საქართველოს იუსტიციის სამინისტროს სსიპ - სახელმწიფო სერვისების განვითარების სააგენტოსა და გაეროს ლტოლვილთა უმაღლესი კომისარიატის (UNHCR) ერთობლივი ღონისძიების მიზანი იყო მოქალაქეობის არმქონეობის სფეროში საქართველოს მიერ მიღწეული პროგრესისა და UNHCR-თან თანამშრომლობით მიმდინარე კამპანიების შედეგების განხილვა, რომლებიც მოქალაქეობის არმქონე პირთა იდენტიფიცირებასა და დოკუმენტირებას ემსახურება.

ღონისძიება გახსნეს საქართველოს იუსტიციის მინისტრის პირველმა მოადგილემ თამარ ტყეშელაშვილმა და საქართველოში გაეროს ლტოლვილთა უმაღლესი კომისრის (UNHCR) წარმომადგენელმა კემლინ ფურლიმ.

„სასიხარულოა, რომ საქართველოს მიერ მოქალაქეობის არმქონეობის სფეროში განხორციელებული ღონისძიებები დადებითად ფასდება როგორც ქვეყნის შიგნით, ისე საერთაშორისო ასპარეზზე და ევროპის ქვეყნებს შორისაც საქართველო ამ მხრივ მოწინავე პოზიციებს იკავებს. მნიშვნელოვანია, რომ ბოლო ათი წლის განმავლობაში საქართველო ინარჩუნებს მოქალაქეობის არმქონე პირთა რიცხვის მკვეთრი კლების ტენდენციას, რაც საბოლოოდ უზრუნველყოფს ყველა ასეთი პირის დოკუმენტირებას მათი უფლებების სრულფასოვნად რეალიზაციის მიზნით“, - აღნიშნა თამარ ტყეშელაშვილმა და მადლობა გადაუხადა UNHCR-სა და სააგენტოს გუნდს ნაყოფიერი თანამშრომლობისა და მიღწეული შედეგებისთვის.

კემლინ ფურლიმ ხაზი გაუსვა მოქალაქეობის არმქონეობის სფეროში საქართველოს მიერ მიღწეულ წარმატებას, რაც კიდევ უფრო მეტად აახლოებს ქვეყნის პრაქტიკას საერთაშორისო სტანდარტებთან.

სააგენტოს თავმჯდომარემ, ქეთევან ბეთლემიძემ, დამსწრე საზოგადოებას დეტალურად გააცნო მოქალაქეობის არმქონეობის შემცირებისა და პრევენციის მიზნით განხორციელებული ღონისძიებები და სამომავლო გეგმები, ასევე, UNHCR-თან თანამშრომლობით მიმდინარე „კარდაკარ“ კამპანიის ფარგლებში შესრულებული აქტივობები და მათი შედეგები.

ღონისძიებას მთავრობის ადმინისტრაციის, სახელმწიფო უწყებების, საქართველოს პარლამენტის, სახალხო დამცველის ოფისისა და საერთაშორისო და ადგილობრივი ორგანიზაციების წარმომადგენლები ესწრებოდნენ

კანონთან კონფლიქტში მყოფი პირების რეაბილიტაცია-რესოციალიზაციის პროცესში ჩართული ფსიქოლოგებისა და სოციალური მუშაკების პროფესიული განვითარების ხელშეწყობის მიზნით კონფერენცია გაიხსნა.

ღონისძიების მონაწილეები ორი დღის განმავლობაში იმსჯელებენ ფსიქოლოგებისა და სოციალური მუშაკების მიერ შემთხვევის მართვის შესახებ, ერთმანეთს გაუზიარებენ გამოცდილებას და განიხილავენ მულტისექტორული თანამშრომლობის კონკრეტულ გზებს, რაც პენიტენციური და დანაშაულის პრევენციის სისტემებს უფრო ეფექტიანს გახდის.

კონფერენციის მონაწილეებს მისასალმებელი სიტყვით მიმართეს იუსტიციის მინისტრის მოადგილე ბუბა ლომუაშვილმა და საქართველოში ევროპის საბჭოს ოფისის ხელმძღვანელმა ნატალია ვუტოვამ.

