ცხელი ხაზი2 405 505

სიახლეები

Share
Print

ქართულ-სომხური სამართლებრივი ფორუმი გაიხსნა

თბილისი ქართულ-სომხურ სამართლებრივ ფორუმს მასპინძლობს. ღონისძიება საქართველოს იუსტიციის მინისტრმა რატი ბრეგაძემ და სომხეთის რესპუბლიკის იუსტიციის მინისტრმა კარენ ანდრესიანმა გახსნეს. მინისტრებმა სამართლებრივ სფეროში საქართველოსა და სომხეთის თანამშრომლობის მნიშვნელობაზე ისაუბრეს.

„ქართულ-სომხური სამართლებრივი ფორუმის ჩატარების შესახებ გადაწყვეტილება მიღებული იყო იუსტიციის სამინისტროს დელეგაციის ვიზიტისას სომხეთში და სულ რაღაც ორი თვის თავზე თბილისში იმართება ქართულ-სომხური ფორუმი. დღევანდელი ღონისძიება კიდევ უფრო მეტად შეუწყობს ხელს საქართველოსა და სომხეთს შორის არსებული სამართლებრივი ურთიერთობის გაღრმავებას“, − აღნიშნა რატი ბრეგაძემ და იმედი გამოთქვა, რომ საქართველო-სომხეთს შორის ურთიერთობა ახალ ეტაპზე გადავა და, შესაბამისად, ორი ქვეყნის იუსტიციის სამინისტროებს შორის თანამშრომლობა კიდევ უფრო წარმატებული იქნება.

სომხეთის იუსტიციის მინისტრმა მადლობა გადაუხადა რატი ბრეგაძეს მასპინძლობისათვის და აღნიშნა, რომ ქართულ-სომხური სამართლებრივი ფორუმი მნიშვნელოვანი ნაბიჯია ორი ქვეყნის პარტნიორობის გაღრმავებისათვის.

„ჩვენ ბევრი რამ გვაქვს სასწავლი ქართველი კოლეგებისგან, დაწყებული პრობბოქსის ბრწყინვალე იდეიდან, რაც კარგად უწყობს ხელს პრობაციის სისტემის განვითარებას... კიდევ ერთი დიდი გამოცდილება, რომელიც მსურს, აღვნიშნო, ეხება იუსტიციის სახლებს. საქართველო ნამდვილად ჩემპიონია სერვისების მოწოდების კუთხით... თანამშრომლობის კიდევ ერთი დიდი სფეროა სასამართლოს აქტების აღსრულება, ასევე, საარბიტრაჟო ცენტრი, რომელიც საქართველომ უკვე შექმნა, ხოლო სომხეთი ამ მნიშვნელოვანი პროექტის დაწყებით ეტაპზეა... თანამშრომლობის დღის წესრიგი საკმაოდ ვრცელია და ჩვენ გავაგრძელებთ ამ პარტნიორობას“, − განაცხადა კარენ ანდრესიანმა.

სამართლებრივი ფორუმი საქართველოსა და სომხეთის თანამშრომლობის წარმატებული პლატფორმაა. ორი ქვეყნის იუსტიციის სამინისტროების წარმომადგენლები თემატურ სესიებზე განიხილავენ ისეთ აქტუალურ საკითხებს, როგორიცაა: სანოტარო სერვისების ხელმისაწვდომობა; ელექტრონული სახელმწიფო სერვისები; იძულებითი აღსრულების საკითხები, პენიტენციური და პრობაციის სისტემების რეფორმა, მსჯავრდებულთა რეაბილიტაციისა და რესოციალიზაციის პროგრამები, ფორმალური და არაფორმალური იურიდიული განათლება და სხვა.

ყოველი თემატური მოხსენების შემდეგ ფორუმის მონაწილეები ერთმანეთს მოსაზრებებსა და გამოცდილებას დისკუსიის რეჟიმში უზიარებენ.

