ცხელი ხაზი2 405 505

სიახლეები

გაზიარება
ბეჭდვა

რატი ბრეგაძემ ევროპის საბჭოს მიერ ორგანიზებული მაღალი დონის კონფერენციის მონაწილეებს აღდგენითი მართლმსაჯულების განვითარების საკუთარი ხედვა გააცნო

საქართველოს იუსტიციის მინისტრმა რატი ბრეგაძემ ევროპის საბჭოს მიერ ორგანიზებული მაღალი დონის კონფერენციის მონაწილეებს აღდგენითი მართლმსაჯულების განვითარების საკუთარი ხედვა გააცნო. ეს მინისტერიალის მეორე სესიაა, რომელზედაც საქართველოს იუსტიციის მინისტრი სიტყვით გამოვიდა. მინისტერიალში „დანაშაული და სისხლის სამართლის მართლმსაჯულება – აღდგენითი მართლმსაჯულების როლი ევროპაში“ ევროპის საბჭოს საპარლამენტო ასამბლეის პრეზიდენტი რიკ დემსი, ვენეციის კომისიის პრეზიდენტი ჯანი ბუკიკიო, ევროპის საბჭოს გენერალური მდივანი მარია პეიჩინოვიჩ ბურიჩი, იტალიის იუსტიციის მინისტრი მარტა კარტაბია და ევროპის ქვეყნების იუსტიციის მინისტრები მონაწილეობენ.

საქართველოს იუსტიციის მინისტრმა აღდგენითი მართლმსაჯულების მიმართულებით საქართველოში არსებული პრაქტიკა მიმოიხილა. როგორც მან აღნიშნა, „არასრულწლოვანთა მართლმსაჯულების კოდექსის“ თანახმად, არასრულწლოვანთა მართლმსაჯულების პროცესში ჩართული ნებისმიერი პირი სპეციალიზებული უნდა იყოს ამ მიმართულებით. შესაბამისად, ადვოკატებმა, გამომძიებლებმა, პროკურორებმა, მოსამართლეებმა, პოლიციელებმა, მედიატორებმა, სოციალურმა მუშაკებმა, პრობაციის ოფიცრებმა სპეციალური ტრენინგები გაიარეს არასრულწლოვნებთან ურთიერთობის მეთოდებზე და მათთან დაკავშირებულ სხვა საკითხებზე.

რატი ბრეგაძის თქმით, მიუხედავად იმისა, რომ საქართველოში ჯერ კიდევ არ არის ხელმისაწვდომი შესაბამისი საბაკალავრო/სამაგისტრო პროგრამა, ევროკავშირთან თანამშრომლობით შემუშავდა სპეციალური სახელმძღვანელო უნივერსიტეტებისთვის აღდგენითი მართლმსაჯულების შესახებ; 2021 წელს კი, პრობაციის სისტემაში პროფესიონალთა მომზადების სახელმძღვანელოს დაემატა სპეციალური თავი აღდგენითი მართლმსაჯულების თაობაზე.

იუსტიციის მინისტრმა არასრულწლოვანთა მართლმსაჯულების პროცესში ჩართული სპეციალისტების გადამზადებაზეც ისაუბრა და აღნიშნა, რომ იუსტიციის სამინისტრომ შეიმუშავა მედიატორის რეესტრის მექანიზმი, რომელიც საშუალებას იძლევა, მომზადდნენ მედიატორები პრაქტიკული საქმიანობისთვის პროფესიული მენტორობის პროგრამის ფარგლებში; მოსამართლეების, პროკურორების, გამომძიებლების, პოლიციელებისა და სხვა პროფესიონალების გადამზადებას კი, შესაბამისი უწყებების სასწავლო ცენტრები ახორციელებენ.

