ანგარიშის განხილვა შშმ პირთა უფლებების დაცვის საკითხებზე მომუშავე საკონსულტაციო საბჭოს ფორმატში გაიმართა, რომელსაც იუსტიციის მინისტრის მოადგილე ბუბა ლომუაშვილი ხელმძღვანელობდა.

სამოქმედო გეგმის ფარგლებში, 6 თვის განმავლობაში იუსტიციის სამინისტროს მიერ გატარდა მთელი რიგი ღონისძიებებისა შშმ პირთა უფლებრივი მდგომარეობის, შესაბამისი ინფრასტრუქტურისა და სერვისებზე წვდომის გაუმჯობესების მიზნით. კერძოდ, განხორციელდა საკანონმდებლო სისტემის რევიზია და მისი გაერო-ს შშმ პირთა უფლებების კონვენციასთან შესაბამისობის დადგენა; საქართველოს იუსტიციის სამინისტროს ელექტრონული სერვისებისა და ვებგვერდების მისაწვდომობის უზრუნველყოფა; შშმ პირთა უფლებათა დაცვის საკითხებზე სისტემის მასშტაბით თანამშრომელთა გადამზადება.

ანგარიში ანალიტიკურმა დეპარტამენტმა მოამზადა, რომელიც, ამავე დროს, შეზღუდული შესაძლებლობის მქონე პირთა უფლებების დაცვის საკითხებზე მომუშავე საკონსულტაციო საბჭოს სამდივნოსაც წარმოადგენს. სამოქმედო გეგმით განსაზღვრული აქტივობების შესრულების პროგრესის შესახებ ისაუბრეს იუსტიციის სამინისტროს სისტემაში შემავალი უწყებების წარმომადგენლებმაც.

სხდომამ მოიწონა შეზღუდული შესაძლებლობის მქონე პირთა უფლებების დაცვის შესახებ იუსტიციის სამინისტროს 2023 წლის სამოქმედო გეგმის აუდიოვერსია, რომელიც იუსტიციის სამინისტროსა და აფხაზეთის უსინათლოთა და ყრუთა კავშირ „ჰერას“ თანამშრომლობით ჩაიწერა. მისი მიზანი უსინათლო და მცირემხედველი პირებისათვის სამოქმედო გეგმის შესახებ ინფორმაციის მისაწვდომობის უზრუნველყოფაა.

შეხვედრის ბოლოს გაიმართა დისკუსია და დაიგეგმა სამომავლო აქტივობები.

სხდომას ესწრებოდნენ საკონსულტაციო საბჭოს წევრები, რომლის შემადგენლობაში შედიან საბჭოს მოწვეული წევრები – შშმ პირთა წარმომადგენლობითი და არასამთავრობო ორგანიზაციები, შშმ თემის წარმომადგენლები, აქტივისტები, აგრეთვე, იუსტიციის სამინისტროს სისტემის სტრუქტურული ერთეულის, სსიპ-ებისა და საქვეუწყებო დაწესებულების ხელმძღვანელები.

სწავლება სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს სოციალური მუშაკებისთვის, თავშესაფრებისა და კრიზისული ცენტრების თანამშრომლებისთვის ჩატარდა და მასში მონაწილეობა ზრუნვის სააგენტოს 28 წარმომადგენელმა მიიღო.

ტრენინგის ფარგლებში ყურადღება გამახვილდა არასრულწლოვანთა ტრეფიკინგისათვის დამახასიათებელი ექსპლუატაციის ფორმებზე, ბავშვების ფსიქოლოგიური განვითარების სტადიებზე, არასრულწლოვან მსხვერპლთან კონტაქტის დამყარების ტექნიკასა და ქუჩაში მცხოვრები ან/და მომუშავე ბავშვების საკითხზე.

შესაბამისი სპეციალისტების კვალიფიკაციის ამაღლება ამ საკითხებზე ტრეფიკინგის წინააღმდეგ ბრძოლის 2023-2024 წლების სამოქმედო გეგმის ერთ-ერთი პრიორიტეტული მიმართულებაა. მისი მიზანია ადამიანით ვაჭრობის მსხვერპლთა და დაზარალებულთა დაცვისა და დახმარების სერვისების გაუმჯობესება და მათი რეაბილიტაციის ეფექტიანი მექანიზმების დანერგვა.

