იუსტიციის მინისტრმა რატი ბრეგაძემ მიხეილ სააკაშვილთან დაკავშირებით სტრასბურგის სასამართლოს დღეს გამოქვეყნებულ გადაწყვეტილებასთან დაკავშირებით ბრიფინგი გამართა.

,,დღეს გამოქვეყნდა სტრასბურგის სასამართლოს გადაწყვეტილება, რომლის თანახმადაც, მსჯავრდებულ მიხეილ სააკაშვილს საქმეში ,,სააკაშვილი საქართველოს წინააღმდეგ“ უარი ეთქვა ვარშავაში გადაყვანაზე და სახელმწიფოს არ დაევალა მისი ქვეყნის შიგნით სხვა სამკურნალო დაწესებულებაში გადაყვანა. ეს ყველაფერი მეტყველებს იმაზე, რომ სახელმწიფოს ყველა მოქმედება მისი შემოსახლების დღიდან იყო კორექტული და იყო ადამიანის უფლებების უმაღლესი სტანდარტების შესაბამისი. მინდა მადლობა გადავუხადო ჩვენს ყველა ღირსეულ თანამშრომელს, რომელიც განუხრელად იცავს ადამიანის უფლებებს და განსაკუთრებულ მადლიერებას იმსახურებს სამედიცინო პერსონალი, რომელიც მრავალი შეურაცხყოფის, მრავალი ცილისწამების მიუხედავად, განუხრელად ასრულებდა და ასრულებს საკუთარ მოვალეობას და დგას ადამიანის ჯანმრთელობის სადარაჯოზე“,-განაცხადა რატი ბრეგაძემ.

იუსტიციის სამინისტროს საგრანტო კონკურსში გამარჯვებული ერთ-ერთი პროექტი „სამართლის ინოვაციური ტექნოლოგიები“ დასრულდა. ციფრული ხელსაწყო (digital tool), რომელიც სამართალშემოქმედების პროცესის ავტომატიზაციას ითვალისწინებს, უკვე გამართულად ფუნქციონირებს. სამუშაო პროცესში ციფრული პლატფორმის გამოყენებისათვის რამდენიმეეტაპიანი გადამზადება გაიარეს სამინისტროს სამართალშემოქმედების დეპარტამენტის თანამშრომლებმაც. შესაბამისი სერტიფიკატები მათ იუსტიციის მინისტრის მოადგილე თორნიკე ჭეიშვილმა და პროექტის ავტორებმა გადასცეს.

ლიგალტექის პროგრამა „Logos“-ის გამოყენებით სამართლებრივი აქტების პროექტების შექმნა ამარტივებს სამართალშემოქმედებით საქმიანობასთან დაკავშირებულ პროცესს და შესაძლებელს ხდის ტექსტის გარდაქმნას სქემატურ გამოსახულებად, აგრეთვე, ნორმათა ციფრულ ვიზუალიზაციას. აღსანიშნავია, რომ მსგავს პროგრამას სამართალშემოქმედებით საქმიანობაში იყენებს გერმანიის იუსტიციის ფედერალური სამინისტრო.

პროექტის ავტორები არიან შტაინბაისის უნივერსიტეტის პრეზიდენტი, თბილისის სახელმწიფო უნივერსიტეტის პროფესორი გიორგი ხუბუა და ბტუ-ს სამართლის ტექნოლოგიების ასოცირებულ პროფესორი, სამართლის ინჟინერი ლადო სირდაძე. პროგრამის განხორციელებაში ჩართული იყო ვიადრინას უნივერსიტეტის ემერიტუსი პროფესორი, ვენის უნივერსიტეტის საპატიო პროფესორი შტეფან ბრაიდენბახი.

იუსტიციის სამინისტრო უწყების საქმიანობაში სამოქალაქო ჩართულობის გაძლიერებისათვის საგრანტო კონკურსს ყოველწლიურად აცხადებს. გასულ წელს 17 საუკეთესო პროექტი დაფინანსდა.

იუსტიციის სამინისტროს საკანონმდებლო ინიციატივა ცალკეული ხელშეკრულების რეგისტრაციისა და მისგან გამომდინარე შეუსრულებელ ვალდებულებაზე ბრძანების გამოცემის გამარტივებას ითვალისწინებს.

