საქართველოს იუსტიციის მინისტრი პაატა სალია სტრასბურგში ევროპის საბჭოს იუსტიციის მინისტრების კონფერენციაში მონაწილეობს.

მინისტრმა თავის გამოსვლაში ყურადღება გაამახვილა მიგრაციის პოლიტიკის ფორმირებისა და მართვის პროცესში, ერთი მხრივ, ადამიანის უფლებების და, მეორე მხრივ, სახელმწიფო სუვერენიტეტისა და ეროვნული ინტერესების დაცვის აუცილებლობაზე; მიგრაციის საკითხებზე სტრასბურგის სასამართლოს მიერ დადგენილი სტანდარტების მნიშვნელობაზე.

კონფერენციის ფარგლებში პაატა სალიამ კოლეგებს მიგრაციის მართვის მიმართულებით საქართველოს გამოცდილებაც გაუზიარა.

ევროპის საბჭოს გენერალური მდივნის ინიციატივით გამართულ კონფერენციაში მონაწილეობენ ევროპის საბჭოს წევრი სახელმწიფოების იუსტიციის მინისტრები და მაღალი რანგის სხვა წარმომადგენლები.

სტრასბურგში ვიზიტის ფარგლებში საქართველოს იუსტიციის მინისტრი შეხვედრებს გამართავს კოლეგა მინისტრებსა და ადამიანის უფლებათა ევროპული სასამართლოს თავმჯდომარესთან.

საქართველოს იუსტიციის მინისტრის მოადგილე გიორგი დგებუაძემ სისხლის სამართლის საერთაშორისო სასამართლოს (ICC) წესდების ხელშემკვრელ სახელმწიფოთა ასამბლეის (ASP) რიგით 24-ე სესიაში მიიღო მონაწილეობა, რომელიც ქალაქ ჰააგაში გაიმართა.

ასამბლეა პირველ დეკემბერს საზეიმო ღონისძიებით გახსნეს სისხლის სამართლის საერთაშორისო სასამართლოს პრეზიდენტმა ტომოკო აკნემ და ხელშემკვრელ სახელმწიფოთა ასამბლეის პრეზიდენტმა პეივი კაუკორანტამ.

იუსტიციის მინისტრის მოადგილე გენერალური დებატების სესიაზე მოხსენებით წარდგა. სიტყვით გამოსვლისას გიორგი დგებუაძემ დაადასტურა საქართველოს აქტიური თანამშრომლობა სისხლის სამართლის საერთაშორისო სასამართლოსთან და ხაზი გაუსვა მის განსაკუთრებულ როლს საერთაშორისო დანაშაულებთან ბრძოლის მიმართულებით.

გიორგი დგებუაძემ ყურადღება გაამახვილა სისხლის სამართლის საერთაშორისო სასამართლოს მიერ 2008 წლის რუსეთ-საქართველოს ომის ფარგლებში ჩადენილი დანაშაულების გამოძიებასა და მასთან დაკავშირებული სასამართლო გადაწყვეტილების აღსრულების საკითხებზე, აგრეთვე მსხვერპლთა ინტერესების დაცვის განსაკუთრებულ მნიშვნელობაზე.
იუსტიციის მინისტრის მოადგილემ, ასევე, აღნიშნა ადამიანის უფლებათა ევროპული სასამართლოს (ECHR) გადაწყვეტილება „საქართველო რუსეთის წინააღმდეგ (IV)“ ე.წ. განგრძობადი ოკუპაციის საქმეზე, სადაც სასამართლომ საქართველოს მთავრობის მიერ წარდგენილი პოზიცია გაიზიარა და შედეგად რუსეთის ფედერაციას საქართველოს დაზარალებული მოქალაქეების სასარგებლოდ კომპენსაციის გადახდის ვალდებულება დააკისრა.

