მსოფლიო ბანკი იუსტიციის სამინისტროს საჯარო რეესტრის ეროვნულ სააგენტოსთან თანამშრომლობას მაღალ შეფასებას აძლევს.

იუსტიციის მინისტრის მოადგილე ლანა მორგოშიამ მსოფლიო ბანკის წარმომადგენლებთან სამუშაო შეხვედრა გამართა. მხარეებმა განიხილეს მსოფლიო ბანკის დაფინანსებული „მდგრადი სოფლის მეურნეობის, ირიგაციისა და მიწის“ პროექტის (GRAIL) “მიწის ადმინისტრირების მომსახურების გაუმჯობესების და ციფრული მმართველობის ინფრასტრუქტურის შექმნის'' კომპონენტის მიმდინარეობა და 2026 წელს დაგეგმილი აქტივობები.

იუსტიციის მინისტრის მოადგილემ ფინანსური ინსტიტუტის წარმომადგენლებს დეტალური ინფორმაცია მიაწოდა იმ მასშტაბური სამუშაოების შესახებ, რომელიც ქართულმა მხარემ აღნიშნული პროგრამის ფარგლებში განახორციელა.

საჯარო რეესტრის სააგენტოსთან თანამშრომლობას მსოფლიო ბანკის წარმომადგენლებმა მაღალი შეფასება მისცეს და აღნიშნეს, რომ ეს უწყება სამაგალითოა პროექტის მართვითა და ინოვაციური განვითარებით.

შეხვედრას ასევე ესწრებოდნენ საჯარო რეესტრის სააგენტოს თავმჯდომარე დავით დევიძე და „მდგრადი სოფლის მეურნეობის, ირიგაციისა და მიწის“ პროექტის მენეჯერი ელენე გრიგოლია.

მსოფლიო ბანკის დელეგაცია საქართველოში პროექტის - „მდგრადი სოფლის მეურნეობის, ირიგაციისა და მიწის“ პროექტის მიმდინარეობის შეფასების მიზნით იმყოფება. ვიზიტის ფარგლებში ფინანსური ინსტიტუტის წარმომადგენლები საჯარო რეესტრის ეროვნულ სააგენტოში დანერგილ სხვა ისეთ ინოვაციებსაც გაეცნენ, როგორიცაა: ეროვნული სივრცითი მონაცემების ინფრასტრუქტურის პროექტი; მულტიფუნქციური გეოპორტალი NSDI.GOV.GE; გონიერი კონტრაქტი და სხვ.

იუსტიციის მინისტრმა პაატა სალიამ, მოადგილე ბექა ძამაშვილთან ერთად, საფრანგეთის ახალდანიშნულ ელჩ ოლივიე კურტოსთან, ორ ქვეყანას შორის იუსტიციის სფეროში თანამშრომლობის პერსპექტივები განიხილა.

გაცნობითი ხასიათის შეხვედრაზე მინისტრმა ელჩს იუსტიციის სამინისტროს საქმიანობის სფეროები და პრიორიტეტული მიმართულებები გააცნო; საუბარი შეეხო საჯარო სერვისების, ციფრული მმართველობის, პენიტენციური და პრობაციის სისტემების განვითარებას.

იუსტიციის მინისტრმა არსებული ნაყოფიერი თანამშრომლობის მომავალში კიდევ მეტად გაღრმავების მზაობა გამოთქვა და ელჩი გაერო-ს საჯარო სერვისების მსოფლიო ფორუმზე მოიწვია. ფორუმს თბილისი 2026 წლის ივნისში უმასპინძლებს.

ოლივიე კურტო საქართველოში საფრანგეთის ელჩის თანამდებობას 2025 წლის სექტემბრიდან იკავებს.

მე-6 ქართულ-სომხური სამართლებრივი ფორუმი დასრულდა. თბილისში ორი დღის განმავლობაში მიმდინარე ღონისძიება საქართველოსა და სომხეთის იუსტიციის მინისტრებმა შეაჯამეს.

ფორუმის დასასრულს მხარრები შეთანხმდნენ სამომავლო თანამშრომლობის გეგმასა და მიმართულებებზე, რომელიც კიდევ უფრო გააღრმავებს უწყებათაშორის სექტორულ და სტრატეგიულ თანამშრომლობას ადამიანის უფლებების დაცვისა და სამართლის უზენაესობის მიმართულებით.

