იუსტიციის მინისტრის განცხადებით, გორის ჰოსპიტლიდან მიხეილ სააკაშვილის ძალადობრივი გზით გადაყვანას ადგილი არ ჰქონია. რატი ბრეგაძე განმარტავს, რომ როდესაც პატიმარი არ ემორჩილება თანამშრომლის კანონიერ მოთხოვნას, ამ შემთვევაში, რა თქმა უნდა, შესაძლებელია მის მიმართ გამოყენებული იყოს იძულებითი ღონისძიებები. თუმცა, მიხეილ სააკაშვილის წნევის ცვალებადობის გამო ასეთ ფაქტს ადგილი არ ჰქონია.

„ის გაწერილი იყო გორის სამხედრო ჰოსპიტლიდან. მივიდნენ პენიტენციური სამსახურის თანამშრომლები. გააცნეს ძალიან მშვიდ და მისაღებ ფორმებში ეს გადაწყვეტილება და ის არ დაემორჩილა პენიტენციური სამსახურის თანამშრომლების კანონიერ მოთოვნას. თქვენ საიდან გაქვთ ეს ინფორმაცია... კიდევ ერთხელ ვამბობ, კანონის წინაშე არის ყველა თანასწორი და როდესაც პატიმარი არ ემორჩილება თანამშრომლის კანონიერ მოთხოვნას, ამ შემთვევაში, რა თქმა უნდა, შესაძლებელია მის მიმართ გამოყენებული იყოს იძულებითი ღონისძიებები. მაგრამ როგორც უკვე მოგახსენეთ მას შეენიშნებოდა წნევის ცვალებადობა და მიიღებულ იქნა შესაბამისი გადაწყვეტილება“.

მინისტრის განმარტებით, პენიტენციურ სამსახურს არ აქვს ვალდებულება, პატიმრის გადაყვანის გადაწყვეტილება ადვოკატებს შეუთანხმოს.

„რაც შეეხება ადვოკატების ინფორმირებულობას, უნდა გაეცნოთ საქართველოს კანონს და იცოდეთ, რომ როდესაც ხდება პატიმრის გადაყვანა, ამის შეთანხმება არ ხდება ადვოკატებთან და ეს არ არის საჭირო გაწერილი პროცედურა. ადვოკატს შეუძლია, ის მოინახულოს კანონდებლობით გათვალისწინებული წესით სამუშაო დღეების განმავლობაში განსაზღვრული საათებით. ისე ნუ წარმოაჩენთ, თითქოს პენიტენციურმა სამსახურმა რაიმე ნორმა დაარღვია,“ - განაცხადა რატი ბრეგაძემ.

იუსტიციის მინისტრმა რატი ბრეგაძემ გორის სამხედრო ჰოსპიტლის სამედიცინო პერსონალს მსჯავრდებულ მიხეილ სააკაშვილის მკურნალობის პროცესში გაწეული დახმარებისთვის მადლობა გადაუხადა და აღნიშნა, რომ ისინი ყოველთვის პაციენტის საუკეთესო ინტერესიდან გამომდინარე მოქმედებენ.

,,მე თავად ვიმყოფებოდი გორის ჰოსპიტალში გარკვეული პერიოდით და აქვე ვისარგებლებ შემთხვევით და დიდ მადლობას გადავუხდი თითოეულ ექიმს და ზოგადად სამედიცინო პერსონალის წარმომადგენლებს ექთნებს და ყველას ვინც მუშაობს ამ დაწესებულებაში იმიტომ, რომ ეს არის ნამდვილად არაჩვეულებრივი, პატრიოტი ადამიანებისაგან დაკომპლექტებული სამედიცინო დაწესებულება და ღრმად ვარ დარწმუნებული, რომ ისინი მოქმედებენ ყოველთვის პაციენტის საუკეთესო ინტერესიდან გამომდინარე“, _განაცხადა რატი ბრეგაძემ.

როგორც რატი ბრეგაძემ ჟურნალისტებთან საუბრისას აღნიშნა ყოველგვარი სპეკულაცია იმის შესახებ, რომ თითქოს გორის სამხედრო ჰოსპიტლის მედპერსონალმა შესაძლოა რაიმე არასწორი გადაწყვეტილება მიიღოს არის უბრალოდ სირცხვილი.