გიორგი დგებუაძემ ასამბლეის ფარგლებში გამართა შეხვედრები რომის სტატუტის ხელშემკვრელ სახელმწიფოთა და სისხლის სამართლის საერთაშორისო სასამართლოს წარმომადგენლებთან, აგრეთვე მონაწილეობა მიიღო სამართლებრივ დისკუსიებში სასამართლოს საქმიანობის საკითხებზე.

ქართული დელეგაციიდან ასამბლეას ასევე ესწრებოდნენ ნიდერლანდების სამეფოში საქართველოს საქმეთა დროებითი რწმუნებული გიორგი საგანელიძე და ნიდერლანდების სამეფოში საქართველოს საელჩოს მრჩეველი კონსტანტინე კაპანაძე.

საქართველოს იუსტიციის სამინისტრომ ტაჯიკეთის რესპუბლიკის დელეგაციას უმასპინძლა. ქართულმა მხარემ სტუმრებს ადამიანით ვაჭრობის (ტრეფიკინგის) წინააღმდეგ ბრძოლის მიმართულებით გადადგმული ნაბიჯები და საქართველოს მიერ მიღწეული პროგრესი გააცნო.

საუბარი შეეხო ადამიანით ვაჭრობასთან (ტრეფიკინგთან) ბრძოლის ოთხსვეტოვან სახელმწიფო პოლიტიკას და ამ პოლიტიკის ეფექტიანი განხორციელების მიზნით იუსტიციის მინისტრის თავმჯდომარეობით მოქმედ უწყებათაშორისი საბჭოს როლს, აგრეთვე საქართველოს პროგრესს საერთაშორისო რეიტინგებსა და კვლევებში ადამიანით ვაჭრობის დანაშაულთან ბრძოლის მიმართულებით. კერძოდ:

• აშშ-ის სახელმწიფო დეპარტამენტის 2025 წლის ანგარიშით, ადამიანით ვაჭრობის (ტრეფიკინგის) წინააღმდეგ განხორციელებული ღონისძიებებით საქართველო კვლავ უმაღლეს საფეხურზეა და მსოფლიოს მასშტაბით 188 ქვეყანას შორის უკვე მე-10 წელია, ინარჩუნებს ადგილს ე.წ. პირველ კალათაში;

• საერთაშორისო ორგანიზაციამ „Walk Free Foundation“, რომელიც მონობის გლობალურ ინდექსს (Global Slavery Index) ზომავს, ბოლო, 2023 წლის ანგარიშით, საქართველოს მთავრობის მიერ ადამიანით ვაჭრობის (ტრეფიკინგის) წინააღმდეგ გადადგმული ნაბიჯებით საქართველოს 160 ქვეყანას შორის მე-14 ადგილი მიაკუთვნა;

• ევროპის საბჭოს ექსპერტთა ჯგუფის (GRETA) შეფასების 2025 წლის რიგით მე-4 რაუნდის ანგარიშით, ბოლო წლების განმავლობაში საქართველოს მთავრობამ პოზიტიური ნაბიჯები გადადგა ტრეფიკინგის წინააღმდეგ საკანონმდებლო, ინსტიტუციური და პოლიტიკური მექანიზმების შემდგომი განვითარებისთვის; გამარტივდა დანაშაულის მსხვერპლთა/დაზარალებულთა კომპენსაციის პროცედურა, გაიზარდა დანაშაულის გამოვლენაზე პასუხისმგებელი სახელმწიფო უწყებების უფლებამოსილება და გაფართოვდა ამ სფეროში დასაქმებული პროფესიონალების კვალიფიკაციის ამაღლებისკენ მიმართული ღონისძიებების არეალი.

საქართველოს იუსტიციის მინისტრმა პაატა სალიამ საქართველოში ყაზახეთის საგანგებო და სრულუფლებიან ელჩს, მურზალინ მალიკს, იუსტიციის სამინისტროს პრიორიტეტული მიმართულებები გააცნო.