რატი ბრეგაძის თქმით, მიუხედავად წინგადადგმული ნაბიჯებისა, მნიშვნელოვანია, რომ აღდგენითი მართლმსაჯულების პრინციპები, მეთოდები, პრაქტიკა და პირობები შევიდეს საუნივერსიტეტო სასწავლო გეგმებსა და სხვა საგანმანათლებლო პროგრამებში, რათა ყველა პროფესიონალს ჰქონდეს საჭირო ცოდნა და ინფორმაცია არასრულწლოვნებთან მუშაობისათვის აღდგენითი მართლმსაჯულების მიმართულებით.

იტალიაში ვიზიტის ფარგლებში საქართველოს იუსტიციის მინისტრი სიტყვით გამოვა მინისტერიალის კიდევ ერთ სესიაზე. რატი ბრეგაძემ უკვე გამართა შეხვედრა იტალიელ კოლეგასთან. პირისპირ შეხვედრებია დაგეგმილი უნგრეთის, სომხეთისა და აზერბაიჯანის იუსტიციის მინისტრებთან.

გაზიარება
ბეჭდვა

რატი ბრეგაძემ ევროპის საბჭოს მიერ ორგანიზებული მინისტერიალის მონაწილეებს „არასრულწლოვანთა მართლმსაჯულების კოდექსი“ და აღდგენითი მართლმსაჯულების ქართული მოდელი გააცნო

საქართველოს იუსტიციის მინისტრმა რატი ბრეგაძემ ევროპის საბჭოს მიერ ორგანიზებული მაღალი დონის კონფერენციის მონაწილეებს „არასრულწლოვანთა მართლმსაჯულების კოდექსი“ და აღდგენითი მართლმსაჯულების ქართული მოდელი გააცნო.

მინისტერიალში „დანაშაული და სისხლის სამართლის მართლმსაჯულება – აღდგენითი მართლმსაჯულების როლი ევროპაში“ ევროპის საბჭოს საპარლამენტო ასამბლეის პრეზიდენტი რიკ დემსი, ვენეციის კომისიის პრეზიდენტი ჯანი ბუკიკიო, ევროპის საბჭოს გენერალური მდივანი მარია პეიჩინოვიჩ ბურიჩი, იტალიის იუსტიციის მინისტრი მარტა კარტაბია და ევროპის ქვეყნების იუსტიციის მინისტრები მონაწილეობენ.

საქართველოს იუსტიციის მინისტრმა არასრულწლოვანთა მართლმსაჯულების ქართულ კოდექსზე ისაუბრა. კოდექსი არასრულწლოვანთა საუკეთესო ინტერესებს ემსახურება და მისი მიზანი კანონთან კონფლიქტში მყოფი არასრულწლოვნების რესოციალიზაცია-რეაბილიტაცია, 18 წლამდე ბრალდებულთა და მოწმეთა უფლებების დაცვა და მათი მხრიდან განმეორებითი დანაშაულის ჩადენის პრევენციაა. რატი ბრეგაძემ მინისტერიალის მონაწილეებს განრიდებისა და მედიაციის პროგრამებიც გააცნო, რომლებიც არასრულწლოვანთა და 21 წლამდე მოზარდთა მართლმსაჯულების ალტერნატიულ მექანიზმებს წარმოადგენს. ეს მექანიზმები საშუალებას აძლევს კანონთან კონფლიქტში მყოფ ახალგაზრდებს, თავიდან აირიდონ სამართლებრივი დევნა, სასჯელი და, შესაბამისად, ნასამართლობა; ამის ნაცვლად კი, არასრულწლოვან და 21 წლამდე ბრალდებულებს სპეციალურად მათზე მორგებულ ნებაყოფლობით პროგრამებში მონაწილეობას სთავაზობს.

