ღონისძიების დასასრულს, გაეროს გენერალური მდივნის, კორეის სახელმწიფოს შინაგან საქმეთა და უსაფრთხოების მინისტრის, სხვადასხვა ქვეყნების მინისტრებისა და მოადგილეების მონაწილეობით, პანელური დისკუსია გაიმართა.

იუსტიციის მინისტრის პირველმა მოადგილემ, თამარ ტყეშელაშვილმა, პანელური დისკუსიის ფარგლებში, ისაუბრა საქართველოს საჯარო მმართველობის მიმართულებით გატარებული რეფორმებისა და ამ პროცესში გენდერული თანასწორობის შესახებ. დელეგაციის ხელმძღვანელმა ხაზი გაუსვა საქართველოში საჯარო სექტორში ქალთა როლის ზრდის მნიშვნელობას, მათ ჩართულობას გადაწყვეტილების მიღების პროცესში და საქართველოს მიღწევებს აღნიშნული მიმართულებით.

"ქალთა გაძლიერება საქართველოს მთავრობის ერთ-ერთი ძირითადი პრიორიტეტია. გატარებული რეფორმების შედეგად, საჯარო სამსახურში მმართველ პოზიციებზე დასაქმებულთა შორის, 47% ქალია. ამასთან, იუსტიციის სამინისტროში დასაქმებულ თანამშრომელთა შორის მენეჯერულ პოზიციებს 59% ქალი იკავებს. სახელმწიფო განაგრძობს საჯარო სამსახურში ქალთა როლის გაძლიერებას, შესაბამისი სამთავრობო და საპარლამენტო საბჭოების მეშვეობით პროცესების მონიტორინგსა და გენდერული მეინსტრიმინგის ხელშეწყობას" - აღნიშნა თამარ ტყეშელაშვილმა.

საჯარო სერვისების საერთაშორისო ფორუმი 3 დღის განმავლობაში მიმდინარეობდა. ფორუმის მიზანს საჯარო მმართველობასა და სახელმწიფო სერვისების მიწოდების სფეროში არსებული მიღწევების, გამოწვევებისა და სამომავლო პერსპექტივების თაობაზე საუკეთესო პრაქტიკის გაზიარება წარმოადგენდა.

გაეროს საჯარო სერვისების ფორუმი 2026 წელს საქართველოში გაიმართება, რომელსაც იუსტიციის სამინისტრო უმასპინძლებს.

საქართველოს იუსტიციის სამინისტროს დელეგაცია სახელმწიფო სერვისების მსოფლიო ფორუმში მონაწილეობას აგრძელებს.

ფორუმის ფარგლებში საქართველოს იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის საერთაშორისო ურთიერთობების სამმართველოს უფროსმა მარიამ ბრეგაძემ ახალგაზრდა საჯარო მოხელეებსა და საჯარო სამსახურში ახალგაზრდების შესაძლებლობებზე გაამახვილა ყურადღება.

თემატურ სესიებზე საუბარი შეეხო ქვეყანაში მიმდინარე საჯარო მმართველობის რეფორმას და ამავე რეფორმის ფარგლებში დამტკიცებულ სახელმწიფო სერვისების განვითარების 2022-2025 წლების სტრატეგიას, რომელიც პირველად შეიქმნა და მთავრობის მიერ დამტკიცდა სახელმწიფო სერვისების განვითარების ერთიანი სტრატეგია.

სახელმწიფო სერვისების განვითარების სტრატეგიის მიზანია მომხმარებელზე ორიენტირებული სერვისის შექმნის, მიწოდების, ხარისხის უზრუნველყოფისა და განფასების ახალი სტანდარტების დანერგვა.

სახელმწიფო სერვისების მსოფლიო ფორუმს 50 ქვეყნის 1200-მდე წარმომადგენელი ესწრება. ფორუმი ხვალ დასრულდება.

დღეს გამოქვეყნდა აშშ-ის სახელმწიფო დეპარტამენტის ყოველწლიური ანგარიში ადამიანით ვაჭრობის (ტრეფიკინგის) თაობაზე, რომლის თანახმად ადამიანით ვაჭრობის (ტრეფიკინგის) წინააღმდეგ განხორციელებული ღონისძიებებით საქართველო კვლავ უმაღლეს საფეხურზეა და მსოფლიოს მასშტაბით 186 ქვეყანას შორის უკვე მე-9 წელია ინარჩუნებს ადგილს ე.წ. „პირველ კალათაში“. წელს შეფასების უმაღლეს შკალაში მხოლოდ 33-მა ქვეყანამ დაიკავა ადგილი.

