დოკუმენტი ითვალისწინებს ორ ქვეყანას შორის დარგობრივი თანამშრომლობის განვითარებას და გამოცდილების გაზიარებას ისეთ მნიშვნელოვან საკითხებში, როგორიცაა: ციფრული მმართველობის განხორციელების პოლიტიკა და სერვისების განვითარება.

ერთობლივი დეკლარაციის გაფორმებამდე იუსტიციის მინისტრმა სახელმწიფო მდივან მარიო კამპოლარგოსთან შეხვედრაზე აღნიშნა, რომ მართლმსაჯულების სისტემის მოდერნიზაცია ტექნოლოგიებისა და ინოვაციების მეშვეობით არის ყველა იმ რეფორმის ქვაკუთხედი, რომელთაც ახორციელებს როგორც საქართველოს იუსტიციის სამინისტრო, ისე იუსტიციის სისტემაში ჩართული სხვა ინსტიტუციები.

მინისტრმა აღნიშნა, რომ სწორედ ციფრული ინსტრუმენტების, ტექნოლოგიებისა და ინოვაციების გამოყენებით იუსტიციის სამინისტრო, როგორც საჯარო სერვისების მიმწოდებელი უწყება, ერთი ფანჯრის პრინციპით მთელი ქვეყნის მასშტაბით 470-ზე მეტი სერვისის მიწოდებას ახორციელებს.

მინისტრმა მობილური აპლიკაცია JustApp-ის ამოქმედებაზეც ისაუბრა, რომლის საშუალებითაც ყველა სახელმწიფო სერვისი ონლაინ რეჟიმში იქნება ხელმისაწვდომი.

მინისტრმა შეხვედრაზე ხაზი გაუსვა, რომ უწყების პრიორიტეტი სერვისების დიგიტალიზაციაზე მუშაობის გაგრძელებაა, პარტნიორ ქვეყნებთან დარგობრივი თანამშრომლობა და გამოცდილების გაზიარება კი, ხელს შეუწყობს ელექტრონული მმართველობის განვითარებას ორივე ქვეყანაში. ევროკავშირში გაწევრების გზაზე დარგობრივი თანამშრომლობის ახალი სფეროების გაძლიერება განსაკუთრებულ მნიშვნელობას იძენს ევროპულ სტანდარტებთან დაახლოების მიმართულებით.

პორტუგალიის დიგიტალიზაციისა და ადმინისტრაციული მოდერნიზაციის საკითხებში სახელმწიფო მდივან მარიო კამპოლარგოსთან შეხვედრას ესწრებოდა იუსტიციის მინისტრის მოადგილე ბექა ძამაშვილი და საქართველოს ელჩი პორტუგალიაში გიორგი მირცხულავა

პორტუგალიაში ოფიციალური ვიზიტის ფარგლებში, ასევე, გაფორმდა საქართველო-პორტუგალიის მემორანდუმი; დაგეგმილია შეხვედრა იუსტიციის ცენტრში.

იუსტიციის მინისტრი რატი ბრეგაძე, პორტუგალიაში ვიზიტის ფარგლებში, კარეგერიას ციხეში იმყოფებოდა. მინისტრმა დაწესებულების ინფრასტრუქტურა დაათვალიერა, პენიტენციური დაწესებულების ფუნქციონირების სპეციფიკას გაეცნო და შეხვედრა გამართა პენიტენციური სისტემის გენერალურ დირექტორ რუი აბრუნჰოსა გონსალვესთან.

მხარეებმა განიხილეს ისეთი საკითხები, როგორიცაა: პენიტენციური დაწესებულების ეფექტიანი მართვა; სარეაბილიტაციო, რესოციალიზაციის, დასაქმების, საგანმანათლებლო პროგრამების და სპორტული აქტივობების ხელმისაწვდომობადა სხვ.

ქართულმა დელეგაციამ დეტალური ინფორმაცია მიიღო პორტუგალიის პენიტენციურ სისტემაში მოქმედი პროექტების შესახებ და პორტუგალიურ მხარეს ქართული ინოვაციები – „რე-მარკეტი“ და „ციფრული უნივერსიტეტი“ გააცნო. რატი ბრეგაძემ რუი აბრუნჰოსა გონსალვესი საქართველოში ევროპული ტიპის პენიტენციური დაწესებულების – ლაითურის ციხის გახსნაზე მოიწვია. მხარეები თანამშრომლებისათვის ერთობლივი ტრენინგების ორგანიზებაზეც შეთანხმდნენ.

