საქართველოს იუსტიციის მინისტრი პაატა სალია ისრაელის სახელმწიფოს ეროვნული უსაფრთხოების მინისტრს, იტამარ ბენ-გვირს შეხვდა.

იუსტიციის სამინისტროში გამართულ შეხვედრას ესწრებოდნენ იუსტიციის მინისტრის პირველი მოადგილე ლაშა მაღრაძე, მოადგილე ბექა ძამაშვილი, სპეციალური პენიტენციური სამსახურის ხელმძღვანელი გიორგი პატარიძე და ისრაელის სახელმწიფოს ეროვნული უსაფრთხოების სამინისტროს დელეგაციის წევრები.

შეხვედრაზე ყურადღება გამახვილდა საქართველო-ისრაელს შორის არსებულ მეგობრულ ურთიერთობებსა და იუსტიციის სფეროში თანამშრომლობის გაღრმავების პერსპექტივებზე. იუსტიციის მინისტრმა ისრაელის მხარეს სამინისტროს ძირითადი პრიორიტეტები გააცნო; ხაზი გაესვა ქართულ პენიტენციურ სისტემაში განხორციელებულ რეფორმებსა და მსჯავრდებულთა რესოციალიზაცია-რეაბილიტაციის მიზნით დანერგილი პროგრამების მნიშვნელობას.

საქართველოში ვიზიტის ფარგლებში ისრაელის სახელმწიფოს ეროვნული უსაფრთხოების სამინისტროს დელეგაციამ გლდანის N8 პენიტენციური დაწესებულება მოინახულა, სადაც ადგილზე გაეცნო დაწესებულების ინფრასტრუქტურას და სისტემის მართვის სტანდარტებს.

იუსტიციის მინისტრი პაატა სალია სამხრეთ კავკასიაში მსოფლიო ბანკის რეგიონულ დირექტორს, როლანდ პრაისს შეხვდა.

შეხვედრაზე განიხილეს იუსტიციის სამინისტროს სსიპ “საჯარო რეესტრის ეროვნულ სააგენტოს” და მსოფლიო ბანკის მრავალწლიანი პარტნიორობის საკითხები, მიმდინარე პროექტები და სამომავლო თანამშრომლობის შესაძლებლობები.

საუბარი შეეხო რეფორმებს ციფრული მმართველობისა და მიწის რეგისტრაციის მიმართულებით. მსოფლიო ბანკის რეგიონულმა დირექტორმა პოზიტიურად შეაფასა საქართველოში განხორციელებული რეფორმები და სააგენტოს მიერ დაგროვილი გამოცდილება, რაც მნიშვნელოვანი საფუძველია არსებული ცოდნის სხვა ქვეყნებთან გასაზიარებლად.

აღინიშნა, რომ მოსახლეობის ინტერესებზე ორიენტირებული NSDI გეოპორტალის, „გონიერი კონტრაქტის“ და მიწის სისტემური რეგისტრაციის ინოვაციური ელექტრონული სერვისების ეფექტურობა და სანდოობა, ქვეყნის მიერ აღებული სასესხო ვალდებულების მთავრობის მიერ ეფექტიანი გამოყენების და განხორციელებული ინვესტიციის შედეგიანობის ნათელი მაგალითია.

შეხვედრაში მონაწილეობდნენ იუსტიციის მინისტრის პირველი მოადგილე ლაშა მაღრაძე, საჯარო რეესტრის ეროვნული სააგენტოს თავმჯდომარე დავით დევიძე და საჯარო რეესტრის ეროვნული სააგენტოს და მსოფლიო ბანკის ერთობლივი პროექტის მენეჯერი ელენე გრიგოლია.

მამუკა ხაზარაძემ და ბადრი ჯაფარიძემ ანაკლიის პორტის საქმეზე დავა ვაშინგტონის არბიტრაჟშიც წააგეს.

ვაშინგტონის არბიტრაჟმა (მსოფლიო ბანკის საინვესტიციო დავების გადაწყვეტის საერთაშორისო ცენტრი - ICSID) ანაკლიის პორტის საქმეზე გადაწყვეტილება გამოიტანა და საქართველოს მთავრობის მოთხოვნები სრულად დააკმაყოფილა.

