საქმეზე „დავით კეზერაშვილი საქართველოს წინააღმდეგ“ სტრასბურგის სასამართლომ გადაწყვეტილება გამოაცხადა. ბრიფინგი ამ თემაზე იუსტიციის მინისტრმა, ანრი ოხანაშვილმა, გამართა.

“სასამართლომ დაადგინა, რომ დავით კეზერაშვილმა თავდაცვის მინისტრობის დროს, 2008 წლის აგვისტოს ომამდე მცირე ხნით ადრე, სახელმწიფო ბიუჯეტიდან გაფლანგა ქართული ჯარისთვის განკუთვნილი დიდი ოდენობის თანხა, კერძოდ 5 მილიონ სამოცი ათასი ევრო, რაც დღევანდელი კურსით შეადგენს დაახლოებით 15 მილიონ ლარს. სასამართლომ, ასევე, დაადგინა, რომ დავით კეზერაშვილის მიმართ პოლიტიკური ნიშნით დევნას ადგილი არ ჰქონია; საქართველოს უზენაესი სასამართლოს განაჩენი კეზერაშვილის დამნაშავედ ცნობის შესახებ იყო დასაბუთებული და მის მიმართ უდანაშაულობის პრეზუმფციის დარღვევას ადგილი არ ჰქონია”, - განაცხადა ანრი ოხანაშვილმა.

მინისტრმა საზოგადოებას შეახსენა კეზერაშვილის მიერ ჩადენილი დანაშაულებრივი სქემის შესახებაც:

„კეზერაშვილმა მისი თავდაცვის მინისტრობის დროს, 2008 წლის აგვისტოს ომამდე მცირე ხნით ადრე, კანონმდებლობის დარღვევით 1 დღეში გააფორმა ფიქციური ხელშეკრულება ოფშორში დარეგისტრირებულ კომპანიასთან ქართული ჯარის საბრძოლო წვრთნის თაობაზე. მეტიც, აღნიშნული ხელშეკრულება გაფორმდა თავდაცვის ძალების გენერალური შტაბის გვერდის ავლით. სინამდვილეში ქართული ჯარის არავითარი წვრთნა არ ჩატარებულა და შედეგად, მიზანმიმართულად გაიფლანგა ქართული ჯარისთვის კუთვნილი თანხა 5 მილიონ სამოცი ათასი ევროს ოდენობით!“

ანრი ოხანაშვილმა ხაზი გაუსვა იმასაც, რომ სტრასბურგის სასამართლომ კეზერაშვილს მორალური ზიანის ანაზღაურებაზე უარი უთხრა: „ქართულის ჯარის გაძარცვით გამდიდრებული კეზერაშვილი სტრასბურგში დამატებით ითხოვდა სახელმწიფოსგან 15 ათასი ევროს ოდენობით მორალური ზიანის ანაზღაურებას, რაზეც სტრასბურგის სასამართლომ უარი უთხრა. სტრასბურგის სასამართლომ, მთლიანობაში, დაადასტურა კეზერაშვილის მიერ განსაკუთრებით მძიმე კატეგორიის დანაშაულის ჩადენა და ამით აღიარა საქართველოს უზენაესი სასამართლოს განაჩენის კანონიერება“.

იუსტიციის მინისტრმა ქართულ სახელმწიფოსა და ქართულ ჯარს ადამიანის უფლებათა ევროპულ სასამართლოში მიღწეული გამარჯვება მიულოცა. მან მადლობა გადაუხადა ყველა თანამშრომელს, ვინც იცავდა საქართველოს ინტერესებს სტრასბურგში და მოუწოდა ევროპელ პარტნიორებს, გამოხატონ რეაქცია აღნიშნულ გადაწყვეტილებასთან დაკავშირებით:

