№10 პენიტენციური დაწესებულების ტერიტორიაზე წმინდა პანტელეიმონ მკურნალის სახელობის ტაძრის მშენებლობა ერთი წლის განმავლობაში მიმდინარეობდა. მშენებლობის პროცესში 40 მდე მსჯავრდებულმა მიიღო მონაწილეობა.

1500 კვადრატული მეტრი მიწის ნაკვეთზე, ასევე, მოეწყო სანათლავი და კელიები, სადაც მსჯავრდებულთათვის გალობის, საღვთისმეტყველო და ბიბლიის შემსწავლელი კურსები ჩატარდება.

ეკლესია დღეს, სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესი ილია მეორეს ლოცვა-კურთხევით ამოქმედდა. ტაძარი იუსტიციის მინისტრმა რატი ბრეგაძემ საპატრიარქოს წარმომადგენლებთან ერთად გახსნა.

მშენებლობაში მონაწილე მსჯავრდებულებს პატრიარქის სიგელები და სამახსოვრო საჩუქრები გადასცეს.

საზეიმო ლიტურგიას, ასევე, ესწრებოდნენ სპეციალური პენიტენციური სამსახურის ხელმძღვანელი ნიკა ცხვარაშვილი და მისი მოადგილე გიორგი გიორგაძე.

იუსტიციის მინისტრი საქართველოს ქალაქებში უწყების საქმიანობის ერთწლიანი ანგარიშის წარდგენას აგრძელებს. თბილისის, ქუთაისის, ბორჯომის, რუსთავის, ბათუმისა და თელავის შემდეგ რატი ბრეგაძე გორს ეწვია. მინისტრმა პირადად მიაწოდა ინფორმაცია გორის მოსახლეობას განხორციელებული რეფორმებისა და შესრულებული დაპირებების შესახებ.

მინისტრის ანგარიში იუსტიციის სამინისტროსა და მის მმართველობაში შემავალი სსიპებ-ის საქმიანობის ყველა სფეროს მოიცავს და იმ პროგრესს ასახავს, რომელიც ბოლო ერთი წლის მანძილზე იქნა მიღწეული. კერძოდ:

დაინერგა და 7 რეგიონში წარმატებით მუშაობს ინოვაციური პროექტი „მობილური იუსტიციის სახლი“; საქართველოს 6 დიდ ქალაქში განთავსდა პრობაციონერთა მომსახურების ელექტრონული სისტემა „PROBBOX“;

ამოქმედდა მიწის სისტემური რეგისტრაციის რეფორმა – საქართველოს 59 მუნიციპალიტეტში ეტაპობრივად, გეგმა-გრაფიკის მიხედვით მიმდინარეობს მიწების აზომვა და რეგისტრაცია;

გრძელდება ინფრასტრუქტურული სამუშაოები – გაიხსნა 5 ახალი იუსტიციის სახლი და საზოგადოებრივი ცენტრი; მშენებლობები მიმდინარეობს კიდევ 6 მუნიციპალიტეტში; დამატებით ერთი იუსტიციის სახლი ამოქმედდება თბილისში, ჰუალინგში; სამცხე-ჯავახეთის რეგიონული არქივის შენობა გაიხსნა ახალციხეში;

დაფუძნდა და გამოიცა ორენოვანი ჟურნალი „იუსტიცია“; იუსტიციის სამინისტროსათვის ხელმისაწვდომი გახდა უმსხვილესი ელექტრონული სამართლებრივი ბაზა „ჰეინონლაინი“ („HeinOnline“);

ურთიერთთანამშრომლობის მემორანდუმები გაფორმდა თურქეთის, ისრაელის, უნგრეთის, სომხეთის, აზერბაიჯანის, შვეიცარიის იუსტიციის სამინისტროებთან;

სანოტარო მომსახურება ხელმისაწვდომი გახდა კიდევ 12 ადმინისტრაციულ ერთეულში; სულ მალე კი, მოქალაქეებს ონლაინ სანოტარო მომსახურების მიღება მობილური აპლიკაციის საშუალებით შეეძლებათ;

პენიტენციურ და პრობაციის სისტემებში გაძლიერდა პატიმართა დასაქმების პროგრამები; გრძელდება პენიტენციურ დაწესებულებებში სპორტული აქტივობების წახალისება;

პრობაციის ბიუროები გაიხსნა სიღნაღში, თერჯოლაში, ქუთაისსა და ზესტაფონში; რეფერირების ცენტრი გაიხსნა ქუთაისში; გაფორმდა თანამშრომლობის მემორანდუმები მუნიციპალიტეტებთან შრომამისჯილი პირების დასაქმებისათვის.