საქართველოს იუსტიციის მინისტრმა ხაზგასმით აღნიშნა, რომ ამ სფეროში გატარებული რეფორმების შედეგად 2010-2021 წლებში 5200 არასრულწლოვანს მიეცა კიდევ ერთი შანსი, თავიდან აერიდებინათ სისხლისსამართლებრივი დევნა და ნასამართლობა. განრიდების პროგრამის დასრულებიდან 3 წლის განმავლობაში მათგან მხოლოდ 9%-მა ჩაიდინა დანაშაული, რაც პროექტების წარმატების დადასტურებაა. იტალიაში ვიზიტის ფარგლებში საქართველოს იუსტიციის მინისტრი სიტყვით გამოვა მინისტერიალის კიდევ ორ სესიაზე. რატი ბრეგაძემ უკვე გამართა შეხვედრა იტალიელ კოლეგასთან. პირისპირ შეხვედრებია დაგეგმილი უნგრეთის, სომხეთისა და აზერბაიჯანის იუსტიციის მინისტრებთან.

გაზიარება
ბეჭდვა

რატი ბრეგაძე იტალიის იუსტიციის მინისტრს შეხვდა

საქართველოს იუსტიციის მინისტრმა რატი ბრეგაძემ იტალიელ კოლეგასთან შეხვედრაზე ორი ქვეყნის იუსტიციის სამინისტროებს შორის თანამშრომლობის პერსპექტივები განიხილა. იუსტიციის მინისტრების შეხვედრა ვენეციაში ევროპის საბჭოს მიერ ორგანიზებული მინისტერიალის ფარგლებში გაიმართა.

მინისტერიალში „დანაშაული და სისხლის სამართლის მართლმსაჯულება – აღდგენითი მართლმსაჯულების როლი ევროპაში“ ევროპის საბჭოს საპარლამენტო ასამბლეის პრეზიდენტი რიკ დემსი, ვენეციის კომისიის პრეზიდენტი ჯანი ბუკიკიო, იტალიის იუსტიციის მინისტრი მარტა კარტაბია და ევროპის ქვეყნების იუსტიციის მინისტრები მონაწილეობენ. ღონისძიებაზე საქართველოს იუსტიციის მინისტრის სიტყვით გამოსვლაა დაგეგმილი.

შეხვედრაზე რატი ბრეგაძემ მარტა კარტაბიას საქართველოს იუსტიციის სამინისტროს განვითარების ათწლიანი სტრატეგია გააცნო. განსაკუთრებული ყურადღება დაეთმო ევროკავშირთან საქართველოს კანონმდებლობის ჰარმონიზაციის პროცესს და ამ კუთხით იტალიასთან თანამშრომლობის საკითხებს, პრობაციისა და პენიტენციური სისტემების რეფორმას, საჯარო სერვისების ხელმისაწვდომობას, მათ შორის, მობილური იუსტიციის სახლების ინოვაციურ პროექტს.

მხარეებმა განიხილეს ურთიერთთანამშრომლობის მემორანდუმის გაფორმების შესაძლებლობაც. ამ საკითხზე მუშაობა ინტენსიურ რეჟიმში გაგრძელდება. იგეგმება, აგრეთვე, ორი ქვეყნის სტუდენტური გაცვლითი პროგრამების ორგანიზება.

შეხვედრის ბოლოს რატი ბრეგაძემ იტალიის იუსტიციის მინისტრი საქართველოში მოიწვია.

იტალიაში ვიზიტის ფარგლებში საქართველოს იუსტიციის მინისტრი სიტყვით გამოვა მინისტერიალის სამ სესიაზე. პირისპირ შეხვედრებია დაგეგმილი უნგრეთის, სომხეთისა და აზერბაიჯანის იუსტიციის მინისტრებთან.

გაზიარება
ბეჭდვა

იუსტიციის სამინისტრომ საგრანტო კონკურსის გამარჯვებულებთან ხელშეკრულებები გააფორმა

იუსტიციის სამინისტრო საგრანტო პროგრამის ფარგლებში 14 პროექტს, ჯამში, 257 919 ლარით დააფინანსებს. კონკურსის გამარჯვებულ ორგანიზაციებსა და კერძო პირებთან შესაბამისი ხელშეკრულებები დღეს გაფორმდა.

