სამთავრობო პროგრამით - „ევროპული სახელმწიფოს მშენებლობისთვის“ - გათვალისწინებულ, იუსტიციის სამინისტროს კომპეტენციაში შემავალ საკითხებზე რატი ბრეგაძემ მოხსენება წარადგინა და დეპუტატების კითხვებს უპასუხა.

მისი განცხადებით, დაინერგება ხელოვნური ინტელექტი სამართალშემოქმედებითი საქმიანობის, სახელმწიფოს მიერ დასადები ხელშეკრულებების სამართლებრივი ექსპერტიზის და საერთაშორისო სასამართლოებსა და არბიტრაჟებში საქმისწარმოების მიმართულებით;

გაგრძელდება საკანონმდებლო აქტების კოდიფიკაციის პროცესი; შემუშავდება მიწის საკითხებთან დაკავშირებული ერთიანი საკანონმდებლო ჩარჩო, ხანდაზმულთა უფლებრივი მდგომარეობის განმსაზღვრელი ერთიანი ნორმატიული აქტი;

ლამინირებული პირადობის მოწმობები უსასყიდლოდ ჩანაცვლდება პირადობის ელექტრონული (ID) მოწმობით;

სამართლებრივი უსაფრთხოების დაცვაში კიდევ უფრო მეტად გაძლიერდება ნოტარიუსების როლი;

ამოქმედდება ე.წ. გონიერი კონტრაქტი;

დასრულდება მიწის სისტემური რეგისტრაციის პროექტი მთელი საქართველოს მასშტაბით;

დაინერგება სარეგისტრაციო დოკუმენტაციის წინასწარი ანალიზისა და სამართლებრივი დასკვნის მომზადების ახალი სერვისი, რაც გაუმარტივებს ფიზიკურ და იურიდიულ პირებს კომპლექსური ტრანზაქციების უხარვეზოდ რეალიზაციას;

ევროკავშირის სამართალთან ჰარმონიზაციის ერთიანი სახელმწიფო პლატფორმის საშუალებით ამაღლდება ქართული სამართლის ევროკავშირის სამართალთან დაახლოების ხარისხი და ტემპი;

მეტი ინტენსიურობით გაგრძელდება ევროკავშირის სამართლებრივი აქტების ქართულ ენაზე თარგმნა;

იუსტიციის სასწავლო ცენტრის ბაზაზე შეიქმნება ევროკავშირის სამართლის ცენტრი;

კიდევ უფრო გაფართოვდება პარტნიორ სახელმწიფოებთან სამართლებრივი თანამშრომლობა;

გაიხსნება საზოგადოებასთან კომუნიკაციის სფეროში ინოვაციური პლატფორმა – „სტუდია იუსტიცია“;

2008 წლის რუსეთ-საქართველოს ომის თაობაზე ადამიანის უფლებათა ევროპული სასამართლოსა და სისხლის სამართლის საერთაშორისო სასამართლოს გადაწყვეტილებები აქტიურად იქნება გამოყენებული ყველა შესაძლო სამართლებრივ და პოლიტიკურ ფორმატში;

გაგრძელდება „სახელმწიფო სერვისების განვითარების 2022-2025 წლების სტრატეგიის“ იმპლემენტაცია და სახელმწიფო სერვისების გამცემ უწყებებში ახალი სტანდარტების დანერგვა;

გაფართოვდება იუსტიციის სახლების გეოგრაფიული არეალი; დასრულდება იუსტიციის სახლების მშენებლობა თბილისში გლდანში, ხაშურში, სამტრედიაში, თერჯოლაში, ახმეტაში, საგარეჯოში, ხელვაჩაურში, ცაიშში, ზოტში, ტოლებში, შროშასა და ჭალაში; საქართველოს სოფლებს სრულად დაფარავს 20 ერთეული მობილური იუსტიციის სახლი;

დაბა ლაითურში ახალგახსნილი, უმაღლეს სტანდარტებთან შესაბამისობაში მყოფი, მცირე ზომის პენიტენციური დაწესებულების ეტაპობრივი დატვირთვის პარალელურად, დასრულდება ახალი, მცირე ზომის პენიტენციური დაწესებულებების მშენებლობა ქალაქ რუსთავში;

ახლად მიღებული პენიტენციური კოდექსის დებულებების გათვალისწინებით, გაგრძელდება ბრალდებულთა/მსჯავრდებულთა საცხოვრებელი პირობების კიდევ უფრო გაუმჯობესება;

არსებულ პენიტენციურ დაწესებულებებში გაგრძელდება სარემონტო სამუშაოები, სპორტული ინფრასტრუქტურის გაუმჯობესება და კეთილმოწყობა;

გაგრძელდება პენიტენციური დაწესებულებების თანამშრომლების კვალიფიკაციის ამაღლება და სამუშაო პირობების გაუმჯობესება; იუსტიციის სასწავლო ცენტრის სააკაძის ახალგახსნილ ბაზაზე ჩატარდება ადგილობრივი და საერთაშორისო სწავლებები;

პენიტენციურ დაწესებულებებში გაიხსნება დამატებითი იუსტიციის სახლები;

გაგრძელდება პენიტენციური დაწესებულებებისა და სამკურნალო პენიტენციური დაწესებულების უახლესი სამედიცინო ტექნიკით აღჭურვა;

გაიზრდება პროექტ „ციფრული უნივერსიტეტის“ მასშტაბი;

გაგრძელდება სპორტის მართვის სტრატეგიის იმპლემენტაცია;

გაიზრდება პროექტ „რე-მარკეტის“ მასშტაბი და „PROBBOX“-ების რაოდენობა;

დაინერგება პრობაციონერთა საორიენტაციო კურსი;

სკოლებში ამოქმედდება დანაშაულის პრევენციის კურსი;

გაგრძელდება აღდგენითი მართლმსაჯულების პროგრამებსა და რეფერირების ცენტრის სერვისებზე ხელმისაწვდომობის ზრდა.

რატი ბრეგაძეს იურიდიულ საკითხთა, ადამიანის უფლებათა დაცვისა და სამოქალაქო ინტეგრაციის, თავდაცვისა და უშიშროების, საპროცედურო საკითხთა და წესების კომიტეტებმა ერთობლივ სხდომაზე მოუსმინეს.