იუსტიციის სამინისტროს ერთწლიანი მუშაობის ანგარიშის პრეზენტაციას ესწრებოდნენ ადგილობრივი ხელისუფლების წარმომადგენლები, იუსტიციის მინისტრის მოადგილეები და მოწვეული სტუმრები.

აგვისტოს ომს მიეძღვნა იუსტიციის მინისტრისა და მოადგილეების შეხვედრა გორში, დავით აღმაშენებლის სახელობის საქართველოს ეროვნული თავდაცვის აკადემიის იუნკერებთან. ღონისძიებას, ასევე, ესწრებოდა აკადემიის რექტორი, გენერალი მამია ბალახაძე.

გორი არის ერთ-ერთი ქალაქი, რომელიც 14 წლის წინ რუსული აგრესიის შედეგად ყველაზე მეტად დაზარალდა. სწორედ გორში ჩამოვარდნილი ისკანდერი გახდა „ოქროს სამხილი“, რომელმაც საქართველოს სტრასბურგის სასამართლოში ისტორიული გამარჯვება მოაპოვებინა. იუსტიციის სამინისტრომ საერთაშორისო სასამართლოს წინაშე წარადგინა 15 მოწმე, სხვადასხვა სოფლის მცხოვრებნი, ვინც საკუთარ თავზე იწვნია ომის უბედურება, მათ შორის, შვილმკვდარი დედები.

2008 წლის რუსული აგრესიის შედეგად დაღუპული ჯარისკაცები, სამხედროები, რომლებმაც ომში თანამებრძოლები დაკარგეს; დაზარალებულები, რომლებმაც, საერთაშორისო სასამართლოს წინაშე მისცეს ჩვენებები; და სახელმწიფო ერთად არის ის ძალა, რომელმაც სტრასბურგში რუსეთის მიერ საქართველოს ოკუპაციის ფაქტის დადასტურება შეძლო.

იუსტიციის მინისტრი და მოადგილეები საქართველოს ეროვნული თავდაცვის აკადემიაში შეკრებილ იუნკერებს სტრასბურგსა და ჰააგაში რუსეთის წინააღმდეგ მიმდინარე დავებზე ესაუბრნენ, რომლებიც აგვისტოს ომის საქმეზე საქართველოსთვის ისტორიული მნიშვნელობის გადაწყვეტილებებით დასრულდა. საუბარი შეეხო სტრასბურგის სასამართლოს გადაწყვეტილებას − ამოერიცხა ან დაუშვებლად ეცნო საქართველოს წინააღმდეგ ცხინვალის რეგიონში მცხოვრები მოსახლეობის მიერ წარდგენილი 3,300-ზე მეტი საჩივარი, რომლებიც რუსეთის კოორდინაციით შევიდა. ფაქტით კიდევ ერთხელ დასტურდება, რომ 2008 წლის ომის დროს ქართველი სამხედროები მოქმედებდნენ საერთაშორისო სამართლის ნორმების დაცვით.

იუსტიციის მინისტრმა და მოადგილეებმა განმარტეს, რომ სტრასბურგის სასამართლოს მიერ რუსეთის ფედერაციის მხრიდან 2008 წელს საქართველოს ოკუპაციის ფაქტის დადასტურება, ცხინვალის რეგიონში ქართველების ეთნიკური წმენდის აღიარება; აგრეთვე, რუსეთის ბრალეულობის დადგენა ქართველი სამხედრო ტყვეების მკვლელობისა და წამებისთვის; სამხედროებისა და სამოქალაქო პირების არაადამიანური და ღირსების შემლახველი მოპყრობისთვის მძლავრი სამართლებრივი იარაღია ჩვენი ქვეყნის შემდგომი დეოკუპაციისათვის.

ლექციაზე განიხილეს ჰააგის სასამართლოს მიერ დაკავების ორდერების გამოცემა ცხინვალის რეგიონის 3 „მაღალჩინოსნის“ მიმართ, რომლებსაც აგვისტოს ომის დროს ქართველი სამოქალაქო ტყვეების წამებასა და არასათანადო მოპყრობაში ედებათ ბრალი. ჰააგის სასამართლოს პროკურორის ოფისის მიერ გამოიკვეთა, აგრეთვე, რუსი გენერალი ბორისოვის პასუხისმგებლობის საკითხიც. სტრასბურგის შემდეგ ამ გადაწყვეტილებით უკვე ჰააგის სისხლის სამართლის საერთაშორისო სასამართლომ დაადასტურა რუსეთის ფედერაციისა და სეპარატისტული რეჟიმების კონკრეტული წარმომადგენლების პასუხისმგებლობა აგვისტოს ომის დროს ჩადენილ დანაშაულებში.

