ცხელი ხაზი2 405 505

სიახლეები

პარასკევი, 24 ნოემბერი , 2023
გაზიარება

ადამიანით ვაჭრობის (ტრეფიკინგის) თემაზე ეროვნული სიმულაციური ტრენინგი განხორციელდა

რიგით მეორე ეროვნული სიმულაციური ტრენინგის – „ადამიანით ვაჭრობის წინააღმდეგ ბრძოლა: უწყებათაშორისი თანამშრომლობის მდგრადობა ეროვნული სიმულაციური ტრენინგის განხორციელების გზით“ – დახურვის ღონისძიება გაიმართა.

ეროვნული სიმულაციური ტრენინგის მიზანი მსხვერპლზე ორიენტირებული მიდგომისა და უწყებათაშორისი კოორდინაციისა და თანამშრომლობის განხორციელების მიმართულებით სფეროში დასაქმებული პრაქტიკოსების უნარ-ჩვევების ამაღლებაა, რაც, თავის მხრივ, ხელს შეუწყობს დანაშაულის დროულ გამოვლენასა და მსხვერპლთა/დაზარალებულთა საზოგადოებაში ეფექტიან ინტეგრაციას.

ტრენინგი უნიკალური შესაძლებლობაა გამომძიებლებისთვის, პროკურორებისთვის, შრომის ინსპექტორებისთვის, იურისტებისთვის, ფსიქოლოგებისა და სოციალური მუშაკებისთვის, სიმულაციურად შექმნილ, მაქსიმალურად რეალურ და, ამავდროულად, უსაფრთხო გარემოში ჩაერთონ ადამიანით ვაჭრობის შემთხვევის გამოვლენისა და მასზე შემდგომი რეაგირების პროცესში.

აღსანიშნავია, რომ საქართველო არის ერთ-ერთი პირველი სახელმწიფო, სადაც სიმულაციური ტრენინგი ადამიანით ვაჭრობის (ტრეფიკინგის) წინააღმდეგ ბრძოლის მიმართულებით სწავლების ერთ-ერთ წარმატებულ მეთოდად დაინერგა. პირველი ტრენინგი 2022 წელს ჩატარდა. წელს საქართველოში მეორედ განხორციელდა მსგავსი სწავლება, რაც მიუთითებს იმაზე, რომ ადამიანით ვაჭრობის (ტრეფიკინგის) წინააღმდეგ ბრძოლა საქართველოს ხელისუფლების ერთ-ერთი პრიორიტეტული მიმართულებაა.

აღსანიშნავია, რომ ადამიანით ვაჭრობის (ტრეფიკინგის) წინააღმდეგ ბრძოლის მიმართულებით საქართველო უკვე მე-9 წელია, ერთ-ერთ მოწინავე პოზიციას იკავებს მსოფლიოს მასშტაბით. ამერიკის სახელმწიფო დეპარტამენტის ბოლო, 2023 წლის ანგარიშის თანახმად, საქართველო არაერთი ევროპული ქვეყნის გვერდით კვლავ ინარჩუნებს ადგილს შეფასების უმაღლეს საფეხურზე, ე.წ. პირველ კალათაში.

ღონისძიება საქართველოში ევროპის უშიშროებისა და თანამშრომლობის ორგანიზაციისა (ეუთო) და საქართველოში შვეიცარიის საელჩოს ფინანსური მხარდაჭერით განხორციელდა.

ეროვნული სიმულაციური ტრენინგი გაიმართა ადამიანით ვაჭრობის (ტრეფიკინგის) წინააღმდეგ ბრძოლის უწყებათაშორისი საკოორდინაციო საბჭოს ფარგლებში. მისი პარტნიორები არიან: იუსტიციის სამინისტრო, შინაგან საქმეთა სამინისტრო, გენერალური პროკურატურა, ფინანსთა სამინისტროს საგამოძიებო სამსახური, შრომის ინსპექციის სამსახური, სახელმწიფო ზრუნვისა და ტრეფიკინგის მსხვერპლთა დაზარალებულთა დახმარების სააგენტო, შინაგან საქმეთა სამინისტროს აკადემია, არასამთავრობო ორგანიზაცია „ძალადობისგან დაცვის ეროვნული ქსელი“ და საქართველოს შოთა რუსთაველის თეატრისა და კინოს სახელმწიფო უნივერსიტეტი.

სიმულაციური ტრენინგი 20 ნოემბერს დაიწყო და 24 ნოემბერს დასრულდა.

