იუსტიციის მინისტრ რატი ბრეგაძის განცხადებით, სპეციალურმა პენიტენციურმა სამსახურმა მიხეილ სააკაშვილის სასამართლოში არგადაყვანის გადაწყვეტილება მისი ჯანმრთელობის ინტერესების გათვალისწინებით მიიღო.

„დიახ, სპეციალურმა პენიტენციურმა სამსახურმა მიიღო ეს გადაწყვეტილება, ვინაიდან პატიმარი სააკაშვილი უარს ამბობს მკურნალობის არსებითი ნაწილის გაგრძელებაზე და შესაძლებელი იყო, რომ მისი ჯანმრთელობის მდგომარეობა გაუარესებულიყო, და ეს რომ სასამართლოში მომხდარიყო, ვინ აიღებდა ამაზე პასუხიმგებლობას?“, – განაცხადა მინისტრმა და კიდევ ერთხელ ხაზგასმით აღნიშნა, რომ უწყება მოქმედებს პატიმრის ჯანმრთელობის ინტერესებიდან გამომდინარე.

რატი ბრეგაძემ არგადაყვანის ერთ-ერთ მიზეზად უსაფრთხოების ფაქტორი დაასახელა. იუსტიციის მინისტრის თქმით, საზოგადოებამ იხილა, თუ როგორ ცდილობდა სასამართლო პროცესისათვის ხელის შეშლას სასამართლოსთან შეკრებილი ხალხი. როგორც მინისტრმა განაცხადა, მსჯავრდებულ სააკაშვილის დასწრებას პროცესზე შესაძლოა, კიდევ უფრო დაეძაბა ვითარება: „ბუნებრივია, ჩვენ მსგავსი ტიპის ქმედებებს ხელს ვერავითარ შემთხვევაში ვერ შევუწყობთ“.

იუსტიციის მინისტრმა რატი ბრეგაძემ ბრიფინგზე განაცხადა, რომ სრულად იზიარებს სტრასბურგის ადამიანის უფლებათა ევროპული სასამართლოს სულისკვეთებას. მისი თქმით, ამ გადაწყვეტილებამ კიდევ ერთხელ დაადასტურა, რომ საქართველოს პენიტენციურ უწყებაში არის ძალიან მაღალი სტანდარტი. მინისტრმა, ასევე, განმარტა, რომ მომჩივანმა მხარემ სტრასბურგის სასამართლოს მიმართა ერთი კონკრეტული მოთხოვნით – დაუყოვნებლივ მომხდარიყო მიხეილ სააკაშვილის გადაყვანა №18 სამკურნალო დაწესებულებიდან სამოქალაქო კლინიკაში, რაც სტრასბურგმა არ დააკმაყოფილა.

„საქართველოს მთავრობას სტრასბურგის სასამართლოს წერილით ეცნობა, რომ მიხეილ სააკაშვილის წარმომადგენლებმა მიმართეს ადამიანის უფლებათა ევროპულ სასამართლოს შემდეგი ერთი კონკრეტული მოთხოვნით – დაუყოვნებლივ მოხდეს მიხეილ სააკაშვილის გადაყვანა №18 სამკურნალო დაწესებულებიდან სამოქალაქო კლინიკაში. სტრასბურგის სასამართლომ მომჩივნის ზემოაღნიშნული მოთხოვნა არ დააკმაყოფილა და დაჟინებით მოუწოდა მიხეილ სააკაშვილს შიმშილობის შეწყვეტისაკენ. სტრასბურგის სასამართლოს გადაწყვეტილება არის ძალიან მისასალმებელი და ჰუმანური, რომელიც მიზნად ისახავს მსჯავრდებულის ინტერესების დაცვას. სასიხარულოა, რომ ჩვენი სულისკვეთება სრულად ემთხვევა. უწყებამ არაერთგზის განმარტა, რომ ჩვენი ინტერესია პატიმრის ჯანმრთელობის დაცვა. ამ გადაწყვეტილებით კიდევ ერთხელ დასტურდება საქართველოს პენიტენციურ უწყებაში არსებული მაღალი სტანდარტი. ჩვენ მივესალმებით და სრულად ვიზიარებთ გადაწყვეტილების სულისკვეთებას და, ცხადია, როგორც გადაწყვეტილებაშია მითითებული, 24 ნოემბრისთვის ევროპულ სასამართლოს მივაწვდით ინფორმაციას პატიმრის ჯანმრთელობისა და უსაფრთხოების თაობაზე და, რა თქმა უნდა, ასევე, გავაგრძელებთ მასზე მზრუნველობას“, – განაცხადა რატი ბრეგაძემ.