საქართველო წელსაც ერთადერთია რეგიონის მასშტაბით და ევროკავშირის წევრობის კანდიდატ სახელმწიფოებს შორის, რომელიც აშშ-ის სახელმწიფო დეპარტამენტის შეფასების უმაღლეს ნიშნულს იკავებს. აღსანიშნავია, რომ უშუალოდ ევროკავშირის წევრი სახელმწიფოებიდან უმაღლეს პირველ კალათაში ვერ მოხვდა 12 ქვეყანა.

საქართველო მნიშვნელოვან ყურადღებას უთმობს ადამიანით ვაჭრობის (ტრეფიკინგის) წინააღმდეგ ეფექტიან ბრძოლას, რომელიც, ასევე, საქართველოს ევროკავშირში ინტეგრაციის პროცესის მნიშვნელოვანი ნაწილია და ქმნის ტრანსნაციონალურ ორგანიზებულ დანაშაულთან ბრძოლის კუთხით ქვეყანასა და რეგიონში უსაფრთხო და საიმედო გარემოს.

აშშ-ის სახელმწიფო დეპარტამენტის ანგარიშის თანახმად, საქართველო სრულად აკმაყოფილებს ამ ტრეფიკინგთან ბრძოლის სტანდარტებს, განაგრძობს მტკიცე, მდგრად, თანმიმდევრულ და კოორდინირებულ ღონისძიებებს ტრეფიკინგთან ბრძოლის მიმართულებით, რაც განაპირობებს ქვეყნის უმაღლეს შეფასებას.

აშშ-ის სახელმწიფო დეპარტამენტის ანგარიშში ხაზგასმულია ადამიანით ვაჭრობის (ტრეფიკინგის) წინააღმდეგ ბრძოლის ყველა მიმართულებით საქართველოს მთავრობის მიერ გაძლიერებული ძალისხმევა როგორც დანაშაულის პრევენციის, ისე დამნაშავეთა გამოვლენის, დასჯისა და მსხვერპლთა დაცვის მიმართულებით. ანგარიშში პოზიტიურადაა შეფასებული:

საქართველოს იუსტიციის სამინისტროს ხელმძღვანელობით მომუშავე სამუშაო ჯგუფი, რომლის მიზანიც ყოველწლიური ფართომასშტაბიანი საინფორმაციო კამპანიის წარმოებაა ადამიანით ვაჭრობის (ტრეფიკინგის) რისკებისა და მისგან თავის დაცვის საშუალებების შესახებ;

1. დანაშაულის გამოვლენისკენ მიმართული პროაქტიული ღონისძიებები და მეტი დამნაშავის დასჯა;
2. ტრეფიკინგის დაზარალებულთათვის და მსხვერპლთათვის არსებული თავშესაფრების რაოდენობის გაზრდა;
3. შრომითი მიგრაციის კანონმდებლობის გაუმჯობესება ადამიანით ვაჭრობის (ტრეფიკინგის) დანაშაულის პრევენციის მიზნით და სხვ.

საქართველოს მიერ აშშ-ის სახელმწიფო დეპარტამენტის ანგარიშში მოწინავე პოზიციის დაკავება და საანგარიშო პერიოდში მიღწეული პროგრესი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭოს ეფექტიანი მუშაობის შედეგია.

საბჭოს საქართველოს იუსტიციის მინისტრი ხელმძღვანელობს და მის შემადგენლობაში შედის ყველა შესაბამისი სახელმწიფო უწყების წარმომადგენელი, სახალხო დამცველის აპარატი, არასამთავრობო და საერთაშორისო ორგანიზაციები.

2024 წლის 24 ივნისს კორეის რესპუბლიკის ქალაქ ინჩონში გაიხსნა გაერო-სა და კორეის რესპუბლიკის შინაგან საქმეთა და უსაფრთხოების სამინისტროს მიერ ორგანიზებული სახელმწიფო სერვისების ყოველწლიური მსოფლიო ფორუმი, რომელშიც საქართველოს დელეგაცია მონაწილეობს იუსტიციის მინისტრის პირველი მოადგილე თამარ ტყეშელაშვილის ხელმძღვანელობით.