,,ყოველგვარი სპეკულაცია იმის შესახებ, რომ თითქოს და სამედიცინო პერსონალმა შეიძლება მიიღოს იქ არასწორი გადაწყვეტილება არის უბრალოდ სირცხვილი. ყოველთვის უნდა ახსოვდეს მათ, ვინც მსგავსი ტყუილების გავრცელებას ცდილობს თუ რას ემსახურებოდა ეს ხალხი 2008 წელის ომიდან დაწყებული დღემდე. ისინი ემსახურებიან ჩვენს ჯარს, რომელიც ძალიან გვეამაყება და ამიტომ ძალიან გთხოვთ ყველამ შეიკავოს თავი ყოველგვარი სპეკულაციისაგან და მე რომ ვიყო მათი ადვოკატების ადგილზე ძალიან დიდ მადლობას გადავუხდიდი იმ მკურნალობისთვის და ღვაწლისთვის, რომელიც გამოიჩინეს კონკრეტულად ამ პატიმრის მიმართ. ეტყობა ეს არის მადლიერების ახალი ფორმა, რომელსაც მიმართავენ სამწუხაროდ ჩვენი ოპონენტები“, _განაცხადა რატი ბრეგაძემ.

იუსტიციის მინისტრმა რატი ბრეგაძემ ბრიფინგზე გორის სამხედრო ჰოსპიტლიდან N12 დაწესებულებაში მიხეილ სააკაშვილის დაბრუნების შესახებ ისაუბრა. მინისტრის თქმით, მსჯავრდებული სააკაშვილი გორის სამხედრო ჰოსპიტალში სამკურნალოდ 19 ნოემბერს იქნა გადაყვანილი და მას ჩაუტარდა ყველა საჭირო სამედიცინო მომსახურება. გუშინ მიღებული იყო გადაწყვეტილება მსჯავრდებულის N12 პენიტენციურ დაწესებულებაში დაბრუნების შესახებ, რასაც მიხეილ სააკაშვილი არ დაემორჩილა.

,,19 ნოემბრიდან მსჯავრდებული მიხეილ სააკაშვილი გადაყვანილ იქნა მკურნალობის მიზნით გორში, სადაც მას გაეწია ყველა საჭირო სამედიცინო მომსახურება. მკურნალობის დასრულების შემდგომ მიღებულ იქნა გადაწყვეტილება სამხედრო ჰოსპიტლიდან გაწერის შესახებ. იგი არ დაემორჩილა სპეციალური პენიტენციური დაწესებულების თანამშრომელთა კანონიერ მოთხოვნას რუსთავის N12 დაწესებულებაში გადაყვანის შესახებ, აღელვების ნიადაგზე აღენიშნებოდა წნევის ცვალებადობა და, შესაბამისად, სპეციალურმა პენიტენციურმა სამსახურმა მიიღო გადაწყვეტილება გადაყვანის კანონიერი გადაწყვეტილების დროებით გადავადების შესახებ“, - განაცხადა რატი ბრეგაძემ.

რატი ბრეგაძემ არ გააკეთა ვრცელი კომენტარი სააკაშვილის ჯანმრთელობის მდგომარეობის შესახებ და განაცხადა, რომ ამის შესახებ დეტალურად შესაბამისი დარგის სპეციალისტებმა უნდა ისაუბრონ.

,,ვრცელდება ძალიან ბევრი და სხვადასხვა სახის ინფორმაცია და, ბუნებრივია, ამ სპეკულაციებზე ვერ ვისაუბრებ; შეუძლიათ, ისაუბრონ შესაბამისი დარგის სპეციალისტებმა. როგორც უკვე მოგახსენეთ, მკურნალობა დასრულდა გორის სამხედრო ჰოსპიტალში, იგი იყო გაწერილი საავადმყოფოდან და, ბუნებრივია, პატიმარი ვერ იქნება სამკურნალო დაწესებულებაში მაშინ, როდესაც დასრულებულია მკურნალობა და იგი გაწერილია შესაბამისი ჰოსპიტლიდან. ის არ დაეთანხმა ამ გადაწყვეტილებას. არ დაემორჩილა სპეციალური პენიტენციური სამსახურის თანამშრომლების აბსოლუტურად კანონიერ მოთხოვნებს, შემდგომში, როგორც უკვე მოგახსენეთ, მას აღენიშნა წნევის ცვალებადობა და, შესაბამისად, იქნა მიღებული გადაწყვეტილება ამ ღონისძიების დროებით გადავადების შესახებ“,-განაცხადა რატი ბრეგაძემ.

იუსტიციის მინისტრმა რატი ბრეგაძემ კომენტარი გააკეთა იუსტიციის სამინისტროს მიერ სახელმწიფო ინსპექტორის აპარატის დასკვნის გასაჩივრების თაობაზე და მისი მიზეზები განმარტა. იუსტიციის მინისტრის განცხადებით, სპეციალურ პენიტენციურ სამსახურს ჰქონდა და აქვს მყარი არგუმენტები, თუ რატომ მოხდა პატიმარ მიხეილ სააკაშვილის კადრების გასაჯაროება. საბოლოოდ კი ამ გადაწყვეტილების კანონიერება უნდა შეაფასოს არა აღმასრულებელმა ან საკანონმდებლო ხელისუფლებამ, არამედ სასამართლომ. ამიტომაც, იუსტიციის სამინისტრომ მიმართა სასამართლოს და გაასაჩივრა სახელმწიფო ინსპექტორის დასკვნა.

