იუსტიციის სამინისტროს ერთ-ერთი პრიორიტეტული მიმართულება მოქალაქეთათვის სახელმწიფო სერვისებზე ხელმისაწვდომობის კიდევ უფრო გაუმჯობესებაა. ამ მიზნით იუსტიციის მინისტრი ხაშურში მოადგილეებთან ერთად იმყოფებოდა. უკვე წლის ბოლოსთვის ხაშურის მოსახლეობა იუსტიციის სახლის 470-მდე სერვისით სარგებლობას შეძლებს.

„დღეს ხაშურელებს არაერთი სასიამოვნო სიახლე გავაცანით. პირველ რიგში, იუსტიციის სახლი, რომლის მშენებლობის პროცესი არის სრულად განახლებული. წლის ბოლოსთვის მომხმარებელს ექნება შესაძლებლობა, რომ მიიღოს ყველა სახის სახელმწიფო მომსახურება ერთ სივრცეში მისთვის ჩვეულ, კომფორტულ გარემოში, როგორსაც ის არის მიჩვეული მთელი საქართველოს მასშტაბით. ხაშურში, ასევე, განვათავსეთ „პრობბოქსი“, რომელიც კიდევ უფრო შეუწყობს ხელს დამნაშავის რესოციალიზაციას. ასევე, გავხსენით მედიაციის სივრცე, რომელიც მნიშვნელოვანია საქართველოში აღდგენითი მართლმსაჯულების განვითარებისთვის“, – განაცხადა იუსტიციის მინისტრმა რატი ბრეგაძემ.

რატი ბრეგაძის ინიციატივით ხაშურის იუსტიციის სახლის მშენებლობა ახალ ეტაპზე გადავიდა. სამუშაოები ინტენსიურ რეჟიმში მიმდინარეობს და მას ახალი კომპანია აგრძელებს.

ხაშურის მუნიციპალიტეტს იუსტიციის სახლის ახალი ფილიალი წლის ბოლოსთვის შეემატება. იუსტიციის სახლში 18 პირი დასაქმდება. მომსახურების დარბაზის გარდა, ახალ ფილიალში თანამედროვე ინტერიერის მქონე საქორწინო-სარიტუალო სივრცეც მოეწყობა. შენობაში იუსტიციის სამინისტროს მმართველობის სფეროში მოქმედი სსიპ-ების ოფისებიც განთავსდება, რომლებიც ამ დრომდე მოძველებულ ინფრასტრუქტურაში ფუნქციონირებენ.

რატი ბრეგაძე ხაშურის პრობაციის ბიუროში გახსნილ მედიაციის ახალ სივრცესაც ეწვია, სადაც მედიაციის პროცესის საჭიროებები სრულად არის გათვალისწინებული. მხარეებისთვის უზრუნველყოფილია კომუნიკაციისა და მოლაპარაკების წარმოებისთვის ყველა საჭირო პირობა. სათანადოდ აღჭურვილ სივრცეში მედიატორებს დაკისრებული მოვალეობის შესრულება გაუმარტივდებათ. ამ დრომდე რეგიონში მედიაციის სივრცე არ არსებობდა, რის გამოც პროცესის წარმართვისთვის სხვა სივრცის მოძიება ხდებოდა საჭირო.

მედიაცია დამზარალებელსა და დაზარალებულს შორის არსებული კონფლიქტის ამოწურვას ემსახურება. ის აღდგენითი მართლმსაჯულების პრინციპებს ეყრდნობა და ორიენტირებულია ადამიანებზე, დანაშაულთან შემხებლობაში მყოფი ყველა პირის ჩართულობაზე, მათი საჭიროებების იდენტიფიცირებასა და დაკმაყოფილებაზე.

იუსტიციის სამინისტრო აქტიურად იყენებს მედიაციის მექანიზმს. ის არასრულწლოვანთა სისხლისსამართლებრივი პასუხისმგებლობის ალტერნატიული ფორმაა, რომელიც დამნაშავეებს პატიმრობის ნაცვლად რეაბილიტაციისა და საზოგადოებაში რეინტეგრაციის ღონისძიებებში ჩართვას სთავაზობს; მედიაციის მექანიზმის წარმატებით მუშაობაზე კი, მეტყველებს ის, რომ 2021 წლის განმავლობაში მედიატორის გამოყოფაზე 596 მიმართვა დაფიქსირდა, საიდანაც კანონთან კონფლიქტში მყოფ 389 ბავშვთან მედიაციის პროცესი წარმატებით დასრულდა.