კონფერენციაზე აღინიშნა, რომ პრობაციისა და პენიტენციური სისტემების შემდგომი განვითარება საუკეთესო ევროპული და საერთაშორისო სტანდარტების შესაბამისად საქართველოს იუსტიციის სამინისტროს სტრატეგიული პრიორიტეტია და ის მნიშვნელოვნად არის დამოკიდებული სოციალური მუშაკებისა და ფსიქოლოგების პროფესიონალურ საქმიანობაზე; შეფასდა სისტემებში ბოლო 10 წლის მანძილზე მიღწეული პროგრესი.

ღონისძიება იუსტიციის სამინისტროს, დანაშაულის პრევენციისა და არასაპატიმრო სასჯელთა აღსრულებისა და პრობაციის ეროვნულ სააგენტოსა და ევროპის საბჭოს ოფისის ორგანიზებით გაიმართა პროექტის - „ჯანდაცვის უზრუნველყოფის გაუმჯობესება საქართველოს პენიტენციურ სისტემაში“ - ფარგლებში.

კონფერენციას ესწრებოდნენ აღმასრულებელი ხელისუფლების წევრები; დანაშაულის პრევენციისა და არასაპატიმრო სასჯელთა აღსრულებისა და პრობაციის ეროვნული სააგენტოს, სპეციალური პენიტენციური სამსახურის, საქართველოში ევროპის საბჭოს ოფისის წარმომადგენლები და მოწვეული სტუმრები.

იუსტიციის სამინისტრო საგრანტო პროგრამის ფარგლებში გამოვლენილ 17 საუკეთესო პროექტს, ჯამში, 335 000 ლარით დააფინანსებს. გამარჯვებულ ორგანიზაციებსა და ფიზიკურ პირებთან შესაბამისი ხელშეკრულებები დღეს გაფორმდა.

კონკურსის მიზანი იუსტიციის სამინისტროს საქმიანობის პრიორიტეტული მიმართულებების გაძლიერება და სისტემის მასშტაბით სამოქალაქო საზოგადოების მონაწილეობისა და ჩართულობის გაზრდაა.

საგრანტო პროგრამა იუსტიციის სამინისტრომ ადამიანის უფლებების დაცვის, გაძლიერების, ინოვაციური სერვისების დანერგვისა და სამართლებრივი უსაფრთხოების განმტკიცების მიმართულებებით 10 ოქტომბერს გამოაცხადა. კონკურსის ფარგლებში, ჯამში, 47 საპროექტო განაცხადი იყო წარმოდგენილი.
ღონისძიებას იუსტიციის მინისტრის მოადგილეები თორნიკე ჭეიშვილი და ერეკლე ღვინიანიძე ესწრებოდნენ.

იუსტიციის მინისტრის მოადგილემ მონაწილეებს სიტყვით მიმართა და დეტალურად გააცნო სახელმწიფო სერვისების მიწოდების ქართული მოდელი. ერეკლე ღვინიანიძემ დამსწრე საზოგადოებას იუსტიციის სამინისტროში მიმდინარე და დაგეგმილი ინოვაციური პროექტებიც გააცნო.

„საქართველოს იუსტიციის სამინისტროს მმართველობის სფეროში მოქმედი 11 საჯარო სამართლის იურიდიული პირის ფუნქციათა და საქმიანობათა მრავალფეროვნების მიუხედავად, ყოველი მათგანის საერთო მიზანი საზოგადოებისთვის ხარისხიანად და სწრაფად სერვისის მიწოდებაა, რასაც სამინისტრო თავისივე „წინა ხაზის“ − იუსტიციის სახლის მეშვეობით ახორციელებს“, − განაცხადა ერეკლე ღვინიანიძემ.

ფორუმს ესწრებოდნენ სსიპ „იუსტიციის სახლის“ აღმასრულებელი დირექტორი ლაშა ლობჯანიძე, სსიპ „სახელმწიფო სერვისების განვითარების სააგენტოს“ თავმჯდომარე ქეთევან ბეთლემიძე და სსიპ „საჯარო რეესტრის ეროვნული სააგენტოს“ თავმჯდომარე დავით დევიძე.

აზერბაიჯანის დედაქალაქ ბაქოში 15-16 დეკემბერს გამართული საერთაშორისო ფორუმის მიზანი სახელმწიფო სერვისების მიწოდების საუკეთესო პრაქტიკის გაზიარება იყო.

