ცხელი ხაზი2 405 505

სიახლეები

პარასკევი, 02 ოქტომბერი, 2026
გაზიარება

თბილისში კორეა-საქართველოს სტრატეგიული ფორუმი - „ხელოვნური ინტელექტი საჯარო მმართველობაში“ გაიმართა

ფორუმი საქართველოს იუსტიციის მინისტრის მოადგილემ, თამარ ზოდელავამ და კორეის რესპუბლიკის შინაგან საქმეთა და უსაფრთხოების სამინისტროს ხელოვნური ინტელექტის სფეროში მთავრობათაშორისი თანამშრომლობის მიმართულების დირექტორმა, ჰაისუნ ჩოიმ გახსნეს.

თამარ ზოდელავამ ყურადღება გაამახვილა საჯარო სექტორში ხელოვნური ინტელექტის პასუხისმგებლიანი და უსაფრთხო გამოყენების მნიშვნელობაზე, განსაკუთრებით იმ პირობებში, როდესაც ტექნოლოგიები სულ უფრო მეტად ცვლის სახელმწიფო სერვისების მიწოდებისა და მოქალაქეებთან ურთიერთობის პროცესებს. მისი განცხადებით, ხელოვნური ინტელექტის განვითარებასთან ერთად მნიშვნელოვანია შესაბამისი სამართლებრივი და ინსტიტუციური მექანიზმების შექმნა, რაც ტექნოლოგიურ განვითარებას ადამიანის უფლებების დაცვასთან, გამჭვირვალობასა და მოქალაქეზე ორიენტირებულ მიდგომასთან დააბალანსებს.

მინისტრის მოადგილემ, ასევე, ხაზი გაუსვა საერთაშორისო თანამშრომლობისა და გამოცდილების გაზიარების მნიშვნელობას და აღნიშნა, რომ საქართველოსა და კორეის რესპუბლიკას შორის პარტნიორობის ფარგლებში შექმნილი ციფრული თანამშრომლობის ცენტრი ამ მიმართულების გაძლიერების მნიშვნელოვანი მექანიზმია.

ღონისძიება საქართველოსა და კორეის რესპუბლიკას შორის სამთავრობო დონეზე თანამშრომლობის ფარგლებში ჩატარდა და მისი მთავარი მიზანია საჯარო მმართველობაში ხელოვნური ინტელექტის გამოყენების მიმართულებით გამოცდილების გაზიარება და ორმხრივი პარტნიორობის ახალი შესაძლებლობების განხილვა.

ფორუმის მონაწილეებმა განიხილეს ხელოვნური ინტელექტის მმართველობის საკითხები საქართველოსა და კორეის რესპუბლიკის გამოცდილების გათვალისწინებით, ასევე, საჯარო სექტორში ხელოვნური ინტელექტის პრაქტიკული გამოყენების შესაძლებლობები. საუბარი შეეხო სანდო ციფრული ინფრასტრუქტურის განვითარებას, რომელიც უსაფრთხო და მასშტაბური, ხელოვნური ინტელექტით მხარდაჭერილი სახელმწიფო სერვისების შექმნის საფუძველია. მონაწილეებმა იმსჯელეს საჯარო სექტორში ხელოვნური ინტელექტის დანერგვასთან დაკავშირებულ გამოწვევებზე, მათ შორის, უსაფრთხოების, ანგარიშვალდებულების, შესაბამისი პოლიტიკისა და რეგულირების საკითხებზე; გამოკვეთეს ერთობლივი ინიციატივები.

ფორუმი საქართველოს იუსტიციის სამინისტროსა და კორეის შინაგან საქმეთა და უსაფრთხოების სამინისტროს შორის გაფორმებული მემორანდუმის ფარგლებში გაიმართა და მასში საქართველოსა და კორეის რესპუბლიკის შესაბამისი სახელმწიფო უწყებების, ადგილობრივი ხელისუფლებისა და საჯარო სექტორთან დაკავშირებული ორგანიზაციების წარმომადგენლები მონაწილეობდნენ.

სხვა სიახლეები

გაზიარება
ბეჭდვა

პენიტენციურ დაწესებულებებში მინის მხატვრული დამუშავებისა და ტიხრული მინანქრის საწარმოები მოეწყო

იუსტიციის მინისტრის მოადგილე ლანა მორგოშიამ სპეციალური პენიტენციური სამსახურის გენერალურ დირექტორ რამაზ თათარაშვილთან ერთად №16 და N5 პენიტენციური დაწესებულებებში არსებული მცირე საწარმოები დაათვალიერა, სადაც მსჯავრდებულები ტიხრული მინანქრის ნაკეთობებს ამზადებენ და მინის მხატვრულ დამუშავებას სწავლობენ.

