სამართლებრივი ფორუმის მუშაობა იუსტიციის მინისტრებმა რატი ბრეგაძემ და პაველ ბლაჟეკმა დასკვნით სიტყვაში შეაჯამეს.

საქართველოს იუსტიციის მინისტრმა ხაზი გაუსვა ჩეხეთის გამოცდილების გაზიარების მნიშვნელობას საქართველოს კანონმდებლობის ევროპულ სამართალთან დაახლოების პროცესში, რაც საშუალებას მისცემს საქართველოს, განაგრძოს წინსვლა ევროკავშირთან ინტეგრაციის გზაზე.

აღინიშნა, რომ სასესიო ფორმატის ფარგლებში მხარეებმა არაერთი საინტერესო ინიციატივა წამოჭრეს, რომელთა განხორციელებაც ხელს შეუწყობს ორი ქვეყნის სახელმწიფო სისტემების განვითარებას, ადამიანის უფლებების დაცვის მექანიზმების დახვეწას და, აგრეთვე, პენიტენციური და პრობაციის სისტემების რეფორმირების პროცესის წარმატებას.

ქართულ-ჩეხური სამართლებრივი ფორუმი ყოველწლიურად იმართება. პირველად ღონისძიება 2023 წელს ჩატარდა და მას თბილისმა უმასპინძლა.

ფორუმის მიზანი ორ ქვეყანას შორის დარგობრივი თანამშრომლობის განვითარებაა.

ორმხრივი შეხვედრის ფორმატში საუბარი შეეხო 2026 წელს თბილისში გაერო-ს საჯარო სერვისების დღისადმი მიძღვნილი ღონისძიების ჩატარებას, რისთვისაც თამარ ტყეშელაშვილმა გაეროს გენერალური მდივნის მოადგილის გუნდს მადლობა გადაუხადა მტკიცე მხარდაჭერისა და თანამშრომლობისათვის.

აღინიშნა, რომ იუსტიციის სამინისტროს ერთ-ერთი მნიშვნელოვანი პრიორიტეტი ადამიანზე ორიენტირებული სისტემის შექმნაა, რომელიც თანაბრად უზრუნველყოფს მოქალაქეებისთვის ხარისხიანი და უსაფრთხო სერვისების მიწოდებას.

თამარ ტყეშელაშვილმა ისაუბრა საჯარო მმართველობის რეფორმის 2023-2026 წლების და საჯარო სერვისების განვითარების 2022-2025 წლების სტრატეგიის მნიშვნელობაზე. ორივე დოკუმენტის ფარგლებში საქართველო აგრძელებს საჯარო სერვისების განვითარებას, რაც უზრუნველყოფს ინოვაციებისა და ტექნოლოგიების გაზრდის ეფექტურობას.

აღსანიშნავია, რომ საქართველოს იუსტიციის სამინისტროს სერვისები გაერო-ს საჯარო სამსახურის 2024 წლის ჯილდოებზეა წარდგენილი.

იუსტიციის მინისტრის პირველმა მოადგილემ ხაზი გაუსვა საქართველოს მთავრობის მიერ გადადგმულ მნიშვნელოვან ნაბიჯებსა და ხელშესახებ პროგრესს ეფექტური, გამჭვირვალე, ინკლუზიური და ანგარიშვალდებული სახელმწიფო ინსტიტუტების შექმნაში.

შეხვედრის ბოლოს მხარეები შეთანხმდნენ სახელმწიფო მომსახურების მიმართულებით თანამშრომლობის შემდგომ განვითარებასა და გაღრმავებაზე.

შეხვედრას ასევე ესწრებოდნენ გაეროსთან საქართველოს მუდმივი წარმომადგენელი დავით ბაქრაძე და საჯარო რეესტრის ეროვნული სააგენტოს თავმჯდომარე დავით დევიძე.

რიგით მეორე ჩეხურ-ქართული სამართლებრივი ფორუმი იუსტიციის მინისტრებმა რატი ბრეგაძემ და პაველ ბლაჟეკმა გახსნეს.

რატი ბრეგაძემ ხაზი გაუსვა მხარეებს შორის უკვე დამკვიდრებული ორმხრივი ფორუმის მნიშვნელობას და ტრადიციას. მინისტრმა აღნიშნა ქართულ-ჩეხური დარგობრივი თანამშრომლობის როლი საქართველოს ევროინტეგრაციის პროცესში, რაც ჩვენი ქვეყნის ისტორიული არჩევანია.

ჩეხურ-ქართული სამართლებრივი ფორუმი წარმოადგენს საუკეთესო პლატფორმას ქართული და ჩეხური სამართლებრივი სისტემების დაახლოების, ინსტიტუციური და შინაარსობრივი გაძლიერების კუთხით. ამასთან, ფორუმი საქართველოსა და ჩეხეთის იუსტიციის სამინისტროების, სამართლის დარგის პროფესიონალთა და სასამართლო სისტემის წარმომადგენელთათვის თანამშრომლობის გაღრმავების, გამოცდილების გაზიარებისა და კონკრეტული ინიციატივების განხილვის საშუალებაა.