ტრენინგი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭოს ორგანიზებით, ევროპის კავშირის ფინანსური მხარდაჭერითა და მიგრაციის პოლიტიკის განვითარების საერთაშორისო ცენტრთან თანამშრომლობით ჩატარდა.

სწავლება პროექტის – „განვითარებაზე მიგრაციის გავლენის გაძლიერება საქართველოში“ (STREAMinG) – ფარგლებში გაიმართა, რომელსაც მიგრაციის პოლიტიკის განვითარების საერთაშორისო ცენტრი (ICMPD) ევროკავშირისა და შვეიცარიის განვითარებისა და თანამშრომლობის სააგენტოს (SDC) დაფინანსებით ახორციელებს.

ტრეფიკინგთან ბრძოლა საქართველოს მთავრობის პრიორიტეტული მიმართულებაა, რომელიც, ასევე, საქართველოს ევროკავშირში ინტეგრაციის პროცესის მნიშვნელოვანი ნაწილია და ქმნის ტრანსნაციონალურ ორგანიზებულ დანაშაულთან ბრძოლის კუთხით ქვეყანასა და რეგიონში უსაფრთხო და საიმედო გარემოს.

აშშ-ის სახელმწიფო დეპარტამენტის 2023 წლის ანგარიშის თანახმად, ტრეფიკინგის წინააღმდეგ განხორციელებული ღონისძიებებით საქართველო კვლავ უმაღლეს საფეხურზეა, რომლის თანახმად, საქართველო სრულად აკმაყოფილებს ტრეფიკინგთან ბრძოლის სტანდარტებს; განაგრძობს მტკიცე, მდგრად, თანმიმდევრულ და კოორდინირებულ ღონისძიებებს ტრეფიკინგთან ბრძოლის მიმართულებით, რაც განაპირობებს ქვეყნის უმაღლეს შეფასებას.

საქართველოს მიერ ტრეფიკინგის წინააღმდეგ გატარებული ღონისძიებების დადებითი შეფასება საქართველოს იუსტიციის სამინისტროს ხელმძღვანელობით მოქმედი ადამიანით ვაჭრობის (ტრეფიკინგის) წინააღმდეგ მიმართული ღონისძიებების განმახორციელებელი საუწყებათაშორისო საკოორდინაციო საბჭოსა და მისი წევრი სახელმწიფო უწყებების ეფექტიანი მუშაობის შედეგია.

ტრეფიკინგის წინააღმდეგ ბრძოლის კოორდინირებული სახელმწიფო პოლიტიკა მიმართულია დანაშაულის პრევენციის, მსხვერპლთა დაცვის, პროაქტიული გამოძიებისა და ეფექტიანი სისხლისსამართლებრივი დევნისა და თანამშრომლობის ღონისძიებების გაძლიერებისაკენ.

გაერთიანებული ერების ორგანიზაციის ადამიანის უფლებათა კომიტეტში წარსადგენი კანდიდატის შესარჩევი კონკურსი გამოცხადდა, რომელიც საქართველოს იუსტიციის მინისტრის 2023 წლის 11 ივლისის №921 ბრძანებით დამტკიცებული კონკურსის ჩატარების წესის შესაბამისად წარიმართება.

დაინტერესებულმა პირებმა განაცხადები უნდა წარმოადგინონ 2023 წლის 15 აგვისტომდე. კონკურსის თაობაზე დეტალური ინფორმაცია განთავსებულია შემდეგ მისამართზე: https://hr.gov.ge/JobProvider/UserOrgVaks/Details/80232?active=1

კონკურსის შედეგად საქართველოდან წარდგენილი კანდიდატი მონაწილეობას მიიღებს გაერო-ს ადამიანის უფლებათა კომიტეტის არჩევნებში, რომელიც 2024 წელს გაიმართება.

ადამიანის უფლებათა კომიტეტი პასუხისმგებელია გაერო-ს ფარგლებში ადამიანის უფლებების დაცვის განმტკიცებასა და ხელშემკვრელი სახელმწიფოების მიერ „სამოქალაქო და პოლიტიკური უფლებების შესახებ“ საერთაშორისო პაქტით გათვალისწინებული ვალდებულებების ეფექტიანი შესრულების მონიტორინგზე.

