იუსტიციის მინისტრმა პაატა სალიამ, მოადგილე ლანა მორგოშიასთან და იუსტიციის სახლის თავმჯდომარე ვახტანგ ჟვანიასთან ერთად, მცხეთის მშენებარე იუსტიციის სახლი დაათვალიერა და ადგილზე მიმდინარე სამუშაოებს გაეცნო.

თანამედროვე სტანდარტებისა და არქიტექტურის შენობის მშენებლობა დასასრულს უახლოვდება. ახალი, სრულად ადაპტირებული და მაღალი სტანდარტების იუსტიციის სახლი მცხეთის მოსახლეობას სახელმწიფო და კერძო სექტორის 500-ზე მეტ სერვისს ერთ სივრცეში შესთავაზებს, რაც მომსახურების მიღების პროცესს კიდევ უფრო სწრაფსა და კომფორტულს გახდის.

მცხეთის იუსტიციის სახლში მოეწყობა ქორწინების სივრცე, ასევე იუსტიციის სამინისტროს მმართველობის სფეროში მოქმედი სსიპ-ების სამუშაო სივრცეები, რაც მოქალაქეებს სხვადასხვა სერვისის მიღების შესაძლებლობას ერთ მისამართზე მისცემს.

ახალი ფილიალი წლიურად 70 000 -ზე მეტ მოქალაქეს მოემსახურება, რაც მნიშვნელოვნად გააუმჯობესებს სერვისებზე ხელმისაწვდომობასა და მომსახურების ხარისხს.

მცხეთის იუსტიციის სახლი მცხეთა-მთიანეთის რეგიონში რიგით მეექვსე, ხოლო საქართველოს მასშტაბით 128-ე ფილიალი იქნება. რეგიონის მასშტაბით უკვე ფუნქციონირებს იუსტიციის სახლები ყაზბეგში, დუშეთში, მუხრანში, ფასანაურსა და თიანეთში.

მცხეთის იუსტიციის სახლში ადგილობრივი კადრები დასაქმდებიან, რაც ახალი სამუშაო ადგილების შექმნასა და მუნიციპალიტეტის ეკონომიკური აქტივობის ზრდას შეუწყობს ხელს.

ამჟამად ქვეყნის მასშტაბით კიდევ სამი იუსტიციის სახლი შენდება. იუსტიციის სამინისტროს მიზანია, თანამედროვე, ხარისხიანი და მოქალაქეზე ორიენტირებული სახელმწიფო სერვისები საქართველოს ყველა რეგიონში თანაბრად ხელმისაწვდომი იყოს.

იუსტიციის მინისტრმა გაერო-ს ლტოლვილთა უმაღლესი კომისრის წარმომადგენელთან წარმატებული თანამშრომლობის საკითხები განიხილა. შეხვედრაზე პაატა სალიამ და ანა რიჩმა აღნიშნეს, რომ იუსტიციის სამინისტრო მჭიდროდ თანამშრომლობს გაერო-ს ლტოლვილთა უმაღლესი კომისრის ოფისთან და ხელს უწყობს მოქალაქეობის არმქონე პირებისათვის სხვადასხვა სერვისის მიწოდებას.

საუბარი შეეხო მოქალაქეობის არმქონეობის შემცირების სფეროში საქართველოს წარმატებული პრაქტიკის პარტნიორი ქვეყნებისათვის გაზიარების მნიშვნელობას, აგრეთვე იუსტიციის სამინისტროს სახელმწიფო სერვისების განვითარების სააგენტოს მიერ სხვადასხვა უწყების თანამშრომლებისთვის შესაბამისი ტრენინგების ორგანიზებას.

შეხვედრაზე აღინიშნა, რომ წარმატებული თანამშრომლობისა და საქართველოს მიერ გატარებული რეფორმების საერთაშორისო აღიარებაა საჯარო სერვისების ფორუმის ჩატარება თბილისში, რომელიც იუსტიციის სამინისტროსა და გაერო-ს ერთობლივი ორგანიზებით 23-25 ივნისს გაიმართება.