ღონისძიების ფარგლებში, სასესიო ფორმატში განხილულ იქნება ადამიანის უფლებათა დაცვისა და საერთაშორისო სასამართლოების გადაწყვეტილებების აღსრულების მექანიზმები; ეროვნული კანონმდებლობის ჰარმონიზაციის პროცესი და პროგრესი ევროკავშირის სამართალთან; პენიტენციური და პრობაციის სისტემების თანამშრომელთა მუდმივი გადამზადების მნიშვნელობა; მართლმსაჯულების სისტემის ეფექტიანობის მიზნით განხორციელებული რეფორმები; ადვოკატთა როლი ადამიანის უფლებების დაცვის პროცესში; განრიდებისა და მედიაციის როლი სისხლის სამართლის სფეროში და სხვ.

ფორუმის მუშაობაში მონაწილეობენ საქართველოს იუსტიციის მინისტრის მოადგილეები ბექა ძამაშვილი და თორნიკე ჭეიშვილი; ადვოკატთა ასოციაციის, იურიდიული დახმარების სამსახურისა და სასამართლო სისტემის წარმომადგენლები.

ჩეხურ-ქართული სამართლებრივი ფორუმის დაფუძნების იდეა 2022 წლის ოქტომბერში ჩეხეთისა და საქართველოს იუსტიციის მინისტრების შეხვედრისას გაჩნდა. ღონისძიებას თბილისი და პრაღა მორიგეობით მასპინძლობს.

მიწის რეფორმის ქართული მოდელი აშშ-ში, ქ. ვაშინგტონში მიმდინარე საერთაშორისო ღონისძიების მონაწილეებს იუსტიციის მინისტრის პირველმა მოადგილე თამარ ტყეშელაშვილმა გააცნო. სესიას მსოფლიოს 100-ზე მეტი ქვეყნის წარმომადგენელი ესწრებოდა.

თამარ ტყეშელაშვილმა საჯარო რეესტრის ეროვნული სააგენტოსა და მსოფლიო ბანკის ერთობლივი პროექტის − „ირიგაციისა და მიწის ბაზრის განვითარების“ საპილოტე პროექტის შესახებ ისაუბრა.

მსოფლიო ბანკის მისიის შეფასებით, პროექტის ფარგლებში შექმნილი სისტემური რეგისტრაციის მეთოდოლოგია და ტექნოლოგიური გადაწყვეტები სამაგალითოა და საქართველოს აქვს მაღალი პოტენციალი იმისთვის, რომ სხვა ქვეყნებს ექსპერტული მხარდაჭერა გაუწიოს.

საპილოტე პროექტის შედეგად მიღებული ცოდნისა და გამოცდილების ანალიზის საფუძველზე, 2022 წლიდან სახელმწიფოს დაფინანსებით მთელი ქვეყნის მასშტაბით 59 მუნიციპალიტეტში მიმდინარეობს მიწის სისტემური რეგისტრაცია, რომელიც 2024 წელს დასრულდება. პროექტის ფარგლებში უკვე 1 000 000-ზე მეტი მიწის ნაკვეთი აიზომა, 700 000-ზე მეტ მიწის ნაკვეთზე კი, საკუთრების უფლება დარეგისტრირდა. ყოველდღიურად, საშუალოდ, 4000 მიწის ნაკვეთი იზომება.

თამარ ტყეშელაშვილმა ყურადღება გაამახვილა მაღალტექნოლოგიური სერვისების დანერგვის მნიშვნელობაზე და დამსწრეებს წარუდგინა ქართული ინოვაციები, რომელთა საშუალებით მიწის სისტემური რეგისტრაციის პროცესი სრულად ელექტრონული, შესაბამისად, მოქალაქეებისთვის უფრო სწრაფი და მოქნილი გახდა. ამასთან, ინერგება თანამედროვე ტექნოლოგიებზე დაფუძნებული სერვისი „გონიერი კონტრაქტი“, რაც მოქალაქეებს საშუალებას მისცემს, ელექტრონული მოწყობილობის საშუალებით დისტანციურად დადონ გარიგებები უძრავ ქონებაზე, გადაიხადონ ნასყიდობის საფასური და დაარეგისტრირონ უფლება.

მსოფლიო ბანკის კონფერენციაზე წარმოდგენილია საჯარო რეესტრის ეროვნული სააგენტოს საგამოფენო სივრცე. მიწის ადმინისტრირების სხვადასხვა საკითხთან დაკავშირებულ სესიებზე საჯარო რეესტრის ეროვნული სააგენტოს ხელმძღვანელი დავით დევიძე სხვა ქვეყნებს ქართულ გამოცდილებას მიმდინარე ღონისძიების მომდევნო დღეებშიც გაუზიარებს.