გაერო-ს საჯარო სერვისების ფორუმს წელს 50 ქვეყნის 1200-მდე წარმომადგენელი ესწრება. ფორუმი გახსნეს ეკონომიკურ და სოციალურ საკითხებში გაერო-ს გენერალური მდივნის მოადგილე ლი ჯუნხუამ, გაერო-ს მერვე გენერალურმა მდივანმა ბან კი-მუნმა, კორეის რესპუბლიკის პრეზიდენტმა იუნ სუკ იოლმა და კორეის რესპუბლიკის შინაგან საქმეთა და უსაფრთხოების მინისტრმა ლი სანგ-მინმა. ფორუმში მონაწილეობენ გაერო-ს წევრი ქვეყნების მთავრობების მაღალი დონის წარმომადგენლები, ექსპერტები და საერთაშორისო ორგანიზაციების წარმომადგენლები.

გაერო-ს ყოველწლიური ფორუმი საუკეთესო საშუალებაა ქვეყნებისთვის, რათა განიხილონ სახელმწიფო სერვისების მიწოდების სფეროში არსებული სიახლეები, გამოწვევები, მიღწევები და სამომავლო პერსპექტივები. საქართველოს წარმომადგენლები მონაწილეობას მიიღებენ თემატურ სესიებში, ხოლო ფორუმის მიწურულს იუსტიციის მინისტრის პირველი მოადგილე თამარ ტყეშელაშვილი სიტყვით გამოვა მინისტრთა მრგვალი მაგიდის შეხვედრაზე.

ღონისძიებაში საქართველოს მხრიდან, ასევე, მონაწილეობენ საქართველოს სრულუფლებიანი და საგანგებო ელჩი კორეის რესპუბლიკაში თარაშ პაპასქუა, სსიპ „საჯარო რეესტრის ეროვნული სააგენტოს“ თავმჯდომარე დავით დევიძე, სსიპ „სახელმწიფო სერვისების განვითარების სააგენტოს“ თავმჯდომარე ქეთევან ბეთლემიძე, სსიპ „იუსტიციის სახლის“ თავმჯდომარე ლაშა ლობჯანიძე და საქართველოს იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის საერთაშორისო ურთიერთობების სამმართველოს უფროსი მარიამ ბრეგაძე.

აღსანიშნავია, რომ 2026 წელს სახელმწიფო სერვისების მსოფლიო ფორუმს საქართველოს იუსტიციის სამინისტრო უმასპინძლებს, რაც სახელმწიფო სერვისების განვითარების სფეროში ჩვენი ქვეყნის მიღწევების კიდევ ერთი საერთაშორისო აღიარებაა. ეს ინიციატივა საქართველოს იუსტიციის მინისტრმა გასულ წელს გაერო-ს გენერალური მდივნის მოადგილესთან აშშ-ში ვიზიტის ფარგლებში გამართულ შეხვედრაზე განიხილა.

იუსტიციის სამინისტროსა და კავკასიის საერთაშორისო უნივერსიტეტის მხარდაჭერით ეროვნული არქივის საგამოფენო პავილიონში მინდია უგრეხელიძის „რჩეული ნაწერების“ პირველი წიგნის პრეზენტაცია გაიმართა. ქართველი სამართალმცოდნე მინდია უგრეხელიძე სისხლის სამართლის ქართული მეცნიერული სკოლის ერთ-ერთი ფუძემდებელია. სხვადასხვა დროს ის იყო საქართველოს უზენაესი სასამართლოს თავმჯდომარე, ადამიანის უფლებათა ევროპული სასამართლოს მოსამართლე, „იურისტთა მსოფლიო ასოციაციისა“ და „სისხლის სამართლის საერთაშორისო ასოციაციის“ წევრი და 70-მდე ნაშრომის ავტორი.

იუსტიციის სამინისტროს ერთ-ერთი პრიორიტეტი მეცნიერებასა და კვლევაზე დაფუძნებული მიდგომების განვითარებაა. სისხლის სამართლის ქართული მეცნიერული სკოლის წარმომადგენელთა სამეცნიერო შემოქმედების გამოქვეყნება ხელს შეუწყობს იურისტთა მომავალ თაობებს, გაეცნონ პროფესიულ ლიტერატურას.

მინდია უგრეხელიძის წიგნში დაბეჭდილი ნაშრომების უმეტესობა საზღვარგარეთაა გამოცემული, ჩვენთან კი, ბიბლიოგრაფიული იშვიათობაა. „რჩეულ ნაწერებში“ ასახული იდეები სცდება სისხლის სამართლის საკითხების წმინდა სამართლებრივი ანალიზის ფარგლებს; პრობლემები შესწავლილი და განხილულია სამართლის დოგმატიკის, პოლიტიკის, ფილოსოფიის, სოციოლოგიის, ფსიქოლოგიისა და ეთიკის ფართო ჭრილში.