იუსტიციის მინისტრმა მიხეილ სააკაშვილის მრავალპროფილურ სამოქალაქო კლინიკაში გადაყვანის მოთხოვნას „რუსთავი 2“-ის ეთერში უპასუხა. რატი ბრეგაძის თქმით, მოხარული იქნება, თუკი მსჯავრდებული სააკაშვილი, ევროპული სასამართლოს მოწოდების შესაბამისად, შეწყვეტს შიმშილობას, ოღონდ – ყოველგვარი დათქმების გარეშე:

„ევროპულმა სასამართლომ მოუწოდა ბატონ სააკაშვილს, შეეწყვიტა შიმშილობა. ძალიან მოხარული ვიქნებით, თუ ის დათანხმდება... ოღონდ – ყოველგვარი დათქმების გარეშე. რატომ უნდა იყოს ეს ადამიანი გადაყვანილი კერძო კლინიკაში? შეუძლია, ვინმეს, ამიხსნას?“

რატი ბრეგაძის განმარტებით, შიმშილობის შეწყვეტის შემთხვევაში მსჯავრდებული სააკაშვილი მე-12 პენიტენციურ დაწესებულებაში დაბრუნდება, რადგან მისი ჯანმრთელობის გაუარესების რისკი აღარ იარსებებს.

„თუკი ადამიანი ასრულებს შიმშილობას, ეს ძალიან კარგია... ჩვენი სულისკვეთება სტრასბურგის სასამართლოს გადაწყვეტილებასთან არის აბსოლუტურად ერთიანი. ჩვენც, რა თქმა უნდა, ძალიან მოხარული ვიქნებით, თუ მისი ჯანმრთელობის მდგომარეობა იქნება სტაბილური და ის დაუბრუნდება ცხოვრების ნორმალურ რიტმს. იმ შემთხვევაში, როდესაც იქნება შესაბამისი პირობები შექმნილი, ის გადაყვანილი იქნება უკან – სპეციალური პენიტენციური სამსახურის მე-12 დაწესებულებაში, სადაც აქამდე იხდიდა სასჯელს“, – განაცხადა მინისტრმა.

სტრასბურგის სასამართლომ 10 ნოემბრის გადაწყვეტილებით არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და მოსთხოვა მას შიმშილობის შეწყვეტა.

„აქ არის სწორედ წყალგამყოფი, როდესაც ვინმე ბედავს და მსგავს ტყუილს ამბობს, როდესაც ვინმე ჩვენ გვაბრალებს წამებას. და ვინ გვაბრალებს წამებას? – ის რეჟიმი, რომელსაც პატიმრები ჩაჰყავდა და მიცვალებულებზე აბამდნენ?!“ – ამის შესახებ იუსტიციის მინისტრმა რატი ბრეგაძემ „ღამის კურიერის“ ეთერში ისაუბრა.

„მინდა, საზოგადოებამ იცოდეს სიმართლე. როდესაც ეს რეანიმობილი გაჩერდა, როგორც ამბობს ბატონი გვარამია, რომ თითქოსდა ეს რეანიმობილი ჩვენ გავაჩერეთ 30 მეტრის მოშორებით სპეციალურად, რომ, როგორც ის ამბობს, მერე გადმოგვეთრია პატიმარი და გვეთრია 30 მეტრი – რა არის? ბუნებრივია, ეს არის უკვე ღირსების შემლახავი მოპყრობა, ხომ?! თითქოსდა უნდა დაენახა ყველა სხვა პატიმარს, როგორ მიათრევდნენ სააკაშვილს, რაც არის მტკნარი სიცრუე, და ეს იხილა საზოგადოებამ – როგორ არის რეანიმობილი მიყენებული ზუსტად პირდაპირ პანდუსთან და სწორედ აქ მოხდა მისი გადმოყვანა“, – განაცხადა რატი ბრეგაძემ.

მინისტრმა აღნიშნა, რომ ეს ინფორმაცია იყო ტყუილი და მიზნად ისახავდა სახელმწიფო ინსტიტუტებზე შეტევას.