საერთაშორისო სასამართლოებში დავების საქართველოს სასარგებლოდ დასასრულებლად იუსტიციის სამინისტრომ წარადგინა 700-მდე მტკიცებულება (მათ შორის, ვიდეო და ფოტო მასალები, რადარის მონაცემები, ექსპერტის დასკვნები, სამეთვალყურეო კამერის ჩანაწერები, სეისმური სადგურის მიერ აფეთქებების დამადასტურებელი ჩანაწერები, მოწმეთა ჩვენებები, სატელიტური სურათები, მედიის მასალები, საერთაშორისო ორგანიზაციების ანგარიშები, სატელეფონო მიყურადების ჩანაწერები, განაღმვის ანგარიშები და სხვა) და არაერთი დოკუმენტი შესაბამისი ანალიზითა და არგუმენტებით.

იუსტიციის მინისტრი რატი ბრეგაძე საქართველოს პრემიერ-მინისტრ ირაკლი ღარიბაშვილთან და მინისტრთა კაბინეტის წევრებთან ერთად მუხათგვერდის ძმათა სასაფლაოზე იმყოფებოდა. მთავრობის მეთაურმა და მინისტრებმა 2008 წლის აგვისტოს ომში დაღუპულთა ხსოვნის პატივისცემის ნიშნად, გმირთა მემორიალი გვირგვინით შეამკეს.

მუხათგვერდის სასაფლაოზე იმყოფებოდნენ, აგრეთვე, პარლამენტის თავმჯდომარე შალვა პაპუაშვილი, საკანონმდებლო ხელისუფლებისა და დიპლომატიური კორპუსის წარმომადგენლები.

თბილისის, ქუთაისის, ბორჯომის, რუსთავისა და ბათუმის შემდეგ იუსტიციის მინისტრმა უწყების მუშაობის ანგარიში თელავის მოსახლეობას წარუდგინა. მინისტრმა პირადად მიაწოდა ინფორმაცია თელაველებს ერთი წლის განმავლობაში განხორციელებული რეფორმებისა და შესრულებული დაპირებების შესახებ.

ადამიანის უფლებების დაცვის მიმართულების გაძლიერება, სამართლებრივი უსაფრთხოება და ეფექტიანი სერვისები − ამ სამი პრინციპის გარშემო ერთიანდება ყველა ის სიახლე, რაც იუსტიციის სამინისტრომ მოქალაქეებს შესთავაზა; კერძოდ:

დაინერგა და 7 რეგიონში წარმატებით მუშაობს ინოვაციური პროექტი „მობილური იუსტიციის სახლი“; საქართველოს 6 დიდ ქალაქში განთავსდა პრობაციონერთა მომსახურების ელექტრონული სისტემა „PROBBOX“; ამოქმედდა მიწის სისტემური რეგისტრაციის რეფორმა – საქართველოს 59 მუნიციპალიტეტში ეტაპობრივად, გეგმა-გრაფიკის მიხედვით მიმდინარეობს მიწების აზომვა და რეგისტრაცია;

გრძელდება ინფრასტრუქტურული სამუშაოები – გაიხსნა 5 ახალი იუსტიციის სახლი და საზოგადოებრივი ცენტრი; მშენებლობები მიმდინარეობს კიდევ 6 მუნიციპალიტეტში; დამატებით ერთი იუსტიციის სახლი ამოქმედდება თბილისში, ჰუალინგში; სამცხე-ჯავახეთის რეგიონული არქივის შენობა გაიხსნა ახალციხეში;

დაფუძნდა და გამოიცა ორენოვანი ჟურნალი „იუსტიცია“; იუსტიციის სამინისტროსათვის ხელმისაწვდომი გახდა უმსხვილესი ელექტრონული სამართლებრივი ბაზა „ჰეინონლაინი“ („HeinOnline“); ურთიერთთანამშრომლობის მემორანდუმები გაფორმდა თურქეთის, ისრაელის, უნგრეთის, სომხეთის, აზერბაიჯანის, შვეიცარიის იუსტიციის სამინისტროებთან;

სანოტარო მომსახურება ხელმისაწვდომი გახდა კიდევ 12 ადმინისტრაციულ ერთეულში; სულ მალე კი, მოქალაქეებს ონლაინ სანოტარო მომსახურების მიღება მობილური აპლიკაციის საშუალებით შეეძლებათ;

პენიტენციურ და პრობაციის სისტემებში გაძლიერდა პატიმართა დასაქმების პროგრამები; გრძელდება პენიტენციურ დაწესებულებებში სპორტული აქტივობების წახალისება;

პრობაციის ბიუროები გაიხსნა სიღნაღში, თერჯოლაში, ქუთაისსა და ზესტაფონში; რეფერირების ცენტრი გაიხსნა ქუთაისში; გაფორმდა თანამშრომლობის მემორანდუმები მუნიციპალიტეტებთან შრომამისჯილი პირების დასაქმებისათვის.

