ცხელი ხაზი2 405 505

სიახლეები

სამშაბათი, 17 ნოემბერი, 2026
გაზიარება

იაღლუჯის მთის მასივზე არსებული მიწის ნაკვეთების რეგისტრაციის პროცესი იწყება

საქართველოს პრემიერ-მინისტრის გადაწყვეტილებით, იწყება იაღლუჯის მთის მასივზე არსებული მიწის ნაკვეთების რეგისტრაციასთან დაკავშირებული მრავალწლიანი პრობლემის მოგვარება.

საკითხის შესწავლისა და მისი სამართლებრივად მოწესრიგებისთვის იუსტიციის მინისტრის ხელმძღვანელობით შეიქმნა უწყებათაშორისი სამუშაო ჯგუფი, რომელშიც ჩართულია იუსტიციის სამინისტროს საჯარო რეესტრის ეროვნული სააგენტო, შესაბამისი მუნიციპალიტეტები და სხვა სახელმწიფო უწყებები. სამუშაო ჯგუფმა საკითხის კომპლექსურობისა და სირთულის გათვალისწინებით შეისწავლა არსებული ინფორმაცია და დოკუმენტაცია, ტერიტორიის თავისებურებები და განსაზღვრა პრობლემის მოგვარების სამართლებრივი გზები და პროცედურები.

სარეგისტრაციო პროცესი იწყება იმ მოქალაქეებისთვის, რომლებსაც წლების განმავლობაში ჰქონდათ სირთულეები იაღლუჯის მთის მასივზე მდებარე მიწის ნაკვეთებზე საკუთრების უფლების რეგისტრაციასთან დაკავშირებით.

სარეგისტრაციო პროცესში შესაბამისი უწყებები საჭიროებისამებრ ჩაერთვებიან თითოეული საკითხის შესწავლის მიზნით, შეაფასებენ მოქალაქეების ხელთ არსებულ დოკუმენტებსა და სამართლებრივ საფუძვლებს. აღნიშნულის საფუძველზე საჯარო რეესტრის ეროვნული სააგენტო მიიღებს გადაწყვეტილებას კანონმდებლობის მოთხოვნების შესაბამისად.

მოქალაქეებს, რომლებსაც 2025 წლის 31 დეკემბრის ჩათვლით საჯარო რეესტრის ციფრულ პლატფორმაზე (Slr.napr.gov.ge) წარდგენილი ჰქონდათ განცხადება მიწის ნაკვეთის აზომვის მოთხოვნით, ამ ეტაპზე ხელახლა განცხადების წარდგენა ან დამატებითი ინფორმაციის მიწოდება არ სჭირდებათ. სააგენტო უკვე ფლობს მათ მიერ წარდგენილ მოთხოვნებს და პროცესის ფარგლებში განიხილავს. კერძოდ, საჯარო რეესტრი თავად მოიძიებს ყველა საჭირო დოკუმენტს, რაც რეგისტრაციისათვის არის კანონით სავალდებულო.

დაინტერესებული პირები იაღლუჯის მთის მასივზე არსებული მიწის ნაკვეთების შესახებ უახლოეს მომავალში მიიღებენ შეტყობინებას რეგისტრაციის პროცესის დაწყებისა და დამატებით დოკუმენტაციის შესახებ, რომელთა წარდგენაც შესაძლოა, გახდეს აუცილებელი იუსტიციის სახლებსა და საჯარო რეესტრის ფილიალებში.

მოქალაქეებს, რომლებსაც აქვთ მიწის ნაკვეთზე საკუთრების დასადგენად დამადასტურებელი დოკუმენტები, ასევე, შეუძლიათ, მიმართონ საჯარო რეესტრის ეროვნულ სააგენტოს სპორადული რეგისტრაციის მოთხოვნით. თითოეული განცხადება ინდივიდუალურად, კანონმდებლობის შესაბამისად განიხილება.

სხვა სიახლეები

გაზიარება
ბეჭდვა

პენიტენციურ დაწესებულებებში მინის მხატვრული დამუშავებისა და ტიხრული მინანქრის საწარმოები მოეწყო

იუსტიციის მინისტრის მოადგილე ლანა მორგოშიამ სპეციალური პენიტენციური სამსახურის გენერალურ დირექტორ რამაზ თათარაშვილთან ერთად №16 და N5 პენიტენციური დაწესებულებებში არსებული მცირე საწარმოები დაათვალიერა, სადაც მსჯავრდებულები ტიხრული მინანქრის ნაკეთობებს ამზადებენ და მინის მხატვრულ დამუშავებას სწავლობენ.

ღონისძიებას, ასევე, ესწრებოდნენ მსჯავრდებულთა პროფესიული მომზადებისა და გადამზადების ცენტრის დირექტორი თამთა დემურიშვილი და პროფესიულ კოლეჯ „სახელობო სკოლის“ დირექტორი რეზო შარაბიძე.