მინისტრმა დეპუტატებს უწყების საქმიანობის ერთი წლის ანგარიში წარუდგინა.

საერთაშორისო სასამართლოებში სახელმწიფო ინტერესების დაცვა, მოქალაქეებისთვის სერვისებზე გაზრდილი ხელმისაწვდომობა, მობილური იუსტიციის სახლი, ახალი და მშენებარე იუსტიციის სახლები, სამართლის ისტორიის ჰოლოგრამული მუზეუმი, მიწის სისტემური რეგისტრაცია, დამისამართების პროექტი, ციფრული მმართველობის განვითარება, სტუდია „იუსტიცია“, რესოციალიზაცია-რეაბილიტაციის პროგრამები, ახალი პენიტენციური კოდექსი და პატიმართა გაუმჯობესებული პირობები – ეს იმ თემების ნაწილია, რომლის შესახებაც მინისტრმა დეპუტატებს ინფორმაცია მიაწოდა.

რატი ბრეგაძემ მოხსენების შემდეგ დეპუტატების კითხვებსაც უპასუხა.

შეხვედრის მიზანი იყო საერთაშორისო მიგრაციის განხილვის პირველი ფორუმისა და მისი პროგრესანგარიშის განხილვა.

გაერო-ს მიგრაციის ქსელის თანათავმჯდომარეების − საქართველოში გაერო-ს მუდმივი კოორდინატორის და მიგრაციის საერთაშორისო ორგანიზაციის საქართველოს მისიის (IOM), ასევე, IOM-ის რეგიონული ოფისის მიერ ორგანიზებულ ღონისძიებაში მონაწილეობდნენ საქართველოში წარმოდგენილი გაერო-ს სხვა სააგენტოების, სახელმწიფო უწყებებისა და სამოქალაქო საზოგადოების წარმომადგენლები.

მასპინძლებთან ერთად, შეხვედრა გახსნა საქართველოს იუსტიციის მინისტრის პირველმა მოადგილე თამარ ტყეშელაშვილმა, რომელმაც თავის გამოსვლაში ხაზი გაუსვა მიგრაციის გლობალურ, რეგიონულ თუ ეროვნულ დონეებზე მართვის სფეროში პარტნიორობის, კოორდინირებული ქმედების და საერთო სამთავრობო მიდგომის მნიშვნელობას, რამაც საქართველოს მიერ ევროკავშირთან სავიზო რეჟიმის ლიბერალიზაციის სამოქმედო გეგმის შესრულებასა და მის ბაზაზე სფეროს მართვის მექანიზმების განვითარებაში მნიშვნელოვანი როლი შეასრულა.

იუსტიციის სამინისტროდან შეხვედრას, ასევე, ესწრებოდნენ სსიპ „სახელმწიფო სერვისების განვითარების სააგენტოს“ თავმჯდომარე ქეთევან ბეთლემიძე, მიგრაციის საკითხთა სამთავრობო კომისიის სამდივნოს აღმასრულებელი მდივანი გიორგი ჯაში და სააგენტოს წარმომადგენელი ანა წულაძე.

რატი ბრეგაძე საქართველოში ჩინეთის სახალხო რესპუბლიკის ელჩ ჭოუ ციენს შეხვდა. მხარეებმა ორ ქვეყანას შორის თანამშრომლობის განვითარების გზებზე ისაუბრეს.

იუსტიციის მინისტრმა ხაზი გაუსვა ჩინეთთან სამართლებრივი თანამშრომლობის გაღრმავების მნიშვნელობას და აღნიშნა ელჩის პირადი მხარდაჭერა მიმდინარე წლის სექტემბერში „ჰუალინგ პლაზაში“ იუსტიციის სახლის ფილიალის გახსნის პროცესში.

სახელმძღვანელოში დეტალურად არის განხილული ნარკოტიკების ავადმოხმარების პრევენციის საერთაშორისო და ევროპული სტანდარტები; სხვადასხვა გარემოში მტკიცებულებაზე დაფუძნებული პრევენციული ინტერვენციების პროგრამები, რომლებზე დაყრდნობითაც შესაძლებელია მაღალი სანდოობის პრევენციული პროგრამების შემუშავება ეროვნულ დონეზე. სახელმძღვანელო განკუთვნილია გადაწყვეტილების მიმღები, საზოგადოებრივი აზრის შემქმნელი და პოლიტიკის გამტარებელი პირებისათვის.