ქართულ-სომხური სამართლებრივი ფორუმი ხვალ დასრულდება. ვიზიტის ფარგლებში სომხეთის იუსტიციის მინისტრი ეროვნულ არქივს, იუსტიციის სახლს, პენიტენციურ სამსახურს მოინახულებს და მათი მუშაობის ქართულ მოდელს გაეცნობა.

Share
Print

ნოტარიუსის თანამდებობაზე ყოფნის ზღვრული ასაკი 70 წელი იქნება

77 ხმა ნულის წინააღმდეგ – „ნოტარიატის შესახებ“ საქართველოს კანონში შესაბამისი ცვლილება პარლამენტმა მესამე მოსმენით მიიღო. საკანონმდებლო ინიციატივა დეპუტატებს იუსტიციის მინისტრის მოადგილე თორნიკე ჭეიშვილმა წარუდგინა.

კანონის აქამდე მოქმედი რედაქციით, ნოტარიუსის თანამდებობაზე ყოფნის ზღვრულ ასაკად 65 წელი იყო განსაზღვრული, თუმცა, ნოტარიუსის განცხადებისა და ნოტარიუსთა პალატის დასაბუთებული რეკომენდაციის საფუძველზე, იუსტიციის მინისტრს ჰქონდა უფლებამოსილება, არაუმეტეს 5 წლის ვადით გაეგრძელებინა ნოტარიუსისთვის საქმიანობის უფლება.

განხორციელებული ცვლილებით, ნოტარიუსის თანამდებობაზე ყოფნის ზღვრული ასაკი 65-დან 70 წლამდე ფიქსირებულად გაიზარდა. ამ ასაკის მიღწევამდე უფლებამოსილების განხორციელებას ნოტარიუსები მინისტრისადმი მიმართვისა და შესაბამისი ბრძანების გარეშე შეძლებენ.

Share
Print

ჯეიმს აპატურაიმ კიბერუსაფრთხოების საკითხებზე შეხვედრა ციფრული მმართველობის სააგენტოში გამართა

ჩრდილოატლანტიკური ალიანსის გენერალური მდივნის თანაშემწის მოადგილე ჯეიმს აპატურაიმ კიბერუსაფრთოების საკითხებზე სსიპ ციფრული მმართველობის სააგენტოში შეხვედრა გამართა.

NATO-ს დელეგაციის ციფრული მმართველობის სააგენტოში ვიზიტის მიზანს კიბერუსაფრთხოების საკითხებზე ჩრდილოატლანტიკურ ალიანსსა და საქართველოს შორის თანამშრომლობის გაღრმავება, შესაბამისი პერსპექტივებისა და კიბერუსაფრთხოების მიმართულებით საქართველოს ძირითადი საჭიროებების განსაზღვრა წარმოადგენდა. მხარეებმა ისაუბრეს კიბერ და ჰიბრიდული პოლიტიკის მიმართულებასა და უსაფრთხოებასთან დაკავშირებულ გამოწვევებზე.

შეხვედრაზე ციფრული მმართველობის სააგენტოს თავმჯდომარე დავით ნადირაშვილმა სტუმრებს მიაწოდა ინფორმაცია კიბერუსაფრთხოების სფეროში სააგენტოს უფლებამოსილების, მისი ძირითადი საჭიროებებისა და საქართველოს საკანონმდებლო და სტრატეგიული ჩარჩოების შესახებ.

სააგენტოს თავმჯდომარის განცხადებით, მსოფლიოში არსებული მდგომარეობის გათვალისწინებით, კიბერთავდასხმები დიდ საფრთხეს უქმნის გლობალურ ეკონომიკას, რომლის წინაშეც შესაძლოა აღმოჩნდეს საქართველოც. ,,სრულად ვიზიარებთ ჩვენი სტრატეგიული პარტნიორების პოზიციას, რომ ასეთ დროს ფხიზლად უნდა ვიყოთ ამ საფრთხის წინააღმდეგ და გავაძლიეროთ კიბერუსაფრთხოება იმ ტექნოლოგიების მიმართ, რომლებსაც ადამიანები ყოველდღიურად იყენებენ“, - აღნიშნა დავით ნადირაშვილმა.