იუსტიციის მინისტრმა რატი ბრეგაძემ გამარჯვებულებს წარმატება პირადად მიულოცა. საგრანტო პროექტები იუსტიციის სამინისტროს სისტემაში ადამიანის უფლებების გაძლიერების, ინოვაციური სერვისების დანერგვის, მსჯავრდებულთა და ყოფილ პატიმართა რეაბილიტაცია-რესოციალიზაციის ხელშეწყობისა და დანაშაულის ეფექტიანი პრევენციის მიმართულებებით იუსტიციის სამინისტრომ მიმდინარე წლის 30 ივლისს გამოაცხადა.

მასში მონაწილეობა 42-მა ორგანიზაციამ და კერძო პირმა მიიღო. საგრანტო კონკურსის მიზანი იუსტიციის სამინისტროს სისტემის საქმიანობაში სამოქალაქო საზოგადოების მონაწილეობისა და ჩართულობის გაზრდაა. გამარჯვებული პროექტებით განხორციელდება მნიშვნელოვანი ღონისძიებები და აქტივობები, რაც ხელს შეუწყობს საქართველოს იუსტიციის სამინისტროს სისტემის პრიორიტეტული მიმართულებების განვითარებას. სამოქალაქო ინიციატივების მხარდაჭერას იუსტიციის სამინისტრო მომავალშიც გააგრძელებს.

გაზიარება
ბეჭდვა

იუსტიციის მინისტრის მოადგილე: „დემოკრატიის ვარიაციების“ კვლევის ინდიკატორები იმ რეფორმების ლოგიკური შედეგია, რომლებიც ჩვენს ქვეყანაში უკანასკნელ წლებში განხორციელდა“

იუსტიციის მინისტრის მოადგილე: „დემოკრატიის ვარიაციების“ კვლევის ინდიკატორები იმ რეფორმების ლოგიკური შედეგია, რომლებიც ჩვენს ქვეყანაში უკანასკნელ წლებში განხორციელდა“.

საქართველოს მიერ მიღწეულ ხელშესახებ პროგრესზეა საუბარი ანგარიშში, რომელიც ავტორიტეტულმა კვლევითმა ცენტრმა „დემოკრატიის ვარიაციებმა“ გამოაქვეყნა. საქართველო დემოკრატიული სტატუსის მქონე ქვეყნებს შორის დემოკრატიის გრძელვადიანი (2010-2020 წწ.) გაუმჯობესების მიხედვით მსოფლიოს საუკეთესო ხუთეულში მოხვდა.

„დემოკრატიის ვარიაციების“ კვლევა დღეს იუსტიციის მინისტრის მოადგილე თორნიკე ჭეიშვილმა შეაფასა. მისი თქმით, საქართველოს პროგრესი ბოლო წლების განმავლობაში განხორციელებული რეფორმების შედეგია:​

„ავტორიტეტული საერთაშორისო კვლევის მიერ გამოქვეყნდა მორიგი ანგარიში, რომელშიც საუბარია საქართველოს მიერ მიღწეულ ხელშესახებ პროგრესზე. ანგარიშში მიმოხილულია ის დემოკრატიული რეფორმები, რომლებიც საქართველოში განხორციელდა, მათ შორის, ადამიანის ძირითადი უფლებების დაცვის კუთხით. ეს შეეხება წამებისაგან თავისუფლებას, გამოხატვის თავისუფლებას, სხვა ფუნდამენტური უფლებების ძალიან მაღალი დაცვის სტანდარტის დამკვიდრებას. მნიშვნელოვანია, რომ კვლევის ინდიკატორები წარმოადგენს ლოგიკურ შედეგს იმ რეფორმებისა, რაც ჩვენს ქვეყანაში განხორციელდა უკანასკნელი წლების განმავლობაში, აგრეთვე, საგულისხმოა, რომ არა მარტო საკანონმდებლო ბაზის სრულყოფის მიზნით, არამედ ამ რეფორმების იმპლემენტაციის მიმართულებათაც“.

თორნიკე ჭეიშვილის თქმით, მუშაობა ამ საკითხებზე გაგრძელდება, რაც ქვეყანას საშუალებას მისცემს, კვლავ მიაღწიოს წარმატებას საერთაშორისო რეიტინგებში.