სახელმძღვანელო მნიშვნელოვანი ინსტრუმენტია საქართველოს ევროკავშირთან ასოცირების პროცესში აღებული ვალდებულებების ეფექტიანი შესრულებისათვის, ასევე, 2021-2026 წლების ნარკოტიკების ავადმოხმარების პრევენციის ეროვნული სტრატეგიისა და მისი თანმდევი 2022-2023 წლების სამოქმედო გეგმის სწრაფი და თანმიმდევრული განხორციელებისათვის.

დოკუმენტი შემუშავდა იუსტიციის სამინისტროს, ნარკომანიასთან ბრძოლის უწყებათაშორისი საბჭოსა და ნარკოვითარების მონიტორინგის ეროვნული ცენტრის კოორდინაციით, ევროპის ნარკოტიკებისა და წამალდამოკიდებულების მონიტორინგის ცენტრისა (EMCDDA) და ევროკავშირის მიერ დაფინანსებული პროექტის EMCDDA4GE-ს (EMCDDA for Georgia) მხარდაჭერით.

სახელმძღანელოს თარგმნისა და ადაპტირების პროცესში აქტიურად მონაწილეობდნენ „ტომაშ ზაბრანსკის სახელობის ადიქტოლოგიის ინსტიტუტის“ წარმომადგენლები, ნარკოტიკების მოხმარების პრევენციისა და ადიქტოლოგიის დარგის ექსპერტები.

სახელმძღვანელოს პრეზენტაცია იუსტიციის სასწავლო ცენტრში გაიმართა.

კოდექსის ძირითად სიახლეებზე საქართველოს იუსტიციის მინისტრმა რატი ბრეგაძემ მთავრობის სხდომის შემდგომ გამართულ ბრიფინგზე ისაუბრა.
მინისტრის განცხადებით, პროექტი აუმჯობესებს სპეციალური პენიტენციური სამსახურის თანამშრომელთა შრომით პირობებს და პენიტენციურ დაწესებულებებში მყოფ პირთა უფლებრივი მდგომარეობა გადაჰყავს კიდევ უფრო მეტად მაღალ ხარისხზე.

იუსტიციის მინისტრმა რამდენიმე მნიშვნელოვან ცვლილებას გაუსვა ხაზი:

• ბრალდებულს მიენიჭება ხანგრძლივი პაემნის უფლება, რომელიც აქამდე არ ჰქონდა;
• ყველა სახის პაემანი გახდება სრულიად უფასო − დღეს 60 ლარის გადახდა უწევს სრულწლოვან მსჯავრდებულებს, არასრულწლოვნებს კი − 30 ლარის;
• გარდა საშიშროების მაღალი რისკის მსჯავრდებულებისა, ყველას მიენიჭება უმაღლესი განათლების მიღების უფლება და, შესაბამისად, ის ინოვაციური პროექტი, რომელიც სულ რამდენიმე ხნის წინ იუსტიციის სამინისტრომ განათლებისა და მეცნიერების სამინისტროსთან ერთად დაიწყო − „ციფრული უნივერსიტეტი“, ხელმისაწვდომი გახდება მსჯავრდებულთა ფართო მასებისთვის;
• იზრდება სატელეფონო საუბრების რაოდენობა და ხანგრძლივობა, რაც მსჯავრდებულებს გარე სამყაროსთან კომუნიკაციის კიდევ უფრო მეტ საშუალებას მისცემს;
• გათანაბრდება მსჯავრდებულთა და ბრალდებულთა საცხოვრებელი პირობები, რაც უდავოდ პროგრესული და წინგადადგმული ნაბიჯია;
• პენიტენციური სამსახურის ყველა დანაყოფს მიენიჭება სპეციალური სტატუსი, რაც თანამშრომელთა პირობებს გაათანაბრებს და გააუმჯობესებს;
• ფართოვდება სპეციალური წოდების მქონე პირთა წრე და ყველა მოსამსახურე, თანამდებობრივი და წოდებრივი სარგოს გარდა, მიიღებს წელთა ნამსახურობის დანამატს, რაც მათ სახელფასო პირობებზე დადებითად აისახება.