Share
Print

ეროვნულ არქივში ყოფილი პატიმრების, პრობაციონერებისა და შშმ პირების ერთობლივი ნამუშევრების გამოფენა-გაყიდვა გაიმართა


საგამოფენო სივრცეში სააღდგომო თემატიკის ნაკეთობებია წარმოდგენილი. გამოფენილი ნამუშევრების გაყიდვიდან შესული თანხა ხის სოციალური საწარმოს განვითარებას და მისთვის სამუშაო მასალების შეძენას მოხმარდება.

ხის სოციალურ საწარმოში დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ბენეფიციარები შშმ პირებთან ერთად მუშაობენ და განმავითარებელ სათამაშოებს ქმნიან. პროექტის მიზანი შშმ პირებთან ყოფილ მსჯავრდებულთა და პირობით მსჯავრდებულთა ინტეგრირება, რესოციალიზაცია-რეაბილიტაცია და მათი დასაქმების ხელშეწყობაა.

პროექტს „ერთად-ერთმანეთისთვის“ იუსტიციის სამინისტროს საგრანტო პროგრამაში გამარჯვებული ააიპ „სმენისა და მეტყველების დარღვევის მქონე ბავშვთა დახმარების ასოციაცია“ ახორციელებს.

ეროვნულ არქივში სააღდგომო გამოფენა-გაყიდვის გახსნას იუსტიციის მინისტრის მოადგილეები თორნიკე ჭეიშვილი, ბუბა ლომუაშვილი, ერეკლე ღვინიანიძე, სამინისტროს სისტემის საჯარო სამართლის იურიდიული პირების ხელმძღვანელები და სამინისტროს სტრუქტურული ერთეულების ხელმძღვანელები ესწრებოდნენ.

Share
Print

მიწის სისტემური რეგისტრაციის რეფორმა მთელი ქვეყნის მასშტაბით 59 მუნიციპალიტეტში დაიწყო

რეფორმის პრეზენტაცია კახეთის რეგიონში საქართველოს პრემიერ-მინისტრმა ირაკლი ღარიბაშვილმა და იუსტიციის მინისტრმა რატი ბრეგაძემ გახსნეს. მთავრობის მეთაურმა აზომვითი სამუშაოების დემონსტრაციაშიც მიიღო მონაწილეობა და უახლესი თაობის დრონის აპარატისა და შესაბამისი ხელსაწყოს გამოყენებით მიწის ნაკვეთი აზომა.

საქართველოს პრემიერ-მინისტრმა პრეზენტაციაზე მიწის სისტემური რეგისტრაციის რეფორმის მნიშვნელობაზე ისაუბრა და აღნიშნა, რომ მიწის რესურსის 1/3 დღემდე არ არის რეგისტრირებული, რაც იმას ნიშნავს, რომ მილიონ 200 ათასი ჰექტარი მიწის ნაკვეთი გამოთიშულია ეკონომიკური ბრუნვიდან.

„ჩვენ ვაჩქარებთ მიწის სისტემურ რეგისტრაციას მთელი ქვეყნის მასშტაბით. პროექტი განხორციელდება მთელი საქართველოს მასშტაბით. ეს მოიცავს ქვეყნის 59 მუნიციპალიტეტს, ათასზე მეტ ადმინისტრაციულ ერთეულს და 4000-ზე მეტ დასახლებას... მიწის სისტემური რეგისტრაცია არის სრულიად უფასო“, – აღნიშნა ირაკლი ღარიბაშვილმა და მადლობა გადაუხადა იუსტიციის მინისტრ რატი ბრეგაძეს, პროექტის პარტნიორ მსოფლიო ბანკს და პროექტში ჩართულ პროფესიონალებს.