საუკეთესო ევროპული და საერთაშორისო სტანდარტების დანერგვა სასჯელაღსრულებისა და დანაშაულის პრევენციის სფეროებში საქართველოს იუსტიციის სამინისტროს ერთ-ერთი პრიორიტეტია. ამ მიზნით პარტნიორი ქვეყნების პრაქტიკის შესწავლას უწყება მომავალშიც გააგრძელებს.

ურთიერთთანამშრომლობის მემორანდუმს რატი ბრეგაძემ და კატარინა სარმენტო ე კასტრომ საქართველოს დელეგაციის პორტუგალიაში ვიზიტის ფარგლებში მოაწერეს ხელი.

დარგობრივი თანამშრომლობის გაღრმავებისა და მემორანადუმის გაფორმების შესახებ გადაწყვეტილება 2022 წლის ივლისში საქართველოსა და პორტუგალიის იუსტიციის მინისტრების შეხვედრაზე იქნა მიღებული, რომელზედაც მხარეებმა ორმხრივი ურთიერთობების განვითარებისათვის კონკრეტული ინიციატივები განიხილეს.

მემორანდუმი საქართველოსა და პორტუგალიას შორის თანამშრომლობის სხვადასხვა სფეროს მოიცავს, მათ შორის, ევროკავშირის სამართალთან საქართველოს კანონმდებლობის დაახლოების, მართლმსაჯულების დიგიტალიზაციის, დანაშაულის პრევენციის, პენიტენციურ და პრობაციის სისტემებში მსჯავრდებულთა რეაბილიტაცია-რესოციალიზაციისა და საგანმანათლებლო პროგრამების ხელმისაწვდომობის. ამ მიზნით მემორანდუმი ითვალისწინებს ორი ქვეყნის იუსტიციის სამინისტროების თანამშრომელთა გადამზადებისა და კვალიფიკაციის ასამაღლებელი პროგრამების შემუშავებას, აგრეთვე, ერთობლივი სემინარების, სასწავლო ვიზიტებისა და სამართლებრივი ფორუმების ორგანიზებას.

მემორანდუმის გაფორმებას წინ უძღოდა საქართველოსა და პორტუგალიის იუსტიციის მინისტრებს შორის შეხვედრა. რატი ბრეგაძემ და კატარინა სარმენტო ე კასტრომ ურთიერთთანამშრომლობის კონკრეტული შესაძლებლობები და სამომავლო ინიციატივები განიხილეს. შეხვედრას ესწრებოდნენ საქართველოს იუსტიციის მინისტრის მოადგილე ბექა ძამაშვილი, საქართველოს ელჩი პორტუგალიაში გიორგი მირცხულავა და მისიის ხელმძღვანელის მოადგილე ცოტნე ზურაბიანი.

პორტუგალიაში საქართველოს დელეგაცია შეხვედრებს გამართავს დიგიტალიზაციისა და ადმინისტრაციული მოდერნიზაციის საკითხებში სახელმწიფო მდივანსა და პენიტენციური სამსახურის ხელმძღვანელთან. დაგეგმილია დელეგაციის ვიზიტი პენიტენციურ დაწესებულებასა და იუსტიციის ცენტრში.

დასრულდა პროექტი „მომავალ თაობაში იურიდიული განათლების მიღების ხელშეწყობა სამართლებრივი სახელმწიფოს უსაფრთხოებისა და მისი ინსტიტუციური განვითარებისათვის“. პროექტის მონაწილეებმა – სხვადასხვა უნივერსიტეტის იურიდიული ფაკულტეტებიდან შერჩეულმა 30-მდე სტუდენტმა, ადამიანის უფლებების სფეროში 5-დღიანი ტრენინგის გავლის შემდეგ საჯარო სკოლების მოსწავლეებთან შეხვედრები გამართეს. აღსანიშნავია, რომ პროექტში ჩართული იყო არა მხოლოდ თბილისის, არამედ საქართველოს რეგიონების საგანმანათლებლო დაწესებულებებიც. დედაქალაქის გარდა, მოსწავლეებთან შეხვედრები გაიმართა ბათუმის, ლაგოდეხისა და გორის სკოლებში.

