციის მინისტრთან, ფარიდ აჰმედოვთან ორმხრივი შეხვედრა გამართა.

ბაქოში გამართულ შეხვედრაზე მხარეებმა განიხილეს ორ ქვეყანას შორის იუსტიციის სფეროში არსებული თანამშრომლობის საკითხები. ყურადღება გამახვილდა სამართლებრივი ურთიერთდახმარების, ადამიანის უფლებათა დაცვისა და მოქალაქეზე ორიენტირებული საჯარო სერვისების განვითარების მიმართულებებზე.

პაატა სალიამ აზერბაიჯანელ კოლეგას საქართველოს იუსტიციის სამინისტროს პრიორიტეტები გააცნო და მოიწვია გაეროს საჯარო სერვისების ფორუმზე, რომელსაც 2026 წლის ივნისში, საქართველო მასპინძლობს.

შეხვედრის დასასრულს მხარეებმა ნაყოფიერი თანამშრომლობის გაგრძელების თაობაზე მზაობა გამოთქვეს.

ბაქოში ოფიციალური ვიზიტის ფარგლებში, პაატა სალიამ, კონფერენციის მონაწილეებთან ერთად, აზერბაიჯანის ეროვნული ლიდერის, ჰეიდარ ალიევის ხსოვნას პატივი მიაგო.

ადამიანის უფლებათა ევროპულმა სასამართლომ გამოაქვეყნა გადაწყვეტილება საქმეზე „ზაქაიძე საქართველოს წინააღმდეგ“, რომლითაც დაადგინა, რომ მომჩივნის მიმართ განხორციელებული ძალადობის ფაქტზე საქართველოს ხელისუფლებამ ჩაატარა ეფექტიანი გამოძიება, ხოლო შემდგომი სასამართლო პროცესი წარიმართა ჯეროვნად და სრულად შეესაბამებოდა ევროპული კონვენციის სტანდარტებს.

საქმის ფაქტობრივი გარემოებების თანახმად, 2021 წლის 9 თებერვალს მომჩივანი მისმა თანასოფლელებმა სცემეს, რის შედეგადაც მან მიიღო მრავლობითი დაზიანება, მათ შორის – ქვედა ყბის მოტეხილობა და ტვინის შერყევა. თავდასხმაში მონაწილე ყველა პირი ეროვნულმა სასამართლოებმა დამნაშავედ ცნეს და მიუსაჯეს თავისუფლების აღკვეთა, რომელიც პირობით მსჯავრად ჩაეთვალათ.

ევროპული კონვენციის საფუძველზე, მომჩივანი ამტკიცებდა, რომ ხელისუფლების მიერ მის მიმართ განხორციელებული ძალადობის ფაქტზე ჩატარებული გამოძიება არასათანადო იყო, რომლის შედეგადაც თავდამსხმელებს წარედგინათ ჩადენილ ქმედებებთან შეუსაბამოდ მსუბუქი სასჯელი. გარდა ამისა, იგი მიუთითებდა, რომ მას არ მიეცა გამოძიებისა და სასამართლო წარმოების ეტაპზე პროცესში მონაწილეობის ეფექტიანი შესაძლებლობა.

სტრასბურგის სასამართლომ გაიზიარა საქართველოს მთავრობის მიერ წარდგენილი სამართლებრივი პოზიცია შესაბამის მტკიცებულებებთან ერთად და დაადგინა, რომ არ დასტურდება მომჩივნის ბრალდებები გამოძიების არაეფექტიანობის შესახებ.

ევროპულმა სასამართლომ მიუთითა, რომ საგამოძიებო ორგანოებმა დაუყოვნებლივ დაიწყეს გამოძიება და დროულად განახორციელეს მნიშვნელოვანი საგამოძიებო მოქმედებები. საქმის განხილვა, მათ შორის სააპელაციო და საკასაციო ეტაპებზე, წელიწად-ნახევარზე ნაკლებ დროში დასრულდა. შესაბამისად, სტრასბურგის სასამართლოს შეფასებით, პროკურატურა და სასამართლო ხელისუფლება სათანადო გულმოდგინებით მოქმედებდნენ ბრალდებულთა პასუხისმგებლობის დასადგენად.

