ცხელი ხაზი2 405 505

სიახლეები

ხუთშაბათი, 11 ნოემბერი 2021
Share

​რატი ბრეგაძე: ,,არსებობს კადრები, სადაც ნათლად ჩანს, რომ რეანიმობილი გაჩერებულია უშუალოდ №18 დაწესებულებასთან და არა 30 მეტრის მოშორებით და მისი გადმოყვანა მოხდა უშუალოდ დაწესებულების კართან“

იუსტიციის მინისტრმა რატი ბრეგაძემ ბრიფინგზე მიხეილ სააკაშვილის გლდანის №18 მსჯავრდებულთა და ბრალდებულთა სამკურნალო დაწესებულებაში მიხეილ სააკაშვილის გადაყვანასთან დაკავშირებით ისაუბრა.

მინისტრის თქმით, პენიტენციურმა სამსახურმა მაღალი საზოგადოებრივი ინტერესიდან გამომდინარე გაასაჯაროა კადრები, სადაც ნათლად ჩანს, რომ რეანიმობილი გაჩერებულია უშუალოდ №18 დაწესებულებასთან და არა 30 მეტრის მოშორებით, როგორც ამბობდა ერთ-ერთი ადვოკატი. მისივე თქმით, მიხეილ სააკაშვილის გადმოყვანა მოხდა უშუალოდ №18 დაწესებულების კართან და იქ მას ვერავინ დაინახავდა. შესაბამისად, სააკაშვილი პატიმართა კორპუსთან არავის გაუტარებია. რატი ბრეგაძემ, ასევე, აღნიშნა, რომ თავად სააკაშვილი არ დაემორჩილა პენიტენციური სამსახურის თანამშრომლების კანონიერ მოთხოვნას და გაუწია მათ წინააღმდეგობა:

„ეს არის ძალიან დიდი სიცრუე, რომელსაც სულ რამდენიმე წუთში ვამხელთ და ნათლად გამოჩნდება, თუ სად გაჩერდა რეანიმობილი, რომლითაც გადავიყვანეთ პატიმარი სააკაშვილი №18 დაწესებულებაში და ნათლად დაინახავს საზოგადოება, რომ ეს არის გაჩერებული პირდაპირ დაწესებულების კარებთან, სადაც მათ საერთოდ ვერავინ დაინახავდა. მსგავსი ტიპის წვრილმან სიცრუეზე არის აგებული მთელი კამპანია. ეს, რაც შეეხება წამებას და არაადამიანურ მოპყრობას, რომელსაც თითქოსდა ჩვენ ვახორციელებთ ამ პატიმრის მიმართ. სწორედ ჩვენ ვიყავით, ხაზგასმით ვამბობ, ის ხალხი, რომელიც ზრუნავდა პატიმრის ჯანმრთელობაზე, ზრუნავს და, რა თქმა უნდა, მომავალშიც იზრუნებს. ჩვენი ინტერესი არის ყველა პატიმრის ჯანმრთელობის სტაბილური მდგომარეობა. აქვე ვიტყვი ერთსაც – თავად პატიმარი არ დაემორჩილა ჩვენი თანამშრომლების კანონიერ მოთხოვნას, როდესაც ის უნდა გადასულიყო რეანიმობილიდან და შესახლებულიყო ამ დაწესებულებაში“, – განაცხადა რატი ბრეგაძემ.
მინისტრის თქმით, შემოსახლებიდან დღემდე ბატონ მიხეილ სააკაშვილის ჰყავდა 179 ვიზიტორი, ის 24-საათიანი მეთვალყურეობის ქვეს იმყოფება ექიმების მხრიდან. შემოსახლებიდან ზუსტად ორ დღეში არასამუშაო საათებში დაუმზადდა საბანკო ბარათი. მას აქვს ტელევიზორი, და როდესაც ამოეწურა თანხა და უნდოდა მაცივარი, ადმინისტრაციამ, კეთილი ნების საფუძველზე, მისი ეს თხოვნაც შეასრულა.

ასევე, მუდმივ რეჯიმში, 24 საათის განმავლობაში, მასთან მორიგეობდა რეანიმობილი. იქ მორიგეობდნენ ექიმები, რომლებიც ზრუნავდნენ მის ჯანმრთელობაზე.

შეიქმნა კონსილიუმი, რათა პენიტენციურის პერსონალთან ერთად გაეწიათ გარკვეული რეკომენდაციები, რომელთაც უწყება მაქსიმალურად ითვალისწინებდა ყოველ ჯერზე. ასევე, შეიქმნა ცალკე სამუშაო ჯგუფი, რომელიც მართლაც უპრეცედენტო არის მიხეილ სააკაშვილის მდგომარეობაზე ზედამხედველობის მიზნით“.

სხვა სიახლეები

Share
Print

იუსტიციის მინისტრმა ევროკავშირის სამართლის იმიტირებული სასამართლო პროცესის გამარჯვებულები დააჯილდოვა


ყოველწლიური სტუდენტური კონკურსი ევროკავშირის სამართალში დასრულდა. იმიტირებული სასამართლო პროცესის გამარჯვებულები დღეს იუსტიციის მინისტრმა რატი ბრეგაძემ პირადად დააჯილდოვა. მინისტრმა ახალგაზრდებს წარმატება მიულოცა და აღნიშნა, რომ ევროკავშირის მიმართ ინტერესი იზრდება – წელს კონკურსში 11 უმაღლესი სასწავლებლის 36 გუნდი, ჯამში, 119 კონკურსანტი მონაწილეობდა.