საქართველოს პრემიერ-მინისტრთან ოფიციალური ვიზიტით მყოფ უზბეკეთის პრემიერ-მინისტრს აბდულა არიპოვს თბილისის ცენტრალურ იუსტიციის სახლში იუსტიციის მინისტრმა რატი ბრეგაძემ უმასპინძლა. საქართველოს იუსტიციის მინისტრმა უზბეკეთის სახელმწიფო დელეგაციას სერვისების მიწოდების ქართული გამოცდილება გაუზიარა.
უზბეკეთის დელეგაცია, ასევე, გაეცნო იუსტიციის სამინისტროს ქართულ ინოვაციას – იუსტიციის სახლებს პენიტენციურ დაწესებულებებში.

რატი ბრეგაძემ ყურადღება გაამახვილა სახელმწიფო სერვისების ხელმისაწვდომობის უპრეცედენტოდ მაღალ მაჩვენებელზე, მათ შორის, ისეთ ქართულ ინოვაციურ პროექტზე, როგორიცაა მობილური იუსტიციის სახლი, რომელიც უკვე მთელ საქართველოს ფარავს.

იუსტიციის მინისტრმა უზბეკეთის დელაგაციას ასევე საქართველოში სასჯელის აღსრულების მიმართულებით ერთ-ერთი წარმატებული რეფორმა ,,პრობბოქსი“ გააცნო. ,,პრობბოქსი“ ევროპაში პირველი ტექნოლოგიური მოწყობილობაა, რომელშიც ყველა ის სერვისია ინტეგრირებული, რომელთა სარგებლობისთვისაც პრობაციონერებს აქამდე პრობაციის ბიუროებში სჭირდებოდათ მისვლა.

უზბეკეთის პრემიერთან შეხვედრას, ასევე, ესწრებოდნენ იუსტიციის მინისტრის მოადგილე ერეკლე ღვინიანიძე და იუსტიციის სახლის თავმჯდომარე ლაშა ლობჯანიძე.

საქართველოს იუსტიციის მინისტრის პირველმა მოადგილემ და უზბეკეთის რესპუბლიკის იუსტიციის მინისტრის მოადგილემ ორ ქვეყანას შორის დარგობრივი თანამშრომლობის განვითარების პერსპექტივებზე ისაუბრეს.

თამარ ტყეშელაშვილისა და ხუდოიორ მელიევის შეხვედრა უზბეკეთის რესპუბლიკის პრემიერ-მინისტრ აბდულა არიპოვის საქართველოს პრემიერ-მინისტრ ირაკლი ღარიბაშვილთან ვიზიტის ფარგლებში გაიმართა.

საქართველოს იუსტიციის მინისტრის პირველმა მოადგილემ კოლეგას იუსტიციის სამინისტროს ხელმძღვანელობით მიმდინარე წარმატებული რეფორმები და უწყების საქმიანობის ძირითადი მიმართულებები გააცნო. განსაკუთრებული ყურადღება გამახვილდა სერვისების ხელმისაწვდომობის მიზნით დანერგილ ინოვაციურ პროექტებზე – მობილურ იუსტიციის სახლსა და იუსტიციის სახლების ფილიალების გახსნაზე პენიტენციურ დაწესებულებებში, რაც ქართულ ინოვაციას წარმოადგენს.

უზბეკეთის რესპუბლიკის დელეგაციის ვიზიტის ფარგლებში ირაკლი ღარიბაშვილმა და აბდულა არიპოვმა ორ ქვეყანას შორის ორმხრივი თანამშრომლობის განვითარების ერთობლივი პრაქტიკული ღონისძიებების 2023-2024 წლების სამოქმედო გეგმას მოაწერეს ხელი.

2023 წლის 5 ივლისს ადვოკატმა წარმოადგინა მომართვა მსჯავრდებულ სააკაშვილთან კლინიკა „ვივა-მედში“ პოლონელი ექიმების შეშვებასთან დაკავშირებით. 12 ივლისს მათ მიერ დასახელებულ ექიმებს მიეცათ შესაძლებლობა, რომ მოენახულებინათ მსჯავრდებული;

ადვოკატის წერილში მითითებული იყო, რომ მოცემული ინფორმაცია გახლდათ კონფიდენციალური. თუმცა, მოგვიანებით, საზოგადოებამ ერთ-ერთი ტელეკომპანიის მეშვეობით, პრაქტიკულად, პირდაპირ ეთერში იხილა ექიმების საავადმყოფოში შესვლის პროცესი, რასაც მიეძღვნა პოლიტიკური გადაცემები და იმთავითვე თავად დაარღვიეს კონფიდენციალურობა;