„ეს იყო მორიგი ტყუილი, რომელიც მიზნად ისახავს ძალიან საშიშ ტენდენციას და ეს არის სახელმწიფო ინსტიტუტებზე მიზანმიმართული შეტევა, დასუსტების მცდელობა, რასაც ძალიან სახიფათო და გამოუსწორებელი შედეგები შეიძლება მოჰყვეს საზოგადოებისთვის. და კიდევ ერთხელ ვამბობთ, რომ ჩვენ ნებისმიერი სცენარისთვის ვართ მზად, არ გვეშინია არც მათი ბულინგის, არც მათი ტროლების, არც მათი უზრდელური გამონათქვამების და არც მათი კუნთებზე ყურების; ამისი არავის ეშინია. ჩვენ ვართ ნებისმიერი სცენარისთვის მზად და, პირველ რიგში, იმისათვის, რომ ნებისმიერ ფასად დავიცვათ ყველა პატიმრის ჯანმრთელობა და უფლებრივი მდგომარეობა. ამაში ვერავინ შეგვიშლის ხელს“, – განაცხადა იუსტიციის მინისტრმა.

იუსტიციის მინისტრის განცხადებით, მსჯავრდებულ სააკაშვილის მე-18 პენიტენციურ დაწესებულებაში გადაყვანის პროცესი მისი უფლებების დაცვით განხორციელდა. რატი ბრეგაძემ ამის დამადასტურებლად დღეს გავრცელებული კადრები მოიყვანა.

„გავრცელდა კადრები, როდესაც მას რეანიმობილში, დაახლოებით, 15 წუთის განმავლობაში ესაუბრებოდნენ თანამშრომლები, თქვენობით ელაპარაკებოდნენ; მოუწოდებდნენ, რომ გადმოსულიყო; ეუბნებოდნენ, რომ ეს მისი ჯანმრთელობისთვის კეთდება და იქიდან მხოლოდ და მხოლოდ შეურაცხმყოფელი სიტყვების კორიანტელი მიდიოდა თანამშრომლებზე“, – აღნიშნა იუსტიციის მინისტრმა.

რატი ბრეგაძის თქმით, მსჯავრდებული სააკაშვილი შეურაცხყოფას აყენებდა ადამიანებს, რომლებიც თავდაუზოგავად შრომობენ თითოეული ჩვენგანის უსაფრხოებისათვის:

„ეს არ არის მარტივი გასაძლები, როდესაც დაუმსახურებლად იღებს ასეთ შეურაცხყოფას ადამიანი, რომელიც თითოეული ჩვენგანისთვის, ჩვენი ოჯახების უსაფრთხოებისთვის დღეს და ღამეს ასწორებს. ბუნებრივია, ჩვენ ამის უფლებას ვერავის მივცემთ; ვერცერთ პატიმარს და ვერცერთ ადამიანს, რომ ჩვენს თანამშრომელს უსამართლოდ შეეხოს და არ დაემორჩილოს მის კანონიერ მოთხოვნას“.

რაც შეეხება ძალის გამოყენებას მას შემდეგ, რაც სააკაშვილი პენიტენციური დაწესებულების თანამშრომლებს არ დაემორჩილა, იუსტიციის მინისტრის თქმით, გამოყენებული იყო „სრულიად პროპორციული ძალა“. რატი ბრეგაძემ აღნიშნა, აგრეთვე, რომ ამ ფაქტზე გამოძიებას იუსტიციის სამინისტროს გენინსპექცია და სახელმწიფო ინსპექტორის სამსახური აწარმოებენ და საბოლოო სამართლებრივ შედეგს გამოძიება დაადგენს.

იუსტიციის მინისტრმა რატი ბრეგაძემ „რუსთავი 2“-ის ეთერში ისაუბრა მიხეილ სააკაშვილის ჯანმრთელობის მდგომარეობაზე და განაცხადა, რომ, ექიმებისგან მიღებული ბოლო ინფორმაციით, მისი ჯანმრთელობის მდგომარეობა არის სტაბილური და სასიცოცხლო პარამეტრები არის ნორმაში. იუსტიციის მინისტრმა ეთერში ისაუბრა იმის შესახებ, რომ სააკაშვილის კვებასთან დაკავშირებით იუსტიციის სამინისტროში შემოვიდა სადეპუტატო შეკითხვა, რაზედაც უწყება ვალდებული იყო, გაეცა ინფორმაცია.