„ვულოცავ ჩვენ სახელმწიფოს, ქართულ ჯარსა და ჩვენს საზოგადოებას ევროპულ სასამართლოში ამ ღირსეულ გამარჯვებას!.. მადლობა იუსტიციის სამინისტროს იმ თანამშრომლებს, რომლებიც სახელმწიფო ინტერესებს იცავდნენ ევროპულ სასამართლოში. ასევე, მსურს, მადლობა გადავუხადო საქართველოს პროკურატურის თანამშრომლებს ამ საქმეზე მჭიდრო კოორდინაციისათვის. დაველოდებით ევროპელ კოლეგებს, იმ რეზოლუციების ავტორებს, რომლებმაც კეზერაშვილი წარმოაჩინეს მედიამენეჯერად და მედიაზე მზრუნველად, როგორი რეაგირება ექნებათ სტრასბურგის სასამართლოს მიერ დამნაშავედ გამოცხადებულ ამ პირთან დაკავშირებით“, ‒ განაცხადა ანრი ოხანაშვილმა.

სტრასბურგის სასამართლოს გადაწყვეტილებით დადასტურდა, რომ დავით კეზერაშვილმა თავდაცვის მინისტრობის დროს გაფლანგა ქართული ჯარისთვის განკუთვნილი სახელმწიფო ბიუჯეტი და მის მიმართ პოლიტიკურ დევნას ადგილი არ ჰქონია.

აღნიშნულ საკითხთან დაკავშირებით იუსტიციის სამინისტროში გაიმართება ბრიფინგი 15:00 საათზე.

იუსტიციის მინისტრის მოადგილის თანამდებობა ბექა ძამაშვილმა, ნიკო თათულაშვილმა და ერეკლე ღვინიანიძემ დაიკავეს.

ბექა ძამაშვილი სამართლის დოქტორია. მას აქვს იუსტიციის სამინისტროში მუშაობისა და აკადემიური საქმიანობის მრავალწლიანი გამოცდილება. 2021 წლიდან იკავებდა მინისტრის მოადგილის თანამდებობას.

ნიკო თათულაშვილი სამართლის დოქტორია. მას აქვს საჯარო სამსახურში მუშაობის მრავალწლიანი გამოცდილება. 2021 წლიდან იყო პრემიერ-მინისტრის მრჩეველი ადამიანის უფლებათა დაცვის საკითხებში.

ერეკლე ღვინიანიძე პროფესიით იურისტია. ის სხვადასხვა წლებში იუსტიციის სამინისტროს სისტემაში იკავებდა არაერთ მნიშვნელოვან პოზიციას. 2022 წლიდან იყო იუსტიციის მინისტრის მოადგილე.

თამარ ტყეშელაშვილი და ბუბა ლომუაშვილი საქმიანობას სახელმწიფო სამსახურში განაგრძობენ, რის შესახებაც საზოგადოებისთვის უახლოეს პერიოდში გახდება ცნობილი.

პირველ სამუშაო დღეს მინისტრმა დეპარტამენტები მოინახულა და სამუშაო გარემოს გაეცნო. ანრი ოხანაშვილი თანამშრომლებს პირადად გაესაუბრა და თითოეული მათგანის საჭიროებებით დაინტერესდა.

მინისტრმა ხაზი გაუსვა თანამშრომლების ინიციატივების მნიშვნელობას სამინისტროს მიერ დასახული მიზნებისა და ამოცანების ეფექტიანი რეალიზებისათვის.

გუშინ ანრი ოხანაშვილმა სამინისტროსა და მის სისტემაში შემავალი სსიპ-ების ხელმძღვანელ პირებთან გამართა სამუშაო შეხვედრა. თანამშრომლებს ის საქართველოს პრემიერ-მინისტრმა ირაკლი კობახიძემ წარუდგინა.

იუსტიციის სამინისტროს თანამშრომლებთან შეხვედრაზე მთავრობის მეთაურმა ანრი ოხანაშვილის პროფესიულ გამოცდილებას გაუსვა ხაზი და აღნიშნა, რომ ის მაღალი კვალიფიკაციის მქონე იურისტია.

პრემიერ-მინისტრის განცხადებით, ანრი ოხანაშვილი წლების განმავლობაში წარმატებით საქმიანობდა არაერთი მიმართულებით და იქნება წარმატებული იუსტიციის მინისტრი.