შეხვედრას ესწრებოდნენ იუსტიციის მინისტრის პირველი მოადგილე ბექა ძამაშვილი და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი.

იუსტიციის მინისტრმა გაერო-ს მუდმივ კოორდინატორ დიდიე ტღებიუკთან სამომავლო თანამშრომლობის პერსპექტივები განიხილა.

პაატა სალიამ შეხვედრისას ისაუბრა ადამიანის უფლებების დაცვის გაძლიერების მიმართულებით იუსტიციის სამინისტროსა და გაერთიანებული ერების ორგანიზაციის ნაყოფიერ და მრავალწლიან თანამშრომლობაზე, რისი დასტურიც ერთობლივი პროექტები და განხორციელებული რეფორმებია.

მინისტრმა იმედი გამოთქვა, რომ გაერო-ს მდგრადი განვითარების თანამშრომლობის ჩარჩოს (UN Sustainable Development Cooperation Framework) ფარგლებში, 2026-2030 წლებში თანამშრომლობა კიდევ უფრო გაღრმავდება და კონკრეტული შედეგების მიღწევას შეუწყობს ხელს. საქართველოს იუსტიციის სამინისტრო აქტიურად მონაწილეობს როგორც მმართველი კომიტეტის, ისე შედეგებზე ორიენტირებული სამივე სამუშაო ჯგუფის საქმიანობაში.

პაატა სალიამ უწყების პრიორიტეტებზეც ისაუბრა და აღნიშნა, რომ ადამიანის უფლებების დაცვისა და თანამედროვე, მოქალაქეზე ორიენტირებული საჯარო სერვისების განვითარების მიმართულებით სამინისტრო მუდმივად ნერგავს თანამედროვე ტექნოლოგიებსა და ინოვაციურ გადაწყვეტილებებს, მოქალაქეთა მომსახურების ხარისხის გაუმჯობესების მიზნით. მისი თქმით, განსაკუთრებული ყურადღება ეთმობა პენიტენციურ სისტემაში ადამიანის უფლებების დაცვის მაღალი სტანდარტების უზრუნველყოფას.

იუსტიციის მინისტრმა გაერო-ს მუდმივი კოორდინატორი გაერო-ს საჯარო სერვისების ფორუმზე მოიწვია, რომელსაც თბილისი მიმდინარე წლის 23-25 ივნისს უმასპინძლებს.

შეხვედრას ასევე ესწრებოდნენ იუსტიციის მინისტრის პირველი მოადგილე ბექა ძამაშვილი და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი.

პაატა სალიამ მუსტაფა თურქერ არისთან განიხილა საქართველოსა და თურქეთს შორის არსებული ეფექტიანი თანამშრომლობა სამოქალაქო და სისხლის სამართლის საქმეების, აგრეთვე, ტრანსნაციონალური ორგანიზებული დანაშაულის წინააღმდეგ ბრძოლის მიმართულებით.

იუსტიციის მინისტრმა ხაზი გაუსვა, რომ ორ ქვეყანას შორის პარტნიორობის ახალი მიმართულებების განვითარება ხელს შეუწყობს მართლმსაჯულების, კანონის უზენაესობისა და ადამიანის უფლებების დაცვის სფეროებში გამოცდილების გაზიარებასა და ერთობლივი ძალისხმევის გაძლიერებას.

პაატა სალიამ გამოხატა მზაობა, გამართოს შეხვედრა თურქ კოლეგასთან დარგობრივი თანამშრომლობის ახალი მიმართულებებისა და მექანიზმების შემუშავების მიზნით.

საქართველოს იუსტიციის მინისტრმა თურქეთის დელეგაცია გაერო-ს საჯარო სერვისების ფორუმზე მოიწვია, რომელსაც თბილისი მიმდინარე წლის 23-25 ივნისს უმასპინძლებს.

შეხვედრას ესწრებოდნენ, აგრეთვე, იუსტიციის მინისტრის პირველი მოადგილე ბექა ძამაშვილი და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი.