რატი ბრეგაძემ განაცხადა, რომ ამ ეტაპზე მიხეილ სააკაშვილის კვების რაციონი შედგება ფაფებისა და ნატურალური წვენებისგან, რაც შეადგენს საკვებ რაციონს და არ აქვს სამედიცინო დანიშნულება.

„ჩვენ მოგვმართა საქართველოს პარლამენტის წევრმა სადეპუტატო კითხვით, რომელზეც ვალდებული ვიყავით, გაგვეცა პასუხი. აქ იყო რამდენიმე კითხვა და, მათ შორის, ერთი შეკითხვა შეეხებოდა, დიახ, საკვებ პროდუქტებსაც. აქვე გეტყვით ჩვენს პასუხს და – პირველად ვამბობ ამას ეთერში, იმიტომ, რომ ამის შესახებ ჩვენ უკვე ვუპასუხეთ პარლამენტს და ეს ინფორმაცია უკვე ისედაც საჯარო გახდება – დიახ, მან თავიდან, შემოსვლისას, როდესაც მიიღო საბანკო ბარათი, და ეს ძალიან სწრაფად მოხდა, სულ რაღაც 2 დღეში, თავიდან შეიძინა გარკვეული პროდუქტები, შემდეგ უკვე, როგორც იცით, მან განაცხადა უარი ამ საკვები პროდუქტების მიღებაზე. გავიდა გარკვეული პერიოდი და ის დათანხმდა და საკუთარი სურვილით მიიღო გარკვეული ფაფები, სხვადასხვა სახის, და ნატურალური წვენები. ასევე, ის აგრძელებს იმ მედიკამენტების მიღებას, რაც გამოუწერეს ექიმებმა. ეს არის სხვადასხვა სახის ფაფები და ნატურალური წვენები. ეს არის საკვები და არა სამედიცინო დანიშნულების ფაფები, რომელსაც იღებს პატიმარი “, – განაცხადა რატი ბრეგაძემ.

იუსტიციის მინისტრმა ისაუბრა იმის შესახებ, რომ აღნიშნულ ინფორმაციას ამაგრებს მტკიცებულებები და ფაქტები. მისი თქმით, ეს ინფორმაცია უკვე გამოითხოვა პარლამენტმა და იუსტიციის სამინისტრო ვალდებული იყო, გაეცა იგი. იუსტიციის მინისტრმა არ გააკეთა კომენტარი იმის შესახებ, აქვს თუ არა მიხეილ სააკაშვილს გაკეთებული კუჭის ოპერაცია.

„რაც შეეხება რაიმე სახის ინფორმაციას, რომელიც შეიძლება ეხებოდეს ოპერაციას, ბუნებრივია, ეს არის მისი პერსონალური ინფორმაცია და ამ საკითხზე მე ვერ ვისაუბრებ“, – განაცხადა მინისტრმა.

იუსტიციის მინისტრმა, ასევე, ისაუბრა იმის შესახებ, რომ მთელი ამდენი ხნის განმავლობაში ვრცელდება არაერთი ცრუ ინფორმაცია პენიტენციურ დაწესებულებასთან დაკავშირებით, რაც საზოგადოების შეცდომაში შეყვანას ემსახურება. მინისტრის თქმით, აქ აღარ არის საუბარი მიხეილ სააკაშვილზე, რადგან ციხეში სხვა პატიმრებიც არიან და მათაც ჰყავთ ახლობლები და ოჯახის წევრები, რომლებიც განიცდიან თითოეულ ინფორმაციას, რაც ვრცელდება პენიტენციურ დაწესებულებაზე.