საგულისხმოა, რომ მომჩივანს მიენიჭა დაზარალებულის სტატუსი, სათანადოდ განემარტა უფლებები და მიეცა შესაძლებლობა, წარედგინა მომხდარი შემთხვევის შესახებ საკუთარი ვერსია როგორც გამოძიების, ისე შემდგომში - თბილისის სააპელაციო სასამართლოს წინაშე. სააპელაციო სასამართლომ მომჩივანი გამოიძახა ზეპირ სხდომაზეც, რომელიც მისი თანდასწრებით ჩატარდა.

რაც შეეხება სასჯელის პროპორციულობის საკითხს, სტრასბურგის სასამართლომ მიუთითა, რომ ჩადენილი ქმედების სიმძიმესა და გამოყენებულ სანქციას შორის შეუსაბამობა არ დგინდებოდა.

ზემოაღნიშნული გარემოებების საფუძველზე, სტრასბურგის სასამართლომ დაასკვნა, რომ საქართველოს ხელისუფლებამ უზრუნველყო ევროპულ სტანდარტებთან შესაბამისი გამოძიება და სასამართლო პროცესი, რომლის გათვალისწინებითაც არ დაადგინა ევროპული კონვენციის დარღვევა.

საქართველოს იუსტიციის მინისტრის მოადგილე გიორგი დგებუაძე და აღსრულების ეროვნული ბიუროს თავმჯდომარე ლაშა მოძღვრიშვილი აღმასრულებელთა საერთაშორისო კავშირის (UIHJ) პირველ ვიცე-პრეზიდენტს და გენერალურ მდივანს შეხვდნენ.

შეხვედრაზე საუბარი შეეხო აღმასრულებელთა საერთაშორისო კონფერენციისა და აღმასრულებელთა საერთაშორისო კავშირის მუდმივმოქმედი საბჭოს საგაზაფხულო სესიას, რომელსაც 2026 წელს საქართველო უმასპინძლებს.

მხარეებმა ისაუბრეს აღსრულების ეროვნული ბიუროსა და საერთაშორისო კავშირის საქმიანობის პრიორიტეტებზე, სამართლებრივი და დიგიტალიზაციის მიმართულებით მიმდინარე რეფორმებსა და თანამშრომლობის გაღრმავების მნიშვნელობაზე.

აღმასრულებელთა საერთაშორისო კავშირის მუდმივმოქმედი საბჭოს სხდომა და აღმასრულებელთა საერთაშორისო კონფერენცია 2026 წლის 7-9 მაისს თბილისში გაიმართება. მასშტაბურ ღონისძიებაში მონაწილეობას 50-ზე მეტი ქვეყნის 100-ზე მეტი დელეგატი მიიღებს.

2025 წლის 20 ოქტომბერს გამოქვეყნდა ადამიანით ვაჭრობის (ტრეფიკინგის) საკითხებში ევროპის საბჭოს ექსპერტთა ჯგუფის (GRETA) შეფასების რიგით მე-4 რაუნდის ანგარიში. „ადამიანით ვაჭრობის წინააღმდეგ ბრძოლის შესახებ“ ევროპის საბჭოს კონვენციის შესრულების შეფასების მე-4 რაუნდი დაეთმო ადამიანით ვაჭრობისათვის მოწყვლადი ჯგუფების გამოვლენასა და მათ დაცვას.

ანგარიშის თანახმად, ბოლო წლების განმავლობაში საქართველოს მთავრობამ პოზიტიური ნაბიჯები გადადგა ტრეფიკინგის წინააღმდეგ საკანონმდებლო, ინსტიტუციური და პოლიტიკური მექანიზმების შემდგომი განვითარებისთვის. განსაკუთრებული მოწონება დაიმსახურა ტრეფიკინგის წინააღმდეგ სახელმწიფოს თანმიმდევრულმა პოლიტიკამ, რომელსაც ახორციელებს იუსტიციის სამინისტროს ხელმძღვანელობით მოქმედი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭო. ანგარიშში, ასევე, პოზიტიურად შეფასდა დანაშაულის მსხვერპლთა/დაზარალებულთა კომპენსაციის პროცედურის გამარტივება, დანაშაულის გამოვლენაზე პასუხისმგებელი სახელწმიფო უწყებების უფლებამოსილების ზრდა და სფეროში დასაქმებული პროფესიონალების კვალიფიკაციის ამაღლებისკენ მიმართული ღონისძიებები.