სერვისი ბიზნესასოციაციის წარმომადგენლებს საქართველოს იუსტიციის მინისტრის მოადგილე ერეკლე ღვინიანიძემ და სსიპ აღსრულების ეროვნული ბიუროს თავმჯდომარე მირიან ხარაბაძემ გააცნეს.

პროექტის თანახმად, აღსრულების ეროვნულ ბიუროში შესაძლებელი გახდება სასყიდლიანი ხელშეკრულების (მათ შორის, იჯარის/ქირავნობის ხელშეკრულების) რეგისტრაცია. მისი სავალდებულო პირობა იქნება მხარეთა შეთანხმება, რომ ვალდებულების დარღვევის შემთხვევაში, აღსრულების ეროვნული ბიურო, სასამართლოს გარეშე, გამოსცემს აქტებს შეუსრულებელი ფულადი ვალდებულების გადახდევინების ან/და უძრავი ნივთის გამოთხოვის შესახებ.

ახალი სერვისის მიზანი ფულადი მოთხოვნისა და უძრავ ნივთებზე მფლობელობის აღდგენის მოქნილი, სწრაფი და ხელმისაწვდომი სისტემის შექმნაა, რაც მოქალაქეებს დროისა და ფინანსური რესურსის დაზოგვის შესაძლებლობას მისცემს.

ევროკავშირის სამართალში სტუდენტური კონკურსის დასკვნითი ეტაპი სიმბოლურად ევროპის დღეების ფარგლებში ჩატარდა.

იმიტირებული პროცესი იუსტიციის სამინისტროს ინიციატივით ყოველწლიურად ტარდება. მისი მიზანი სტუდენტებს შორის ევროკავშირის სამართლის პოპულარიზაცია და ევროინტეგრაციის პროცესისადმი ინტერესის გაზრდაა. კონკურსის ფარგლებში სტუდენტები იღრმავებენ ცოდნას, ესწრებიან სპეციალურ ტრენინგებს ევროკავშირის სამართალში, ასრულებენ წერით დავალებებს. აღსანიშნავია, რომ წელს კონკურსზე ყველაზე მეტი მონაწილე – 53 გუნდი და 169 სტუდენტი დარეგისტრირდა.

სტუდენტური კონკურსის ფინალურ ეტაპზე მონაწილეობა საუკეთესო შედეგის მქონე 8 გუნდმა მიიღო. შეჯიბრების გამარჯვებული გახდა შავი ზღვის საერთაშორისო უნივერსიტეტის გუნდი თამარ ბლიაძის, მარიამ მღებრიშვილის, მანანა გაჩეჩილაძისა და ბიჭიკო დეკანოიას შემადგენლობით, იმიტირებული პროცესის საუკეთესო გამომსვლელად კი, მარიამ მღებრიშვილი დასახელდა. გამარჯვებულებს სპეციალური პრიზები – სასწავლო ლიტერატურა ევროკავშირის სამართლის შესახებ იუსტიციის მინისტრის მოადგილე ბექა ძამაშვილმა გადასცა; კონკურსის ყველა მონაწილემ კი, სპეციალური სერტიფიკატი მიიღო.

სტუდენტური შეჯიბრება იუსტიციის სასწავლო ცენტრისა და ევროკავშირის პროექტ „Facility for AA Implementation II“-ის მხარდაჭერით ჩატარდა.

ევროკავშირის შესახებ საზოგადოების ცნობიერების ამაღლება, აგრეთვე სტუდენტური პროექტების განხორციელება იუსტიციის სამინისტროს პრიორიტეტია. ღონისძიებების ორგანიზებას ამ მიმართულებებით უწყება მომავალშიც გეგმავს.