იუსტიციის მინისტრმა აღსრულების პოლიციელებს პროფესიული დღე მიულოცა. პაატა სალიამ ყურადღება გაამახვილა მორიგებით დასრულებული საქმეების მნიშვნელობაზე და აღნიშნა, რომ აღსრულების პოლიციის საქმიანობის მთავარი მიზანი მხოლოდ სამართლებრივი დავების სწრაფად და ეფექტიანად დასრულება არ არის – პრიორიტეტს მხარეთა ინტერესების მაქსიმალური დაცვა და შეთანხმების საფუძველზე შედეგის მიღწევა წარმოადგენს. მინისტრის განცხადებით, ამ მიდგომის ეფექტიანობას 2025 წლის სტატისტიკაც ადასტურებს – საქმეთა 80 პროცენტზე მეტი მორიგებითა და ნებაყოფლობით დასრულდა.

იუსტიციის მინისტრმა, აღსრულების ეროვნული ბიუროს თავმჯდომარესთან ერთად, საქმიანობაში გამოვლენილი მაღალი პროფესიონალიზმისა და განსაკუთრებული დამსახურებისთვის თანამშრომლებს სპეციალური სახელმწიფო წოდებები მიანიჭა და სამსახურებრივი მოვალეობის კეთილსინდისიერად შესრულებისთვის მადლობა გადაუხადა.

იუსტიციის მინისტრი ზვიად გაბისონიას წიგნის – „ციფრული მმართველობა და სამართლის ტექნოლოგიები“ – პრეზენტაციას დაესწრო. პაატა სალიამ პრეზენტაციის მონაწილეებს სიტყვით მიმართა. მინისტრმა ხაზი გაუსვა იუსტიციის სამინისტროს როლს ქვეყნის ციფრული ტრანსფორმაციის პროცესში; ტექნოლოგიების განვითარების ფონზე წარმოქმნილ გამოწვევებზე ისაუბრა და ყურადღება გაამახვილა ისეთ აქტუალურ საკითხებზე, როგორიცაა: ხელოვნური ინტელექტის დანერგვა სახელმწიფო სერვისების, მართლმსაჯულებისა და ქონებრივი უფლებების სფეროში და ამ პროცესის სამართლებრივი რეგულაცია; სამართლის ახალი დარგების – ტექნოლოგიების სამართლის, ინტერნეტსამართლის, სოციალური ქსელებისა და სოციალური მედიის მარეგულირებელი ნორმების განვითარების მნიშვნელობა და სხვ.

ღონისძიებაზე სიტყვით გამოვიდნენ, აგრეთვე, განათლების, მეცნიერებისა და ახალგაზრდობის მინისტრი გივი მიქანაძე, სახელმწიფო მინისტრი შერიგებისა და სამოქალაქო თანასწორობის საკითხებში თეა ახვლედიანი და თბილისის სახელმწიფო უნივერსიტეტის რექტორი ჯაბა სამუშია.

პრეზენტაციას ესწრებოდნენ იუსტიციის მინისტრის მოადგილეები, აღმასრულებელი და საკანონმდებლო ხელისუფლების წევრები, სამეცნიერო და აკადემიური წრეების წარმომადგენლები.

ნაშრომი ხელოვნური ინტელექტის იუსტიციისა და განათლების სისტემებში დანერგვის საკითხებს ეხება და მას წინ უძღოდა ონლაინ ლექციების კურსი „ხელოვნური ინტელექტი და ტექნოლოგიების სამართალი“, რომელიც იუსტიციის სამინისტროს მიერ დაფინანსებული საგრანტო პროგრამის ფარგლებში მომზადდა.

იუსტიციის მინისტრმა და იურიდიული დახმარების სამსახურის დირექტორმა უწყებრივი თანამშრომლობის საკითხები განიხილეს. გაცნობითი ხასიათის შეხვედრაზე ოთარ ჩახუნაშვილმა და პაატა სალიამ იუსტიციის სამინისტროსა და იურიდიული დახმარების სამსახურის ერთობლივ პროექტებზე იმსჯელეს.