ქართულ-სომხური სამართლებრივი ფორუმი წარმოადგენს პლატფორმას პარტნიორი სახელმწიფოების იუსტიციის სამინისტროებს შორის გამოცდილების გაზიარებისა და თანამშრომლობის გაღრმავებისთვის. ყოველწლიურად ღონისძიებას თბილისი და ერევანი მონაცვლეობით მასპინძლობს. ორი ქვეყნის იუსტიციის სამინისტროების წარმომადგენლები განიხილავენ აქტუალურ საკითხებს, არსებულ გამოწვევებს და მათი გადაჭრის გზებს. წლევანდელი ფორუმის თემატური სესიები დაეთმო ადამიანის უფლებების დაცვის, ციფრული სერვისების განვითარების, სამართლებრივ და იურიდიული მომსახურების სფეროში ხელოვნური ინტელექტის როლის, მედიაციისა და სხვა აქტუალურ საკითხებს.

ფორუმის ფარგლებში, სომხეთის იუსტიციის მინისტრს უმასპინძლა საქართველოს პრემიერ-მინისტრმა ირაკლი კობახიძემ; გაიმართა ორმხრივი შეხვედრა პაატა სალიასა და სრბუი გალიანს შორის.

სომხეთის დელეგაციამ მოინახულა, ასევე, თბილისის იუსტიციის სახლი და ქალთა №5 პენიტენციური დაწესებულება.

სომხეთის რესპუბლიკის იუსტიციის მინისტრი სრბუი გალიანი, დელეგაციასთან ერთად, თბილისის იუსტიციის სახლში სახელმწიფო სერვისების მიწოდების ქართულ მოდელს გაეცნო.

სომხეთის რესპუბლიკის დელეგაციის წარმომადგენლებს იუსტიციის სახლში იუსტიციის მინისტრის მოადგილე ლანა მორგოშიამ და იუსტიციის სახლის თავმჯდომარე ვახტანგ ჟვანიამ უმასპინძლეს. სტუმრები ადგილზე გაეცნენ იუსტიციის სახლის კონცეფციას და ინფორმაციას იმ 500-მდე სერვისის შესახებ, რომელთაც იუსტიციის სახლი ყოველდღიურად გასცემს.

დელეგაციის წევრები, ასევე, გაეცნენ ინფორმაციას სახელმწიფო სერვისების განვითარების სააგენტოს; საჯარო რეესტრის ეროვნული სააგენტოს; დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს და საქართველოს საკანონმდებლო მაცნეს საქმიანობასა და მიმდინარე რეფორმებს.

სომხეთის რესპუბლიკის იუსტიციის სამინისტროს დელეგაცია მინისტრ სრბუი გალიანის ხელმძღვანელობით თბილისში მე-6 ქართულ-სომხური სამართლებრივი ფორუმის ფარგლებში იმყოფება.

საქართველოს იუსტიციის მინისტრი პაატა სალია ქართულ-სომხური სამართლებრივი ფორუმის ფარგლებში სომხეთის რესპუბლიკის იუსტიციის მინისტრ სრბუი გალიანს შეხვდა. ორმხრივ შეხვედრაზე მინისტრებმა საქართველოსა და სომხეთს შორის სტრატეგიული პარტნიორობისა და სამართლებრივი თანამშრომლობის საკითხები განიხილეს.

აღინიშნა, რომ საქართველოს გამოცდილება ევროინტეგრაციისა და ვიზალიბერალიზაციის მიმართულებით მნიშვნელოვან პრაქტიკულ მაგალითს წარმოადგენს პარტნიორი ქვეყნისთვის. შეხვედრაზე ასევე განიხილეს საჯარო სერვისების განვითარებისა და იუსტიციის სისტემის მოდერნიზაციის პროცესში ციფრული ინოვაციების დანერგვის საკითხები.

შეხვედრის დასასრულს მხარეებმა თანამშრომლობის კიდევ უფრო გაღრმავების მზადყოფნა გამოთქვეს.

ღონისძიება საქართველოს იუსტიციის მინისტრმა პაატა სალიამ და სომხეთის რესპუბლიკის იუსტიციის მინისტრმა სრბუი გალიანმა გახსნეს.

მინისტრებმა ხაზგასმით აღნიშნეს იუსტიციის სფეროში საქართველოსა და სომხეთს შორის არსებული მჭიდრო თანამშრომლობის მნიშვნელობა.