ამ დროისთვის მედიაციის სივრცეები თბილისში, ქუთაისსა და ხაშურში მოქმედებს; წლის ბოლომდე კი, ოზურგეთშიც გაიხსნება.

დღესვე პრობაციონერებისთვის შექმნილი ინოვაციური ტექნოლოგიური მოწყობილობა „PROBBOX“, იუსტიციის სახლების გარდა, პირველად, ალტერნატიულ სივრცეში – ხაშურის მუნიციპალიტეტის მერიის ადმინისტრაციულ შენობაში განთავსდა. ტექნოლოგიურ მოწყობილობაში ყველა ის სერვისია ინტეგრირებული, რომელთა სარგებლობისთვისაც პრობაციონერებს აქამდე პრობაციის ბიუროებში სჭირდებოდათ მისვლა.

„პრობბოქსის“ სერვისებს შორისაა: შეთავაზებები დასაქმების შესახებ, ინფორმაცია პირობითი მსჯავრის გაუქმებაზე, განაცხადის წარდგენა რეჟიმის შემსუბუქების მოთხოვნაზე, პრობაციის ოფიცერთან კომუნიკაცია და მსჯავრდებულთან ვიდეოპაემნის დაჯავშნა.

პრობაციონერებს „პრობბოქსით“ სარგებლობა ამ დროისთვის 7 მუნიციპალიტეტში შეუძლიათ. მოწყობილობა ბათუმის, ქუთაისის, თბილისის, თელავის, გორისა და ზუგდიდის შემდეგ ხაშურის მუნიციპალიტეტშიც არის ხელმისაწვდომი; ეტაპობრივად კი, მთელი ქვეყნის მასშტაბით განაწილდება.

ჩეხეთის რესპუბლიკის დედაქალაქ პრაღაში ევროკავშირის წევრი ქვეყნების იუსტიციის მინისტრების მინისტერიალის ფარგლებში რატი ბრეგაძე პორტუგალიელ კოლეგას შეხვდა. შეხვედრას ასევე ესწრებოდა პირველი მოადგილე თამარ ტყეშელაშვილი.

ორი ქვეყნის იუსტიციის მინისტრებმა ორმხრივი ურთიერთობების გაღრმავებისათვის კონკრეტული ინიციატივები განიხილეს, მათ შორის ელექტრონული სერვისებისა და ელექტრონული მმართველობის განვითარების სფეროებში. საუბარი შეეხო, აგრეთვე ქართული კანონმდებლობის ევროკავშირის სამართალთან ჰარმონიზაციის პროცესის მიმდინარეობას.

პორტუგალიის იუსტიციის მინისტრის გარდა, რატი ბრეგაძემ შეხვედრები გამართა გერმანიის, ჩეხეთის, საბერძნეთის იუსტიციის მინისტრებთან. დარგობრივი თემების გარდა, ევროკავშირის წევრი ქვეყნების იუსტიციის მინისტრებთან სასაუბრო თემა საქართველოს ევროპული პერსპექტივა იყო.

პრაღაში იუსტიციის მინისტრი რატი ბრეგაძე ევროკავშირის წევრი ქვეყნების მინისტერიალში მონაწილეობის მიზნით იმყოფებოდა. ერთ-ერთი განსახილველი თემა სისხლის სამართლის სფეროში თანამშრომლობის გაუმჯობესება იყო.

მინისტერიალს, ასევე, ესწრებოდნენ საქართველოს, მოლდოვისა და უკრაინის იუსტიციის მინისტრები.

რატი ბრეგაძე ჩეხეთში მიმდინარე მინისტერიალის ფარგლებში ევროკავშირის წევრი ქვეყნების იუსტიციის მინისტრებთან ორმხრივ შეხვედრებს განაგრძობს. საქართველოს იუსტიციის მინისტრი ბერძენ კოლეგასაც შეხვდა.