პროექტის შედეგების შეჯამება თსუ-ში შედგა. ღონისძიების მონაწილეებმა პროგრამის მნიშვნელობასა და არასრულწლოვნებში სამართლებრივი ცნობიერების ამაღლების მნიშვნელობაზე ისაუბრეს. შეხვედრის ბოლოს პროექტის მონაწილეებს – იურიდიული ფაკულტეტის სტუდენტებს და ექსპერტებს სპეციალური სერტიფიკატები გადაეცათ.

იუსტიციის სამინისტროს საგრანტო პროგრამის ფარგლებში დაფინანსებული პროექტის მიზანი საგანმანათლებლო დაწესებულებებში იურიდიული განათლების პოპულარიზაცია, სამართლებრივი კულტურის გაძლიერება, სკოლის მოსწავლეებში მართლშეგნების დონის ამაღლება და მომავალი თაობის იურისტებში პროფესიული უნარ-ჩვევების განვითარებაა. საგრანტო წინადადების წარმდგენი თინათინ წერეთლის სახელობის სამეცნიერო საზოგადოებაა.

იუსტიციის სამინისტრო უწყების საქმიანობაში სამოქალაქო ჩართულობის გაძლიერებისათვის საგრანტო კონკურსს ყოველწლიურად აცხადებს. გასულ წელს უწყებამ 17 საუკეთესო პროექტი დააფინანსა.

იუსტიციის სამინისტროს წარმომადგენლები დაფინანსებული პროექტების მიმდინარეობის მონიტორინგსა და მხარდაჭერას რეგულარულად ახორციელებენ.

საჯარო ლექციათა ციკლი თემაზე „საქართველოს სუვერენიტეტის დაცვა სამართლებრივი გზებით“ გრძელდება. იუსტიციის სამინისტროში ლექციას უძღვებოდა საერთაშორისო სასამართლოებში სახელმწიფო წარმომადგენლობის დეპარტამენტის უფროსი ნინო ნიკოლაიშვილი.

მომხსენებელმა ოკუპაციის შედეგებსა და დღეს არსებულ მდგომარეობაზე ისაუბრა. განსაკუთრებული ყურადღება დაეთმო იმ რთულ და წარმატებულ ბრძოლას, რომელსაც იუსტიციის სამინისტრო სტრასბურგსა და ჰააგაში აწარმოებდა რუსეთის წინააღმდეგ საქართველოს სუვერენიტეტისა და ტერიტორიული მთლიანობის დასაცავად.

სხვა საკითხებთან ერთად, სტუდენტებს, ასევე, განემარტათ, თუ რა მნიშვნელობა აქვს საქართველოს შემდგომი დეოკუპაციისა და სუვერენიტეტის დაცვისათვის იმ ფაქტებს, რომ სტრასბურგისა და ჰააგის სასამართლოები აღიარებენ ჩვენი ქვეყნის ტერიტორიულ მთლიანობას და ადასტურებენ რუსეთის მიერ ოკუპაციას.

ლექცია წარიმართა ინტერაქტიულ რეჟიმში, რის ფარგლებშიც მომხსენებელმა უპასუხა სტუდენტების კითხვებს და მოისმინა მათი მოსაზრებები.

საზოგადოებასთან პირისპირ კომუნიკაცია იუსტიციის სამინისტროს პრიორიტეტული მიმართულებაა. საჯარო ლექციების ციკლი 2022 წლის 26 მაისს დამოუკიდებლობის დღესთან დაკავშირებით დაიწყო და მთელი საქართველოს მასშტაბით ხორციელდება სახელმწიფო მნიშვნელობის საკითხებზე საზოგადოების ინფორმირების მიზნით.

იუსტიციის სამინისტრომ მოლდოვის რესპუბლიკის დელეგაციას სასწავლო ვიზიტით უმასპინძლა.
სასწავლო ვიზიტის ფარგლებში მოლდოვის რესპუბლიკის დელეგაციის წევრები ქართველი კოლეგებისაგან იზიარებენ გამოცდილებას იუსტიციის სამინისტროს ხელმძღვანელობით „ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ“ ევროპის საბჭოს 2011 წლის 11 მაისის კონვენციის (სტამბოლის კონვენცია) რატიფიკაციისა და შემდგომი იმპლემენტაციისთვის ჩატარებული სამუშაოების შესახებ.

