Geo
Engსიახლეები
თბილისში მიწის სისტემური რეგისტრაცია დაიწყო
რიყის პარკში თბილისის მიწის სისტემური რეგისტრაციის რეფორმის ღონისძიება გაიმართა, რომელიც იუსტიციის მინისტრმა რატი ბრეგაძემ და თბილისის მერმა კახა კალაძემ გახსნეს.
„ამ ქვეყანაში ყველა მოქალაქის საკუთრების უფლების დასაცავად დამოუკიდებლობის მოპოვების შემდგომ მიწის ფონდთან დაკავშირებული პრობლემების სისტემური გადაჭრის მიზნით დავიწყეთ სისტემური რეგისტრაციების პროექტი, რომლის შედეგადაც აიზომება ყველა მიწის ნაკვეთი, მოძიებული იქნება მისი მესაკუთრე და ყველა ნაკვეთს და თითოეულ კვადრატულ სანტიმეტრს ამ სახელმწიფოში ეყოლება კანონიერი მესაკუთრე. ეს პროექტი არის ნათელი მაგალითი იმისა, თუ როგორ შეიძლება წარმატებულად თანამშრომლობდეს მუნიციპალიტეტი და სამინისტრო. მიწის სისტემური რეგისტრაცია იქნება ერთ-ერთი ყველაზე წარმატებული პროექტი, რომელიც საქართველოს ევროპული მომავლისკენ არის მიმართული“, – განაცხადა რატი ბრეგაძემ.
საქართველოს იუსტიციის სამინისტროსა და თბილისის მერიას შორის გაფორმებული ურთიერთთანამშრომლობის მემორანდუმის თანახმად, თბილისის მერიის მიერ შერჩეულ არეალებზე (ახალდაბა, ბეთანია, კვესეთი, კიკეთი-საღორისი, წყნეთი, კოჯორი, ტაბახმელა, შინდისი, წავკისი, დიდგორი, ძველი ვეძისი, დიღომი) 2024 წლის ბოლომდე წინასწარ დადგენილი გეგმა-გრაფიკით საჯარო რეესტრის ეროვნული სააგენტო სრულიად უფასოდ აზომავს და დაარეგისტრირებს მიწის ნაკვეთებს.
2024 წლის ბოლომდე, თბილისში აიზომება და დარეგისტრირდება დაახლოებით 30 000 მიწის ნაკვეთი. დღეის მდგომარეობით, სისტემური რეგისტრაციის რეფორმის ფარგლებში, მთელი ქვეყნის მასშტაბით, აზომილია 543 820 მიწის ნაკვეთი - ჯამური ფართობით 177 501 ჰექტარი. აქედან 442 057 მიწის ნაკვეთზე - ჯამური ფართობით 163 437 ჰექტარზე, საკუთრების უფლების რეგისტრაცია უკვე დასრულებულია.
მიწის სისტემური რეგისტრაცია ყველა მოქალაქისთვის არის სრულიად უფასო. რეფორმით სარგებლობა შეუძლიათ დიასპორის წარმომადგენლებსაც.
კონკრეტულ ადმინისტრაციულ ერთეულებში საკადასტრო აგეგმვითი/აზომვითი სამუშაოების დაწყების განრიგის გაცნობა შესაძლებელია შემდეგ ბმულზე: https://napr.gov.ge/required-info.
ღონისძიებას იუსტიციის მინისტრის მოადგილეები, საჯარო რეესტრის ეროვნული სააგენტოს თავმჯდომარე დავით დევიძე, სააგენტოს შესაბამისი სამსახურისა და თბილისის მერიის წარმომადგენლები ესწრებოდნენ.