იუსტიციის მინისტრის განცხადებით, მიწაზე საკუთრების უფლება ადამიანის ფუნდამენტურ უფლებას წარმოადგენს; მიწის სისტემური რეგისტრაციის პროექტი კი, ამ უფლების რეალიზაციისათვის გადადგმული მნიშვნელოვანი ნაბიჯია:

„ამ პროექტის დასრულების შემდეგ გაირკვევა, ვინ არის კონკრეტული ნაკვეთის მესაკუთრე ქვეყნის მთელ ტერიტორიაზე... პროექტი მიმდინარეობს გარკვეული გრაფიკით და დასრულდება 2024 წელს. ეს ნამდვილად ისტორიული მოვლენა იქნება, როდესაც 2024 წელს პრობლემები, რომლებიც გვაქვს დღეს, აღარ იარსებებს“.

რატი ბრეგაძემ მხარდაჭერისათვის მადლობა გადაუხადა პრემიერ-მინისტრს, საქართველოს პარლამენტს და პროექტში ჩართულ თითოეულ თანამშრომელს, რომელთა შრომის გარეშე პროექტი ვერ განხორციელდებოდა.

პროექტის პრეზენტაცია საჯარო რეესტრის ეროვნული სააგენტოს თავმჯდომარე ოლეგ თორთლაძემ გამართა. ღონისძიებაზე მიწის სისტემური რეგისტრაციისათვის განკუთვნილი ტექნიკაც იყო წარმოდგენილი. პროცესის შეუფერხებლად წარმართვისათვის უწყებამ 174 მაღალი გამავლობის მანქანა, 233 GPS როვერი, 233 პლანშეტი შეიძინა. უახლესი ტექნოლოგია და რეგისტრაციის ელექტრონული პროცესი პრაქტიკულად გამორიცხავს მიწის ნაკვეთების გადაფარვას და ცდომილებებს. რეფორმაში უწყების 1000-ზე მეტი თანამშრომელია ჩართული, პროექტის ჯამური ღირებულება კი, 120 მილიონ ლარს შეადგენს.

მიწის სისტემური რეგისტრაციის ფარგლებში სახელმწიფო მოქალაქეებს როგორც საკუთრებაში ან სარგებლობაში არსებულ, ისე თვითნებურად დაკავებულ მიწის ნაკვეთებს ურეგისტრირებს. ყველა მომსახურება მესაკუთრეებს ადგილზე, ოფისში მისვლის გარეშე, უფასოდ მიეწოდებათ.

ღონისძიებას აღმასრულებელი და საკანონმდებლო ხელისუფლების წევრები, საერთაშორისო მისიებისა და დიპლომატიური კორპუსის წარმომადგენლები და მოწვეული სტუმრები დაესწრნენ.

Share
Print

იუსტიციის მინისტრმა რატი ბრეგაძემ და გაერო-ს ლტოლვილთა უმაღლესი კომისრის (UNHCR) წარმომადგენელმა საქართველოში კემლინ ფურლიმ სამომავლო თანამშრომლობის გაფართოების პერსპექტივები განიხილეს

იუსტიციის მინისტრმა რატი ბრეგაძემ და გაერო-ს ლტოლვილთა უმაღლესი კომისრის (UNHCR) წარმომადგენელმა საქართველოში კემლინ ფურლიმ სამომავლო თანამშრომლობის გაფართოების პერსპექტივები განიხილეს

რატი ბრეგაძემ კემლინ ფურლის იუსტიციის სამინისტროს შეხვედრების ოთახ „გაგრაში“ უმასპინძლა.