ამჯერად უკვე ვაშინგტონის არბიტრაჟის მიერ დადასტურდა, რომ ანაკლიის პორტის პროექტის განუხორციელებლობა მთლიანად მამუკა ხაზარაძის, ბადრი ჯაფარიძისა და მათი პარტნიორების პასუხისმგებლობაა და საქართველოს მთავრობის მხრიდან რაიმე ფორმით ხელშეშლას ადგილი არ ჰქონია.

საარბიტრაჟო ტრიბუნალმა სრულად გაიზიარა საქართველოს იუსტიციის სამინისტროს მიერ მომზადებული სამართლებრივი არგუმენტაცია და დაადგინა, რომ:

• პროექტის დაფინანსების ვალდებულება სრულად ეკისრებოდა ინვესტორს, რომელმაც საკუთარი მიზეზით ვერ მოიძია საჭირო სახსრები.
• პროექტის კომერციული რისკის მატარებელი იყო მხოლოდ ინვესტორი.
• მთავრობის მხრიდან ხელშეკრულების შეწყვეტა იყო კანონიერი: ინვესტორს მრავალჯერ გადაუვადდა მშენებლობისთვის საჭირო დაფინანსების მოსაძიებლად დადგენილი ვადები. დამტკიცებულად იქნა მიჩნეული, რომ სახელმწიფო ხელშეკრულების მოქმედების განმავლობაში განუხრელად უჭერდა მხარს ანაკლიის პროექტის განხორციელებას.
• მამუკა ხაზარაძისა და ბადრი ჯაფარიძის მისამართით ფულის გათეთრებასთან დაკავშირებით წარმოებული სისხლისსამართლებრივი დევნის კანონიერება ეჭვქვეშ არ დამდგარა.
• „ანაკლიის განვითარების კონსორციუმისთვის“ ინვესტორების (მათ შორის, ამერიკული საინვესტიციო ფონდის) მოზიდვაში სახელმწიფოს ხელი არ შეუშლია.

აღნიშნული დავის ფარგლებში ხაზარაძისა და ჯაფარიძის ჰოლანდიელი პარტნიორი ბობ მეიერი ითხოვდა 64 მილიონი აშშ დოლარის გადახდას, თუმცა, არბიტრაჟმა მისი ყველა მოთხოვნა უარყო და მას თავად დააკისრა საქართველოს მთავრობის სასარგებლოდ 6,5 მილიონი აშშ დოლარის გადახდის ვალდებულება.

საზოგადოებისთვის ცნობილია, რომ ზუსტად ერთი წლის წინ ანაკლიის საქმეზე დავა ხაზარაძისა და ჯაფარიძის ანაკლიის კონსორციუმმა სახელმწიფოსთან პარიზის არბიტრაჟში წააგო, რომლის ფარგლებშიც სახელმწიფო ბიუჯეტიდან 1,5 მილიარდი აშშ დოლარის გადახდას ითხოვდნენ.

პარიზის არბიტრაჟმაც სრულად უარყო მომჩივნების მოთხოვნები და პირიქით, მათ დაეკისრათ სახელმწიფოს სასარგებლოდ 650 000 აშშ დოლარის გადახდის ვალდებულება. აღნიშნული გადაწყვეტილება ხაზარაძეს და ჯაფარიძეს არ გაუსაჩივრებიათ, მათ დაკისრებული თანხაც გადაიხადეს, რითაც ფაქტობრივად აღიარეს, რომ ანაკლიის პორტი მათი ბრალეულობით ვერ განხორციელდა.

იუსტიციის მინისტრმა პაატა სალიამ სამსახურებრივი მოვალეობის კეთილსინდისიერად შესრულებისთვის იუსტიციის სამინისტროს სსიპ „დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს“ 29 თანამშრომელი მადლობის სიგელებით დააჯილდოვა.