გაცნობითი ხასიათის შეხვედრაზე საუბარი შეეხო ადამიანის უფლებათა დაცვის მექანიზმებს, სახელმწიფო სერვისების მიწოდების პოლიტიკას, პენიტენციური და პრობაციის სისტემების რეფორმას, ასევე ციფრული მმართველობისა და ინოვაციების ინტეგრაციას სამინისტროს საქმიანობაში.

საქართველოს იუსტიციის მინისტრმა ყაზახეთის დელეგაცია გაერო-ს საჯარო სერვისების ფორუმზე მოიწვია, რომელიც 2026 წლის 23-25 ივნისს, თბილისში გაიმართება.

ყაზახეთის ელჩთან შეხვედრას ესწრებოდნენ იუსტიციის მინისტრის მოადგილე ბექა ძამაშვილი და სპეციალური პენიტენციური სამსახურის ხელმძღვანელი გიორგი პატარიძე.

საქართველოს იუსტიციის სამინისტრომ მემორანდუმი გააფორმა, რომელიც ბლოკჩეინ ეკოსისტემის ერთ-ერთ წამყვან პლატფორმა Hedera-სთან თანამშრომლობით საჯარო სექტორში უახლესი ციფრული ტექნოლოგიების დანერგვას ითვალისწინებს.

საქართველოს იუსტიციის მინისტრ პაატა სალიასა და პლატფორმის წარმომადგენლებს შორის გამართულ შეხვედრაზე განიხილეს თანამშრომლობის პერსპექტივები, მათ შორის საჯარო რეესტრის ეროვნული სააგენტოს მონაცემების ბლოკჩეინ ქსელზე გადატანის შესაძლებლობები, რაც საკუთრების უფლების კიდევ უფრო მეტ დაცულობას, პროცესების გამჭვირვალობასა და სანდოობას უზრუნველყოფს.

კომპანიის წარმომადგენლებს ასევე მიეწოდათ ინფორმაცია საჯარო რეესტრის ეროვნული სასაგენტოს მიერ დანერგილი სერვისის, “გონიერი კონტრაქტის” და მისი განვითარების პერსპექტივების შესახებ. ამ კუთხით, ერთ-ერთ მნიშვნელოვან მიმართულებად განიხილება უძრავი ქონების ტოკენიზაცია, რაც რეალური აქტივების ელექტრონულ ერთეულებად გარდაქმნას გულისხმობს.

საჯარო სექტორში უახლესი ტექნოლოგიების ინტეგრაციის მიზნით, მომდევნო ეტაპზე გათვალისწინებულია სამუშაო ჯგუფების შექმნა იუსტიციის სამინისტროსა და საჯარო რეესტრის ეროვნული სააგენტოს ექსპერტების მონაწილეობით, რაც ტექნოლოგიურ კომპანიასთან თანამშრომლობას აქტიურ ფაზაში გადაიყვანს.

ადამიანის უფლებათა ევროპულმა სასამართლომ გაიზიარა იუსტიციის სამინისტროს მიერ შესაბამისი მტკიცებულებებით გამყარებული სამართლებრივი პოზიცია და საჩივრები საქმეზე „ფირცხალავა და Y საქართველოს წინააღმდეგ“, ასევე, „გოგინაშვილი საქართველოს წინააღმდეგ“ დაუშვებლად გამოაცხადა.

ხსენებული საჩივრების ფარგლებში მომჩივნები ამტკიცებდნენ, რომ უზენაეს სასამართლოში მათი საქმეების განმხილველი ერთ-ერთი მოსამართლე იყო მიკერძოებული. ამასთან, ფირცხალავას და Y-ის შეფასებით, მოსამართლე შ.თ. კანონის შესაბამისად არ იყო დანიშნული.