შეხვედრაზე აღინიშნა, რომ გაერო-ს წევრ სახელმწიფოებს შორის საქართველო მოწინავე ქვეყანაა მოქალაქეობის არმქონე პირების შემცირებისათვის და მოქალაქეობის არმქონეობის პრევენციის მიზნით გატარებული ღონისძიებების ეფექტიანობით. საუბარი შეეხო მოქალაქეობის არმქონე/უდოკუმენტო პირთა იდენტიფიცირებისა და დოკუმენტირების საინფორმაციო კამპანიას, რომელსაც იუსტიციის სამინისტროს სახელმწიფო სერვისების განვითარების სააგენტო UNHCR-თან თანამშრომლობით ახორციელებს. კამპანიის მიზანი ქვეყანაში უდოკუმენტო მოქალაქეების არსებობის აღმოფხვრაა. ამ მიმამართულებით UNHCR-სა და სახელმწიფო სერვისების განვითარების სააგენტოს შორის თანამშრომლობის შესახებ შეთანხმებაც გაფორმდა.

მხარეებმა სამომავლო თანამშრომლობის გაფართოების პერსპექტივებიც განიხილეს.

Share
Print

იუსტიციის სამინისტრომ ოფიციალური დოკუმენტაციის ენობრივი ანალიზი დაასრულა

იუსტიციის სამინისტროს სისტემაში შექმნილი დოკუმენტების ანალიზის შედეგები და რეკომენდაციები განიხილეს იუსტიციის სასწავლო ცენტრში გამართულ პრეზენტაციაზე. ღონისძიება სიმბოლურად ქართული ენის დღეს გაიმართა.

ოფიციალური დოკუმენტაციის ენობრივი ანალიზის მიზანი ქართული ენის გამართულად გამოყენების ხელშეწყობაა, რაც 2021-2030 წლების სახელმწიფო ენის ერთიანი პროგრამის სამოქმედო გეგმის ნაწილია. სტრატეგიის განხორციელებაში იუსტიციის სასწავლო ცენტრი 2021 წლიდან არის ჩართული.

პრეზენტაცია იუსტიციის მინისტრის მოადგილემ თორნიკე ჭეიშვილმა გახსნა. მონაწილეებს სიტყვით მიმართეს სახელმწიფო ენის დეპარტამენტის თავმჯდომარე გიორგი ალიბეგაშვილმა და იუსტიციის სასწავლო ცენტრის დირექტორმა, ხათუნა კასრაძემ.

ქართული ენის დღის აღნიშვნის ტრადიცია სასწავლო ცენტრში 2016 წლიდან დაინერგა. 14 აპრილი სიმბოლურად იმ ღონისძიებების შეჯამებით აღინიშნება, რომლებიც სასწავლო ცენტრმა ქართული ენის დაცვის, განვითარებისა და სწავლების კუთხით განახორციელა. მათ შორის: 2015-2017 წლებში ჩატარდა ქართული ენის სასწავლო კურსები არაქართულენოვანი მოსახლეობისთვის; 2018 წლიდან შეიქმნა ტრენინგ პროგრამა „ქართული ენის მართლწერისა და სტილის საკითხები“; 2016 წელს შემუშავდა ქართული ენის ცოდნის დონის განმსაზღვრელი და ქართული ენის მართლწერის ტესტები.

Share
Print

იუსტიციის სამინისტრომ შშმ პირთა უფლებების დაცვის 2022 წლის სამოქმედო გეგმის პრეზენტაცია გამართა

შშმ პირთა უფლებების შესახებ გაერო-ს კონვენციასთან საქართველოს კანონმდებლობის ჰარმონიზაცია; შშმ პირებისთვის იუსტიციის სამინისტროს სისტემაში არსებულ სერვისებზე ხელმისაწვდომობის გაზრდა სერვისების და ინფრასტრუქტურის ადაპტირების გზით; პენიტენციურ დაწესებულებაში მყოფი შშმ ბრალდებულთა და მსჯავრდებულთა უფლებების დაცვა მათი სპეციფიკური საჭიროებების გათვალისწინებით − ეს ის საკითხებია, რომლებსაც შშმ პირთა უფლებების დაცვის დოკუმენტში განსაკუთრებული ყურადღება ეთმობა.