„დემოკრატიის ვარიაციების

გაზიარება
ბეჭდვა

რატი ბრეგაძე: „ადამიანის სიცოცხლისა და ჯანმრთელობის ინტერესებიდან გამომდინარე, გთავაზობთ, მიხეილ სააკაშვილი გადაყვანილი იყოს გორის სამხედრო ჰოსპიტალში. ამ გადაწყვეტილებით ჩვენ ვიცავთ სხვა ადამიანების ჯანმრთელობასა და სიცოცხლესაც, რომლებიც ახლა შიმშილობენ“

იუსტიციის მინისტრი რატი ბრეგაძე პატიმარ მიხეილ სააკაშვილს აბრამიშვილის სახელობის გორის სამხედრო ჰოსპიტალში გადაყვანას სთავაზობს. განცხადება მინისტრმა დღეს გამართულ ბრიფინგზე გააკეთა:

„ადამიანის სიცოცხლის და ჯანმრთელობის ინტერესებიდან გამომდინარე, ეს არის ადგილი, სადაც მისი ჯანმრთელობა და უსაფრთხოება სახელმწიფოს მხრიდან იქნება დაცული. ამ გადაწყვეტილებით ჩვენ ვიცავთ არა მხოლოდ მიხეილ სააკაშვილის, არამედ სხვა ადამიანების ჯანმრთელობას და სიცოცხლეს, რომლებიც ახლა შიმშილობენ“.

იუსტიციის მინისტრმა გორის სამხედრო ჰოსპიტალში გადაყვანის პირობად დაასახელა პოლიტიკური ოპონენტების მხრიდან ნებისმიერი პროვოკაციული ქმედებებისგან თავის შეკავება, რამაც შეიძლება ხელი შეუშალოს პატიმრის გადაყვანას და შემდგომ სამედიცინო პერსონალის მუშაობას. წინააღმდეგ შემთხვევაში, ნებისმიერი კანონდამრღვევი უმკაცრესად აგებს პასუხს კანონის წინაშე, ხოლო მიხეილ სააკაშვილი დაბრუნდება №18 დაწესებულებაში.

„ოპონენტების მხრიდან ნებისმიერი პროვოკაციული ქმედების შემთხვევაში, რამაც შეიძლება ხელი შეუშალოს პატიმრის გადაყვანას და შემდგომ სამედიცინო პერსონალის მუშაობას, პატიმარი გადაყვანილი იქნება №18 დაწესებულებაში და ყველა კანონდამრღვევი უმკაცრესად აგებს პასუხს კანონის წინაშე“, – განაცხადა რატი ბრეგაძემ.

იუსტიციის მინისტრმა, ასევე, განაცხადა, რომ მიხეილ სააკაშვილს სტრასბურგის სასამართლომ შიმშილობის შეწყვეტისკენ დაჟინებით მოუწოდა.

„ეს არის, რა თქმა უნდა, თავად პატიმრის გადასაწყვეტი, რომ მან შეწყვიტოს შიმშილობა. ჩვენ ვეხმარებით ამ გადაწყვეტილების მიღებაში და გადაგვყავს ის გორის ჰოსპიტალში. ბუნებრივია, დანარჩენი დამოკიდებულია მის თანხმობაზე. შეირჩა გორის ჰოსპიტალი, იმიტომ, რომ ეს არის ადგილი, სადაც როგორც მისი ჯანმრთელობა, ისე უსაფრთხოება იქნება მაქსიმალურად დაცული. რაც შეეხება გარანტიებს, ეს არის, რა თქმა უნდა, შიმშილობის დაუყოვნებლივი შეწყვეტა და, ასევე, ყოველგვარ პროვოკაციაზე უარის თქმა – იქნება ეს სხვადასხვა სახის აქციები გორის ჰოსპიტალთან თუ რაიმე სხვა დესტრუქციული ქმედება, რამაც შეიძლება ხელი შეუშალოს როგორც ექიმების მუშაობას, ისე პატიმრის უსაფრთხოებას. აი ეს არის, რისკენაც მოვუწოდებთ ჩვენს ოპონენტებს“, – განაცხადა რატი ბრეგაძემ.