„აქვე კიდევ ერთხელ ხაზგასმით უნდა ვთქვა, რომ ერთხელ და სამუდამოდ ეს ხალხი უნდა შეეშვას ცრუ ინფორმაციის გავრცელებას. მთელი ამდენი ხნის განმავლობაში ჩვენ არაერთი ტყუილის მომსწრენი გავხდით, როგორ ავრცელებს ეს ხალხი ცრუ ინფორმაციას პენიტენციურ დაწესებულებებთან მიმართებით და ცდილობს, შეცდომაში შეიყვანოს საზოგადოება. აქ საუბარი აღარ არის უკვე პატიმარ სააკაშვილზე, არამედ მათ არ უნდა დაავიწყდეთ, რომ ამ დაწესებულებაში არიან სხვა პატიმრებიც და მათაც ჰყავთ ოჯახის წევრები და სხვა ახლობლები, რომლებიც განიცდიან ამ ცრუ ინფორმაციას“, – განაცხადა რატი გრეგაძემ. იუსტიციის მინისტრმა კიდევ ერთხელ ხაზგასმით თქვა, რომ სააკაშვილის ჯანმრთელობის მდგომარეობაზე უნდა ისაუბრონ ექიმებმა და არა ადვოკატებმა.

„კონსილიუმის არცერთ დასკვნაში არ ყოფილა საუბარი, რომ მიხეილ სააკაშვილს ესაჭიროება გადაუდებელი ჰოსპიტალიზაცია და, მით უმეტეს, სამოქალაქო კლინიკაში – ეს ტერმინი საერთოდ არ ყოფილა ნახსენები“, – ამის შესახებ იუსტიციის მინისტრმა რატი ბრეგაძემ „რუსთავი 2“-ის ეთერში განაცხადა.

„მე-18 დაწესებულებაში თუ მოხდება მისი გადაყვანა, და ეს მოხდება იმ შემთხვევაში, თუ საჭირო იქნება მისი ჰოსპიტალიზაცია, ბუნებრივია, მისი უსაფრთხოება იქნება დაცული. ამისთვის ყველა საჭირო ზომა არის გატარებული. ერთ-ერთი ტელევიზიის ხელმძღვანელი საუბრობდა იმაზე, რომ თითქოსდა იქ იგეგმებოდა ბუნტის მოწყობა და შემდგომში მიხეილ სააკაშვილის ლიკვიდაცია – ამასთან დაკავშირებით სთხოვა მას იუსტიციის სამინისტროს გენერალურმა ინსპექციამ, რომ მოსულიყო და მოეწოდებინა ინფორმაცია, თუმცა, მან ეს არ გააკეთა. ასევე, შემდგომში ვიხილეთ, რომ საუბარი იყო თითქოსდა გორის სამხედრო ჰოსპიტალზე და თითქოსდა ოსურ დაჯგუფებას უნდა გაეტაცებინა – ერთხელ და სამუდამოდ ამ ზღაპრებს უნდა შეეშვას ეს ხალხი. ყოველდღე ვრცელდება მსგავსი სახის ტყუილები. გავრცელდება ტყუილი – მუდამ ვპასუხობთ საზოგადოებას სიმართლით. ჩვენ მათ კი არ ვპასუხობთ, ჩვენ ძვირფას საზოგადოებას ვპასუხობთ, ეს ადამიანები დაიღალნენ... აქვე გეტყვით, როდესაც ვინმე ბედავს და წამებაზე საუბრობს; თვითონ პირიქით ხომ არ ახორციელებენ მორალურ ტერორს და იქით ხომ არ აიძულებენ პატიმარ სააკაშვილს, რომ შიმშილობა არ შეეწყვიტა?! როდესაც ღია ეთერებში მოუწოდებენ, რომ არ გაბედოს, თორემ წინააღმდეგ შემთხვევაში ის, როგორც პოლიტიკოსი, განადგურებული იქნება... დაასრულონ ერთხელ და სამუდამოდ ამ პატიმრის გამოყენება საკუთარი პოლიტიკური მიზნებისათვის. ისინი თავად ძალადობენ პატიმარ სააკაშვილზე“, – განაცხადა რატი ბრეგაძემ.

სამართლიანი და თავისუფალი არჩევნებისთვის უწყებათაშორისმა კომისიამ თვითმმართველობის არჩევნების მე-2 ტურის შემდეგ პირველი სხდომა გამართა.

კომისიის წევრებმა საარჩევნო კანონმდებლობის სავარაუდო დარღვევის ფაქტებზე იმსჯელეს, რომლებიც წინასაარჩევნო პერიოდსა და კენჭისყრის დღეს სხვადასხვა მედიასაშუალებამ გააშუქა. შესაძლო ინციდენტებზე რეაგირების შესახებ ინფორმაცია სხდომას კომპეტენტური უწყებების წარმომადგენლებმა მიაწოდეს.