დღეისათვის სწავლება, ჯამში ორმოცმა მსჯავრდებულმა გაიარა. მათ უკვე გადაეცათ სახელმწიფოს მიერ აღიარებული ორენოვანი სერტიფიკატი, რომელიც მსჯავრდებულებს შესაძლებლობას აძლევს, სასჯელის მოხდის შემდეგ ახალი პროფესიით დასაქმდნენ როგორც საქართველოში, ისე საზღვარგარეთ. თვითდასაქმებული მსჯავრდებულები კი, დამზადებული პროდუქციის რეალიზაციას „რე-მარკეტში“ შეძლებენ.

აღნიშნული სპეციალობების შესწავლის სურვილი მსჯავრდებულებმა თავად გამოთქვეს. საწარმოები კი მსჯავრდებულთა პროფესიული მომზადებისა და გადამზადების ცენტრის ინიციატივით, საპატრიარქოს საქველმოქმედო ფონდ „ლაზარეს“ პროფესიული განათლების ხელშეწყობის პროექტის ფარგლებში მოეწყო. სწავლების პროცესს პროფესიული კოლეჯი „სახელობო სკოლა“ ახორციელებს.

საქართველოს მსჯავრდებულთა რესოციალიზაცია-რეაბილიტაციის მიზნით სხვადასხვა სასწავლო კურსები პენიტენციურ დაწესებულებებში მთელი წლის განმავლობაში მიმდინარეობს. ამ მიმართულებით იუსტიციის სამინისტროს სსიპ „მსჯავრდებულთა პროფესიული მომზადებისა და გადამზადების ცენტრი“ თანამშრომლობს განათლების, მეცნიერებისა და ახალგაზრდობის სამინისტროს სხვადასხვა კოლეჯთან.

ღონისძიებას, ასევე, ესწრებოდნენ მსჯავრდებულთა პროფესიული მომზადებისა და გადამზადების ცენტრის დირექტორი თამთა დემურიშვილი და პროფესიულ კოლეჯ „სახელობო სკოლის“ დირექტორი რეზო შარაბიძე.

გაზიარება
ბეჭდვა

იუსტიციის მინისტრმა ესკორტირებისა და სპეციალურ ღონისძიებათა დეპარტამენტს ახალი სპეციალიზებული ავტომანქანები და თანამედროვე შეიარაღება გადასცა

პაატა სალიამ, სპეციალური პენიტენციური სამსახურის გენერალურ დირექტორ რამაზ თათარაშვილთან ერთად, დეპარტამენტს მსჯავრდებულთა ესკორტირებისათვის განკუთვნილი 38 ახალი სპეციალიზებული ავტომანქანა და თანამედროვე შეიარაღება გადასცა. იუსტიციის მინისტრმა თანამშრომლებს სიტყვით მიმართა და გაწეული სამსახურისთვის მადლობა გადაუხადა.

“მნიშვნელოვანი ნაბიჯი გადაიდგა პენიტენციური სისტემის ტექნიკური აღჭურვის კუთხით. განახლდა სამსახურის არსენალი და ავტოპარკი. იუსტიციის სამინისტროსა და სპეციალური პენიტენციური სამსახურის ერთ-ერთი პრიორიტეტი თანამშრომლებზე ზრუნვა და მათი სამუშაო პირობების გაუმჯობესებაა. განსაკუთრებული მნიშვნელობა ენიჭება მათი პროფესიული უნარების გაძლიერებას. ამ მიზნით მოეწყობა შესაბამისი სასწავლო ინფრასტრუქტურა. თანამშრომლებზე ზრუნვა, მათი უსაფრთხოების დაცვა, სამუშაო პირობების გაუმჯობესება და პროფესიული განვითარება პენიტენციური სისტემის გაძლიერების მნიშვნელოვანი საფუძველია“, – განაცხადა პაატა სალიამ.

ღონისძიების მონაწილეებს სიტყვით მიმართა, აგრეთვე, სპეციალური პენიტენციური სამსახურის გენერალურმა დირექტორმა, რამაზ თათარაშვილმა.

იუსტიციის სამინისტრო, სპეციალურ პენიტენციურ სამსახურთან ერთად, მუშაობს რამდენიმე პროექტზე, რომლებიც 2028 წლის დასაწყისში დასრულდება. კერძოდ, დაგეგმილია ახალი ბაზის, ცეცხლსასროლი იარაღის დახურული სასროლეთის, სპორტული მოედნების, სატრენაჟორო სივრცეების, ტრენინგცენტრის და სასწავლო აუდიტორიების მშენებლობა.