„ჩვენს ქვეყნებსა და სამინისტროებს შორის სექტორული თანამშრომლობის ეს ფორმატი არის მრავალწლიანი, მეგობრული, საქმიანი და შედეგზე ორიენტირებული ურთიერთობის ნათელი მაგალითი. მჯერა, რომ ფორუმის ფარგლებში გაზიარებული გამოცდილება დაეხმარება ჩვენი ქვეყნების სამართლებრივი სისტემების მეტად დაახლოებას და ღონისძიებაზე გამართული მრავალფეროვანი დისკუსიები გზას გაუხსნის მეტად ინტენსიურ თანამშრომლობას“, – განაცხადა პაატა სალიამ.

სომხეთის იუსტიციის მინისტრმა მადლობა გადაუხადა საქართველოს იუსტიციის მინისტრს მასპინძლობისთვის და ხაზგასმით აღნიშნა, რომ ფორუმი მნიშვნელოვან როლს ასრულებს ორ ქვეყანას შორის პარტნიორობის გაღრმავებაში. მისი თქმით, საქართველოს გამოცდილება ევროინტეგრაციისა და ვიზალიბერალიზაციის პროცესში სომხეთს დაეხმარება რეფორმების წარმატებით განხორციელებაში.

ფორუმი ქვეყნებს შორის თანამშრომლობის წარმატებულ პლატფორმას წარმოადგენს. ორი ქვეყნის სამართლებრივი ინსტიტუტების წარმომადგენლები თემატურ სესიებზე განიხილავენ ისეთ აქტუალურ საკითხებს, როგორიცაა: ადამიანის უფლებების დაცვა, ციფრული სერვისების განვითარება, ხელოვნური ინტელექტის როლი სამართლებრივ სფეროში, მედიაცია და სხვა.

ორდღიანი ვიზიტის განმავლობაში სომხეთის იუსტიციის სამინისტროს დელეგაცია გაეცნობა საქართველოს იუსტიციის სამინისტროს დაქვემდებარებაში მყოფ უწყებებში დანერგილ პრაქტიკასა და მუშაობის გამოცდილებას, მათ შორის, დაგეგმილია ვიზიტები იუსტიციის სახლსა და ქალთა პენიტენციურ დაწესებულებაში.

საქართველოს იუსტიციის მინისტრმა პაატა სალიამ, აზერბაიჯანის კონსტიტუციის მიღების 30 წლის იუბილესადმი მიძღვნილი ღონისძიების ფარგლებში, აზერბაიჯანის იუსტიციის მინისტრთან, ფარიდ აჰმედოვთან ორმხრივი შეხვედრა გამართა.

ბაქოში გამართულ შეხვედრაზე მხარეებმა განიხილეს ორ ქვეყანას შორის იუსტიციის სფეროში არსებული თანამშრომლობის საკითხები. ყურადღება გამახვილდა სამართლებრივი ურთიერთდახმარების, ადამიანის უფლებათა დაცვისა და მოქალაქეზე ორიენტირებული საჯარო სერვისების განვითარების მიმართულებებზე.

პაატა სალიამ აზერბაიჯანელ კოლეგას საქართველოს იუსტიციის სამინისტროს პრიორიტეტები გააცნო და მოიწვია გაეროს საჯარო სერვისების ფორუმზე, რომელსაც 2026 წლის ივნისში, საქართველო მასპინძლობს.

შეხვედრის დასასრულს მხარეებმა ნაყოფიერი თანამშრომლობის გაგრძელების თაობაზე მზაობა გამოთქვეს.

ბაქოში ოფიციალური ვიზიტის ფარგლებში, პაატა სალიამ, კონფერენციის მონაწილეებთან ერთად, აზერბაიჯანის ეროვნული ლიდერის, ჰეიდარ ალიევის ხსოვნას პატივი მიაგო.

ადამიანის უფლებათა ევროპულმა სასამართლომ გამოაქვეყნა გადაწყვეტილება საქმეზე „ზაქაიძე საქართველოს წინააღმდეგ“, რომლითაც დაადგინა, რომ მომჩივნის მიმართ განხორციელებული ძალადობის ფაქტზე საქართველოს ხელისუფლებამ ჩაატარა ეფექტიანი გამოძიება, ხოლო შემდგომი სასამართლო პროცესი წარიმართა ჯეროვნად და სრულად შეესაბამებოდა ევროპული კონვენციის სტანდარტებს.

საქმის ფაქტობრივი გარემოებების თანახმად, 2021 წლის 9 თებერვალს მომჩივანი მისმა თანასოფლელებმა სცემეს, რის შედეგადაც მან მიიღო მრავლობითი დაზიანება, მათ შორის – ქვედა ყბის მოტეხილობა და ტვინის შერყევა. თავდასხმაში მონაწილე ყველა პირი ეროვნულმა სასამართლოებმა დამნაშავედ ცნეს და მიუსაჯეს თავისუფლების აღკვეთა, რომელიც პირობით მსჯავრად ჩაეთვალათ.