„ეს არის სამართლებრივი პროცედურა. ჩვენ გვქონდა განსხვავებული მოსაზრება, რომელიც არის დასაბუთებული და ბუნებრივია, ამაზე გადაწყვეტილება უნდა მიიღოს სასამართლო ხელისუფლებამ, ამაზე გადაწყვეტილებას მიიღებს მოსამართლე“, - თქვა იუსტიციის მინისტრმა.

რატი ბრეგაძემ კიდევ ერთხელ განმარტა, რომ პატიმარ მიხეილ სააკაშვილის კადრების გასაჯაროება აბსოლუტურად კანონიერი იყო და ემსახურებოდა სახელმწიფოში მართლწესრიგისა და უსაფრთხოების დაცვის ინტერესებს
: „ღრმად ვართ დარწმუნებული, რომ გვაქვს მყარი სამართლებრივი პოზიცია. ის გადაწყვეტილება, რომელიც მიღებული იქნა სპეციალური პენიტენციური სამსახურის მიერ კადრების გამოქვეყნებასთან დაკავშირებით იყო აბსოლუტურად კანონიერი, ემსახურებოდა მრავალგზის საზოგადოებრივი ინტერესის დაკმაყოფილებას და იმის გამორიცხავს, რომ საზოგადოება შეცდომაში ყოფილიყო შეყვანილი, რაც ეხებოდა სააკაშვილის გლდანის მე-18 დაწესებულებაში გადაყვანას, მათ შორის, ფაფებისა და წვენების ეპიზოდს. ეს ემსახურებოდა სახელმწიფოში მშვიდობის, მართლწესრიგისა და უსაფრთხოების ინტერესებს“, - განაცხადა მინისტრმა.

„მიხეილ სააკაშვილი, ისევე, როგორც ნებისმიერი სხვა პატიმარი, მოიხდის სასჯელს შესაბამის პენიტენციურ დაწესებულებაში დადგენილი წესების მიხედვით“, – ამის შესახებ იუსტიციის მინისტრმა რატი ბრეგაძემ ჟურნალისტებს განუცხადა კითხვაზე – „მიხეილ სააკაშვილს 6 წელი აქვს მისჯილი, მან სასჯელი გორის ჰოსპიტალში უნდა მოიხადოს?“

„სასჯელი უნდა იყოს მოხდილი შესაბამის პენიტენციურ დაწესებულებაში. როდესაც მსჯავრდებულს აქვს ჯანმრთელობის პრობლემები, ხდება მისი გაყვანა შესაბამის სამკურნალო დაწესებულებაში და ის არის გაყვანილი დროებით, და როგორც უკვე მოგახსენეთ, არსებობს შესაბამისი ფორმა 100. ჩვენ, გუშინდელი ფაქტიდან გამომდინარე, რაზეც უკვე ვისაუბრე, იყო გარკვეული წნევის ცვალებადობა, მივიღეთ ეს გადაწყვეტილება, და როდესაც გავესაუბრებით შესაბამის სამედიცინო პერსონალს, ბატონი სააკაშვილი, ისევე, როგორც ნებისმიერი სხვა პატიმარი, მოიხდის სასჯელს შესაბამის პენიტენციურ დაწესებულებაში დადგენილი წესების მიხედვით. მისი ყველა უფლება იქნება, რა თქმა უნდა, დაცული“, – აცხადებს რატი ბრეგაძე.

პრობაციონერები ვალდებულებების შესრულებასა და სერვისების მიღებას საქართველოში შექმნილი ინოვაციური მოწყობილობით შეძლებენ.

დღეიდან ეს ყველაფერი პირობით მსჯავრდებულებისთვის ელექტრონულად იქნება უზრუნველყოფილი. ევროპაში პირველი ინოვაციური ტექნოლოგიური მოწყობილობა „PROBBOX“ საპილოტე რეჟიმში ჩაირთო.

პრობბოქსი საზოგადოებას იუსტიციის მინისტრმა, რატი ბრეგაძემ მის მოადგილესთან ბუბა ლომუაშვილთან ერთად წარადგინა.
ინოვაციური ტექნოლოგიური მოწყობილობა იუსტიციის სახლებსა და საზოგადოებრივ ცენტრებში საქართველოს 6 დიდ ქალაქში - თბილისში, თელავში, გორში, ქუთაისში, ზუგდიდსა და ბათუმში განაწილდა.

შეთავაზებები სერვისების და დასაქმების შესახებ, ინფორმაცია პირობითი მსჯავრის გაუქმებაზე, რეჟიმის შემსუბუქების მოთხოვნაზე განაცხადის წარდგენა, პრობაციის ოფიცერთან კომუნიკაცია თუ მსჯავრდებულთან ვიდეო პაემნის დაჯავშნა - ამ და სხვა საჭიროებების დაკმაყოფილება „PROBBOX“-ით მოხდება.

