ცხელი ხაზი2 405 505

სიახლეები

ორშაბათი, 22 მაისი , 2023
Share

იუსტიციის სამინისტროს საგრანტო პროგრამის ფარგლებში დაფინანსებული პროექტი წარმატებით დასრულდა

პროექტში „იმიტირებული სასამართლო პროცესი ადამიანის უფლებათა სამართალში“ ქვეყნის მასშტაბით სხვადასხვა უნივერსიტეტის 70-მდე სტუდენტმა მიიღო მონაწილეობა. იმიტირებული სასამართლო პროცესის გამარჯვებული თბილისის სახელმწიფო უნივერსიტეტის გუნდი გახდა. ასევე, გამოვლინდა საუკეთესო მომხსენებელი, რომელიც კავკასიის უნივერსიტეტს წარმოადგენდა.

საგანმანათლებლო პროექტისთვის გრანტი იუსტიციის სამინისტრომ გასცა და ის მიზნად ისახავს ადამიანის უფლებათა დაცვის გაძლიერებას. მონაწილე სტუდენტებს პროექტი საშუალებას აძლევს, განივითარონ იურიდიული კარიერისთვის საჭირო უნარ-ჩვევები, აიმაღლონ კვალიფიკაცია ადამიანის უფლებათა დაცვის საერთაშორისო სისტემის მიმართულებით და შექმნან საკონტაქტო ქსელი.

იმიტირებული სასამართლო პროცესის ფინალური ეტაპი საირმეში გაიმართა, რომელსაც იუსტიციის მინისტრის მოადგილე თორნიკე ჭეიშვილი, სამინისტროს ადმინისტრაციის დეპარტამენტის უფროსი მანანა ბეგიაშვილი და საერთაშორისო სასამართლოებში სახელმწიფო წარმომადგენლობის დეპარტამენტის უფროსი ნინო ნიკოლაიშვილი დაესწრნენ.

ადამიანის უფლებათა სამართალში იმიტირებული სასამართლო პროცესი „ევროპის იურისტ სტუდენტთა ასოციაცია საქართველოს“ (ELSA Georgia) ორგანიზებით განხორციელდა. პროექტი 6 თვის განმავლობაში რამდენიმე ეტაპად წარიმართა. იურიდიული ფაკულტეტების სტუდენტებმა ადამიანის უფლებათა შესახებ სალექციო კურსები მოისმინეს, დეტალურად გაეცნენ ადამიანის უფლებათა ევროპული სასამართლოს პრინციპებსა და პრაქტიკულ ასპექტებს.

წლევანდელი იმიტირებული სასამართლო პროცესის თემა ქალთა მიმართ ძალადობის წინააღმდეგ ბრძოლა და ბავშვთა უფლებები იყო.

იუსტიციის სამინისტრო უწყების საქმიანობაში სამოქალაქო ჩართულობის გაძლიერებისათვის საგრანტო კონკურსს ყოველწლიურად აცხადებს. გასულ წელს 17 საუკეთესო პროექტი დაფინანსდა. სამინისტროს წარმომადგენლები დაფინანსებული პროექტების მიმდინარეობის მონიტორინგსა და მხარდაჭერას რეგულარულად ახორციელებენ.

სხვა სიახლეები

Share
Print

ეროვნული შეჯიბრი საერთაშორისო ჰუმანიტარულ სამართალში დასრულდა

ფინალური ეტაპი 2-4 ივნისს, ყვარლის იუსტიციის სასწავლო ცენტრში გაიმართა. მასში 100-მდე კონკურსანტიდან შერჩეული 6 საუკეთესო გუნდი და 18 სტუდენტი, მონაწილეობდა.


შეჯიბრის გამარჯვებული ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის საერთაშორისო სამართლის საბაკალავრო პროგრამის გუნდი გახდა დავით ხვისტანის, ნაია სისაურისა და ციცი გიგოიძის შემადგენლობით. საუკეთესო მომხსენებლად კი ქუთაისის აკაკი წერეთლის სახელმწიფო უნივერსიტეტის სტუდენტი მარიამ მაღლაკელიძე დასახელდა.


გამარჯვებულები საქართველოს იუსტიციის მინისტრის მოადგილე ბექა ძამაშვილმა და წითელი ჯვრის საერთაშორისო კომიტეტის ხელმძღვანელმა საქართველოში ანნ მონტავონმა დააჯილდოვეს. ფინალური ეტაპის თითოეულ მონაწილეს კი სერტიფიკატები და თემატური ლიტერატურა გადაეცა.ეროვნული შეჯიბრი საერთაშორისო ჰუმანიტარულ სამართალში იუსტიციის სამინისტროს, იუსტიციის სასწავლო ცენტრისა და წითელი ჯვრის საერთაშორისო კომიტეტის მხარდაჭერით ჩატარდა. სტუდენტური პროექტების ორგანიზებას საერთაშორისო სამართლის მიმართულებით იუსტიციის სამინისტრო მომავალშიც გაგრძელებს.

Share
Print

იუსტიციის მინისტრის პირველმა მოადგილემ პაკისტანის საგარეო საქმეთა სახელმწიფო მდივანთან შეხვედრა გამართა

თამარ ტყეშელაშვილმა ასად მაჯიდ ხანთან ორ ქვეყანას შორის დარგობრივი თანამშრომლობის საკითხები განიხილა და ხაზი გაუსვა საერთაშორისო საზოგადოების მხრიდან საქართველოს ტერიტორიული მთლიანობის მხარდაჭერის მნიშვნელობას.

მინისტრის პირველმა მოადგილემ პაკისტანის დელეგაციას იუსტიციის სამინისტროს საქმიანობის ძირითადი პრიორიტეტები გააცნო.

პაკისტანის მხარემ გამოთქვა სურვილი, გაიზიაროს საქართველოს გამოცდილება სერვისების მიწოდებისა და დიგიტალიზაციის კუთხით.
საუბარი, ასევე, შეეხო სახელმწიფო პოლიტიკას მიგრაციის მიმართულებით.

შეხვედრას ესწრებოდნენ სახელმწიფო სერვისების განვითარების სააგენტოს ხელმძღვანელი ქეთევან ბეთლემიძე, საქართველოში პაკისტანის საგანგებო და სრულუფლებიანი ელჩი ბილალ ჰაიე და პაკისტანის საგარეო საქმეთა სამინისტროს მე-3 ევროპული დეპარტამენტის დირექტორი ალი შაჰიდი.