ღონისძიებები

ხუთშაბათი, 03 ნოემბერი 2022

რატი ბრეგაძე ოფიციალური ვიზიტით ავსტრიის რესპუბლიკაში იმყოფება

ავსტრიაში მიმდინარე ოფიციალური ვიზიტის ფარგლებში, იუსტიციის მინისტრმა რატი ბრეგაძემ პირველი შეხვედრა ავსტრიის რესპუბლიკის პენიტენციური სამსახურის გენერალურ დირექტორ ფრიდრიხ ალექსანდერ კიონიგთან გამართა.

მხარეებმა ერთმანეთს, პენიტენციური სამსახურების მიმართულებით გამოცდილება და არსებული ცოდნა გაუზიარეს.

მინისტრმა შეხვედრაზე საქართველოს პენიტენციურ და პრობაციის სისტემებში არსებულ მიღწევებზე ისაუბრა. მან ავსტრიულ მხარეს ინოვაციური საგანმანათლებლო პროექტის „ციფრული უნივერსიტეტის“ შესახებ ინფორმაცია მიაწოდა, რომელიც ზრდის მსჯავრდებულების განათლებაზე ხელმისაწვდომობას.

საქართველოს იუსტიციის სამინისტრო გეგმავს, კიდევ უფრო გააღრმაოს თანამშრომლობა ავსტრიის რესპუბლიკასთან პენიტენციური და პრობაციის სისტემის მართვის მიმართულებით, რაც ქვეყანას საშუალებას მისცემს, განავითაროს რეაბილიტაციისა და რესოციალიზაციის პროგრამები, საკნის გარე აქტივობები; პატიმართა დასაქმების, საგანმანათლებლო და სპორტული პროგრამები.

შეხვედრაზე, რატი ბრეგაძემ აღნიშნა, რომ საუკეთესო ევროპულ სტანდარტებზე სწორება საქართველოს იუსტიციის სამინისტროს სტრატეგიულ პრიორიტეტს წარმოადგენს და ის სამინისტროს 10-წლიანი განვითარების გეგმაშიცაა ასახული.

იუსტიციის მინისტრმა კმაყოფილება გამოთქვა, რომ პენიტენციური და პრობაციის სისტემების მართვის სფეროში თანამშრომლობა გაღრმავდება და ავსტრიის იუსტიციის სამინისტროსთან შესაბამისი მემორანდუმი გაფორმდება. მან ასევე აღნიშნა, რომ ევროპელ კოლეგებთან სექტორული თანამშრომლობის გაღრმავება განსაკუთრებით მნიშვნელოვანია საქართველოს ევროინტეგრაციის გზაზე, მით უფრო, ევროპული პერსპექტივის მიღების შემდგომ.

შეხვედრაზე მცირე ზომის პენიტენციური დაწესებულებების მშენებლობაზეც ისაუბრეს. საქართველოში 700-მდე მსჯავრდებულზე გათვლილი პირველი მცირე ზომის დაწესებულება ლაითურში გაიხსნება. იუსტიციის მინისტრმა ფრიდრიხ ალექსანდერ კიონიგი საქართველოში ლაითურის ციხის გახსნის ცერემონიალზეც მოიწვია.

ფრიდრიხ ალექსანდერ კიონიგმა აღნიშნა, რომ მისთვის პატივი იყო საქართველოს იუსტიციის მინისტრთან შეხვედრა. „ჩემთვის დიდი პატივი იყო, შევხვედროდი საქართველოს იუსტიციის მინისტრს და მის დელეგაციას, რათა გვესაუბრა საქართველოსა და ავსტრიის პენიტენციურ სისტემებსა და იმ საკითხებზე, რომლებიც ყველას გვაწუხებს. მე მჯერა, რომ ერთმანეთისგან ბევრი რამის სწავლა შეგვიძლია და ამ შეხვედრით ორივე მხარე დიდად კმაყოფილი ვართ“,- განაცხადა კიონიგმა.