საქართველოს ევროინტეგრაციის პროცესის შესახებ ისაუბრა იუსტიციის მინისტრმა რატი ბრეგაძემ გერმანიის ფედერაციული რესპუბლიკის ბუნდესტაგის ევროპის საკითხთა კომიტეტის დელეგაციის წევრებთან შეხვედრაზე. ქართულმა მხარემ გერმანელ სტუმრებს დეტალური ინფორმაცია მიაწოდა ევროკავშირის წევრობის კანდიდატი ქვეყნის სტატუსის მისაღებად 12-პუნქტიანი რეკომენდაციების შესრულების მიმართულებით არსებულ პროგრესზე. რატი ბრეგაძემ ასევე ხაზი გაუსვა ევროკავშირის სამართალთან საქართველოს კანონმდებლობის დაახლოების მნიშვნელობას და აღნიშნა, რომ იუსტიციის სამინისტრო სრულად გაუწევს კოორდინაციას ამ პროცესს. შესაბამის საკანონმდებლო ინიციატივას პარლამენტი უკვე განიხილავს და უახლოეს პერიოდში ამოქმედდება სპეციალურად ამ მიზნით შექმნილი ელექტრონული პლატფორმა.

აღინიშნა საქართველოსა და გერმანიას შორის არსებული მჭიდრო თანამშრომლობის როლი და მნიშვნელობა ქვეყნის ევროინტეგრაციის პროცესში.

დელეგაციის წევრებმა აღნიშნეს, რომ შეხვედრიდან მიღებული შთაბეჭდილებები იმის შესახებ, თუ როგორ ასრულებს საქართველო ევროკავშირის რეკომენდაციებს, ძალიან პოზიტიურია და ქვეყანაში ამ მიზნით მიმდინარე რეფორმები დადებითად შეაფასეს.

ქართულმა მხარემ იმედი გამოთქვა, რომ ქვეყნის ევროინტეგრაციის პროცესს გერმანიის ურყევი მხარდაჭერა ექნება.

საქართველოს იუსტიციის სამინისტროს გერმანიასთან მჭიდრო სექტორული თანამშრომლობა აკავშირებს, რომელიც განსაკუთრებით გაძლიერდა 2022 წლის სექტემბერში, საქართველოს იუსტიციის მინისტრის გერმანიაში ვიზიტის შემდგომ. კერძოდ:

• გაფორმდა 2022-2025 წლების თანამშრომლობის პროგრამა ორი ქვეყნის იუსტიციის სამინისტროებს შორის;
• გაძლიერდა პარტნიორული ურთიერთობები პენიტენციურ სფეროში პროფესიული გადამზადების კურსების დახვეწის მიმართულებით;
• სანოტარო სფეროში დაიწყო გამოცდილების გაზიარების ინტენსიური პროცესი და გაფორმდა თანამშრომლობის მემორანდუმი;
• დაფუძნდა ქართულ-გერმანული სამართლებრივი ფორუმი და პირველად ის მიმდინარე წლის 5-6 ივლისს გაიმართება თბილისში.

2023 წლის სამოქმედო გეგმა 4 მიზნის, 7 ამოცანისა და 39 აქტივობისგან შედგება. ის „შეზღუდული შესაძლებლობის მქონე პირთა უფლებების შესახებ“ საქართველოს კანონით ნაკისრი ვალდებულებების შესრულების სამოქმედო გეგმას წარმოადგენს.

სამოქმედო გეგმის მიზანია „შეზღუდული შესაძლებლობის მქონე პირთა უფლებების შესახებ“ გაერო-ს კონვენციის დებულებებთან საქართველოს კანონმდებლობის შემდგომი ჰარმონიზაციის უზრუნველყოფა და შშმ პირებისათვის სამინისტროს, აგრეთვე, მის სისტემაში არსებული უწყებების ინფრასტრუქტურის, მომსახურებისა და სერვისების მისაწვდომობის გაზრდა.

რიგით მესამე სამოქმედო გეგმა საქართველოს იუსტიციის მინისტრის 28 აპრილის ბრძანებით დამტკიცდა. დოკუმენტი სამინისტროს ანალიტიკურმა დეპარტამენტმა შეიმუშავა. პროცესში მონაწილეობდნენ სამინისტროს მმართველობის სფეროში მოქმედი საჯარო სამართლის იურიდიული პირებისა და სახელმწიფო საქვეუწყებო დაწესებულების წარმომადგენლები. დოკუმენტის სამუშაო ვერსია მოსაზრებებისთვის წარედგინა საქართველოს იუსტიციის სამინისტროს შეზღუდული შესაძლებლობის მქონე პირთა საკითხებზე მომუშავე საკონსულტაციო საბჭოს, რომლის შემადგენლობაში შედიან შეზღუდული შესაძლებლობის პირთა წარმომადგენლობითი ორგანიზაციები, არასამთავრობო ორგანიზაციები და შშმ თემის წარმომადგენლები. მიღებული რეკომენდაციების უმეტესი ნაწილი აისახა სამოქმედო გეგმაში.