რატი ბრეგაძემ კოსტას ციარისთან საერთაშორისო ურთიერთობების მნიშვნელობაზე ისაუბრა და იმედი გამოთქვა, რომ საქართველოსა და საბერძნეთის იუსტიციის სამინისტროებს შორის არსებული დარგობრივი თანამშრომლობა კიდევ უფრო გაღრმავდება.
მხარეებმა ურთიერთობის გაგრძელების შესაძლო მიმართულებებზე ისაუბრეს.

საქართველოს იუსტიციის მინისტრმა ბერძენ კოლეგას საქართველოსა და საბერძნეთის იუსტიციის სამინისტროებს შორის ურთიერთთანამშრომლობის მემორანდუმის გაფორმება შესთავაზა.

„დარწმუნებული ვარ, რომ მემორანდუმი შექმნის შესანიშნავ პლატფორმას ჩვენი თანამშრომლობის შემდგომი გაძლიერებისათვის და გახსნის კარებს ახალი ინიციატივებისთვის“, – განაცხადა რატი ბრეგაძემ.

საერთაშორისო თანამშრომლობის გაძლიერება საქართველოს იუსტიციის სამინისტროს 10-წლიანი სტრატეგიის პრიორიტეტული მიმართულებაა. 2021 წელს სტრატეგიის ამოქმედებიდან დღემდე ურთიერთთანამშრომლობის მემორანდუმები უკვე გაფორმდა თურქეთის, ისრაელის, უნგრეთის, სომხეთის, აზერბაიჯანის, შვეიცარიის, ინდონეზიის იუსტიციის სამინისტროებთან.

ორი ქვეყნის იუსტიციის მინისტრებმა ურთიერთთანამშრომლობის გაღრმავებაზე პრაღაში იუსტიციისა და შინაგან საქმეთა მინისტრების კონფერენციის ფარგლებში ორგანიზებულ შეხვედრაზე ისაუბრეს.

საქართველოსა და გერმანიის ფედერაციულ რესპუბლიკას შორის თანამშრომლობა უფრო ინტენსიური გახდება სამოქალაქო და სისხლის სამართლის სფეროში თანამედროვე პენიტენციური და პრობაციის სისტემის მართვისა და მოწყობის მიმართულებით; განხორციელდება რეაბილიტაციისა და რესოციალიზაციის პროგრამები პენიტენციურ და პრობაციის სისტემებში; ქართული მხარე გერმანულ გამოცდილებას გაიზიარებს არასრულწლოვანთა მართლმსაჯულების სფეროში; გერმანელი ექსპერტები ქართული კანონმდებლობის ევროკავშირის სამართალთან ჰარმონიზაციის პროცესში ჩაერთვებიან.

გერმანიის იუსტიციის მინისტრმა რატი ბრეგაძე ოფიციალური ვიზიტით ბერლინში მიიწვია.

იუსტიციის მინისტრი რატი ბრეგაძე ჩეხეთის დედაქალაქ პრაღაში ევროკავშირის წევრი ქვეყნების მინისტერიალში მონაწილეობის მიზნით იმყოფება. კონფერენციას, ასევე, ესწრებიან საქართველოს, მოლდოვისა და უკრაინის იუსტიციის მინისტრები.

ჩეხეთის რესპუბლიკის დედაქალაქ პრაღაში ევროკავშირის წევრი ქვეყნების იუსტიციის მინისტრების მინისტერიალი გაიმართა, რომელშიც ასევე მონაწილეობა მიიღეს საქართველოს, უკრაინისა და მოლდოვის რესპუბლიკის იუსტიციის მინისტრებმა. მინისტერიალის ერთ-ერთი განსახილველი საკითხი იყო სისხლის სამართლის სფეროში თანამშრომლობა და ქვეყნებს შორის ელექტრონული საშუალებებით ინფორმაციის გაცვლა.

