საჯარო სერვისების გაერო-ს ფორუმის ფარგლებში, გაერთიანებული ერების ორგანიზაციის გენერალური მდივნის მოადგილე ეკონომიკურ და სოციალურ საკითხებში ლი ჯუნჰუა თბილისის ცენტრალურ იუსტიციის სახლს ეწვია.

მაღალი რანგის სტუმარს საჯარო სერვისების მიწოდების წარმატებული ქართული მოდელი, "ერთი ფანჯრის“ პრინციპი და იუსტიციის სახლის კონცეფცია იუსტიციის მინისტრის მოადგილე ლანა მორგოშიამ და იუსტიციის სახლის თავმჯდომარე ვახტანგ ჟვანიამ გააცნეს.

ლი ჯუნჰუამ ინფორმაცია მიიღო საჯარო სერვისების განვითარების მიმართულებით საქართველოში განხორციელებული ციფრული და ინოვაციური პროექტების, ასევე ინკლუზიურობისა და თანაბარი ხელმისაწვდომობის უზრუნველსაყოფად დანერგილი სერვისების, მათ შორის მობილური იუსტიციის სახლისა და ბიზნესასისტენტის შესახებ.

აღსანიშნავია, რომ იუსტიციის სახლი არაერთი პრესტიჟული საერთაშორისო ჯილდოს მფლობელია, მათ შორისაა გაერო-ს საჯარო სამსახურის ჯილდო (UNPSA), რომელიც უწყებას სერვისების მიწოდების სფეროში საუკეთესო მიღწევებისთვის გადაეცა.

იუსტიციის მინისტრი ეკონომიკურ და სოციალურ საკითხებში გაერო-ს გენერალური მდივნის მოადგილე ლი ჯუნჰუას შეხვდა. მინისტრმა ლი ჯუნჰუას მადლობა გადაუხადა მაღალი დონის ფორუმის ორგანიზების საკითხებში თანამშრომლობისა და მხარდაჭერისთვის.

პაატა სალიამ აღნიშნა, რომ თბილისი იქცა გლობალური დისკუსიის პლატფორმად ინოვაციებსა და საჯარო სერვისების განვითარების მიმართულებებზე სასაუბროდ.

წლევანდელი ფორუმის თემა „საჯარო ინსტიტუტების ტრანსფორმაცია: ინოვაციების, ანგარიშვალდებულების, ჩართულობისა და ინკლუზიურობის ხელშეწყობა“ სრულად ეხმიანება საქართველოში საჯარო სერვისების მიწოდების მიმართულებით განხორციელებულ რეფორმებს, რაც მოიცავს საჯარო ინსტიტუტების მოდერნიზაციას უფრო ეფექტიანი, ინკლუზიური და მოქალაქეზე ორიენტირებული სერვისების უზრუნველსაყოფად.

მინისტრმა, ასევე, ორმხრივი შეხვედრები გამართა ფორუმის მონაწილე სხვა ქვეყნებთან.

შეხვედრების ბოლოს პაატა სალიამ იმედი გამოთქვა, რომ ფორუმის ფარგლებში ჩამოყალიბებული თანამშრომლობა საერთო ცოდნის და გამოცდილების გაზიარების კუთხით კიდევ მეტ შესაძლებლობებს გააჩენს. მინისტრის თქმით, საქართველო მზადაა, პარტნიორ ქვეყნებს გაუზიაროს უნიკალური გამოცდილება სწრაფი და ეფექტიანი, მათ შორის, ციფრული და დისტანციური სერვისების მიწოდების სისტემის განვითარების მიმართულებით.

პაატა სალიამ აღნიშნა იუსტიციის სამინისტროს განსაკუთრებული როლი ქვეყნის ციფრული ტრანსფორმაციის პროცესში და ხაზი გაუსვა ციფრული მმართველობის როლს სახელმწიფოსა და მოქალაქის სწრაფი და მეტად ეფექტური თანამშრომლობისათვის.

თამარ ზოდელავამ მონაწილეობა მიიღო სამუშაო შეხვედრაში „ციფრული საჯარო ინფრასტრუქტურა, ციფრული იდენტობა და მონაცემთა უსაფრთხოება საჯარო სერვისების მიწოდების პროცესში“.