ერთ-ერთი პოლონელი ექიმისგან ადგილი ჰქონდა გაუგებარ ინციდენტს. მსჯავრდებულ მიხეილ სააკაშვილისგან აღებული ნიმუში პოლონელმა ექიმმა გადაახვია ქაღალდში და ცდილობდა მის მალულად გატანას ფეხსაცმლის მეშვეობით;

ოფიციალური წესით აღებული ნიმუშის გატანის უფლება მათ მისცა თავად სამსახურმა. შესაბამისად, აღნიშნული ქმედება ექიმის მხრიდან სამედიცინო ეთიკურ და სამართლებრივ ნორმებთან შეუსაბამო საქციელს კიდევ უფრო მეტად მატებს ბუნდოვანებას;

ამ პიროვნებას ჩამოერთვა ახსნა-განმარტება, რომელიც ვერ ექვემდებარება ლოგიკურ ახსნას;

მივმართავთ თხოვნით საგარეო საქმეთა სამინისტროს, მოისმინოს პოლონეთის საელჩოს პოზიცია, რადგან სწორედ პოლონეთის საელჩო იყო ამ ექიმების ერთ-ერთი რეკომენდატორი;

საქართველო არის დამოუკიდებელი და სუვერენული სახელმწიფო, სამართლებრივი სახელმწიფო და სამართლებრივი სახელმწიფოსთვის აუცილებელია, რომ სამართალი აღსრულდეს. სასჯელის აღსრულება არის სამართლის აღსრულება, მით უმეტეს მაშინ, როდესაც როგორც მსჯავრდებულ სააკაშვილის, ისე ყველა სხვა პატიმრის უფლება არის დაცული;

ჩვენ ვმოქმედებთ მხოლოდ ქართველი ხალხის ინტერესიდან გამომდინარე კანონმდებლობის ფარგლებში; ჩვენთვის არ აქვს არსებითი მნიშვნელობა წმინდა პოლიტიკურ შთაბეჭდილებებს, რომლებიც არ ეფუძნება მტკიცებულებებს;

ყველამ პატივი უნდა ვცეთ ჩვენი ქვეყნის სუვერენიტეტს, რაოდენ დიდი გაერთიანებაც უნდა შედგეს, რომელიც არ ეფუძნება მტკიცებულებებს და რომლის უკანაც არ დგას ლოგიკა, ჩვენ ვერავის აზრს ვერ გავითვალისწინებთ, ჩვენ ვიმოქმედებთ მკაცრად კანონმდებლობის ფარგლებში.

სპეციალურმა პენიტენციურმა სამსახურმა პატიმართა ესკორტირების კიდევ უფრო მეტი უსაფრთხოების უზრუნველსაყოფად გაატარა რეფორმა, რომლის შედეგადაც დღეს ესკორტირების ერთიანი მართვის ცენტრი გაიხსნა.

ახლად გახსნილი ცენტრის ფუნქციონირებას იუსტიციის მინისტრი რატი ბრეგაძე და სპეციალური პენიტენციური სამსახურის ხელმძღვანელი ნიკა ცხვარაშვილი ადგილზე გაეცნენ.

ცენტრი აღჭურვილია რადიოსიხშირისა და GPS ნავიგაციის უახლესი და თანამედროვე ტექნიკით, რაც საშუალებას იძლევა ოპერატიულად, ეფექტიანად და უსაფრთხოების კიდევ უფრო მაღალი სტანდარტებით განხორციელდეს, როგორც მსჯავრდებულთა გადაადგილება, ასევე ესკორტირებისა და სპეციალურ ღონისძიებათა მთავარი სამმართველოს თანამშრომელთა მუშაობაც.

ესკორტირების ერთიანი მართვის ცენტრში დასაქმებული თანამშრომლებისთვის პენიტენციურმა სამსახურმა კომფორტული სამუშაო გარემო უზრუნველყო და თანამშრომელთათვის მოსასვენებელი სივრცეც გამოყო, რომელიც აღჭურვილია ყველა საჭირო ტექნიკითა და ინვენტარით.