რატი ბრეგაძემ აღნიშნა, რომ საქართველოს ევროკავშირის წევრ სახელმწიფოებთან სისხლის სამართლის სფეროში თანამშრომლობის ძალიან კარგი გამოცდილება აქვს. თანამშრომლობის ფორმატი მოიცავს, როგორც ორმხრივ ურთიერთობებს, ისე იუსტიციის სფეროში ევროკავშირის თანამშრომლობის სააგენტოს (EUROJUST) ფარგლებში ორგანიზებულ დანაშაულთან ბრძოლის ერთობლივ ღონისძიებებში აქტიურ მონაწილეობას.

რატი ბრეგაძის განმარტებით, საქართველო მზადაა ევროკავშირის წევრ სახელმწიფოებთან თანამშრომლობა ელექტრონული და ციფრული საშუალებებითაც წარმართოს, რის შესაძლებლობასაც იძლევა საქართველოს კანონმდებლობა და შესაბამისი ინფრასტრუქტურა. კერძოდ, საქართველოში წლებია აქტიურად გამოიყენება ელექტრონული ხელმოწერისა და დოკუმენტაციის ციფრული საშუალებებით გაცვლის პლატფორმები. ამგვარი პრაქტიკა არსებობს არაერთ სახელმწიფოსთან სისხლის სამართლის სფეროში თანამშრომლობის ფარგლებშიც და თუ ევროკავშირის სახელმწიფოების მხრიდან იქნება მზაობა, საქართველო აქტიურად ჩაერთვება თანამშრომლობის ელექტრონული გზებით განხორციელების ინიციატივაში.

ელექტრონული სერვისების მუშაობის ეფექტურობა და გაძლიერება დღის წესრიგში მსოფლიოში ბოლო პერიოდში განვითარებული გლობალური კრიზისების ფონზე კიდევ უფრო აქტუალურად დადგა. სწორედ ამ პერიოდში გახდა აუცილებელი ევროკავშირის არაწევრ ქვეყნებთან სისხლის სამართლის საქმეებზე სამართლებრივი ურთიერთდახმარების სფეროში ელექტრონული კომუნიკაციებისა და სერვისების დამატებითი ინსტრუმენტების შექმნა.

რატი ბრეგაძისა და პაველ ბლაჟეკის შეხვედრა პრაღაში ევროკავშირის წევრი ქვეყნების მინისტერიალის ფარგლებში გაიმართა, რომელშიც საქართველოს, უკრაინისა და მოლდოვის დელეგაციებიც მონაწილეობენ. მინისტერიალი სისხლის სამართლის სფეროში თანამშრომლობის გაღრმავების საკითხებს განიხილავს. ღონისძიებაზე რატი ბრეგაძე ელექტრონული კომუნიკაციის სფეროში საქართველოს მიღწევებისა და პერსპექტივების შესახებ სიტყვით გამოვა.

საქართველოს იუსტიციის მინისტრმა ჩეხ კოლეგას ორმხრივი ურთიერთობების გაღრმავებისათვის კონკრეტული ინიციატივები შესთავაზა. საუბარი შეეხო ორი ქვეყნის იუსტიციის სამინისტროებს შორის ურთიერთთანამშრომლობის მემორანდუმის მომზადებას, რომელიც ხელს შეუწყობს ევროკავშირის სამართალთან საქართველოს კანონმდებლობის დაახლოების პროცესს. ამ მიზნით რატი ბრეგაძემ და პაველ ბლაჟეკმა ორ ქვეყანას შორის ექსპერტების გაცვლის შესაძლებლობაზე იმსჯელეს.

შეხვედრაზე ურთიერთთანამშრომლობის გაღრმავების შესაძლო მიმართულებებიც განიხილეს, მათ შორის, ელექტრონული მმართველობა და ელექტრონული სერვისები; ერთობლივი კონფერენციების, სემინარებისა და თანამშრომლების გაცვლითი პროგრამების ორგანიზება.

ორი ქვეყნის იუსტიციის მინისტრების შეხვედრაში მონაწილეობდნენ იუსტიციის მინისტრის პირველი მოადგილე თამარ ტყეშელაშვილი და საქართველოს ელჩი ჩეხეთის რესპუბლიკაში მარიამ რაქვიაშვილი.

დაგეგმილია, აგრეთვე, ორმხრივი შეხვედრები გერმანიისა და საბერძნეთის იუსტიციის მინისტრებთან.