საქართველოს კანონმდებლობაში განხორციელებული ცვლილებები, ცნობიერების ამაღლების ღონისძიებები ქალთა მიმართ და ოჯახში ძალადობის შესახებ, ქცევის კორექციის პროგრამები პენიტენციურ და პრობაციის სისტემებში – ეს ის საკითხებია, რომელთაც მოლდოვის დელეგაცია სასწავლო ვიზიტის ფარგლებში გაეცნო.

სასწავლო ვიზიტი ევროპის საბჭოს პროექტის ფარგლებში დაიგეგმა. ევროპის საბჭო მიიჩნევს, რომ მოლდოვის რესპუბლიკისთვის, რომელმაც სტამბოლის კონვენციის რატიფიცირება 2022 წელს მოახდინა, სამაგალითოა ფემიციდის მონიტორინგის ქართული მექანიზმი და ეროვნული კანონმდებლობის დონეზე კონვენციის იმპლემენტაციის ქართული მოდელი.

საქართველომ სტამბოლის კონვენციის რატიფიკაცია 2017 წელს დაასრულა, რის შემდეგაც აღმასრულებელი, საკანონმდებლო, სასამართლო ხელისუფლებისა და არასამთავრობო სექტორის ერთობლივი ძალისხმევითა და იუსტიციის სამინისტროს ხელმძღვანელობით შეიქმნა ქალთა მიმართ ძალადობის აღმოფხვრისა და მასზე რეაგირების ეფექტიანი საკანონმდებლო და ინსტიტუციური ინსტრუმენტები.

საქართველოს გამოცდილების გაზიარება მოლდოვის რესპუბლიკას დაეხმარება ქალთა მიმართ და ოჯახში ძალადობის პრევენციაში, ამ დანაშაულის წინააღმდეგ ეფექტიან ბრძოლასა და ძალადობის მსხვერპლთა გამოვლენაში.
სასწავლო ვიზიტი ორ ქვეყანას შორის თანამშრომლობის გაღრმავებას ემსახურება.

32 წლის წინ, 1991 წლის 31 მარტს ჩატარებული ისტორიული რეფერენდუმის მნიშვნელობაზე სამეცნიერო-საკონსულტაციო საბჭოს სხდომაზე ისაუბრეს. ეს დღე საქართველოს უახლეს ისტორიაში სამაგალითო სამოქალაქო ერთსულოვნების მაგალითია, რადგან საქართველოს მთელ ტერიტორიაზე გამართულ რეფერენდუმში მონაწილეობა მიიღეს, მათ შორის, აფხაზმა და ოსმა თანამოქალაქეებმაც, რომლებმაც საქართველოს დამოუკიდებლობის იდეას დაუჭირეს მხარი. სწორედ 31 მარტის რეფერენდუმის შედეგები დაედო საფუძვლად უზენაესი საბჭოს მიერ 1991 წლის 9 აპრილს სახელმწიფოებრივი დამოუკიდებლობის აქტის მიღებას.

სხდომაზე იმსჯელეს საქართველოს საერთაშორისოდ აღიარებულ საზღვრებში მშვიდობიანი თანაცხოვრების პერსპექტივებზე, შერიგების პოლიტიკაზე და 31 მარტის რეფერენდუმით კიდევ ერთხელ გაცხადებულ ნებაზე, რომელიც დამოუკიდებელი, ერთიანი და ძლიერი სახელმწიფოს მშენებლობას გულისხმობს.

სამეცნიერო-საკონსულტაციო საბჭოს სხდომას საქართველოს იუსტიციის მინისტრი რატი ბრეგაძე, პირველი მოადგილე თამარ ტყეშელაშვილი, მოადგილე თორნიკე ჭეიშვილი და სამინისტროსთან არსებული სამეცნიერო-საკონსულტაციო საბჭოს წევრები – უმაღლესი საგანმანათლებლო დაწესებულებების სამართლის სკოლის პროფესორები და სამართლის სხვადასხვა დარგის გამოჩენილი სპეციალისტები, დოქტორანტები და დარგის მკვლევრები ესწრებოდნენ.