ანგარიშის პრეზენტაციას ესწრებოდნენ ადგილობრივი ხელისუფლების წარმომადგენლები, იუსტიციის მინისტრის მოადგილეები, თელავის მუნიციპალიტეტის დაქვემდებარებაში მოქმედი სსიპ-ების თანამშრომლები და მოწვეული სტუმრები.

რა გამარჯვებებს მიაღწია იუსტიციის სამინისტრომ ადამიანის უფლებათა ევროპულ სასამართლოებში ქვეყნის სუვერენიტეტისა და ტერიტორიული მთლიანობის დასაცავად − ამ თემაზე ლექციათა ციკლი დღეს თელავში გაგრძელდა.

იუსტიციის მინისტრის პირველი მოადგილე თამარ ტყეშელაშვილი და მოადგილე ბექა ძამაშვილი აუდიტორიას სტრასბურგსა და ჰააგაში რუსეთის წინააღმდეგ მიმდინარე საქმეებზე ესაუბრნენ, რომლებიც აგვისტოს ომის საქმეზე საქართველოსთვის ისტორიული მნიშვნელობის გადაწყვეტილებებით დასრულდა.

იუსტიციის მინისტრის მოადგილეებმა განმარტეს, რომ სტრასბურგის სასამართლოს მიერ რუსეთის ფედერაციის მხრიდან 2008 წელს საქართველოს ოკუპაციის ფაქტის დადასტურება, ცხინვალის რეგიონში ქართველების ეთნიკური წმენდის აღიარება; აგრეთვე, რუსეთის ბრალეულობის დადგენა ქართველი სამხედრო ტყვეების მკვლელობისა და წამებისთვის; სამხედროებისა და სამოქალაქო პირების არაადამიანური და ღირსების შემლახველი მოპყრობისთვის მძლავრი სამართლებრივი იარაღია ჩვენი ქვეყნის შემდგომი დეოკუპაციისათვის.

საუბარი შეეხო, აგრეთვე, სტრასბურგის სასამართლოს გადაწყვეტილებას − ამოერიცხა ან დაუშვებლად ეცნო საქართველოს წინააღმდეგ ცხინვალის რეგიონში მცხოვრები მოსახლეობის მიერ წარდგენილი 3,300-ზე მეტი საჩივარი, რომლებიც რუსეთის კოორდინაციით შევიდა. მინისტრის მოადგილეების განმარტებით, ფაქტით კიდევ ერთხელ დასტურდება, რომ 2008 წლის ომის დროს ქართველი სამხედროები მოქმედებდნენ საერთაშორისო სამართლის ნორმების დაცვით.

ლექციაზე განიხილეს ჰააგის სასამართლოს მიერ დაკავების ორდერების გამოცემა ცხინვალის რეგიონის 3 „მაღალჩინოსნის“ მიმართ, რომლებსაც აგვისტოს ომის დროს ქართველი სამოქალაქო ტყვეების წამებასა და არასათანადო მოპყრობაში ედებათ ბრალი. სტრასბურგის შემდეგ ამ გადაწყვეტილებით უკვე ჰააგის სისხლის სამართლის საერთაშორისო სასამართლომ დაადასტურა რუსეთის ფედერაციისა და სეპარატისტული რეჟიმების კონკრეტული წარმომადგენლების პასუხისმგებლობა აგვისტოს ომის დროს ჩადენილ დანაშაულებში.

ღონისძიებას ესწრებოდნენ სახელმწიფო რწმუნებული კახეთის მხარეში ირაკლი შიოშვილი, ადგილობრივი ხელისუფლების წარმომადგენლები, საჯარო მოხელეები, თელავის სახელმწიფო უნივერსიტეტის სტუდენტები.

№16 პენიტენციურ დაწესებულებაში მსჯავრდებულთა შორის ტურნირი ჩატარდა სპორტის 7 სახეობაში: შაშში, ჭადრაკში, კალათბურთში, ფრენბურთში, ფეხბურთში, ხელბურთსა და მაგიდის ჩოგბურთში.