ადამიანის უფლებათა ევროპულმა სასამართლომ გაიზიარა იუსტიციის სამინისტროს არგუმენტი და სამივე საჩივარი მოსამართლის მიუკერძოებლობასთან დაკავშირებით დაუშვებლად გამოაცხადა. გადაწყვეტილებაში სტრასბურგის სასამართლომ მიმოიხილა საქართველოს ხელისუფლების მიერ 2012 წლიდან მართლმსაჯულების სისტემის გაჯანსაღების მიზნით გატარებული რეფორმები. კერძოდ, სხვებს შორის, ყურადღება გამახვილდა ისეთ საკითხებზე, როგორიცაა: მოსამართლეთა უვადო დანიშვნა; მოსამართლეთა დანიშვნისა და დაწინაურების პროცედურების დახვეწა; იუსტიციის უმაღლესი საბჭოს როლისა და ფუნქციური დამოუკიდებლობის გაძლიერება; კონსტიტუციური ცვლილება, რომლის მიხედვითაც, უფრო მეტად დაიხვეწა უზენაესი სასამართლოს მოსამართლეების შერჩევისა და თანამდებობაზე განწესების პროცედურები.

აღსანიშნავია, რომ ირაკლი ფირცხალავას მიმართ მიმდინარე სამართალწარმოება უკავშირდებოდა ბუტა რობაქიძის მკვლელობის ფაქტზე წარმოებულ სისხლის სამართლის საქმეს. ირაკლი ფირცხალავა დამატებით ამტკიცებდა, რომ მისი სისხლის სამართლის პროცესი არასამართლიანად წარიმართა, რადგან მას არ მიეცა შესაძლებლობა, დაეკითხა ყოფილი თანაბრალდებულები და სხვა მოწმეები და ეფექტიანად გაებათილებინა მტკიცებულებები. სტრასბურგის სასამართლომ აღნიშნულ საკითხთან დაკავშირებით დაადგინა, რომ მომჩივნის საქმის სამართლიანი განხილვის უფლების დარღვევის ნიშნებიც კი არ გამოვლენილა. შესაბამისად, ირაკლი ფირცხალავას დამატებითი საჩივრები, როგორც აშკარად დაუსაბუთებელი, დაუშვებლად გამოაცხადა.

იუსტიციის მინისტრის მოადგილე ლანა მორგოშიამ ყირგიზეთის საგანგებო და სრულუფლებიან ელჩ მაკსატ მამიტკანოვთან ორ ქვეყანას შორის სამართლის უზენაესობისა და ადამიანის უფლებების დაცვის სფეროში მომავალი თანამშრომლობის მიმართულებები განიხილა

გაცნობითი ხასიათის შეხვედრაზე მინისტრის მოადგილემ ელჩს იუსტიციის სამინისტროს საქმიანობის პრიორიტეტული მიმართულებები გააცნო. საუბარი შეეხო საჯარო სერვისების, ციფრული მმართველობის, პენიტენციური და პრობაციის სფეროების განვითარებას. ლანა მორგოშიამ ხაზი გაუსვა ამ პროცესში ციფრული ინოვაციებისა და ციფრული მმართველობის განსაკუთრებულ მნიშვნელობას.

როგორც მინისტრის მოადგილემ აღნიშნა, საქართველო გახდა ერთ-ერთი პირველი ქვეყანა, რომელმაც ხელი მოაწერა ევროპის საბჭოს ხელოვნური ინტელექტისა და ადამიანის უფლებების, დემოკრატიისა და სამართლის უზენაესობის შესახებ ჩარჩო კონვენციას ხელოვნური ინტელექტის შესახებ – სამართლებრივად სავალდებულო პირველ საერთაშორისო ხელშეკრულებას.

შეხვედრის ბოლოს ლანა მორგოშიამ ელჩი გაეროს-ს საჯარო სერვისების მსოფლიო ფორუმზე მიიწვია, რომელიც თბილისში 2026 წლის ივნისში გაიმართება.

