ცხელი ხაზი2 405 505

სიახლეები

შაბათი, 16 ოქტომბერი 2021
Share

საქართველო-ევროკავშირის ასოცირების ქვეკომიტეტმა საქართველოს მიერ სამართლის უზენაესობის, მართლმსაჯულებისა და უსაფრთხოების გაძლიერებისთვის განხორციელებული რეფორმები განიხილა

2021 წლის 15 ოქტომბერს გაიმართა მართლმსაჯულების, თავისუფლების და უსაფრთხოების საკითხებზე საქართველო-ევროკავშირის ასოცირების ქვეკომიტეტის მეშვიდე შეხვედრა. ქვეკომიტეტის შეხვედრები, როგორც წესი, იმართება ყოველ წელს, მონაცვლეობით - თბილისსა და ბრიუსელში. მიმდინარე წელს ქვეკომიტეტის შეხვედრა გაიმართა ონლაინ რეჟიმში.

საქართველო-ევროკავშირის ასოცირების თანამშრომლობის ფარგლებში თავისუფლების, უსაფრთხოებისა და მართლმსაჯულების ქვეკომიტეტის შეხვედრა წარმოადგენს საქართველო-ევროკავშირს შორის ინსტიტუციონალური თანამშრომლობის მნიშვნელოვან შემადგენელ ნაწილს, რომლის ფარგლებშიც განიხილება ისეთი საკითხები, როგორიცაა: სამართლის უზენაესობის, სასამართლო სისტემის და სამართალდამცავი ორგანოების რეფორმა; ორგანიზებული დანაშაულის და სხვა მართლსაწინააღმდეგო ქმედებების საკითხები (მათ შორის, ფულის გათეთრება და ტერორიზმთან ბრძოლა); სამოქალაქო და სისხლის სამართლის საქმეებზე სამართლებრივი თანამშრომლობა; მიგრაციის, თავშესაფრისა და საზღვრის მართვის საკითხები და სხვ. ხაზი გაესვა საქართველოს მიერ წარმატებით განხორციელებულ საქმიანობას კორუფციის, ტრეფიკინგის, ნარკოტიკების წინააღმდეგ ბრძოლის მიმართულებით, ასევე პენიტენციურ სისტემაში განხორციელებულ და მიმდინარე რეფორმებს.

შეხვედრის მიზანს წარმოადგენს ევროკავშირს მიეწოდოს ინფორმაცია იმ რეფორმებსა და მიღწევების შესახებ, რომელიც ხორციელდება სამართლის უზენაესობის, მართლმსაჯულებისა და უსაფრთხოების გაძლიერებისათვის.
ქვეკომიტეტის სხდომას ქართული მხრიდან კოორდინაციას უწევს საქართველოს იუსტიციის სამინისტრო და მასში მონაწილეობას იღებენ საქართველოს პარლამენტის; საქართველოს მთავრობის ადმინისტრაციის; საქართველოს შინაგან საქმეთა სამინისტროს; საქართველოს სახელმწიფო უსაფრთხოების სამსახურის; საქართველოს საგარეო საქმეთა სამინისტროს; საქართველოს მთავარი პროკურატურის; საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს; ფინანსური მონიტორინგის სამსახურის; სახელმწიფო სერვისების განვითარების სააგენტოს; იუსტიციის უმაღლესი საბჭოს; სახელმწიფო ინსპექტორის აპარატის წარმომადგენლები.

ევროკავშირის მხრიდან ქვეკომიტეტის შეხვედრაზე მონაწილეობა მიიღეს ევროკომისიის, ევროკავშირის საგარეო ქმედებათა სამსახურისა და საქართველოში ევროკავშირის დელეგაციის წარმომადგენლებმა.

სხვა სიახლეები

Share
Print

​რატი ბრეგაძე ახალ წელს სპეციალური პენიტენციური სამსახურის თანამშრომლებთან ერთად შეხვდა

​იუსტიციის მინისტრმა, მისმა მოადგილეებმა - თამარ ტყეშელაშვილმა, ბექა ძამაშვილმა, და სპეციალური პენიტენციური სამსახურის ხელმძღვანელმა ნიკა ცხვარაშვილმა ახალი წლის დადგომა პენიტენციური სამსახურის თანამშრომლებთან ერთად აღნიშნეს.

ისინი 2022 წელს ქალაქ რუსთავში, გარე დაცვის თანამშრომლებსა და წვევამდელებთან ერთად შეხვდნენ, რომლებიც პენიტენციური სამსახურის გარე დაცვის ბაზაზე მსახურობენ. იუსტიციის მინისტრმა მათ ქვეყნისთვის გაწეული სამსახურისთვის მადლობა გადაუხადა და წარმატებული წელი უსურვა. იუსტიციის სამინისტრო კიდევ ერთხელ გილოცავთ ახალ წელს.

Share
Print

რატი ბრეგაძე: „თავდაცვის მინისტრის მოადგილეობის დროს მკურნალობის მიზნით თავად ვიმყოფებოდი გორის ჰოსპიტალში; ეს არის ნამდვილად არაჩვეულებრივი, პატრიოტი ადამიანებისაგან დაკომპლექტებული სამედიცინო დაწესებულება“

„დარწმუნებული ვარ, რომ იქ ყველა პროცედურა არის დაცული. მე თავად გახლდით გარკვეული პერიოდის განმავლობაში თავდაცვის მინისტრის მოადგილე, მათ შორის, მკურნალობის მიზნითაც ვიმყოფებოდი გორის ჰოსპიტალში გარკვეული პერიოდით და, აქვე ვისარგებლებ შემთხვევით და ძალიან დიდ მადლობას გადავუხდი თითოეულ ექიმს და, ზოგადად, სამედიცინო პერსონალს, ვინც მუშაობს ამ დაწესებულებაში. ეს არის ნამდვილად არაჩვეულებრივი, პატრიოტი ადამიანებისაგან დაკომპლექტებული სამედიცინო დაწესებულება და, ღრმად ვარ დარწმუნებული, რომ ისინი მოქმედებენ ყოველთვის პაციენტის საუკეთესო ინტერესიდან გამომდინარე“, – ამის შესახებ იუსტიციის მინისტრმა რატი ბრეგაძემ დღეს გამართულ ბრიფინგზე ისაუბრა.

მინისტრის თქმით, ყოველგვარი სპეკულაცია იმის შესახებ, რომ თითქოსდა სამედიცინო პერსონალმა შეიძლება იქ მიიღოს არასწორი გადაწყვეტილება, არის, უბრალოდ, სირცხვილი.

„ყოველთვის უნდა ახსოვდეს მათ, ვინც მსგავსი ტყუილების გავრცელებას ცდილობს, თუ რას ემსახურებოდა ეს ხალხი 2008 წლის ომიდან დაწყებული დღემდე. ისინი ემსახურებიან ჩვენს ჯარს, რომელიც ძალიან გვეამაყება, და ამიტომ ძალიან გთხოვთ, ყველამ შეიკავოს თავი ყოველგვარი სპეკულაციისაგან. და მე რომ ვიყო მათი ადვოკატების ადგილზე, ძალიან დიდ მადლობას გადავუხდიდი იმ მკურნალობისა და ღვაწლისთვის, რაც გამოიჩინეს კონკრეტულად ამ პატიმრის მიმართ. ეტყობა, ეს არის მადლიერების ახალი ფორმა, რომელსაც მიმართავენ, სამწუხაროდ, ჩვენი ოპონენტები“, – განაცხადა რატი ბრეგაძემ.