ირაკლი კობახიძემ იუსტიციის მინისტრის თანამდებობაზე გაწეული საქმიანობისთვის რატი ბრეგაძეს მადლობა გადაუხადა.

"ანრი ოხანაშვილს არ სჭირდება განსაკუთრებული წარდგენა, იგი გახლავთ ერთ-ერთი საუკეთესო, პროფესიონალი იურისტი საქართველოში. მას აქვს მიღებული ძალიან ღრმა განათლება ჯერ თბილისის სახელმწიფო უნივერსიტეტში და შემდეგ დამთავრებული აქვს მაგისტრატურა იენის უნივერსიტეტში, გერმანიაში და ასევე სადოქტორო დისერტაცია აქვს დაცული გერმანიაში, ჰუმბოლდტის უნივერსიტეტში. ის 2017 წლიდან გახლავთ საქართველოს პარლამენტის წევრი, წლების განმავლობაში, იკავებდა იურიდიული კომიტეტის ხელმძღვანელის თანამდებობას და ყველა მიმართულებით იყო ძალიან წარმატებული თავის საქმიანობაში. ანრი ოხანაშვილი გახლავთ თბილისის სახელმწიფო უნივერსიტეტის ასოცირებული პროფესორი, არის არაერთი სამეცნიერო ნაშრომის ავტორი, დარწმუნებული ვარ, რომ ის იქნება ძალიან კარგი იუსტიციის მინისტრი, მინდა წარმატებები ვუსურვო იუსტიციის სამინისტროში,"- განაცხადა პრემიერ-მინისტრმა.

პრემიერმა რატი ბრეგაძეს გაწეული საქმიანობისთვის მადლობა გადაუხადა. საქართველოს მთავრობის განახლებული შემადგენლობა პარლამენტს ნდობის გამოსაცხადებლად დღეს წარედგინება.

სხდომას საბჭოს თავმჯდომარე, იუსტიციის მინისტრის პირველი მოადგილე თამარ ტყეშელაშვილი ხელმძღვანელობდა, მის მუშაობაში მონაწილეობდნენ საბჭოს წევრი სამინისტროებისა და სხვა სახელმწიფო უწყებების ხელმძღვანელი პირები.

საბჭომ, სტრატეგიასა და სამოქმედო გეგმასთან ერთად, ასევე განიხილა და მიიღო 9 დარგობრივი სპეციფიკაცია და ტექნიკური რეგლამენტი, რომლის პროექტი NSDI-ს კოორდინატორმა უწყებამ ‒ იუსტიციის სამინისტროს საჯარო რეესტრის ეროვნულმა სააგენტომ შეიმუშავა, საკოორდინაციო საბჭოში შემავალ უწყებებს დაუგზავნა და მათი წინადადებებისა და შენიშვნების გათვალისწინებით დააკორექტირა.

საუკეთესო საერთაშორისო გამოცდილების გათვალისწინებით შექმნილი სამართლებრივი და ტექნიკური რეგულაციები ქვეყანაში დაადგენს სივრცითი მონაცემების წარმოებისა და გაზიარების ერთიან სტანდარტს. შედეგად, სხვადასხვა უწყების მონაცემი თავსებადი იქნება ერთმანეთთან, ასევე ევროკავშირის სივრცითი მონაცემების ინფრასტრუქტურასთან (INSPIRE).

საკოორდინაციო საბჭო „ეროვნული სივრცითი მონაცემების ინფრასტრუქტურის შესახებ“ საქართველოს კანონის შესაბამისად, მთავრობის დადგენილების საფუძველზე შეიქმნა. მისი მიზანი NSDI-ს შექმნის, ფუნქციონირებისა და განვითარების მხარდაჭერა, ამით კი ელექტრონული მმართველობისა და საჯარო ადმინისტრირების განვითარებაა.

