საქართველოს იუსტიციის მინისტრმა პაატა სალიამ დიდი ბრიტანეთის ელჩ გარეთ უორდთან იუსტიციის სფეროში მომავალი თანამშრომლობის გაღრმავებაზე ისაუბრა.

გაცნობითი ხასიათის შეხვედრაზე საუბარი შეეხო იუსტიციის სამინისტროს პრიორიტეტულ მიმართულებებს - ადამიანის უფლებათა დაცვის მექანიზმებს, სახელმწიფო სერვისების მიწოდების პოლიტიკას, პენიტენციური და პრობაციის სისტემების რეფორმას, ასევე, ციფრული მმართველობისა და ინოვაციების ინტეგრაციას სამინისტროს საქმიანობაში.

იუსტიციის მინისტრმა ბრიტანეთის ელჩს მადლობა გადაუხადა ვიზიტისთვის და იუსტიციის სფეროში მომავალი თანამშრომლობის გაღრმავების მზაობა გამოთქვა.

შეხვედრას, ასევე, ესწრებოდნენ საქართველოს იუსტიციის მინისტრის მოადგილე ბექა ძამაშვილი და დიდი ბრიტანეთის ელჩის პოლიტიკური და საგარეო ურთიერთობების მდივანი ჯეს დაკვორთი.

იუსტიციის მინისტრის მოადგილეებმა იაპონიის საპარლამენტო დელეგაციასთან თანამშრომლობის გაღრმავების პერსპექტივები განიხილეს.

ლანა მორგოშიამ და გიორგი დგებუაძემ იაპონია-საქართველოს საპარლამენტო მეგობრობის ჯგუფის დელეგაციის ხელმძღვანელს, კარენ მაკიშიმასა და ჯგუფის სხვა წევრებს იუსტიციის სამინისტროს პრიორიტეტები და საქმიანობის ძირითადი სფეროები გააცნეს.

დელეგაციის ინტერესის გათვალისწინებით, განსაკუთრებული ყურადღება დაეთმო სერვისების ხელმისაწვდომობის უზრუნველყოფისა და ციფრული მმართველობის დანერგვის მიზნით გატარებულ რეფორმებს.

ქართულმა მხარემ გამოხატა მზაობა, გაიზიაროს იაპონიის გამოცდილება ტექნოლოგიური ინოვაციების სფეროში და გამოთქვა იმედი, რომ ამ კუთხით, არსებობს ორ ქვეყანას შორის თანამშრომლობის გაღრმავების შესაძლებლობები.

შეხვედრას, ასევე, ესწრებოდნენ იუსტიციის სამინისტროს საერთაშორისო ურთიერთობების სამმართველოს უფროსი მარიამ ბრეგაძე, სახელმწიფო სერვისების განვითარების სააგენტოს თავმჯდომარე რუსუდან კოხოძე, საჯარო რეესტრის ეროვნული სააგენტოს ხელმძღვანელი დავით დევიძე, იუსტიციის სახლის თავმჯდომარე ვახტანგ ჟვანია და ციფრული მმართველობის სააგენტოს თავმჯდომარე დავით ნადირაშვილი.

დღესვე იაპონიის დელეგაცია, საქართველოში ვიზიტის ფარგლებში, თბილისის იუსტიციის სახლის ცენტრალურ ფილიალს ეწვევა და სერვისების გაცემის კონცეფციასა და კერძო და საჯარო სერვისების მიწოდების პროცესს გაეცნობა.

იუსტიციის მინისტრი პაატა სალია ელჩების ყოველწლიური კონფერენციის მუშაობაში მონაწილეობს, რომელიც საგარეო საქმეთა სამინისტროს ორგანიზებით იმართება.