სამოქმედო გეგმის პრეზენტაცია დღეს გაიმართა. შეხვედრას იუსტიციის მინისტრის მოადგილე ბუბა ლომუაშვილი ხელმძღვანელობდა. მინისტრის მოადგილემ პრეზენტაციის მონაწილეებს შშმ პირთა უფლებების დაცვის და სერვისებზე წვდომის გაუმჯობესების მიზნით სამინისტროს მიერ უკვე განხორციელებული ღონისძიებებიც გააცნო.

როგორც შეხვედრაზე აღინიშნა, 2021წლიდან პირადობის ელექტრონულ მოწმობაზე შესაძლებელია შშმ პირის უვადოდ დადგენილი სტატუსის დატანა; დანერგილია ყრუ და სმენადაქვეითებული პირებისათვის ადაპტირებული მომსახურება; განხორციელდა ინფრასტრუქტურის ადაპტირება შშმ პირებისთვის; დაწყებულია იუსტიციის სამინისტროს სისტემის უწყებების ოფიციალური ვებგვერდების ადაპტირების პროცესი და სხვ.

ღონისძიება იუსტიციის სამინისტროს ანალიტიკური დეპარტამენტის ორგანიზებითა და გაეროს განვითარების პროგრამის (UNDP) მხარდაჭერით გაიმართა. შეხვედრას ესწრებოდნენ შშმ პირები, მათი უფლებების დაცვაზე მომუშავე პირები და დონორი ორგანიზაციები. მათი ნაწილი პრეზენტაციაში რეგიონებიდან, დისტანციურად მონაწილეობდა.

Share
Print

სახელმწიფო სერვისების განვითარების 2022-2025 წლების სტრატეგია დამტკიცდა

ქვეყანაში მიმდინარე საჯარო მმართველობის რეფორმის ფარგლებში, საქართველოში პირველად შეიქმნა და მთავრობის მიერ დამტკიცდა სახელმწიფო სერვისების განვითარების ერთიანი სტრატეგია.


რეფორმის შედეგად, სახელმწიფო სერვისების მიწოდება მომხმარებლისათვის კიდევ უფრო მარტივი და ხელმისაწვდომი გახდება.
სახელმწიფო სერვისების განვითარების სტრატეგიის მიზანია მომხმარებელზე ორიენტირებული სერვისის შექმნის, მიწოდების, ხარისხის უზრუნველყოფისა და განფასების ახალი სტანდარტების დანერგვა.


სერვისების გამარტივებულად მიწოდების სტანდარტის შემუშავებაზე პასუხისმგებელი უწყებაა იუსტიციის სამინისტროს სსიპ -სახელმწიფო სერვისების განვითარების სააგენტო. რეფორმის მოცემული კომპონენტი გაეროს განვითარების პროგრამის (UNDP) მხარდაჭერით ხორციელდება.
სერვისების განვითარების სტრატეგია სააგენტოსა და ადგილობრივი და საერთაშორისო ექსპერტების ჩართულობით შემუშავდა. მომზადდა სტრატეგიით გათვალისწინებული ხუთი სახელმძღვანელო და ტრენინგ-მოდული და, დღეისათვის, უკვე გადამზადდა სახელმწიფო სერვისების გამცემი უწყებების 500-მდე წარმომადგენელი.


ამასთან, შეიქმნა სახელმწიფო სერვისების ხარისხის ინდექსის კონცეფცია (ასევე, ინდიკატორები და შეფასების მატრიცა) და ინდექსის გამოანგარიშების მეთოდოლოგია. იგეგმება სერვისის ინდექსის პორტალის შექმნაც.
მთავრობის მიერ სტრატეგიის დამტკიცების შემდეგ, ერთიანი მიდგომების პრაქტიკაში დანერგვით, საქართველოში სახელმწიფო მომსახურების ხარისხი კიდევ უფრო გაიზრდება.