გაზიარება
ბეჭდვა

იუსტიციის მინისტრი: „პენიტენციურმა სისტემამ მოიწვია ექიმების დამატებითი ჯგუფები, რომლებიც სააკაშვილის ჯანმრთელობის მუდმივ მონიტორინგს ახორციელებენ; ექიმების ჯგუფი ყოველდღიურ რეჟიმში გააკეთებს განმარტებებს მისი ჯანმრთელობის მდგომარეობასთან დაკავშირებით“

იუსტიციის მინისტრის განცხადებით, მსჯავრდებულ სააკაშვილის ჯანმრთელობას ექიმების დამატებითი ჯგუფი დააკვირდება. ეს განცხადება რატი ბრეგაძემ დღეს გამართულ ბრიფინგზე განაცხადა.

„ჯანდაცვის სამინისტროსთან თანამშრომლობით, პენიტენციურმა სისტემამ მოიწვია ექიმების დამატებითი ჯგუფები, რომლებიც სააკაშვილის ჯანმრთელობის მუდმივ მონიტორინგს ახორციელებენ და მას სათანადო სამედიცინო მომსახურებას უწევენ“, – აღნიშნა მინისტრმა.

საზოგადოებრივი ინტერესის გათვალისწინებით და სააკაშვილის ჯანმრთელობის მდგომარეობის შესახებ სპეკულაციების თავიდან ასარიდებლად მედიკოსები, რომლებიც მონიტორინგს ახორციელებენ სააკაშვილის ჯანმრთელობაზე, საზოგადოებას ყოველდღიურად გააცნობენ ინფორმაციას.

„მაღალი საზოგადოებრივი ინტერესის და იმის გათვალისწინებით, რომ პატიმარ სააკაშვილის ჯანმრთელობის მდგომარეობასთან დაკავშირებით ყოველდღიურად მიზანმიმართულად ვრცელდება არასწორი ინფორმაცია, ექიმების ჯგუფი ყოველდღიურ რეჟიმში გააკეთებს განმარტებებს მისი ჯანმრთელობის მდგომარეობასთან დაკავშირებით. ამით წერტილი დაესმება ყველა დეზინფორმაციული ხასიათის ინფორმაციის გავრცელებას“, – განაცხადა რატი ბრეგაძემ.

გაზიარება
ბეჭდვა

რატი ბრეგაძე: „მათ უარი განაცხადეს სასამართლო პროცესზე ონლაინ მონაწილეობაზე, რადგან ამ ხალხს სპექტაკლი, სააკაშვილის უსაფრთხოებისთვის პრობლემის შექმნა და, როგორც თავად ამბობენ, „კარტინკის“ დადგმა სურთ“

იუსტიციის მინისტრის განცხადებით, პროკურატურამ მიხეილ სააკაშვილს შესთავაზა სასამართლო პროცესზე ონლაინ რეჟიმში დასწრება, თუმცა, მან ამაზე უარი განაცხადა. რატი ბრეგაძის თქმით, რეალურად მიხეილ სააკაშვილის თანამოაზრეებსა და მხარდამჭერებს სპექტაკლის დადგმა და მისი უსაფრთხოებისთვის პრობლემის შექმნა სურთ.

