იუსტიციის მინისტრმა ჩინეთის ელჩთან შეხვედრა გამართა. პაატა სალიამ ჭოუ ციენს სამინისტროს საქმიანობის პრიორიტეტული მიმართულებები გააცნო. ასევე, საუბარი შეეხო საქართველოსა და ჩინეთს შორის არსებულ სტრატეგიულ პარტნიორობას და ორი ქვეყნის იუსტიციის სამინისტროებს შორის თანამშრომლობის პერსპექტივებს.

იუსტიციის სამინისტროში გამართულ შეხვედრას ესწრებოდნენ იუსტიციის მინისტრის მოადგილე ბექა ძამაშვილი, საელჩოს პირველი მდივანი ვანგ ტანი და საელჩოს ატაშე ჩენ ჩუეიპინი.

იუსტიციის მინისტრი პაატა სალია, მოადგილეებთან ერთად, საჯარო რეესტრის ეროვნული სააგენტოსა და ციფრული მმართველობის სააგენტოს თანამშრომლებს შეხვდა.

სამუშაო შეხვედრაზე განიხილეს სააგენტოების მიმდინარე პროექტები და სამომავლო გეგმები. საუბარი ასევე შეეხო არსებულ გამოწვევებსა და მათი გადაჭრის გზებს.

იუსტიციის მინისტრი და მოადგილეები, ასევე, ადგილზე გაეცნენ თანამშრომელთა სამუშაო პირობებსა და მათ საჭიროებებს.

იუსტიციის მინისტრი პაატა სალია აზერბაიჯანის რესპუბლიკის ელჩს საქართველოში, ფაიგ გულიევს შეხვდა.

შეხვედრაზე მხარეებმა ორი ქვეყნის კომპეტენტურ უწყებებს შორის სამართლის სფეროში არსებული მჭიდრო და ეფექტიანი თანამშრომლობის შესახებ ისაუბრეს და სამომავლოდ ერთობლივი ღონისძიებების განხორციელებაზე იმსჯელეს.

იუსტიციის სამინისტროში გამართულ შეხვედრას ასევე ესწრებოდნენ იუსტიციის მინისტრის მოადგილე ბექა ძამაშვილი და აზერბაიჯანის რესპუბლიკის საელჩოს პირველი მდივანი სეიმურ ილიასლი.

იუსტიციის მინისტრი პაატა სალია, მოადგილეებთან ერთად, იუსტიციის სამინისტროს სსიპ “მსჯავრდებულთა პროფესიული მომზადებისა და გადამზადების ცენტრის” თანამშრომლებს შეხვდა.

სამუშაო შეხვედრაზე საუბარი შეეხო ცენტრის მიმდინარე საქმიანობას და სამომავლო გეგმებს.

იუსტიციის მინისტრმა ასევე დაათვალიერა მაღაზია “რე-მარკეტი”, სადაც მსჯავრდებულთა ხელნაკეთი ნივთების შეძენაა შესაძლებელი.

იუსტიციის მინისტრმა პაატა სალიამ დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოში სამუშაო შეხვედრა გამართა.

შეხვედრაზე საუბარი შეეხო სააგენტოს მიმდინარე საქმიანობას, განხილულ იქნა არსებული გამოწვევები და მათი გადაჭრის გზები.

შეხვედრას ესწრებოდნენ იუსტიციის მინისტრის პირველი მოადგილე ლაშა მაღრაძე, მოადგილეები - ალექსანდრე მაისურაძე, მერაბ ტურავა, ბექა ძამაშვილი, გიორგი დგებუაძე და დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს თავმჯდომარის მოვალეობის შემსრულებელი მიხეილ ზაზაშვილი.

იუსტიციის მინისტრის მოადგილედ ირაკლი ხმალაძე დაინიშნა.

იუსტიციის მინისტრის მოადგილედ ირაკლი ხმალაძე დაინიშნა. ირაკლი ხმალაძე პროფესიით იურისტია. აქვს სახელმწიფო სამსახურში მუშაობის მრავალწლიანი გამოცდილება.

იუსტიციის მინისტრის მოადგილის თანამდებობაზე დანიშვნამდე იკავებდა თბილისის ვიცე-მერის თანამდებობას.

იუსტიციის მინისტრის მოადგილედ ალექსანდრე მაისურაძე დაინიშნა.

ალექსანდრე მაისურაძე პროფესიით იურისტია. აქვს სახელმწიფო სამსახურში მუშაობის მრავალწლიანი გამოცდილება.