იუსტიციის მინისტრის მოადგილემ, თორნიკე ჭეიშვილმა ღონისძიებაზე იმ დადებითი ტენდენციების შესახებ ისაუბრა, რომელიც CPT-ის მონიტორინგის დოკუმენტში აისახა.
აღინიშნა, რომ ევროპული კომიტეტის ანგარიშის თანახმად, პენიტენციური დაწესებულებების თანამშრომლებსა და პატიმრებს შორის დადებითი და მშვიდი ურთიერთობა არსებობს და რომ დელეგაციას არ მიუღია ინფორმაცია ციხის თანამშრომლების მხრიდან პატიმრების არასათანადო მოპყრობის არცერთ ფაქტზე.

თორნიკე ჭეიშვილმა ისაუბრა აგრეთვე CPT-ის მხრიდან პენიტენციური სამსახურის ჯანდაცვის სისტემის შეფასების შესახებ და აღნიშნა, რომ კომიტეტი პენიტენციურ დაწესებულებებში გადამდებ დაავადებათა მკურნალობას სწრაფად და ადვილად ხელმისაწვდომად მიიჩნევს, განსაკუთრებით მაღალ შეფასებას კი COVID-ის მართვის პრაქტიკას აძლევს, რის შედეგადაც, პანდემიის მიუხედავად, შესაძლებელი იყო პატიმრების გარე სამყაროსთან კონტაქტის შენარჩუნება.

რაც შეეხება ანგარიშში დაფიქსირებულ რეკომენდაციებს, მინისტრის მოადგილის განცხადებით, მათი ნაწილი უკვე გათვალისწინებული და ასახულია იუსტიციის სამინისტროს 10-წლიან სტრატეგიაში. კერძოდ, უკვე დამტკიცებულია პენიტენციურ სისტემაში სპორტის მართვის ახალი სტრატეგია, განახლდა სპორტული მოედნები; ამოქმედდა ციფრული უნივერსიტეტის პროგრამა. არსებული გამოწვევების საკანონმდებლო დონეზე აღმოფხვრისათვის კი უკვე მიმდინარეობს აქტიური მუშაობა ახალ პატიმრობის კოდექსზე, რომელიც საქართველოს პარლამენტს საშემოდგომო სესიაზე წარედგინება:

„შექმნილია შესაბამისი უწყებათშორისი ჯგუფი, ახალი პატიმრობის კოდექსი და აღნიშნული სამუშაო პლატფორმის საქმიანობა იმისკენ იქნება ორიენტირებული, რომ ნებისმიერი საკითხი, რომელიც დღეს პრაქტიკაში შეიძლება მწვავედ იდგეს, პირველ ყოვლისა, საკანონმდებლო დონეზე იქნეს აღმოფხვრილი“, - განაცხადა თორნიკე ჭეიშვილმა.

CPT-ის მიერ საქართველოში განხორციელებული მონიტორინგის ანგარიშის განხილვა საქართველოს სახალხო დამცველის ორგანიზებით გაიმართა და მას სახელმწიფო უწყებების, წამების პრევენციის ევროპული კომიტეტის, საერთაშორისო ორგანიზაციებისა და დიპლომატიური კორპუსის წარმომადგენლები ესწრებოდნენ.

„LIBER AMICORUM – მინდია უგრეხელიძე 80“ − ასე ჰქვია წიგნს, რომელიც მკითხველს ღვაწლმოსილი ქართველი იურისტის, აკადემიკოს მინდია უგრეხელიძის ცხოვრებისა და მოღვაწეობის შესახებ მოუთხრობს. წიგნის პრეზენტაცია მეცნიერის 80 წლის იუბილეს მიეძღვნა.