შეფასების მე-4 რაუნდის ფარგლებში 2024 წლის 23-27 სექტემბერს GRETA-ს დელეგაცია იმყოფებოდა ვიზიტით საქართველოში.

საქართველო მნიშვნელოვან ყურადღებას უთმობს ადამიანით ვაჭრობის (ტრეფიკინგის) წინააღმდეგ ეფექტიან ბრძოლას, რომელიც, ასევე, საქართველოს ევროკავშირში ინტეგრაციის პროცესის მნიშვნელოვანი ნაწილია და ქმნის ტრანსნაციონალურ ორგანიზებულ დანაშაულთან ბრძოლის კუთხით ქვეყანასა და რეგიონში უსაფრთხო და საიმედო გარემოს.

GRETA-ს შეფასების მე-4 რაუნდის ანგარიშში აღნიშნული პროგრესი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭოს ეფექტიანი მუშაობის შედეგია. საბჭოს საქართველოს იუსტიციის მინისტრი ხელმძღვანელობს და მის შემადგენლობაში შედის ყველა შესაბამისი სახელმწიფო უწყების, სახალხო დამცველის აპარატისა და პარტნიორი ორგანიზაციების წარმომადგენლები.

GRETA-ს შეფასების მე-4 რაუნდის ანგარიში იმეორებს ადამიანით ვაჭრობის (ტრეფიკინგის) თაობაზე აშშ-ის სახელმწიფო დეპარტამენტის ყოველწლიური ანგარიშის სულისკვეთებას, რომლის თანახმად ადამიანით ვაჭრობის (ტრეფიკინგის) დანაშაულის წინააღმდეგ განხორციელებული ღონისძიებებით საქართველო უკვე მე-10 წელია უმაღლეს საფეხურზეა და ინარჩუნებს ადგილს „პირველ კალათაში“.

საქართველოს იუსტიციის მინისტრი პაატა სალია ჰააგის სისხლის სამართლის საერთაშორისო სასამართლოს (ICC) პროკურორის მოადგილეს, ნაჟატ შამემ ხანს შეხვდა.

მხარეებმა განიხილეს სისხლის სამართლის საერთაშორისო სასამართლოს მიერ საქართველოს საქმის, კერძოდ, 2008 წლის რუსეთ-საქართველოს ომის გამოძიების ფარგლებში მხარეთა თანამშრომლობისა და სასამართლო გადაწყვეტილების აღსრულების საკითხები.

პროკურორის მოადგილემ და იუსტიციის მინისტრმა ისაუბრეს სასამართლოს მიერ გაცემულ დაპატიმრების ორდერებზე და კიდევ ერთხელ აღნიშნეს, რომ 2008 წლის აგვისტოში ჩადენილი სავარაუდო დანაშაულების გამოძიებისთვის განსაკუთრებით მნიშვნელოვანია მსხვერპლთა ინტერესების დაცვა.

შეხვედრაზე ხაზი გაესვა საქართველოს საქმეზე სასამართლოსთან ეფექტიანი და გამჭვირვალე თანამშრომლობის აუცილებლობას, რომის სტატუტით ნაკისრი ვალდებულებების შესაბამისად.

საუბარი ასევე შეეხო ადამიანის უფლებათა ევროპული სასამართლოს (ECHR) ბოლოდროინდელ გადაწყვეტილებას საქმეზე „საქართველო რუსეთის წინააღმდეგ (IV)“, რომლითაც 29,000-ზე მეტი დაზარალებულისთვის 253 მილიონ ევროზე მეტი კომპენსაცია დადგინდა.

შეხვედრას ესწრებოდნენ იუსტიციის მინისტრის მოადგილეები - მერაბ ტურავა, ბექა ძამაშვილი, გიორგი დგებუაძე და ლანა მორგოშია, ასევე, ICC-ის დელეგაციის წევრები.