შეხვედრას ესწრებოდნენ იუსტიციის მინისტრის მოადგილეები ბუბა ლომუაშვილი, თორნიკე ჭეიშვილი, სპეციალური პენიტენციური სამსახურის უფროსი ნიკა ცხვარაშვილი და საქართველოს საგანგებო და სრულუფლებიანი ელჩი ავსტრიის რესპუბლიკაში ქეთევან ციხელაშვილი. See less

სტრასბურგის სასამართლომ გიორგი მამალაძის განაჩენი კანონიერად მიიჩნია

ადამიანის უფლებათა ევროპულმა სასამართლომ გიორგი მამალაძის მიმართ გამოტანილი განაჩენი კანონიერად მიიჩნია და მომჩივნის პრეტენზია მორალური კომპენსაციის მინიჭების თაობაზე არ დააკმაყოფილა.

სტრასბურგის სასამართლოს წინაშე გიორგი მამალაძე დაობდა, რომ დაირღვა სამართლიანი სასამართლო განხილვის უფლება მტკიცებულებების („ნატრიუმის ციანიდის“) მოპოვების გარემოებების გამო. იგი, აგრეთვე, ასაჩივრებდა მის მიმართ მიმდინარე სასამართლო პროცესის სრულად დახურვის საკითხს და ამტკიცებდა, რომ გენერალური პროკურატურისა და თანამდებობის პირების განცხადებების საფუძველზე დაირღვა მისი უდანაშაულობის პრეზუმფცია.

სტრასბურგის სასამართლომ მომჩივნის სამართლიანი სასამართლო განხილვის უფლების, მტკიცებულებათა მოპოვების გარემოებებისა („ნატრიუმის ციანიდის“) და მათი სანდოობის კუთხით დარღვევა არ დაადგინა. შესაბამისად, სტრასბურგის სასამართლომ კითხვის ნიშნის ქვეშ არ დააყენა ეროვნულ დონეზე საგამოძიებო ორგანოსა და სასამართლოების დასკვნები მომჩივნის მიმართ წარმოებულ სისხლის სამართლის საქმეზე. საგულისხმოა, რომ სტრასბურგის სასამართლო დაეთანხმა მთავრობის პოზიციას, რომლის თანახმადაც, გამოძიების მიერ მოპოვებული მტკიცებულებებით დასტურდება, რომ გამორიცხულია მომწამლავი ნივთიერების „ჩადება“, როგორც ამას მომჩივანი ამტკიცებდა. ამასთან, ევროპულმა სასამართლომ აღნიშნა, რომ გიორგი მამალაძის განაჩენი ეფუძნება საქმეში არსებულ არაერთ სხვა მტკიცებულებას, როგორიცაა მოწმეთა ჩვენებები, აუდიო- და ვიდეომასალა, კომპიუტერული მონაცემები და სხვა.

რაც შეეხება მომჩივნის სხვა მოთხოვნებს, სტრასბურგის სასამართლომ დაადგინა, რომ მომჩივნის მიმართ წარმოებული საქმის სხდომების სრულად დახურვა არ იყო მკაცრად აუცილებელი. კერძოდ, ევროპული სასამართლოს შეფასებით, შიდა სასამართლოების მიერ სათანადოდ არ იყო დასაბუთებული, თუ რატომ არ შეიძლებოდა სხდომის ნაწილის საჯაროდ ჩატარება. ევროპულმა სასამართლომ უდანაშაულობის პრეზუმფციის დარღვევად მიიჩნია ერთობლიობაში მომჩივნის წინააღმდეგ ცალკეული საჯარო განცხადებების გაკეთება და პროკურატურის მხრიდან საქმის მასალების ნაწილის საჯაროდ გამოქვეყნება, მაშინ, როდესაც დაცვის მხარის მიმართ გამოყენებულ იქნა ინფორმაციის გაუთქმელობის ვალდებულება.

აღსანიშნავია, რომ ხსენებული დარღვევები არის პროცედურული ხასიათის და გავლენას არ ახდენს განაჩენის კანონიერებაზე, რაც კიდევ ერთხელ დადასტურდა თავად ევროპული სასამართლოს დღევანდელი გადაწყვეტილებით, რომლის მიხედვითაც, სისხლის სამართლის საქმისწარმოება მთლიანობაში იყო სამართლიანი, მომჩივნის ჩხრეკა იყო კანონიერი და ციანიდის „ჩადებას“ ადგილი არ ჰქონია.

ღონისძიებები

ნოემბერი2022
  • ორ
  • სა
  • ოთ
  • ხუ
  • პა
  • შა
  • კვ
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 1
  • 2
  • 3
  • 4