დღეისათვის სწავლება, ჯამში ორმოცმა მსჯავრდებულმა გაიარა. მათ უკვე გადაეცათ სახელმწიფოს მიერ აღიარებული ორენოვანი სერტიფიკატი, რომელიც მსჯავრდებულებს შესაძლებლობას აძლევს, სასჯელის მოხდის შემდეგ ახალი პროფესიით დასაქმდნენ როგორც საქართველოში, ისე საზღვარგარეთ. თვითდასაქმებული მსჯავრდებულები კი, დამზადებული პროდუქციის რეალიზაციას „რე-მარკეტში“ შეძლებენ.

აღნიშნული სპეციალობების შესწავლის სურვილი მსჯავრდებულებმა თავად გამოთქვეს. საწარმოები კი მსჯავრდებულთა პროფესიული მომზადებისა და გადამზადების ცენტრის ინიციატივით, საპატრიარქოს საქველმოქმედო ფონდ „ლაზარეს“ პროფესიული განათლების ხელშეწყობის პროექტის ფარგლებში მოეწყო. სწავლების პროცესს პროფესიული კოლეჯი „სახელობო სკოლა“ ახორციელებს.

საქართველოს მსჯავრდებულთა რესოციალიზაცია-რეაბილიტაციის მიზნით სხვადასხვა სასწავლო კურსები პენიტენციურ დაწესებულებებში მთელი წლის განმავლობაში მიმდინარეობს. ამ მიმართულებით იუსტიციის სამინისტროს სსიპ „მსჯავრდებულთა პროფესიული მომზადებისა და გადამზადების ცენტრი“ თანამშრომლობს განათლების, მეცნიერებისა და ახალგაზრდობის სამინისტროს სხვადასხვა კოლეჯთან.

გაზიარება
ბეჭდვა

პაატა სალიამ ბიზნესასოციაციის მიერ ორგანიზებულ კონფერენციაზე იუსტიციის სამინისტროს ინოვაციური სერვისები წარადგინა

საქართველოს იუსტიციის მინისტრმა მონაწილეობა მიიღო კონფერენციაში „ბიზნესგარემო საქართველოში – დიალოგი მთავრობასა და ბიზნესს შორის“. პაატა სალიამ პანელური დისკუსიის მონაწილეებს იუსტიციის სამინისტროს ის სერვისები გააცნო, რომლებიც ბიზნესის საჭიროებებზეა მორგებული.

„ბიზნესგარემოს გაუმჯობესება ნიშნავს სამართლებრივად დაცულ საკუთრებას, პროგნოზირებად წესებსა და მომსახურებას, რომელიც მეწარმეს დროსა და რესურსს უზოგავს. ამ მიმართულებით განხორციელებულ რეფორმებს კონკრეტული შედეგები აქვს თქვენი ყოველდღიური საქმიანობისთვის“, – აღნიშნა პაატა სალიამ.

იუსტიციის მინისტრმა ყურადღება გაამახვილა ისეთ სერვისებზე, როგორიცაა: ბიზნესასისტენტი, კვალიფიციური ელექტრონული ხელმოწერა მობილური ტელეფონით, „გონიერი კონტრაქტი“ და უძრავი ქონების ტოკენიზაცია.

პაატა სალიას განცხადებით, სერვისების მოქნილობა ზრდის ქვეყნის საინვესტიციო პოტენციალს; ამ პოტენციალის რეალიზებისთვის კი, გადამწყვეტია უფლებების მკაფიო განსაზღვრა, ინვესტორთა დაცვა და ბიზნესის საჭიროებებთან შესაბამისობა; დავებისა და ფინანსურ-სამართლებრივი რისკების მართვის დამატებით მექანიზმებს კი, ბიზნესს აღსრულების ეროვნული ბიუროსა და სანოტარო სისტემის სერვისები სთავაზობს.

მინისტრმა სამომავლო გეგმებზეც ისაუბრა და აღნიშნა, რომ 2026 წლის ბოლომდე დაგეგმილია ფაქტორინგის რეესტრის შექმნა, რაც ბიზნესს ფულად სახსრებზე წვდომას გაუადვილებს.

„ჩვენი მთავარი ამოცანა და მიზანია, გავუმარტივოთ ბიზნესს საქმიანობა და მეწარმემ თუ ინვესტორმა მაქსიმალურად დაცულად იგრძნოს თავი“, – აღნიშნა პაატა სალიამ.

კონფერენცია „ბიზნესგარემო საქართველოში“ ბიზნესასოციაციის ინიციატივით გაიმართა. ღონისძიებაში მონაწილეობა მიიღო პრემიერ-მინისტრმა ირაკლი კობახიძემ, ბიზნესასოციაციის პრეზიდენტმა სოსო ფხაკაძემ, აღმასრულებელი ხელისუფლების წევრებმა და ბიზნესის წარმომადგენლებმა.