განგრძობადი ოკუპაციის საქმეზე რუსეთს საქართველოს სასარგებლოდ 253 მილიონ ევროზე მეტი კომპენსაციის გადახდის ვალდებულება დაეკისრა.

2025 წლის 14 ოქტომბერს სტრასბურგის სასამართლომ საქართველო რუსეთის წინააღმდეგ (IV) ე.წ. განგრძობადი ოკუპაციის საქმეზე კომპენსაციის შესახებ გადაწყვეტილება გამოაცხადა. სასამართლომ საქართველოს მთავრობის მიერ წარდგენილი კომპლექსური სამართლებრივი პოზიცია და მტკიცებულებები გაიზიარა და შედეგად, რუსეთის ფედერაციას საქართველოს დაზარალებული 29 000-ზე მეტი მოქალაქის სასარგებლოდ 253 018 000 ევროს გადახდის ვალდებულება დააკისრა.

როგორც საზოგადოებისთვის ცნობილია, ამ საქმეზე, 2024 წლის 9 აპრილს მიღებულ იქნა გადაწყვეტილება, რომლითაც რუსეთს დაეკისრა სრული პასუხისმგებლობა ოკუპირებულ ტერიტორიებსა და საოკუპაციო ხაზის გასწვრივ საქართველოს მოსახლეობის მასობრივი შევიწროების, დაკავების, თავდასხმების, მკვლელობებისა და ამგვარი ფაქტებისადმი ოფიციალური შემწყნარებლობის პრაქტიკისათვის, რომელიც საქართველოს ტერიტორიების ოკუპაციისა და ე.წ. ბორდერიზაციის ფონზე მიმდინარეობს.

დღევანდელი გადაწყვეტილება რუსეთის წინააღმდეგ მოგებული ისტორიული საქმეების ლოგიკური გაგრძელებაა. „საქართველო რუსეთის წინააღმდეგ (I)“ ე.წ. დეპორტირებულების საქმეში, რომელიც რუსეთიდან ქართველების მასობრივ გაძევებას უკავშირდებოდა, სტრასბურგის სასამართლომ ეთნიკური ქართველების მასობრივი დეპორტაციისა და მათ მიმართ ადამიანის უფლებების უხეში დარღვევების გამო რუსეთის ფედერაციას 10 მილიონამდე ევროს გადახდის ვალდებულება დააკისრა. ასევე, საზოგადოებისათვის ცნობილია გადაწყვეტილება „საქართველო რუსეთის წინააღმდეგ (II)“ ე.წ. 2008 წლის აგვისტოს ომის საქმეზე, რომლითაც აგვისტოს ომისა და შემდგომ პერიოდში საქართველოს მოქალაქეების მიმართ ჩადენილი მასობრივი დარღვევებისთვის რუსეთის ფედერაციას 130 მილიონამდე ევროს გადახდის ვალდებულება დაეკისრა.

მიუხედავად იმისა, რომ რუსეთის ფედერაცია აღარ არის ევროპის საბჭოს წევრი, მას რჩება გადაწყვეტილებების აღსრულების სამართლებრივი ვალდებულება და ყველა გადაცილებულ დღეზე შესაბამისი ჯარიმა ეკისრება.

აღნიშნული გადაწყვეტილებების აღსრულებაზე მუშაობა ევროპის საბჭოს მინისტრთა კომიტეტის ფარგლებში საქართველოს აქტიური ჩართულობით მიმდინარეობს.

საქართველოს იუსტიციის სამინისტრო მადლობას უხდის მტკიცებულებების შეგროვებაში ჩართულ სახელმწიფო უწყებებს და სრულიად საქართველოს ულოცავს ამ ისტორიულ გამარჯვებას.

იუსტიციის მინისტრის მოადგილედ ლანა მორგოშია დაინიშნა.

ლანა მორგოშია პროფესიით იურისტია; აქვს საქართველოს იუსტიციის სამინისტროში მუშაობის 12-წლიანი გამოცდილება.

მინისტრის მოადგილედ დანიშვნამდე, იკავებდა იუსტიციის სამინისტროს ადმინისტრაციის უფროსის თანამდებობას.