ევროპული კონვენციის საფუძველზე, მომჩივანი ამტკიცებდა, რომ ხელისუფლების მიერ მის მიმართ განხორციელებული ძალადობის ფაქტზე ჩატარებული გამოძიება არასათანადო იყო, რომლის შედეგადაც თავდამსხმელებს წარედგინათ ჩადენილ ქმედებებთან შეუსაბამოდ მსუბუქი სასჯელი. გარდა ამისა, იგი მიუთითებდა, რომ მას არ მიეცა გამოძიებისა და სასამართლო წარმოების ეტაპზე პროცესში მონაწილეობის ეფექტიანი შესაძლებლობა.

სტრასბურგის სასამართლომ გაიზიარა საქართველოს მთავრობის მიერ წარდგენილი სამართლებრივი პოზიცია შესაბამის მტკიცებულებებთან ერთად და დაადგინა, რომ არ დასტურდება მომჩივნის ბრალდებები გამოძიების არაეფექტიანობის შესახებ.

ევროპულმა სასამართლომ მიუთითა, რომ საგამოძიებო ორგანოებმა დაუყოვნებლივ დაიწყეს გამოძიება და დროულად განახორციელეს მნიშვნელოვანი საგამოძიებო მოქმედებები. საქმის განხილვა, მათ შორის სააპელაციო და საკასაციო ეტაპებზე, წელიწად-ნახევარზე ნაკლებ დროში დასრულდა. შესაბამისად, სტრასბურგის სასამართლოს შეფასებით, პროკურატურა და სასამართლო ხელისუფლება სათანადო გულმოდგინებით მოქმედებდნენ ბრალდებულთა პასუხისმგებლობის დასადგენად.

საგულისხმოა, რომ მომჩივანს მიენიჭა დაზარალებულის სტატუსი, სათანადოდ განემარტა უფლებები და მიეცა შესაძლებლობა, წარედგინა მომხდარი შემთხვევის შესახებ საკუთარი ვერსია როგორც გამოძიების, ისე შემდგომში - თბილისის სააპელაციო სასამართლოს წინაშე. სააპელაციო სასამართლომ მომჩივანი გამოიძახა ზეპირ სხდომაზეც, რომელიც მისი თანდასწრებით ჩატარდა.

რაც შეეხება სასჯელის პროპორციულობის საკითხს, სტრასბურგის სასამართლომ მიუთითა, რომ ჩადენილი ქმედების სიმძიმესა და გამოყენებულ სანქციას შორის შეუსაბამობა არ დგინდებოდა.

ზემოაღნიშნული გარემოებების საფუძველზე, სტრასბურგის სასამართლომ დაასკვნა, რომ საქართველოს ხელისუფლებამ უზრუნველყო ევროპულ სტანდარტებთან შესაბამისი გამოძიება და სასამართლო პროცესი, რომლის გათვალისწინებითაც არ დაადგინა ევროპული კონვენციის დარღვევა.

საქართველოს იუსტიციის მინისტრის მოადგილე გიორგი დგებუაძე და აღსრულების ეროვნული ბიუროს თავმჯდომარე ლაშა მოძღვრიშვილი აღმასრულებელთა საერთაშორისო კავშირის (UIHJ) პირველ ვიცე-პრეზიდენტს და გენერალურ მდივანს შეხვდნენ.

შეხვედრაზე საუბარი შეეხო აღმასრულებელთა საერთაშორისო კონფერენციისა და აღმასრულებელთა საერთაშორისო კავშირის მუდმივმოქმედი საბჭოს საგაზაფხულო სესიას, რომელსაც 2026 წელს საქართველო უმასპინძლებს.

მხარეებმა ისაუბრეს აღსრულების ეროვნული ბიუროსა და საერთაშორისო კავშირის საქმიანობის პრიორიტეტებზე, სამართლებრივი და დიგიტალიზაციის მიმართულებით მიმდინარე რეფორმებსა და თანამშრომლობის გაღრმავების მნიშვნელობაზე.

აღმასრულებელთა საერთაშორისო კავშირის მუდმივმოქმედი საბჭოს სხდომა და აღმასრულებელთა საერთაშორისო კონფერენცია 2026 წლის 7-9 მაისს თბილისში გაიმართება. მასშტაბურ ღონისძიებაში მონაწილეობას 50-ზე მეტი ქვეყნის 100-ზე მეტი დელეგატი მიიღებს.