შეჯიბრების მიზანი ევროკავშირის სამართლის პოპულარიზაცია და ევროინტეგრაციის პროცესისადმი ინტერესის გაზრდაა. იმიტირებული სასამართლო პროცესის მონაწილეებს კონკურსის ყოველ ეტაპზე შესაძლებლობა ჰქონდათ, გაეღრმავებინათ ცოდნა ევროკავშირის სამართალში და შეეძინათ მომავალი პროფესიისთვის საჭირო უნარ-ჩვევები. დარეგისტრირებულმა გუნდებმა სპეციალური ტრენინგები გაიარეს; წერილობით ეტაპზე გამოვლენილმა 8 საუკეთესო გუნდმა კი, შეჯიბრება მომდევნო, ზეპირ ეტაპზე გააგრძელა. თითოეული ტური მოსამართლეებისაგან შემდგარმა კოლეგიამ შეაფასა და გამარჯვებულები გამოავლინა.


შეჯიბრების გამარჯვებული თბილისის თავისუფალი უნივერსიტეტის ბაკალავრიატის საფეხურის სტუდენტთა გუნდი გახდა, რომელშიც შედიოდნენ ნიკოლოზ მოსიძე, ბექა ჭყონია, ლუკა ავაზაშვილი. იმიტირებული სასამართლო პროცესის საუკეთესო გამომსვლელი გახდა ივანე ჯავახიშვილის სახელობის თბილისის სახელმწიფო უნივერსიტეტის სტუდენტი ლუკა წიკლაური.
ღონისძიებაში მონაწილე გუნდებს სპეციალური სერტიფიკატები გადაეცათ, გამარჯვებული გუნდი კი, იუსტიციის სამინისტრომ სიმბოლური საჩუქრებითა და ევროკავშირის სამართლის შესახებ სასწავლო სახელმძღვანელოთი დააჯილდოვა. სიმბოლური საჩუქრებით დაჯილდოვდნენ საუკეთესო წერილობითი პოზიციის ავტორი და ფინალურ ეტაპზე გადასული გუნდები.
2022 წლის შეჯიბრება საქართველოს იუსტიციის სამინისტროსა და IRZ-ის მჭიდრო თანამშრომლობით ჩატარდა.

Share
Print

საქართველოში ციფრული მმართველობის გაძლიერებისთვის მიმდინარე და დაგეგმილი პროექტები საერთაშორისო კონფერენციაზე საქართველოს იუსტიციის მინისტრის პირველმა მოადგილე თამარ ტყეშელაშვილმა წარადგინა

თამარ ტყეშელაშვილმა ისაუბრა ისეთ საკითხებზე, როგორებიცაა: ხელმისაწვდომი, ეფექტიანი და გამჭვირვალე ელექტრონული სერვისების მიწოდება; თანამედროვე ინფორმაციულ-საკომუნიკაციო ტექნოლოგიების გამოყენებისას ინფორმაციული სისტემების ურთიერთთავსებადობის უზრუნველყოფა და სხვა.

„ციფრული მმართველობის განვითარება საქართველოს მთავრობის ერთ-ერთი პრიორიტეტია და ამ მხრივ საქართველო მოწინავე პოზიციებს იკავებს რეგიონში. ჩვენ მოხარული ვართ, გავუზიაროთ პარტნიორ ქვეყნებს ჩვენი გამოცდილება ამ მიმართულებით. მთავრობამ სულ ცოტა ხნის წინ დაამტკიცა სერვისების განვითარების სტრატეგია, რომლის პასუხისმგებელ უწყებად იუსტიციის სამინისტროა განსაზღვრული; სერვისების განვითარება კი, შეუძლებელია ციფრული პლატფორმების განვითარების გარეშე. შესაბამისად, ასეთი ტიპის კონფერენციები და ღონისძიებები ყოველთვის ნაყოფიერი იქნება ყველა მხარისთვის“, – აღნიშნა იუსტიციის მინისტრის პირველმა მოადგილე თამარ ტყეშელაშვილმა.


„ციფრული მმართველობის სფეროში თანამშრომლობა და შესაძლებლობათა გაძლიერება“ – ამ თემაზე საერთაშორისო კონფერენცია თბილისში დღეს გაიხსნა. მისი მიზანია ციფრული მმართველობის, სერვისებისა და ინოვაციათა თაობაზე ინფორმაციის გაცვლა, საჯარო მოხელეთა შესაძლებლობათა გაძლიერება, სახელმწიფო სერვისების მიწოდების პროცესის დახვეწა.

კონფერენცია UNDP-ის, კორეის რესპუბლიკის შინაგან საქმეთა და უსაფრთხოების სამინისტროს, ეროვნული ინფორმაციული საზოგადოების სააგენტოს (National Information Society Agency (NIA)), ასტანის სამოქალაქო სერვისების ჰაბის, მსოფლიო ბანკის, საქართველოს იუსტიციის სამინისტროსა და საქართველოს საჯარო სამსახურის ეროვნული ბიუროს ერთობლივი ჩართულობით ტარდება. საერთაშორისო კონფერენციას ესწრებიან ექვსი ქვეყნის თემატური წარმომადგენლები (სომხეთი, აზერბაიჯანი, ყაზახეთი, ყირგიზეთი, ტაჯიკეთი, უზბეკეთი).