წიგნის პრეზენტაციას ესწრებოდნენ იუსტიციის მინისტრი რატი ბრეგაძე, მოადგილეები, მინისტრთა კაბინეტისა და პარლამენტის წევრები. ასევე, კულტურის, სამეცნიერო და აკადემიური სფეროს წარმომადგენლები.

წიგნი გამოქვეყნდა კავკასიის საერთაშორისო უნივერსიტეტის ფინანსური მხარდაჭერით.

შეზღუდული შესაძლებლობების მქონე პირთა უფლებრივი მდგომარეობა, გონივრული მისადაგების პრინციპი, მორგებული სამუშაო გარემო და გრაფიკი, პროფესიული განვითარების შესაძლებლობა და უწყების შიგნით ჩატარებულ სპორტულ აქტივობებში მონაწილეობის შესაძლებლობა – ამ და სხვა საკითხებზე ბუბა ლომუაშვილმა მრგვალი მაგიდის ფორმატში ისაუბრა, რომელიც ღირსეული დასაქმებისა და შემოსავლის საკითხებს დაეთმო.

მინისტრის მოადგილემ ყურადღება გაამახვილა სისტემის მასშტაბით უწყებების მიერ განხორციელებულ ღონისძიებებსა და დანერგილ დასაქმების პოლიტიკაზე. აღინიშნა, რომ იუსტიციის სამინისტროს სისტემის მასშტაბით დასაქმებული შეზღუდული შესაძლებლობის მქონე პირების მიმართ გამოიყენება გონივრული მისადაგების პრინციპი, რაც მოიცავს არჩევით სამუშაო ფორმასა და გრაფიკს, ასევე, მათ საჭიროებაზე მორგებულ სამუშაო გარემოს. პირის ინდივიდუალური საჭიროებიდან გამომდინარე, სამინისტროს მიერ ხორციელდება ინფრასტრუქტურული თუ პროგრამული ცვლილებები.

საუბარი შეეხო, აგრეთვე, პროფესიული განვითარების პროგრამებს, რომლებსაც სამინისტრო დასაქმებულებს სთავაზობს ტრენინგებისა და სხვა სასწავლო რესურსების სახით.

ხაზი გაესვა ჯანსაღი ცხოვრების წესის ხელშეწყობის დანერგვის მნიშვნელობას და შიდა სპორტული ღონისძიებების გარკვეული სახეობების მისაწვდომობასა და ინკლუზიურობას სხვადასხვა შეზღუდვის მქონე პირებისთვის.

მრგვალი მაგიდა „შეზღუდული შესაძლებლობის მქონე პირთა უფლებების შესახებ“ კონვენციის (CRPD) ხელშემკვრელ მხარეთა კონფერენციის მე-17 (COSP17) სესიის ფარგლებში ჩატარდა.

რატი ბრეგაძემ აღსრულების სისტემაში არსებულ პროგრესზე ისაუბრა და თანამშრომლებს მადლობა გადაუხადა.

ბოლო წლებში აღსრულების ეროვნული ბიუროს საქმიანობაში იზრდება საქმეთა ინდივიდუალური მიდგომის, მორიგებისა და საქმის ნებაყოფლობით დასრულების მაჩვენებელი. 2023 წელს 12 035 საქმე მხარეთა მორიგებით დასრულდა; ვითარდება ციფრული სერვისები და ელექტრონული წარმოება. პროგრესია საერთაშორისო თანამშრომლობის მიმართულებითაც – მიმდინარე წელს ბრაზილიაში გამართულ XXV საერთაშორისო კონგრესზე საქართველო აღმასრულებელთა ევროპულ კავშირს დამკვირვებლის სტატუსით შეუერთდა.

ღონისძიების ბოლოს გაიმართა წარმატებული პროფესიონალების დაჯილდოების ცერემონიალი: 19 აღმასრულებელს მადლობა გამოეცხადა, ხოლო რიგ პოლიციელებს ვადამდე ადრე წოდებები მიენიჭათ.

ღონისძიებას ესწრებოდნენ იუსტიციის მინისტრის მოადგილეები და აღსრულების ეროვნული ბიუროს თავმჯდომარე მირიან ხარაბაძე.