სპეციალური პენიტენციური სამსახურისთვის პრიორიტეტულია როგორც პატიმართა პირობების გაუმჯობესება, ასევე თანამშრომელთა ღირსეული სამუშაო გარემოს უზრუნველყოფა. ამ მიზნით, სამსახური არაერთ რეფორმასა თუ პროექტს ახორციელებს, რომელიც სამსახურის საქმიანობას კიდევ უფრო ეფექტიანს ხდის.

ფორუმი თემაზე „საუკეთესო გამოცდილების გაზიარება საქართველოს ევროკავშირთან ინტეგრაციის გზაზე“ თბილისში ორი დღის განმავლობაში მიმდინარეობდა.

ღონისძიება ყოველწლიურ სახეს მიიღებს და მონაცვლეობით საქართველოსა და გერმანიაში გაიმართება, რაც ორ ქვეყანას შორის მდგრადი და შეუქცევადი სამართლებრივი თანამშრომლობის უნიკალური შესაძლებლობაა.

ქართულ-გერმანული სამართლებრივი ფორუმი გერმანიის ფედერაციულ რესპუბლიკისა და საქართველოს იუსტიციის სამინისტროებს შორის შარშან გაფორმებული ურთიერთთანამშრომლობის მემორანდუმის ფარგლებში დაიგეგმა.

ეს არის პლატფორმა, რომელიც აერთიანებს, როგორც საკანონმდებლო, ისე აღმასრულებელ და სასამართლო ხელისუფლებას, მათ შორის, იუსტიციის სამინისტროს სისტემის წარმომადგენლებსა და სამეცნიერო სფეროს.

ფორუმის ფარგლებში ყველა მათგანს ჰქონდა შესაძლებლობა, ემსჯელათ სამართლის დარგში დღეს არსებულ აქტუალურ საკითხებსა და გამოწვევებზე, საინტერესო რეფორმებზე, ინოვაციებსა და ახალ საერთო ინიციატივებზე.

ფორუმმა შექმნა მყარი სამართლებრივი თანამშრომლობის ფორმატი, რასაც განსაკუთრებული მნიშვნელობა აქვს საქართველოს ევროკავშირთან ინტეგრაციის გზაზე.

ფორუმის ფარგლებში, მონაწილე მხარეებმა განიხილეს ისეთი მნიშვნელოვანი სამართლებრივი საკითხები, როგორიცაა:

• საქართველოსა და გერმანიის სამართლებრივი სისტემების ინსტიტუციური ორგანიზება;
• საქართველოს ევროკავშირთან სამართლებრივი დაახლოება;
• ბავშვთა უფლებების დაცვის საერთაშორისო სამართლებრივი გარანტიების გაუმჯობესება;
• აკადემიური წრეების როლი პოლიტიკის შემუშავებასა და მეცნიერებაზე დაფუძნებულ კანონშემოქმედებაში;
• პენიტენციური და პრობაციის სისტემების პროფესიული განვითარება.

ქართულ-გერმანულ ფორუმზე განსაკუთრებული ყურადღება დაეთმო მსჯავრდებულთა რეაბილიტაცია-რესოციალიზაციის მიდგომებსა და თანამშრომელთა კვალიფიკაციის ამაღლების უწყვეტ ღონისძიებებს.

გერმანული მხარისთვის, ისევე, როგორც საერთაშორისო საზოგადოებისთვის, საინტერესო აღმოჩნდა საქართველოში დანერგილი ინოვაციები – იუსტიციის სახლები პენიტენციურ დაწესებულებებში და „ციფრული უნივერსიტეტი“;

ორი დღის განმავლობაში მიმდინარე ქართულ-გერმანულ სამართლებრივ ფორუმზე გერმანიის დელეგაციას ხელმძღვანელობდა იუსტიციის ფედერალური სამინისტროს სახელმწიფო მდივანი ანჟელიკა შლუნკი.

ღონისძიებაში მონაწილეობდნენ ევროკავშირის სააგენტოს „ევროჯასტის“ ვიცე-პრეზიდენტი ბოშტიან შკრლეცი; საკანონმდებლო და სასამართლო ხელისუფლების წარმომადგენლები; პროკურატურის, ადვოკატთა ასოციაციის, პენიტენციური სამსახურის ხელმძღვანელი პირები და აკადემიური სფეროს წარმომადგენლები.