თარიღი: 01.10.2022

დუბლინში გამართული მინისტერიალის ფარგლებში რატი ბრეგაძემ დუბლინის პენიტენციური დაწესებულება მოინახულა და ირლანდიის პენიტენციური სამსახურის გენერალურ დირექტორ კარონ მაკკაფრის შეხვდა.

შეხვედრაზე საქართველოს იუსტიციის მინისტრმა განაცხადა, რომ თავისუფლებაშეზღუდული პირების უფლებების მაღალ დონეზე დაცვა სამინისტროს უმთავრესი პრიორიტეტია; პენიტენციური, პრობაციისა და დანაშაულის პრევენციის სისტემების განვითარება კი, სწორედ საუკეთესო ევროპული და საერთაშორისო სტანდარტების შესაბამისად ხორციელდება.

რატი ბრეგაძემ კარონ მაკკაფრის რეაბილიტაციისა და რესოციალიზაციის მიმართულებით პენიტენციურ დაწესებულებებში დანერგილი სიახლეები გააცნო. მასპინძელი მხარის განსაკუთრებული ინტერესის საგანი ციფრული უნივერსიტეტი და სპორტის მართვის სისტემა იყო. რატი ბრეგაძის მოწვევით ირლანდიის პენიტენციური სამსახურის დელეგაცია საქართველოს ეწვევა. ვიზიტის მიზანი ქართული გამოცდილების გაზიარება და ერთობლივი პროექტების დაგეგმვა იქნება.

იუსტიციის მინისტრმა ირლანდიის პენიტენციური სისტემის გენერალურ დირექტორთან საუბრისას ყურადღება გაამახვილა მცირე ზომის საპატიმრო დაწესებულებების მნიშვნელობაზეც. რატი ბრეგაძემ განაცხადა, რომ ასეთი ტიპის ციხე საქართველოში მიმდინარე წლის ბოლომდე გაიხსნება.

იუსტიციის მინისტრი ირლანდიაში ევროპის საბჭოს წევრი ქვეყნების მინისტერიალზე იმყოფება. ღონისძიება ოჯახური, სექსუალური და გენდერული ძალადობის თემატიკაზე მსჯელობას ეძღვნება. See less