ფუნქციონირებადი NSDI ხელს შეუწყობს ეფექტიან საჯარო მმართველობას სამთავრობო, დარგობრივ და მუნიციპალურ დონეებზე, ადგილმდებარეობაზე დაფუძნებული სერვისების განვითარებას და კერძო სექტორისთვის გაამარტივებს ინფორმირებული (სანდო მონაცემებზე დაფუძნებული) გადაწყვეტილებების მიღებას.

აღსანიშნავია, რომ საჯარო რეესტრი, ასევე, შექმნის NSDI ეროვნულ გეოპორტალს. პორტალზე სივრცითი მონაცემების მწარმოებელი სუბიექტები განათავსებენ და საჯაროდ ხელმისაწვდომს გახდიან საქართველოში არსებულ სივრცით მონაცემებს სრულად, რომლებიც თავსებადი და შესაბამისი იქნება ევროკავშირის სივრცითი ინფორმაციის ინფრასტრუქტურასთან (INSPIRE).

საბჭოზე განხილვის შემდეგ, NSDI-ს სტრატეგიული, დარგობრივი და ტექნიკური დოკუმენტაცია დასამტკიცებლად საქართველოს მთავრობას წარედგინება.

რატი ბრეგაძემ ევროპის საბჭოს წამების, არაადამიანური და ღირსების შემლახველი მოპყრობისა თუ დასჯის პრევენციის ევროპული კომიტეტის (CPT) დელეგაციას მე-7 პერიოდული ვიზიტის ფარგლებში უმასპინძლა. შეხვედრის ფარგლებში რატი ბრეგაძემ ისაუბრა პენიტენციურ სისტემაში მიმდინარე რეფორმებზე და დელეგაციას გააცნო ის ინოვაციები და სიახლეები, რომლებიც წინა ვიზიტებისას გაცემული რეკომენდაციების გათვალისწინებით განხორციელდა.

მინისტრმა ხაზი გაუსვა 2023 წელს მიღებულ ახალ პენიტენციურ კოდექსს, რომელიც აწესებს მსჯავრდებულთა და ბრალდებულთა უფლებების დაცვის კიდევ უფრო მაღალ სტანდარტებს და აუმჯობესებს პენიტენციურ სისტემაში დასაქმებულთა უფლებებს. საუბარი შეეხო „ციფრული უნივერსიტეტის“ ინოვაციას, რომელიც მსჯავრდებულებს აძლევს შესაძლებლობას, დისტანციურად მიიღონ უმაღლესი განათლება და განივითარონ უნარები ლექტორებთან ყოველდღიური და პირდაპირი ინტერაქციით. აღსანიშნავია, რომ ციხისა და სასჯელაღსრულების სისტემების ევროპულმა ორგანიზაციამ (Europris) „ციფრული უნივერსიტეტი“ 3 საუკეთესო პროექტს შორის დაასახელა.

რატი ბრეგაძემ ისაუბრა კიდევ ერთ ინოვაციურ პროექტზე ‒ იუსტიციის სახლები პენიტენციურ დაწესებულებებში. მოცემული ინიციატივის ფარგლებში, მსჯავრდებულებს/ბრალდებულებს შეუძლიათ იუსტიციის სახლის 50-მდე სერვისის მიღება 7 პენიტენციურ დაწესებულებაში (№1, №2, №5, №8, №10, №12, №16). დამატებით, მინისტრმა დელეგაციას გააცნო ახალი სერვისი ‒ ონლაინ კლინიკა, რომელიც უზრუნველყოფს მსჯავრდებულის/ბრალდებულის სამედიცინო სერვისებზე სწრაფ და ეფექტიან ხელმისაწვდომობას, და ინფორმაცია მიაწოდა სააკაძის სასწავლო ბაზის შესახებ, რომელიც პენიტენციური სამსახურის, პრობაციის სააგენტოს, აღსრულების ეროვნული ბიუროსა და გენერალური ინსპექციის თანამშრომლებს სპეციალური სასწავლო-საწვრთნელი კურსების გავლის შესაძლებლობას აძლევს.