აღინიშნა, რომ უწყებები ეფექტიანად თანამშრომლობენ ისეთი პროექტების ფარგლებში, როგორიცაა: მიწის სისტემური რეგისტრაცია; პრობაციონერებისა და პირობით მსჯავრდებულების სამართლებრივი ცნობიერების ამაღლება, მსჯავრდებულთა უფლებრივი მდგომარეობის მონიტორინგი პენიტენციურ დაწესებულებებში და სხვ.

იურიდიული დახმარების სამსახურის დირექტორმა იუსტიციის მინისტრსა და სპეციალური პენიტენციური სამსახურის ხელმძღვანელ გიორგი პატარიძეს უწყების სამომავლო გეგმები გააცნო.

მხარეები თანამშრომლობის გაღრმავების კონკრეტულ მიმართულებებზე შეთანხმდნენ, რომლებიც ადამიანის უფლებების დაცვის სტანდარტის კიდევ უფრო ამაღლებაზე იქნება ორიენტირებული.

ლაითურის №1 პენიტენციური დაწესებულების ინფრასტრუქტურას და დაგეგმილ ახალ პროექტებს იუსტიციის მინისტრი პაატა სალია მოადგილე ლანა მორგოშიასთან და სპეციალური პენიტენციური სამსახურის ხელმძღვანელ გიორგი პატარიძესთან ერთად გაეცნო.

უახლოეს პერიოდში დაწესებულებაში კინოთეატრი, ფრენბურთის, კალათბურთისა და ფეხბურთის სპორტული მოედნები მოეწყობა, რაც მსჯავრდებულთა რესოციალიზაცია-რეაბილიტაციის პროცესს კიდევ უფრო მეტად შეუწყობს ხელს და მათთვის დამატებით საგანმანათლებლო, კულტურულ და სპორტულ შესაძლებლობებს შექმნის.

ლაითურის პენიტენციური დაწესებულება მცირე ზომის, უმაღლესი სტანდარტების შესაბამისი პირველი დაწესებულებაა საქართველოში, რომლის თანამედროვე ინფრასტრუქტურა სხვადასხვა კატეგორიის მსჯავრდებულთა უსაფრთხო და ეფექტიან მართვას უზრუნველყოფს. დაწესებულებაში ქალი და კაცი მსჯავრდებულები ერთ სივრცეში, ერთმანეთისგან იზოლირებულად, შესაბამისი უსაფრთხოების სტანდარტების დაცვით არიან განთავსებული.

მაღალი სტანდარტის დაწესებულებაში მსჯავრდებულთა საჭიროებაზე მორგებული არაერთი სივრცე ფუნქციონირებს, მათ შორის, ციფრული უნივერსიტეტი, სადაც მათ ონლაინ ლექციებზე დასწრება და უმაღლესი განათლების მიღება შეუძლიათ; ხანმოკლე, ხანგრძლივი და ვიდეოპაემნებისთვის განკუთვნილი სივრცეები, რომლებიც ადაპტირებულია შშმ პირებისთვის; თანამშრომელთა და მსჯავრდებულთა მომსახურების ხელმისაწვდომობის მიზნით გახსნილია იუსტიციის სახლიც; სამედიცინო ნაწილი სრულად არის უზრუნველყოფილი შესაბამისი ინვენტარითა და ტექნიკით; მოწყობილია ინდივიდუალური სასეირნო და სარეაბილიტაციო სივრცეები ყველა ნაწილში განთავსებული მსჯავრდებულებისთვის.

საქართველოს იუსტიციის სამინისტროსა და სპეციალური პენიტენციური სამსახურის ერთ-ერთ მთავარ პრიორიტეტს დიდი ზომის დაწესებულებების ეტაპობრივად მცირე ზომის, თანამედროვე სტანდარტებზე დაფუძნებული პენიტენციური დაწესებულებებით ჩანაცვლება წარმოადგენს. სწორედ ამ მიზანს ემსახურება ლაითურის №1 პენიტენციური დაწესებულებაც, რომელიც სრულად არის მორგებული როგორც ბრალდებულთა/მსჯავრდებულთა, ისე თანამშრომელთა საჭიროებებს და უზრუნველყოფს უსაფრთხო, ღირსეულ და თანამედროვე გარემოს.