კონფერენციის ფარგლებში გამართულ სამუშაო სესიაზე „დიპლომატია ქვეყნის თავდაცვისა და უსაფრთხოების სამსახურში“ მონაწილეობდნენ საგარეო საქმეთა მინისტრი მაკა ბოჭორიშვილი, საგარეო საქმეთა მინისტრის მოადგილე ლაშა დარსალია, ვიცე-პრემიერი, საქართველოს თავდაცვის მინისტრი ირაკლი ჩიქოვანი, შინაგან საქმეთა მინისტრი გეკა გელაძე და შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი.

საქართველოს იუსტიციის მინისტრმა „ელჩების კონფერენცია 2025“-ის მონაწილეებს იუსტიციის სამინისტროს საქმიანობის შედეგები და ძირითადი პრიორიტეტული მიმართულებები გააცნო.

ადამიანის უფლებების დაცვის სფეროში მიღწეულ პროგრესზე საუბრისას პაატა სალიამ განსაკუთრებული ყურადღება გაამახვილა პენიტენციური სისტემის წარმატებულ რეფორმაზე, ასევე, ადამიანის უფლებათა ევროპულ სასამართლოში საქართველოს წინააღმდეგ შესული საქმეების მკვეთრ კლებასა და სასამართლო გადაწყვეტილებების აღსრულების პოზიტიურ დინამიკაზე.

სამართლებრივი უსაფრთხოების სფეროში მიღწეული შედეგების კუთხით პაატა სალიამ ხაზი გაუსვა საერთაშორისო არბიტრაჟებსა და უცხო ქვეყნის სასამართლოებში სახელმწიფოს ინტერესების ეფექტიანი დაცვის, ასევე, პარტნიორ სახელმწიფოებთან თანამშრომლობის გაღრმავების მნიშვნელობას.

პაატა სალიამ დიპლომატებს გააცნო სახელმწიფო სერვისების ხელმისაწვდომობის გაუმჯობესების კუთხით, ასევე, ციფრული მმართველობის სფეროში განხორციელებული და დაგეგმილი ინიციატივები, მათ შორის, ინოვაციებისა და ახალი ტექნოლოგიების აქტიურად დანერგვის მიმართულებით. მან ისაუბრა გაერო-ს საჯარო სერვისების ფორუმზეც, რომელსაც საქართველო 2026 წლის ივნისში უმასპინძლებს, და ხაზი გაუსვა საელჩოებისა და წარმომადგენლობების ჩართულობის მნიშვნელობას ღონისძიებისადმი საერთაშორისო ინტერესის გაზრდისთვის.

ელჩების კონფერენცია მუშაობას სასესიო ფორმატში ოთხი დღის განმავლობაში გააგრძელებს.

ადამიანის უფლებათა ევროპულმა სასამართლომ გამოაქვეყნა გადაწყვეტილება საქმეზე „ვეკუა საქართველოს წინააღმდეგ“, რომლის ფარგლებშიც მომჩივნის პრეტენზიების ნაწილი დაუშვებლად გამოაცხადა, ხოლო ნაწილის განხილვის შედეგად დარღვევა არ დადგინდა.

მომჩივანი დაობდა, რომ 2017-2022 წლებში მიმდინარე ადმინისტრაციული სამართალწარმოების შედეგად, დაერღვა საკუთრების უფლება და უდანაშაულობის პრეზუმფცია.

სტრასბურგის სასამართლომ სრულად გაიზიარა იუსტიციის სამინისტროს მიერ წარდგენილი სამართლებრივი პოზიცია შესაბამის მტკიცებულებებთან ერთად და დაასკვნა, რომ მომჩივნის უდანაშაულობის პრეზუმფციის დარღვევას ადგილი არ ჰქონია. რაც შეეხება საკუთრების უფლების შესაძლო დარღვევასთან დაკავშირებულ პრეტენზიებს, სტრასბურგის სასამართლომ საჩივარი ამ ნაწილში დაუშვებლად გამოაცხადა.

სტრასბურგის სასამართლოს გადაწყვეტილებით დადასტურდა, რომ ეროვნულმა სასამართლოებმა პროცესები წარმართეს ევროპული კონვენციის სტანდარტების სრული დაცვით.