დაჯილდოება სააგენტოს პროფესიულ დღესთან დაკავშირებული ღონისძიების ფარგლებში გაიმართა. იუსტიციის მინისტრმა თანამშრომლებს პროფესიული დღე მიულოცა და ხაზი გაუსვა სააგენტოს განსაკუთრებულ როლს განმეორებითი დანაშაულის პრევენციისა და საზოგადოებრივი უსაფრთხოების უზრუნველყოფის კუთხით.

ღონისძიების დამსწრეებს სიტყვით მიმართა სააგენტოს ხელმძღვანელმა ნიკა ცხვარაშვილმა. მან თანამშრომლებს გაწეული საქმიანობისთვის მადლობა გადაუხადა და წარმატებები უსურვა სამომავლო საქმიანობაში.

ღონისძიებას მინისტრის მოადგილეები, სააგენტოს თანამშრომლები და მოწვეული სტუმრები ესწრებოდნენ.

იუსტიციის მინისტრმა პაატა სალიამ და აღსრულების ეროვნული ბიუროს თავმჯდომარემ, ლაშა მოძღვრიშვილმა სამსახურებრივი მოვალეობის კეთილსინდისიერად შესრულებისთვის აღსრულების ეროვნული ბიუროს 20 აღმასრულებელი მადლობის სიგელით და სიმბოლური საჩუქრით დააჯილდოვეს.

აღმასრულებელთა საერთაშორისო დღისადმი მიძღვნილი ღონისძიების ფარგლებში, იუსტიციის მინისტრმა, მოადგილეებთან და იუსტიციის სისტემაში მოქმედი სსიპ-ბის ხელმძღვანელებთან ერთად, აღსრულების ეროვნული ბიუროს ტერიტორიული სააღსრულებო ბიუროების ანგარიში მოისმინა.

პაატა სალიამ აღსრულების სისტემაში არსებულ პროგრესზე და გადაწყვეტილებათა ეფექტური აღსრულების მნიშვნელობაზე ისაუბრა.

აღსრულების ეროვნული ბიურო, როგორც აღმასრულებელთა საერთაშორისო კავშირის წევრი ორგანიზაცია, ყოველწლიურად უერთდება აღმასრულებელთა საერთაშორისო დღის აღნიშვნას.

იუსტიციის მინისტრმა პერსონალურ მონაცემთა დაცვის სამსახურის უფროსთან შეხვედრა გამართა.

გაცნობითი ხასიათის შეხვედრაზე, პაატა სალიამ და ლელა ჯანაშვილმა ორ უწყებას შორის თანამშრომლობის საკითხები განიხილეს.

შეხვედრაზე აღინიშნა პერსონალურ მონაცემთა დაცვის პროცესში იუსტიციის სამინისტროს მნიშვნელოვანი როლი მონაცემთა უსაფრთხოების, მიზნობრივი გამოყენებისა და კანონმდებლობის შესაბამისობის უზრუნველყოფის კუთხით.

შეხვედრას ესწრებოდნენ იუსტიციის მინისტრის მოადგილეები - მერაბ ტურავა, გიორგი დგებუაძე, ბექა ძამაშვილი და ალექსანდრე მაისურაძე, ასევე პერსონალურ მონაცემთა დაცვის სამსახურის უფროსის პირველი მოადგილე ოთარ ჩახუნაშვილი.

იუსტიციის მინისტრი პაატა სალია მოადგილესთან, ბექა ძამაშვილთან ერთად, საქართველოში წითელი ჯვრის საერთაშორისო კომიტეტის (ICRC) დელეგაციის ხელმძღვანელს, ანა მონტავონს შეხვდა.

იუსტიციის მინისტრმა ანა მონტავონს მადლობა გადაუხადა საერთაშორისო ჰუმანიტარული სამართლის მიმართულებით მრავალწლიანი თანამშრომლობისთვის, ასევე, საოკუპაციო ხაზის მიმდებარედ მცხოვრები მოსახლეობის მხარდაჭერის პროცესში აქტიური ჩართულობისთვის.

შეხვედრაზე მხარეებმა არსებული პარტნიორობის გაღრმავების საკითხები განიხილეს და სამომავლო თანამშრომლობის კონკრეტულ მიმართულებებზე შეთანხმდნენ.