სპორტული ფესტივალის გამარჯვებულები იუსტიციის მინისტრმა რატი ბრეგაძემ პირადად დააჯილდოვა და მათ სიმბოლური საჩუქრები გადასცა. მსჯავრდებულებთან შეხვედრისას მინისტრმა პენიტენციურ დაწესებულებებში ჯანსაღი ცხოვრების წესის პოპულარიცაზიის მნიშვნელობასა და სპორტის სხვადასხვა სახეობაში პატიმართა ჩართულობის აუცილებლობაზე ისაუბრა.

ტურნირის დასრულების შემდგომ მსჯავრდებულებმა სტუმრებისთვის რამდენიმე მუსიკალური ნომერი შეასრულეს.

სპორტული ფესტივალი სპეციალურ პენიტენციურ სამსახურსა და სპორტის, ტურიზმისა და ახალგაზრდობის საერთაშორისო ფონდს შორის გაფორმებული ურთიერთთანამშრომლობის მემორანდუმის ფარგლებში გაიმართა, რომელიც მსჯავრდებულთა რესოციალიზაცია-რეაბილიტაციის ხელშეწყობასა და პენიტენციურ დაწესებულებებში ჯანსაღი ცხოვრების წესის მხარდაჭერას ემსახურება.

იუსტიციის მინისტრთან ერთად, ტურნირს ესწრებოდნენ სპეციალური პენიტენციური სამსახურის ხელმძღვანელი ნიკა ცხვარაშვილი, მისი მოადგილე გიორგი გიორგაძე და სპორტის, ტურიზმისა და ახალგაზრდობის საერთაშორისო ფონდის ხელმძღვანელი ტარიელ ხეჩიკაშვილი.

მსჯავრდებულების მონაწილეობით კოტე მარჯანიშვილის სახელობის სახელმწიფო დრამატულ თეატრში სპექტაკლი „ციხის თავზე ანგელოზები დაფრინავენ“ გაიმართა. სპექტაკლი ერთმოქმედებიანია და მასში 19 მსჯავრდებული მონაწილეობს. სცენარი, რეჟისურა, რეკვიზიტები, მხატვრული გაფორმება და აფიშაც თავად მსჯავრდებულებს ეკუთვნით. სპექტაკლი №5 (ქალთა) პენიტენციურ დაწესებულებაში დაიდგა.

სპექტაკლზე მუშაობის პროცესში მსჯავრდებულებს პენიტენციური სამსახურის ხელმძღვანელობის სრული მხარდაჭერა ჰქონდათ, რადგან ეს მათი რესოციალიზაცია-რეაბილიტაციის ნაწილია. თავად სპექტაკლს ლაიტმოტივად გასდევს აზრი იმის შესახებ, რომ მსჯავრდებულს, ისევე, როგორც ნებისმიერ ადამიანს, შეცდომის დაშვების შემდეგ უნდა შეეძლოს ცხოვრების სუფთა ფურცლიდან დაწყება. სპექტაკლზე მუშაობის პროცესი თითოეული მონაწილე მსჯავრდებულისთვის იმის გააზრების ერთგვარი საშუალება იყო, თუ როგორ და რა შინაგანი სირთულეების გადალახვის შედეგად შეძლებენ საკუთარი შეცდომებიდან იმ გამოცდილების გამოტანას, რაც ცხოვრების უკეთესად დაგეგმვაში დაეხმარებათ. „ციხის თავზე ანგელოზები დაფრინავენ“ უკვე დაიდგა სანდრო ახმეტელის სახელობის სახელმწიფო დრამატული თეატრის სცენაზე; პირველ სპექტაკლში მონაწილე რამდენიმე მსჯავრდებულმა კი, უკვე დატოვა სასჯელაღსრულების დაწესებულება და მათ სხვა მსჯავრდებულები ჩაენაცვლნენ. თავად სპექტაკლიც, ისევე, როგორც მასზე მუშაობის პროცესი, მსჯავრდებულებისთვის საზოგადოებაში დაბრუნების ერთგვარი რეპეტიციაა. სპექტაკლის დაწყებამდე მარჯანიშვილის თეატრის ფოიეში მსჯავრდებულთა ხელნაკეთი ნივთების გამოფენა მოეწყო.

სპექტაკლს დაესწრნენ იუსტიციის მინისტრი რატი ბრეგაძე, იუსტიციის მინისტრის მოადგილეები, განათლებისა და მეცნიერების მინისტრი მიხეილ ჩხენკელი, რომელიც იუსტიციის სამინისტროსთან ,,ციფრული უნივერსიტეტის“ პროექტის ფარგლებში თანამშრომლობს, საკანონმდებლო ხელისუფლების წევრები, იუსტიციის სამინისტროს სსიპების და საპატრიარქოს წარმომადგენლები.