წიგნში წარმოდგენილი დოკუმენტური და საარქივო მასალა, ბიოგრაფიული დეტალების გარდა, ქართული სახელმწიფოსა და სამართლის უახლეს ისტორიას ასახავს. ქართული იურიდიული მეცნიერების სხვადასხვა დარგის განვითარებისა და დიპლომატიის ისტორიის გარდამტეხ ეტაპებთან ერთად, წიგნი აცოცხლებს იმ გზას, რომელიც საქართველოსთვის დამოუკიდებლობის მოპოვების შემდგომ ევროპულ სამართლებრივ სივრცეში გაიხსნა. მინდია უგრეხელიძე იყო ადამიანის უფლებათა ევროპული სასამართლოს პირველი ქართველი მოსამართლე და ევროსაბჭოს ამ წამყვან ინსტიტუტთან საქართველოს სამართლებრივი თანამშრომლობის ერთ-ერთი ფუძემდებელი. იგი სხვადასხვა დროს გახლდათ საქართველოს უზენაესი სასამართლოს თავმჯდომარე, „იურისტთა მსოფლიო ასოციაციის“, „სისხლის სამართლის საერთაშორისო ასოციაციისა“ და „ვენეციის კომისიის“ წევრი, ასევე, 2009 წლიდან ევროსაბჭოს სისტემაში მოქმედი თბილისის პოლიტიკური სკოლის ექსპერტი.

ქართული იურიდიული მეცნიერების განვითარებას დღეს მინდია უგრეხელიძე იუსტიციის სამინისტროში მინისტრის მრჩევლის სტატუსითაც განაგრძობს. ის სამინისტროს ორენოვანი სამეცნიერო ჟურნალ „იუსტიციის“ რედაქტორია, რომლის მიზანი მეცნიერებაზე დაფუძნებული კანონმდებლობის განვითარება და სამართლებრივ საკითხებზე აკადემიური დისკუსიის გაღრმავებაა. ცნობილი მეცნიერი აქტიურად მონაწილეობს სამართალშემოქმედებით პროცესში სამეცნიერო პოტენციალის მოზიდვაშიც, რაც იუსტიციის სამინისტროს ერთ-ერთი პრიორიტეტია. სწორედ ამ თანამშრომლობის მნიშვნელობაზე ისაუბრა იუსტიციის მინისტრმა რატი ბრეგაძემ წიგნის პრეზენტაციაზე.

„ბატონმა მინდიამ ერთ-ერთი წამყვანი როლი შეასრულა თანამედროვე ქართული სამართლებრივი სახელმწიფოს მშენებლობაში; იგი არის ქართველი იურისტების არაერთი თაობის აღმზრდელი და წარუშლელ კვალს ტოვებს ქართული სამართლის განვითარებაში. ადამიანის უფლებათა ევროპული სასამართლოს პირველმა მოსამართლემ უშუალო მონაწილეობა მიიღო ევროპული ღირებულებების ფორმირებაში და ჩვენ თამამად შეგვიძლია, ვთქვათ, რომ ბატონი მინდია უგრეხელიძე არის ადამიანის განსახიერება, რომელიც არის „ქართველი და, მაშასადამე, ევროპელი“. ჩვენ წილად გვხვდა პატივი, რომ მივიღოთ რჩევები ბატონი მინდიასგან. მინდა, გულითადად მივულოცო იუბილე და ვუსურვო ყოველივე საუკეთესო“, − განაცხადა იუსტიციის მინისტრმა.

წიგნი გამოსაცემად კავკასიის საერთაშორისო უნივერსიტეტის პროფესორმა ბექა ქანთარიამ მოამზადა. პრეზენტაცია საქართველოს იუსტიციის სამინისტროს ორგანიზებითა და კავკასიის საერთაშორისო უნივერსიტეტის მხარდაჭერით გაიმართა. ღონისძიებას აღმასრულებელი, საკანონმდებლო და სასამართლო ხელისუფლების წევრები; სამეცნიერო წრეების წარმომადგენლები; მინდია უგრეხელიძის მოსწავლეები და სტუდენტები ესწრებოდნენ.

მიმდინარე წლის 5 და 6 ივლისს საქართველოს დელეგაციამ, იუსტიციის მინისტრის მოადგილის, ბექა ძამაშვილის ხელმძღვანელობით, გაერთიანებული ერების ორგანიზაციის ადამიანის უფლებათა კომიტეტში „სამოქალაქო და პოლიტიკურ უფლებათა შესახებ“ საერთაშორისო პაქტის შესრულების თაობაზე საქართველოს მე-5 პერიოდული ანგარიში წარადგინა.