მინისტრის მოადგილემ ხაზი გაუსვა საჯარო ინსტიტუტების გაძლიერებისა და მოქალაქეთა ცხოვრების გაუმჯობესების მიმართულებით ინოვაციებისა და ეფექტიანი მმართველობის მნიშვნელობას.

თამარ ზოდელავას თქმით, ციფრული ტრანსფორმაცია აღარ გულისხმობს მხოლოდ ახალი ტექნოლოგიების დანერგვას – ის გულისხმობს მმართველობის გაძლიერებას, საზოგადოების ნდობის ამაღლებას, სერვისების გაუმჯობესებას და მოქალაქის საჯარო ადმინისტრირების ცენტრში მოქცევას.

იუსტიციის მინისტრის მოადგილე გიორგი დგებუაძემ გახსნა სამუშაო შეხვედრა „ინკლუზიური საჯარო ადმინისტრირების ხელშეწყობა ციფრული ინკლუზიისა და მონაწილეობითი მმართველობის გზით“.

გიორგი დგებუაძემ ხაზგასმით აღნიშნა, რომ, გაერო-ს მდგრადი განვითარების 2030 წლის დღის წესრიგის თანახმად, პროგრესს მხოლოდ მაშინ აქვს რეალური მნიშვნელობა, როდესაც მისი სარგებელი ყველასთვის ხელმისაწვდომია; ციფრული ინოვაციების განვითარება კი, უზრუნველყოფს, რომ საზოგადოების ყველა წევრს ჰქონდეს თანაბარი წვდომა საჯარო სერვისებზე და არ დარჩნენ ციფრული ეპოქის მიღმა.

საჯარო სერვისების გაერო-ს ფორუმს თბილისი პირველად მასპინძლობს და მისი თემაა „საჯარო ინსტიტუტების ტრანსფორმაცია: ინოვაციის, ანგარიშვალდებულების, ჩართულობისა და ინკლუზიურობის ხელშეწყობა“.

იუსტიციის მინისტრის მოადგილე სიტყვით გამოვიდა თემატურ სესიაზე „მნიშვნელოვანი მონაწილეობა როგორც საჯარო სექტორის ტრანსფორმაციის ხელშემწყობი ფაქტორი“. ლანა მორგოშიამ ისაუბრა იმაზე, თუ როგორ შეიძლება საჯარო ინსტიტუტები გახდნენ უფრო ინკლუზიური, გამჭვირვალე, ანგარიშვალდებული და ადამიანზე ორიენტირებული. მისი თქმით, განსაკუთრებული ყურადღება უნდა დაეთმოს ციფრულ ინკლუზიასა და მონაწილეობით მმართველობას, რათა ყველას, მათ შორის, სოფლის მოსახლეობას, ახალგაზრდებს, ქალებსა და შეზღუდული შესაძლებლობის მქონე პირებს, ჰქონდეთ საკუთარი ხმის დაფიქსირების შესაძლებლობა.

იუსტიციის მინისტრის მოადგილემ ხაზგასმით აღნიშნა, რომ საჯაროს სერვისების განვითარების კუთხით მნიშვნელოვანია, მოქალაქეები იყვნენ არა მხოლოდ საჯარო სერვისების მიმღებები, არამედ მათი ფორმირების აქტიური მონაწილეებიც.

თბილისი საჯარო სერვისების გაერო-ს ფორუმს მასპინძლობს, სადაც მსოფლიო ლიდერები საერთაშორისო ექსპერტებთან ერთად მოქალაქეზე ორიენტირებული, ინოვაციური საჯარო სერვისების საკითხებზე მსჯელობენ.

პანელურ დისკუსიებში იუსტიციის მინისტრის პირველმა მოადგილე ბექა ძამაშვილმა და მთავრობის ადმინისტრაციის უფროსმა ლევან ჟორჟოლიანმა მიიღეს მონაწილეობა. ღონისძიებაზე იმსჯელეს ისეთ მნიშვნელოვან საკითხებზე, როგორიცაა: საჯარო სერვისებზე უნივერსალური ხელმისაწვდომობა, მთავრობის ანგარიშვალდებულება და გამჭვირვალობა, ეფექტიანი მონიტორინგის სისტემა და სხვ.