შეხვედრას, ასევე, ესწრებოდნენ საჯარო რეესტრის ეროვნული სააგენტოს, სახელმწიფო სერვისების განვითარების სააგენტოს, იუსტიციის სახლის, ციფრული მმართველობის სააგენტოსა და ნოტარიუსთა პალატის ხელმძღვანელები.

მსოფლიო ბანკი იუსტიციის სამინისტროს საჯარო რეესტრის ეროვნულ სააგენტოსთან თანამშრომლობას მაღალ შეფასებას აძლევს.

იუსტიციის მინისტრის მოადგილე ლანა მორგოშიამ მსოფლიო ბანკის წარმომადგენლებთან სამუშაო შეხვედრა გამართა. მხარეებმა განიხილეს მსოფლიო ბანკის დაფინანსებული „მდგრადი სოფლის მეურნეობის, ირიგაციისა და მიწის“ პროექტის (GRAIL) “მიწის ადმინისტრირების მომსახურების გაუმჯობესების და ციფრული მმართველობის ინფრასტრუქტურის შექმნის'' კომპონენტის მიმდინარეობა და 2026 წელს დაგეგმილი აქტივობები.

იუსტიციის მინისტრის მოადგილემ ფინანსური ინსტიტუტის წარმომადგენლებს დეტალური ინფორმაცია მიაწოდა იმ მასშტაბური სამუშაოების შესახებ, რომელიც ქართულმა მხარემ აღნიშნული პროგრამის ფარგლებში განახორციელა.

საჯარო რეესტრის სააგენტოსთან თანამშრომლობას მსოფლიო ბანკის წარმომადგენლებმა მაღალი შეფასება მისცეს და აღნიშნეს, რომ ეს უწყება სამაგალითოა პროექტის მართვითა და ინოვაციური განვითარებით.

შეხვედრას ასევე ესწრებოდნენ საჯარო რეესტრის სააგენტოს თავმჯდომარე დავით დევიძე და „მდგრადი სოფლის მეურნეობის, ირიგაციისა და მიწის“ პროექტის მენეჯერი ელენე გრიგოლია.

მსოფლიო ბანკის დელეგაცია საქართველოში პროექტის - „მდგრადი სოფლის მეურნეობის, ირიგაციისა და მიწის“ პროექტის მიმდინარეობის შეფასების მიზნით იმყოფება. ვიზიტის ფარგლებში ფინანსური ინსტიტუტის წარმომადგენლები საჯარო რეესტრის ეროვნულ სააგენტოში დანერგილ სხვა ისეთ ინოვაციებსაც გაეცნენ, როგორიცაა: ეროვნული სივრცითი მონაცემების ინფრასტრუქტურის პროექტი; მულტიფუნქციური გეოპორტალი NSDI.GOV.GE; გონიერი კონტრაქტი და სხვ.

იუსტიციის მინისტრმა პაატა სალიამ, მოადგილე ბექა ძამაშვილთან ერთად, საფრანგეთის ახალდანიშნულ ელჩ ოლივიე კურტოსთან, ორ ქვეყანას შორის იუსტიციის სფეროში თანამშრომლობის პერსპექტივები განიხილა.

გაცნობითი ხასიათის შეხვედრაზე მინისტრმა ელჩს იუსტიციის სამინისტროს საქმიანობის სფეროები და პრიორიტეტული მიმართულებები გააცნო; საუბარი შეეხო საჯარო სერვისების, ციფრული მმართველობის, პენიტენციური და პრობაციის სისტემების განვითარებას.

იუსტიციის მინისტრმა არსებული ნაყოფიერი თანამშრომლობის მომავალში კიდევ მეტად გაღრმავების მზაობა გამოთქვა და ელჩი გაერო-ს საჯარო სერვისების მსოფლიო ფორუმზე მოიწვია. ფორუმს თბილისი 2026 წლის ივნისში უმასპინძლებს.

ოლივიე კურტო საქართველოში საფრანგეთის ელჩის თანამდებობას 2025 წლის სექტემბრიდან იკავებს.