თავისუფალი და სამართლიანი არჩევნებისთვის უწყებათაშორისი კომისიის მიზანი საჯარო მოსამსახურეების მხრიდან საარჩევნო კანონმდებლობის დარღვევის პრევენცია და მათზე რეაგირებაა. 8 სექტემბრიდან კომისია კვირაში ერთხელ იკრიბება და წინასაარჩევნო პროცესში მომხდარ სავარაუდო ინციდენტებს განიხილავს. კომისია ინტენსიურ რეჟიმში მუშაობას მეორე ტურის დასრულებასა და არჩევნების საბოლოო შედეგების გამოქვეყნებამდე გააგრძელებს.

უწყებათაშორისი კომისიის მე-13 სხდომა ონლაინფორმატში გაიმართა. მას იუსტიციის მინისტრის მოადგილე თორნიკე ჭეიშვილი უძღვებოდა.

იუსტიციის მინისტრ რატი ბრეგაძის შეფასებით, არჩევნებში "ნაციონალური მოძრაობის მარცხის მიზეზი არის ის "მორალური ტერორი, რომელსაც „ერთიანი ნაციონალური მოძრაობა“ არა მხოლოდ ხელისუფლებაში ყოფნის პერიოდში, არამედ 2012 წლიდან, უკვე ოპოზიციაში ყოფნის პერიოდში, ახორციელებს საზოგადოებაზე"

რატი ბრეგაძის თქმით, ადგილობრივ არჩევნებზე ქართველმა ხალხმა ნათლად გამოხატა თავისი ნება და მკაფიოდ თქვა სათქმელი. იუსტიციის მინისტრმა მადლობა გადაუხადა ყველა მხარდამჭერს, რომლებიც მივიდნენ არჩევნებზე და დააფიქსირეს თავიანთი არჩევანი.

"ჩვენ გუშინ ვიხილეთ ადგილობრივი თვითმმართველობის არჩევნების შედეგი და ეს არის 63-ით 1 „ქართული ოცნების“ სასარგებლოდ. ეს არის ძალიან მკაფიო შედეგი... შესაბამისად, ახლა საუბარი იმაზე, რომ ვიღაც ამ შედეგს ცნობს, ვიღაც არ ცნობს, არის აბსოლუტურად ზედმეტი. მოსახლეობამ თავისი სათქმელი თქვა ძალიან მკაფიოდ“, – განაცხადა მინისტრმა.

რატი ბრეგაძის შეფასებით, ოპონენტების მარცხის მიზეზი ის ძალადობა, მორალური ტერორია, რომელსაც „ნაციონალური მოძრაობა“ არა მხოლოდ ხელისუფლებაში ყოფნისას, არამედ ოპოზიციაში ყოფნის პერიოდშიც ახორციელებს საქართველოს მოქალაქეებზე.

„რა იყო ამ მარცხის მიზეზი? – ის მორალური ტერორი, რომელსაც „ერთიანი ნაციონალური მოძრაობა“ არა მხოლოდ ხელისუფლებაში ყოფნის პერიოდში, არამედ 2012 წლიდან, უკვე ოპოზიციაში ყოფნის პერიოდში, ახორციელებს საზოგადოებაზე როგორც უშუალოდ პოლიტიკოსების მხრიდან, ისე მათი ტელევიზიების მეშვეობით, როდესაც ისინი პირდაპირ ძალადობენ მოსახლეობაზე“, – აღნიშნა იუსტიციის მინისტრმა.
ოპონენტების მარცხის კიდევ ერთი მიზეზი, რატი ბრეგაძის განცხადებით, „ნაციონალური მოძრაობის“ დამოკიდებულებაა ეკლესიასთან, იმ ინსტიტუციასთან, რომლის როლი საქართველოს ისტორიაში აღიარებულია საქართველოს კონსტიტუციით.

„ჩვენ ყველამ ერთად ვიხილეთ, თუ რა დამოკიდებულება აქვს ამ პოლიტიკურ ძალას ეკლესიის მიმართ. როგორ შეურაცხყოფას აყენებს იმ ინსტიტუტს, რომლის განსაკუთრებული მნიშვნელობა აღიარებულია კონსტიტუციით და ყველამ კარგად ვიცით, თუ რა როლი აქვს მართლმადიდებელ ეკლესიას საქართველოს ისტორიაში“, – განაცხადა მინისტრმა.