ქალაქ ვილნიუსში საქართველოს ნოტარიუსთა პალატა ევროკავშირის ნოტარიუსთა საბჭოში წევრად მიღებისადმი მიძღვნილ ღონისძიებაზე იუსტიციის მინისტრის პირველმა მოადგილე თამარ ტყეშელაშვილმა წარადგინა.

„ევროკავშირის ნოტარიუსთა საბჭოში ქვეყნის გაწევრება სანოტარო სფეროში გატარებული რეფორმების შედეგია და საქართველოს მორიგ საერთაშორისო აღიარებას წარმოადგენს, რაც, თავის მხრივ, ხელს შეუწყობს ევროკავშირის ქვეყნებსა და საქართველოს შორის დარგობრივი თანამშრომლობის გაღრმავებას. საქართველო გააგრძელებს ევროკავშირის საუკეთესო სანოტარო პრაქტიკის გაზიარებას. ამასთან, საბჭოში გაწევრების შედეგად საქართველოს ნოტარიუსთა პალატა მნიშვნელოვან წვლილს შეიტანს ევროკავშირის ნოტარიუსთა საბჭოს მუშაობაში“, – აღნიშნა თამარ ტყეშელაშვილმა.

ევროკავშირის ნოტარიუსთა საბჭოში საქართველოს ნოტარიუსთა პალატის მიღების ცერემონიალი ვილნიუსში ევროკავშირის ნოტარიუსთა საბჭოს (CNUE) გენერალური ასამბლეის ფარგლებში გაიმართა. ღონისძიებას ესწრებოდნენ ლიეტუვის იუსტიციის მინისტრი ეველინა დობროვოლსკა, ევროკავშირის ნოტარიუსთა საბჭოს პრეზიდენტი მარიუს სტრაკაიტისი და ნოტარიუსთა საერთაშორისო კავშირის პრეზიდენტი ლიონელ გალიესი, საქართველოს საგანგებო და სრულუფლებიანი ელჩი ლიეტუვაში სალომე შაფაქიძე. ქართული დელეგაციის შემადგენლობაში შედიოდნენ, ასევე, ნოტარიუსთა პალატის გამგეობის თავმჯდომარე ეკატერინე ნანდოშვილი, მოადგილე მარიკა გოგოლაძე, გამგეობის წევრები ეთერ გზირიშვილი და რომან კოსტანიანი, ნოტარიუსთა პალატის საერთაშორისო ურთიერთობების სპეციალისტი თეონა წინწალაშვილი.

ქართული კულტურის ერთ-ერთი გამორჩეული ძეგლი, XII საუკუნის ქურაშის ოთხთავი ეცერის თემს დაუბრუნდა. იუსტიციის მინისტრის მოადგილე ბუბა ლომუაშვილმა, ეროვნული არქივის გენერალურმა დირექტორმა თეონა იაშვილმა და ეროვნული არქივის რესტავრაციის განყოფილების უფროსმა თამილა აფაქიძემ ეცერის თემის წარმომადგენლებს საქართველოს იუსტიციის სამინისტროს ეროვნულ არქივში რესტავრირებული ოთხთავი გადასცეს და ამიერიდან ის კვლავ სოფელ ქურაშის წმიდა გიორგის ეკლესიაში დაბრუნდა. მესტიისა და ზემო სვანეთის ეპარქიის ეპისკოპოსმა, მეუფე ილარიონმა საგანგებო ლოცვა აღავლინა.

ეროვნული არქივის რესტავრატორები წიგნის რესტავრაციასა და კონსერვაციაზე 18 თვის განმავლობაში მუშაობდნენ. ეტრატზე შესრულებული ხელნაწერი 151 ფურცლისაგან შედგება და მასში შესულია გიორგი მთაწმინდელისეული რედაქციის ოთხთავი. წიგნს ახლავს სხვადასხვა პერიოდის ანდერძ-მინაწერები. ხელნაწერის ორი გვერდი პალიმფსესტურია, მის ქვედა ფენაზე იკითხება IX-X საუკუნეების იერუსალიმური ლექციონარის ფრაგმენტები.

რესტავრაციამდე ხელნაწერი იყო ნახევრად დაშლილ მდგომარეობაში, ყდის გარეშე. მის დაზიანებულ და გახევებულ ფურცლებს ჰქონდა ლაქები; მტვრის, ობისა და სანთლის ნადები; დარღვეული იყო გვერდების მიმდევრობა.