ქართულმა მხარემ გაეროს ადამიანის უფლებათა კომიტეტს ამომწურავი ინფორმაცია მიაწოდა წინა პერიოდული ანგარიშის მოსმენის შემდეგ - 2014 წლიდან დღემდე სახელმწიფოს მიერ განხორციელებული საკანონმდებლო და ინსტიტუციური რეფორმების შესახებ, რომლებიც მიზნად ისახავს საქართველოში ადამიანის უფლებების ეფექტიან უზრუნველყოფასა და საერთაშორისო ვალდებულებების ჯეროვან შესრულებას.

საქართველოს დელეგაციამ კომიტეტის სხდომაზე ყურადღება გაამახვილა საქართველოს ოკუპირებულ ტერიტორიებზე ადამიანის უფლებების დაცვის კუთხით არსებულ გამოწვევებზე. კომიტეტის წევრებს მიეწოდათ დეტალური ინფორმაცია ადამიანის უფლებათა ევროპული სასამართლოსა და ჰააგის სისხლის სამართლის საერთაშორისო სასამართლოს მიერ გამოტანილ ისტორიულ გადაწყვეტილებებზე, რითაც უკვე სამართლებრივ ჭრილში დადასტურდა რუსეთის ფედერაციის მიერ საქართველოს ტერიტორიების ოკუპაციის ფაქტი და 2008 წლის ომის დროს ჩადენილ დარღვევებზე პასუხისმგებლობა.

ქართულმა მხარემ, ასევე, კომიტეტის წევრებს მიაწოდა ინფორმაცია სასამართლო სისტემის რეფორმაზე; პენიტენციური სისტემისა და სამართალდამცავი უწყებების გაძლიერების მიზნით გადადგმულ ნაბიჯებზე; ანტიკორუფციულ ღონისძიებებზე; გამოხატვისა და შეკრების თავისუფლების უზრუნველყოფაზე; საარჩევნო რეფორმაზე; ანტიდისკრიმინაციული კანონმდებლობის აღსრულებაზე; ქალთა მიმართ ძალადობის აღმოფხვრისა და ბავშვთა და შეზღუდული შესაძლებლობების მქონე პირთა უფლებათა დაცვის უზრუნველსაყოფად საქართველოს მიერ გატარებულ რეფორმებზე.

განხილვის ფარგლებში საქართველოს დელეგაციამ, ასევე, უპასუხა გაეროს ადამიანის უფლებათა კომიტეტის წევრების შეკითხვებს ადამიანის უფლებების დაცვის კუთხით საქართველოში არსებულ აქტუალურ საკითხებზე. საგულისხმოა, რომ გაეროს ადამიანის უფლებათა კომიტეტმა დადებითად შეაფასა საქართველოს მიერ გაეროს მონიტორინგის ორგანოების რეკომენდაციების შესრულების უზრუნველსაყოფად ქვეყანაში დანერგილი მექანიზმები. განხილვის შემდეგ საქართველოს დელეგაციას წერილობით მიეწოდება კომიტეტის რეკომენდაციები, რომლის შესრულების ანგარიშიც 2024 წელს გაიგზავნება.

საქართველოს დელეგაციის შემადგენლობაში შედიოდნენ აღმასრულებელი, საკანონმდებლო და სასამართლო ხელისუფლების შემდეგი უწყებების წარმომადგენლები:

მთავრობის ადმინისტრაცია;

პარლამენტი;

საგარეო საქმეთა სამინისტრო;

შინაგან საქმეთა სამინისტრო;

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო;

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი;

იუსტიციის უმაღლესი საბჭო;

თბილისის საქალაქო სასამართლო;

გენერალური პროკურატურა;

სახელმწიფო უსაფრთხოების სამსახური;

სპეციალური საგამოძიებო სამსახური;

პერსონალურ მონაცემთა დაცვის სამსახური;

ცენტრალური საარჩევნო კომისია;

კომუნიკაციების ეროვნული კომისია.

მე-5 პერიოდული ანგარიში 2020 წელს წერილობით მომზადდა და გაიგზავნა საქართველოს საგარეო საქმეთა სამინისტროს კოორდინაციითა და სახელმწიფო უწყებების ჩართულობით.