იუსტიციის მინისტრის მოადგილის თანამდებობაზე დანიშვნამდე იკავებდა საქართველოს საგარეო დაზვერვის სამსახურის უსაფრთხოების დირექტორატის უფროსის თანამდებობას.

იუსტიციის მინისტრის მოადგილეების პოსტს ასევე იკავებენ მერაბ ტურავა, გიორგი დგებუაძე და ბექა ძამაშვილი, მინისტრის პირველ მოადგილედ კი ლაშა მაღრაძე დაინიშნა.

საქართველოს პარლამენტის ადამიანის უფლებათა დაცვისა და სამოქალაქო ინტეგრაციისა და იურიდიულ საკითხთა კომიტეტების ერთობლივ სხდომაზე განხილულ იქნა სტრასბურგის სასამართლოსა და გაეროს კომიტეტების მიერ საქართველოს მიმართ გამოტანილი საქმეების აღსრულების მდგომარეობის შესახებ ანგარიშები.

ანგარიშები იუსტიციის მინისტრის მოადგილემ, ბექა ძამაშვილმა წარადგინა.

აღინიშნა, რომ ევროპული სასამართლოს სტატისტიკის თანახმად, მკვეთრად შემცირდა საქართველოს წინააღმდეგ არსებული საქმეების საერთო რაოდენობა. 2025 წლის მდგომარეობით, 2011 წელთან შედარებით, სტრასბურგის სასამართლოში საქართველოს წინააღმდეგ მიმდინარე საქმეების რაოდენობა 94%-ით შემცირდა. ამასთან, 2012 წლის შემდეგ სტრასბურგის სასამართლოს საქართველოს პენიტენციური სისტემიდან გაგზავნილი არცერთი საქმე უცნია დასაშვებად.

ევროპულ სასამართლოში საჩივრების მკვეთრი კლება საქართველოს ხელისუფლების მიერ ბოლო წლებში ადამიანის უფლებების დაცვისა და მართლმსაჯულების სფეროში განხორციელებული მასშტაბური რეფორმების შედეგია, რის შედეგადაც საქართველოს მოქალაქეებს საკუთარი უფლებების ეფექტიანი დაცვა ქვეყნის შიგნითაც შეუძლიათ. ყურადღება გამახვილდა, რომ სტრასბურგის სასამართლოს მიერ გამოტანილი 118 აღსრულებული საქმიდან, 85% 2013 წლის შემდეგ აღსრულდა.

მინისტრის მოადგილემ აღნიშნა, რომ საქართველოს გამარჯვებით დასრულდა 2008 წლის ომთან და განგრძობად ოკუპაციასთან დაკავშირებული ყველა საქმე, რის შემდეგაც რუსეთის ფედერაციის წინააღმდეგ გადაწყვეტილებების აღსრულება ევროპის საბჭოს მინისტრთა კომიტეტის ფარგლებში მიმდინარეობს.

საქართველოს პარლამენტის რეგლამენტის შესაბამისად, ადამიანის უფლებათა ევროპული სასამართლოსა და გაეროს კომიტეტების მიერ საქართველოს მიმართ გამოტანილი საქმეების აღსრულების მდგომარეობის შესახებ ანგარიშები იუსტიციის სამინისტროს მიერ ყოველწლიურად წარედგინება პარლამენტს.

საქართველოს იუსტიციის მინისტრი პაატა სალია თურქეთის რესპუბლიკის საგანგებო და სრულუფლებიან ელჩს საქართველოში ალი ქაან ორბაის შეხვდა.

გაცნობითი ხასიათის შეხვედრაზე მხარეებმა ორი ქვეყნის კომპეტენტურ უწყებებს შორის სამართლის სფეროში არსებული მჭიდრო და ეფექტიანი თანამშრომლობის შესახებ ისაუბრეს და მომავალში ურთიერთთანამშრომლობის კიდევ უფრო გაღრმავების თაობაზე მზაობა გამოთქვეს.

იუსტიციის სამინისტროში გამართულ შეხვედრას ესწრებოდნენ საქართველოს იუსტიციის მინისტრის მოადგილეები ‒ მერაბ ტურავა, ლაშა მაღრაძე და გიორგი დგებუაძე, ასევე, თურქეთის საელჩოს საკონსულო განყოფილების ხელმძღვანელი ბორან ჯან ქოჩბოღანი.