საკანონმდებლო ცვლილების მიზანია ევროკავშირის სამართალთან საქართველოს კანონმდებლობის დაახლოების პროცესის ეფექტიანი კოორდინაცია, რაც განსაკუთრებით მნიშვნელოვანია საქართველოს მიერ ევროპული პერსპექტივის მიღების შემდეგ.

„ნორმატიული აქტების შესახებ“ საქართველოს ორგანულ კანონში ცვლილების შედეგად, თუ პროექტი შემუშავებული იქნება ევროკავშირის სამართლებრივ აქტთან დაახლოების მიზნით, ევროკავშირის სამართალთან შესაბამისობის თაობაზე საქართველოს იუსტიციის სამინისტროს დასკვნა გახდება სავალდებულო საქართველოს მთავრობის მიერ საქართველოს პარლამენტში წარსადგენ კანონპროექტებზე; საქართველოს მთავრობის ნორმატიული აქტების პროექტებსა და სხვა ზოგიერთი კანონქვემდებარე ნორმატიული აქტის პროექტებზე.

გარდა ამისა, ნორმატიული აქტის მიმღები/გამომცემი ორგანო, რომლის ნორმატიული აქტი არ დაექვემდებარება სავალდებულო სამართლებრივ ექსპერტიზას, უფლებამოსილი იქნება, ნორმატიული აქტის პროექტი ევროკავშირის სამართლებრივ აქტთან შესაბამისობის თაობაზე სარეკომენდაციო ხასიათის სამართლებრივი დასკვნისათვის გადასცეს საქართველოს იუსტიციის სამინისტროს.

საკომიტეტო განხილვაზე აღინიშნა, რომ წარმოდგენილი საკანონმდებლო ცვლილების მიღება ქვეყნის მიერ ევროინტეგრაციისკენ გადადგმული კიდევ ერთი მნიშვნელოვანი ნაბიჯი იქნება.

რატი ბრეგაძემ ადამიანის უფლებათა ევროპულ სასამართლოში წარსადგენი სამართლებრივი პოზიციისა და მტკიცებულებების მომზადებაში შეტანილი განსაკუთრებული წვლილისთვის თანამშრომლებს მადლობა გადაუხადა და შესაბამისი სიგელები გადასცა.

2008 წლის აგვისტოს ომში საქართველოს მოსახლეობის წინააღმდეგ რუსეთის მიერ ჩადენილი დარღვევების მტკიცებულებების საფუძვლიანი ანალიზის შემდგომ საქართველოს მთავრობამ 2022 წლის 20 იანვარს სტრასბურგის სასამართლოს წარუდგინა კომპლექსური სამართლებრივი პოზიცია და მტკიცებულებები დაზარალებულ პირთა კომპენსაციასთან დაკავშირებით.

ადამიანის უფლებათა ევროპულმა სასამართლომ რუსეთის ფედერაციას 130 მილიონამდე ევროს გადახდის ვალდებულება დააკისრა ომის დროს დაზარალებული 24 000-მდე საქართველოს მოქალაქის სასარგებლოდ.

გადაწყვეტილების აღსრულების პროცედურა ევროპის საბჭოს მინისტრთა კომიტეტში გაგრძელდება და რუსეთის მიერ კომპენსაციის გადახდის შემდეგ თანხა დაზარალებულებზე განაწილდება.

საქართველოს იუსტიციის სამინისტრო მადლობას უხდის მტკიცებულებების შეგროვებაში ჩართულ სახელმწიფო უწყებებს.

საქართველოს მთავრობა კვლავაც აქტიურად გააგრძელებს სახელმწიფოს ინტერესების დაცვას საერთაშორისო სასამართლოებში, რის თაობაზეც საზოგადოება მუდმივად ინფორმირებული იქნება.