რესტავრატორებმა ოთხთავის თითოეულ ფურცელს ჩაუტარეს სადეზინფექციო სამუშაოები; გაიწმინდა მშრალი და სველი მეთოდით; მოსცილდა მტვრის, ობის, სანთლის ნადები; გახევებული და დეფორმირებული ფურცლები დარბილდა და გასწორდა; ხელოვნური პერგამენტით შეივსო დაზიანებული კიდეები. ამასთან, ხელნაწერის ტექსტი შინაარსობრივად დალაგდა, ხელახლა დაინომრა და აიკინძა, გაუკეთდა ყუა და ჩაისვა ტყავის ახალ ყდაში.

ქურაშის სახარება სვანეთში დაცული მეორე ხელნაწერია, რომლის რესტავრაცია-კონსერვაცია ეროვნული არქივის ლაბორატორიაში ჩატარდა. 2021 წელს აქ ლახამულის XII საუკუნის ოთხთავის სარესტავრაციო სამუშაოები განხორციელდა.

ორივე ხელნაწერის რესტავრაცია შესაძლებელი გახდა ადგილობრივ თემთან წინასწარი მოლაპარაკების საფუძველზე.

ეცერის თემისა და ადგილობრივი ხელისუფლების წარმომადგენლების გარდა, ღონისძიებას ესწრებოდნენ პარლამენტის თავმჯდომარე შალვა პაპუაშვილი; საქართველოს კულტურის, სპორტისა და ახალგაზრდობის მინისტრი თეა წულუკიანი; პარტია „ხალხის ძალის“ თავმჯდომარე სოზარ სუბარი; ასევე, საკანონმდებლო და აღმასრულებელი ხელისუფლების წარმომადგენლები.

სახელმწიფო და კერძო სექტორის სერვისებზე ხელმისაწვდომობა კიდევ უფრო იზრდება. სამტრედიაში იუსტიციის სახლის ფილიალი გაიხსნა, რომელიც ადგილობრივ მოსახლეობას 500-მდე მომსახურებას თანამედროვე და კომფორტულ გარემოში მიაწვდის. აქვე სპეციალურად მოწყობილ სარიტუალო სივრცეში ქორწინების მსურველი წყვილები საზეიმო ცერემონიალის დაგეგმვასაც შეძლებენ.

სამტრედიის იუსტიციის სახლი საქართველოს პრემიერ-მინისტრმა ირაკლი კობახიძემ, იუსტიციის მინისტრმა რატი ბრეგაძემ და სახელმწიფო რწმუნებულმა იმერეთის რეგიონში ზვიად შალამბერიძემ გახსნეს. ახალი ფილიალი სრულად არის მორგებული შეზღუდული შესაძლებლობის მქონე პირთა საჭიროებებზე. აქ 20-მდე ადგილობრივი პირია დასაქმებული.

სახელმწიფო სერვისების ხელმისაწვდომობა იუსტიციის სამინისტროს პრიორიტეტია, რასაც საქართველოს მასშტაბით 119 იუსტიციის სახლი უზრუნველყოფს; რაიონული ცენტრებისაგან მოშორებით მცხოვრებ მოქალაქეებს კი, მთელი ქვეყნის ტერიტორიაზე ემსახურება ინოვაციური პროექტი „მობილური იუსტიციის სახლი“. უშუალოდ იმერეთის რეგიონში 24 იუსტიციის სახლი ფუნქციონირებს, მობილური იუსტიციის სახლი კი, 15 სოფელს ფარავს.

მიმდინარე წელს იუსტიციის სახლების გეოგრაფიული არეალი კიდევ უფრო გაფართოვდება; კერძოდ: გაიხსნება ჭალის, ზოტის, ტოლების, ცაიშისა და შროშის იუსტიციის სახლები; აგრეთვე, დამატებითი ფილიალები თბილისსა (გლდანი) და ბათუმში; ხაშურის, თერჯოლის, ახმეტის, მცხეთის, საგარეჯოსა და ხელვაჩაურის მუნიციპალიტეტებში კი, სამშენებლო სამუშაოები მიმდინარეობს.

სამტრედიის იუსტიციის სახლის გახსნას ესწრებოდნენ, ასევე, იუსტიციის მინისტრის მოადგილეები, სსიპ-ების ხელმძღვანელები, ადგილობრივი ხელისუფლების წარმომადგენლები და მოწვეული სტუმრები.