სხვა სიახლეები

გაზიარება
ბეჭდვა

იუსტიციის მინისტრის პირველმა მოადგილემ მსოფლიო ბანკის წარმომადგენლებთან თანამშრომლობის გაღრმავების მიმართულებები განიხილა

თამარ ტყეშელაშვილმა და ადრიან ფოზარდმა გამოთქვეს მზაობა, გააღრმაონ პარტნიორული ურთიერთობები სამართლის უზენაესობისა და საჯარო სერვისების გაცემის სფეროებში და შემდგომი თანამშრომლობის კონკრეტული ინიციატივები განიხილეს.

იუსტიციის მინისტრის პირველმა მოადგილემ და მინისტრის მოადგილე ბექა ძამაშვილმა მსოფლიო ბანკის წარმომადგენელს ინფორმაცია მიაწოდეს იუსტიციის სამინისტროში დანერგილი ინოვაციური პროექტის - „მობილური იუსტიციის სახლის" შესახებ. განსაკუთრებული ყურადღება დაეთმო პენიტენციურ დაწესებულებებში იუსტიციის სახლების ფილიალების არსებობას, რომელსაც ანალოგი მსოფლიოს არცერთ სხვა ქვეყანაში არ აქვს.

საუბარი შეეხო იუსტიციის სამინისტროს საქმიანობის ისეთ მიმართულებებს, როგორიცაა: ეფექტიანი და სწრაფი სახელმწიფო სერვისების ხელმისაწვდომობის უზრუნველყოფა; პენიტენციური სისტემის რეფორმა და სხვა.

თამარ ტყეშელაშვილმა აღნიშნა, რომ იუსტიციის სამინისტროსა და მსოფლიო ბანკს თანამშრომლობის წარმატებული გამოცდილება აქვთ. კერძოდ,

ირიგაციისა და მიწის ბაზრის განვითარების პროექტის კომპონენტი, მსოფლიო ბანკის შეფასებით, საჯარო რეესტრმა წარმატებით დაასრულა.

2023 წლიდან მსოფლიო ბანკისა და საქართველოს მთავრობის ერთობლივი დაფინანსებით ხორციელდება პროექტი, რომლის ფარგლებში, საჯარო რეესტრის ეროვნული სააგენტო წარმატებით ნერგავს მიწის ადმინისტრირების ინოვაციურ ტექნოლოგიებს და მუშაობს ეროვნული სივრცითი მონაცემების ერთიანი ინფრასტრუქტურისა (NSDI) და გეოპორტალის შექმნაზე.

საქართველოს მთავრობისა და მსოფლიო ბანკის თანადაფინანსებით საჯარო რეესტრის მონაწილეობით მიმდინარეობს GRAIL-ის პროექტი.

შეხვედრას, ასევე, ესწრებოდნენ საჯარო რეესტრის ეროვნული სააგენტოს თავმჯდომარე დავით დევიძე და იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის ხელმძღვანელი ქეთი სარაჯიშვილი.

გაზიარება
ბეჭდვა

ეროვნული არქივის საგამოფენო დარბაზში იუსტიციის სამინისტროს სისტემის თანამშრომელთა ნამუშევრების საქველმოქმედო გამოფენა-გაყიდვა გაიხსნა

ექსპოზიციაზე ხელნაკეთი ნივთები, თექასა და ტილოზე შესრულებული ნახატებია წარმოდგენილი, რომელთა რეალიზაციით მიღებული თანხის ნაწილი არასრულწლოვანთა რეფერირების ცენტრის ბენეფიციარებს მოხმარდება.

საქველმოქმედო აქციაში მონაწილეობა შენაძენის გარეშე, მხოლოდ თანხის გაღებითაც არის შესაძლებელი, რისთვისაც საგამოფენო დარბაზში სპეციალური ყუთია განთავსებული.

ღონისძიება მე-3 წელია, იმართება და უკვე ტრადიციად იქცა. წელს ნამუშევრები იუსტიციის სამინისტროს 70-ზე მეტმა თანამშრომელმა წარმოადგინა.

გამოფენა "ხელოვანი იუსტიციელები" იუსტიციის მინისტრმა რატი ბრეგაძემ მოადგილეებთან ერთად დაათვალიერა. მინისტრმა ხაზი გაუსვა ქველმოქმედების მნიშვნელობას რეფერირების ცენტრის არასრულწლოვნებისათვის და მადლობა გადაუხადა ყველას, ვინც აქციაში ჩაერთო.

საქართველოს ეროვნული არქივის საგამოფენო სივრცე დამთვალიერებლებს 1-2 მარტს, 11.00-დან 19.00 საათამდე უმასპინძლებს.