რატი ბრეგაძე ევროპის საბჭოს საპარლამენტო ასამბლეის (PACE) მონიტორინგის კომიტეტის წევრებს შეხვდა. იუსტიციის მინისტრმა შეხვედრაზე სამინისტროს ფარგლებში მიმდინარე რეფორმები განიხილა და ხაზი გაუსვა PACE-ის მონიტორინგის კომიტეტთან თანამშრომლობის მნიშვნელობას სამართლის უზენაესობისა და ადამიანის უფლებების ხელშეწყობის გზაზე.

საუბარი შეეხო ადამიანის უფლებათა ევროპულ სასამართლოში საქართველოს მიერ მიღწეულ გამარჯვებებსა და საქართველოს მიმართ არსებული საჩივრების მკვეთრი კლების ტენდენციას. კერძოდ, ათი წლის წინ სტრასბურგის სასამართლოში საქართველოს წინააღმდეგ განიხილებოდა 3000-მდე საქმე, ხოლო მიმდინარე წელს - მხოლოდ 147, რაც საქართველოს მთავრობის მიერ განხორციელებული რეფორმების შედეგი და შიდა სასამართლოებისადმი მოქალაქეთა ნდობის გაძლიერების გამოხატულებაა.

შეხვედრაზე აღინიშნა, რომ სტრასბურგის სასამართლო გადაწყვეტილებების ეროვნულ დონეზე აღსრულების გაძლიერების მიზნით გასულ წელს განხორციელდა საკანონმდებლო ცვლილებები, რაც საქართველოს ხელისუფლების მიერ ევროკავშირის 12 პუნქტიდან შესრულებული ერთ-ერთი რეკომენდაცია.

მინისტრის თქმით, უწყება აგრძელებს მუშაობას ადამიანის უფლებების გაძლიერებისთვის. ამისთვის შემუშავდა ახალი პენიტენციური კოდექსი და სტრატეგია, აქტიურად მიმდინარეობს პატიმართა რესოციალიზაცია-რეაბილიტაციის პროგრამები, შეიქმნა ციფრული უნივერსიტეტი მსჯავრდებულებისთვის, გაფართოვდა დასაქმების შესაძლებლობები, შემუშავდა სპორტის მართვის სტრატეგია, ციხის გადატვირთულობის პრობლემის მოსაგვარებლად გაზაფხულის ბოლოს გაიხსნება ახალი ციხე ლაითურში.

პარლამენტის რეგიონული პოლიტიკისა და თვითმმართველობის კომიტეტს იუსტიციის სამინისტროს მიერ შემუშავებული კანონპროექტი მინისტრის მოადგილე თორნიკე ჭეიშვილმა წარუდგინა.

საკანონმდებლო ინიციატივა ეროვნული გეოპორტალის შექმნას ითვალისწინებს, რომელიც ეროვნული სივრცითი მონაცემების ინფრასტრუქტურის (NSDI) ოფიციალური ვებპორტალი იქნება. მასში აისახება შესაბამისი სივრცითი მონაცემები, რომლებსაც ფლობენ საჯარო დაწესებულებები ან, გარკვეულ შემთხვევაში, ფიზიკური ან/და კერძო სამართლის იურიდიული პირები. სივრცითი მონაცემები მარტივად გაცვლადი და ხელმისაწვდომი იქნება როგორც ცენტრალურ, ისე რეგიონულ და ადგილობრივ დონეებზე.

NSDI-ის შექმნა ხელს შეუწყობს ტრანსპორტის, ტურიზმის, გარემოსდაცვითი საკითხების რეგულირებას; სოფლის მეურნეობის, თავდაცვის, ინფრასტრუქტურული პროექტების, საგანგებო სიტუაციების, საკომუნიკაციო სისტემების, მიწის, სამთავრობო და კომუნალური სერვისების მართვას, დაგეგმარებასა და ეფექტიან ფუნქციონირებას; ინვესტიციების მოზიდვასა და ეკონომიკური აქტივობის გაზრდას.

ამასთანავე, კანონპროექტის ერთ-ერთი მიზანი ეროვნული სივრცითი მონაცემების ინფრასტრუქტურის ევროკავშირის ქვეყნების სივრცითი ინფორმაციის ერთიან ინფრასტრუქტურაში (INSPIRE) ინტეგრაციის ხელშეწყობაა.