საჯარო სერვისების გაერო-ს ფორუმს საქართველო პირველად მასპინძლობს. მაღალი დონის ღონისძიების თბილისში ჩატარება იმ წარმატებული რეფორმების საერთაშორისო აღიარებაა, რომელთაც საქართველო წლებია, ახორციელებს ხელმისაწვდომი და ეფექტიანი საჯარო სერვისების განვითარებისათვის. ფორუმი დღეს საქართველოს პრემიერ-მინისტრმა ირაკლი კობახიძემ, იუსტიციის მინისტრმა პაატა სალიამ და გაერო-ს გენერალური მდივნის მოადგილემ ეკონომიკურ და სოციალურ საკითხებში ლი ჯუნჰუამ გახსნეს.

ღონისძების მონაწილეები პანელურ დისკუსიებზე, სამუშაო სესიებზე განიხილავენ ისეთ აქტუალურ საკითხებს, როგორიცაა: ციფრული ტრანსფორმაცია, ხელოვნური ინტელექტის პასუხისმგებლიანი გამოყენება, მონაცემთა დაცვა, ინკლუზიური მმართველობა, კორუფციასთან ბრძოლა, მოქალაქეთა ჩართულობის გაძლიერება და საჯარო სერვისების ხელმისაწვდომობის გაუმჯობესება.

ფორუმი 25 ივნისს დაჯილდოების ცერემონიალით დასრულდება.

თბილისი საჯარო სერვისების გაეროს-ს ფორუმს მასპინძლობს, სადაც მსოფლიო ლიდერები საერთაშორისო ექსპერტებთან ერთად მოქალაქეზე ორიენტირებული, ინოვაციური საჯარო სერვისების საკითხებზე მსჯელობენ.

ფორუმი „საჯარო ინსტიტუტების ტრანსფორმაცია: ინოვაციის, ანგარიშვალდებულების, ჩართულობისა და ინკლუზიურობის ხელშეწყობა“ საქართველოს პრემიერ-მინისტრმა ირაკლი კობახიძემ, იუსტიციის მინისტრმა პაატა სალიამ და გაერო-ს გენერალური მდივნის მოადგილემ ეკონომიკურ და სოციალურ საკითხებში ლი ჯუნჰუამ გახსნეს.

მაღალი დონის ღონისძიების თბილისში ჩატარება იმ წარმატებული რეფორმების საერთაშორისო აღიარებაა, რომელსაც საქართველო წლებია, ახორციელებს ხელმისაწვდომი და ეფექტიანი საჯარო სერვისების განვითარებისათვის.

პაატა სალიამ იმ მოლოდინებზე ისაუბრა, რაც ტექნოლოგიური პროგრესისა და ხელოვნური ინტელექტის სწრაფი განვითარების ფონზე სახელმწიფო სერვისების მიმართ ჩნდება და ხაზი გაუსვა საერთაშორისო თანამშრომლობის გაძლიერებისა და პარტნიორების გამოცდილების გაზიარების მნიშვნელობას ახალი ინიციატივებისა და გადაწყვეტილებების დანერგვის პროცესის წარმატებისათვის.

გაერო-ს გენერალური მდივნის მოადგილემ ეკონომიკურ და სოციალურ საკითხებში ლი ჯუნჰუამ საჯარო სერვისების განვითარებაში შეტანილი წვლილისა და ფორუმის ორგანიზებისათვის საქართველოს იუსტიციის მინისტრს სპეციალური სიგელი გადასცა.

ფორუმი თემატური სესიების ფორმატში სამი დღის განმავლობაში იმუშავებს. მისი მონაწილეები იმსჯელებენ ისეთ საკითხებზე, როგორიცაა: ციფრული ტრანსფორმაცია, ხელოვნური ინტელექტის პასუხისმგებლიანი გამოყენება, მონაცემთა დაცვა, ინკლუზიური მმართველობა, კორუფციასთან ბრძოლა, მოქალაქეთა ჩართულობის გაძლიერება და საჯარო სერვისების ხელმისაწვდომობის გაუმჯობესება. ღონისძიება სერვისების ხელმისაწვდომობის მიზნით განხორციელებული საუკეთესო ინოვაციური პროექტების დაჯილდოების ცერემონიალით დასრულდება.

ფორუმის ფარგლებში, საქართველოს იუსტიციის მინისტრი ორმხრივ შეხვედრებს გამართავს გაერო-ს გენერალური მდივნის მოადგილესთან ეკონომიკურ და სოციალურ საკითხებში ლი ჯუნჰუასა უცხოური დელეგაციების ხელმძღვანელებთან.