„პროკურატურამ მას შესთავაზა პროცესში მონაწილეობა და ჩვენ ამას უზრუნველვყოფდით ტექნიკურად, მაგრამ არ უნდოდათ. რატომ? –იმიტომ, რომ ამ ხალხს სპექტაკლი უნდათ, უსაფრთხოებისთვის პრობლემის შექმნა უნდათ, ე.წ. როგორც თავად ამბობენ, „კარტინკის“ დადგმა უნდათ. ისინი არ არიან მართლმსაჯულებით დაინტერესებული. მათ რომ აინტერესებდეთ სიმართლის დადგენა, თვითონვე მოითხოვდნენ ონლაინ დასწრებას. მაგრამ – არა, ყველაფერი კეთდება მიზანმიმართულად იმისთვის, რომ ის იყოს გაყვანილი გარეთ. ცდილობენ, რომ თავად ამ ადამიანის უსაფრთხოებას შეუქმნან პრობლემა. მაგრამ ჩვენ ვერცერთი პატიმრის უსაფრთხოებას ვერ დავაყენებთ საფრთხის ქვეშ“, – განაცხადა რატი ბრეგაძემ „რუსთავი 2“-ის ეთერში.

გაზიარება
ბეჭდვა

​იუსტიციის მინისტრი: „სააკაშვილის მიმართ განხორციელდა კანონით გათვალისწინებული ღონისძიება, რომლის მიზანი მისი ჯანმრთელობის რისკების მინიმალიზაცია იყო. ტერმინ „გატაცებას“ ჩვენი ოპონენტები ამკვიდრებენ საზოგადოების ცნობიერებაზე მავნე ზეგავლენის მოსახდენად“

იუსტიციის მინისტრი რატი ბრეგაძე ოპონენტების მიერ გაჟღერებულ ბრალდებას გამოეხმაურა სააკაშვილის გატაცების შესახებ და მას მავნებლური უწოდა.

„მინდა, გავაკეთო განცხადება ბოლო დღეების განმავლობაში გავრცელებულ მავნებლურ ბრალდებებზე. დავიწყებ ტერმინით „გატაცება“, რომელსაც ჩვენი ოპონენტები ამკვიდრებენ და უნდათ, რომ მოახდინონ მავნე ზეგავლენა საზოგადოებრივ ცნობიერებაზე; და უნდათ, საზოგადოება დაარწმუნონ, თითქოსდა ჩვენ ვინმე გავიტაცეთ... საერთოდ, როგორ არის შესაძლებელი, ამბობდე, რომ ერთი დაწესებულებიდან მეორე დაწესებულებაში გადაყვანა არის გატაცება... აი ეს არის მავნებლური“, – განაცხადა მინისტრმა.

იუსტიციის მინისტრმა ხაზგასმით აღნიშნა, რომ სააკაშვილის მიმართ განხორციელდა კანონით გათვალისწინებული ღონისძიება, რომლის მიზანი მსჯავრდებულის ჯანმრთელობის რისკების მინიმალიზაცია იყო:

„მან უარი განაცხადა მკურნალობის არსებით ნაწილზე და რისკი იმისა, რომ მისი ჯანმრთელობის მდგომარეობა გაუარესებულიყო, იყო მზარდი. სწორედ ჯანმრთელობის მდგომარეობის თავიდან ასარიდებლად და მსგავსი რისკების მინიმალიზაციის მიზნით მიღებულ იქნა გადაწყვეტილება, რომ იგი გადაყვანილიყო მე-18 სამკურნალო დაწესებულებაში, სადაც მასზე მეთვალყურეობა იქნებოდა ბევრად უფრო მჭიდრო და ეს რისკი იქნებოდა სრულად მინიმალიზებული.

მინისტრის თქმით, დღეს მსჯავრდებული სააკაშვილი განთავსებულია მე-18 სამკურნალო დაწესებულებაში და მასზე ზრუნავს კვალიფიციური პერსონალი.

რატი ბრეგაძემ ისაუბრა სააკაშვილის უსაფრთხოების საკითხზეც. მინისტრის თქმით, სახელმწიფო უსაფრთხოების სამსახურის ბრიფინგზე გაჟღერებული ინფორმაციით ცხადი გახდა, რომ იგეგმებოდა მსჯავრდებულის გადაყვანის ხელშეშლა, რაც თავიდან იქნა აცილებული. მან კიდევ ერთხელ გადაუხადა მადლობა პენიტენციური სამსახურის ყველა იმ თანამშრომელს, რომელმაც პატიმრის უსაფრთხოდ გადაყვანა უზრუნველყო.