დელეგაციის წევრებს მინისტრმა მიაწოდა ინფორმაცია 2023 წელს დაბა ლაითურში გახსნილი ახალი პენიტენციური დაწესებულების შესახებ და აცნობა, რომ 2025 წლის დასაწყისში კიდევ 1 ახალი მცირე ზომის დაწესებულება გაიხსნება რუსთავში. მინისტრმა დელეგაციის წევრებს ასევე გააცნო პენიტენციურ დაწესებულებებში განხორციელებული სხვა ინფრასტრუქტურული სიახლეები, რომელიც, სხვებს შორის, ემსახურება პენიტენციურ სისტემაში დანერგილი „სპორტის სტრატეგიის“ ეფექტიან იმპლემენტაციას.

რატი ბრეგაძემ ასევე ისაუბრა მსჯავრდებულთა რეაბილიტაცია-რესოციალიზაციის პროგრამებზე და დასაქმების შესაძლებლობებზე, მათ შორის „რე-მარკეტსა“ და მსჯავრდებულთა ხელნაკეთი ნივთების რეალიზაციის შესაძლებლობებზე.

საქართველოში მიღწეულ პროგრესს ადასტურებს ის ფაქტიც, რომ ადამიანის უფლებათა ევროპულ სასამართლოს 2012 წლის შემდეგ საქართველოს პენიტენციური სისტემიდან გაგზავნილი არც ერთი საქმე არ მიუღია წარმოებაში.

CPT-ის დელეგაციის წარმომადგენლები 2 კვირის განმავლობაში გამართავენ შეხვედრებს შინაგან საქმეთა და ჯანდაცვის სამინისტროების, სპეციალური საგამოძიებო სამსახურისა და სახალხო დამცველის წარმომადგენლებთან, ეწვევიან დახურული ტიპის პენიტენციურ და ფსიქიატრიულ დაწესებულებებს და დროებითი მოთავსების იზოლატორებს.

იუსტიციის სამინისტროში შეხვედრას, ასევე, ესწრებოდნენ იუსტიციის მინისტრის მოადგილე ბექა ძამაშვილი, სპეციალური პენიტენციური სამსახურის გენერალური დირექტორი ნიკა ცხვარაშვილი, იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი და სპეციალური პენიტენციური სამსახურის სამედიცინო დეპარტამენტის უფროსი მალხაზ ურთქმელიძე.

კომისიის წევრებმა ცენტრალური საარჩევნო კომისიის წარმომადგენლებისგან მოისმინეს ინფორმაცია საერთო სასამართლოებსა და საარჩევნო ადმინისტრაციაში მიმდინარე საარჩევნო დავების შესახებ.

უწყებათაშორისი კომისიის სხდომას იუსტიციის მინისტრი რატი ბრეგაძე უძღვებოდა. მის მუშაობაში მონაწილეობდნენ კომისიის წევრი საჯარო უწყებების ხელმძღვანელი პირები; საერთაშორისო და ადგილობრივი სადამკვირვებლო ორგანიზაციების, აგრეთვე, პოლიტიკური პარტიის წარმომადგენლები.

საარჩევნო კოდექსის შესაბამისად შექმნილი უწყებათაშორისი კომისიის მიზანი საჯარო მოსამსახურეების მიერ საარჩევნო კანონმდებლობის დარღვევის პრევენცია და დარღვევებზე რეაგირებაა. მას იუსტიციის მინისტრი რატი ბრეგაძე ხელმძღვანელობს.

კომისიისათვის მის კომპეტენციაში შემავალ საკითხებზე ინფორმაციის მიწოდება შესაძლებელია ელექტრონული ფოსტის მეშვეობით შემდეგ მისამართზე: iatf@justice.gov.ge; აგრეთვე, ცხელ ხაზზე: (+995) 599 85 00 11.

კომისია საქმიანობას ცესკო-ს მიერ არჩევნების საბოლოო შედეგების ოფიციალურად გამოქვეყნების დღიდან დაასრულებს.