ნოვატორული სიახლის დანერგვამდე, ვალდებულებების შესასრულებლად პირობით მსჯავრდებულს პრობაციის ბიუროში მისვლა ესაჭიროებოდა. ინოვაციური მოწყობილობის იუსტიციის სახლებსა და საზოგადოებრივ ცენტრებში განაწილება გეოგრაფიულ ხელმისაწვდომობას შეუწყობს ხელს. პირობით მსჯავრდებულთა ელექტრონული კონტროლის ნოვატორული მექანიზმის შექმნის შესახებ იუსტიციის სამინისტროს ათწლიანი გეგმის წარდგენისას დაანონსდა. ეტაპობრივად კი, მთელი ქვეყნის მასშტაბით იქნება ხელმისაწვდომი.

პრობაციონერებისთვის შექმნილი ახალი, ელექტრონული კონტროლის თანამედროვე სისტემის ამოქმედების შესახებ იუსტიციის მინისტრმა რატი ბრეგაძემ მინისტრის საათის ფარგლებში ისაუბრა.

რატი ბრეგაძის განცხადებით, პრობაციის მიმართულებით მასშტაბური რეფორმები ტარდება, რომელთა შორის ერთ-ერთია მსჯავრდებულთა ელექტრონული კონტროლის ახლებური მექანიზმი „probbox“, რაც თანამედროვე ტექნოლოგიების გამოყენებით მსჯავრდებულს გაუადვილებს მასზე დაკისრებული ვალდებულების შესრულებას, დაზოგავს ადამიანურ რესურსს და გაზრდის ანონიმურობის ხარისხს.

მინისტრის ინფორმაციით, ასევე, შეიქმნა ახალი ინფრასტრუქტურა სხვადასხვა მუნიციპალურ ერთეულში, რეგიონებში გაიხსნა რეფერირების ცენტრები, საზოგადოებრივად სასარგებლო შრომის შესახებ მუნიციპალიტეტებთან გაფორმდა მემორანდუმები.

„მინდა, მადლობა გადავუხადო ჩვენს ყველა პარტნიორს და ბატონ პრემიერ-მინისტრს იმ საინტერესო პროექტებისათვის, რომელიც 2021 წელს განხორციელდა. გამოვთქვამ იმედს, რომ მომავალი წელი კიდევ უფრო წარმატებული იქნება“, - ასე შეაფასა იუსტიციის მინისტრმა რატი ბრეგაძემ პრემიერ-მინისტრის 2021 წლის ანგარიში.

რატი ბრეგაძის თქმით, პრემიერმა ისაუბრა ყველა იმ პროექტზე, რომელიც საქართველოს მთავრობამ მიმდინარე წელს განახორციელა და საზოგადოებას 2022 წლისათვის კონკრეტული ინიციატივები გააცნო:

„ბატონმა პრემიერ-მინისტრმა წარმოადგინა წლის შემაჯამებელი მოხსენება, რომლის ფარგლებშიც, მან ძალიან საინტერესოდ ისაუბრა იმ პროექტების შესახებ, რომლებიც 2021 წელს განახორციელა საქართველოს მთავრობამ, ასევე საუბარი იყო სამომავლო გეგმებზე და იმ კონკრეტულ პროექტებზე, რომლებსაც მთავრობა გეგმავს 2022 წელს“, - განაცხადა იუსტიციის მინისტრმა და იმედი გამოთქვა, რომ 2022 წელი საქართველოსათვის კიდევ უფრო წარმატებული იქნება.

საქართველოს პრემიერ-მინისტრმა ირაკლი ღარიბაშვილმა მთავრობის საქმიანობის 2021 წლის ანგარიში დღეს წარადგინა. ღონისძიებას მინისტრთა კაბინეტის, აღმასრულებელი და საკანონმდებლო ხელისუფლების წევრები და მოწვეული სტუმრები ესწრებოდნენ.

სასჯელაღსრულების დაწესებულებებში უმაღლესი განათლების ხელმისაწვდომობის გაზრდისა და ხარისხის ასამაღლებლად განხორციელებული რეფორმების შესახებ იუსტიციის მინისტრმა პარლამენტში მინისტრის საათის ფარგლებში ისაუბრა.

მინისტრის ინფორმაციით, სასჯელაღსრულების დაწესებულებებში უმაღლესი განათლების ხელმისაწვდომობის გაზრდისა და ხარისხის ასამაღლებლად იწყება პროექტი „ციფრული უნივერსიტეტი“.

უნივერსიტეტებთან თანამშრომლობით, პროექტი მსჯავრდებულებს მისცემს შესაძლებლობას, მიიღონ სრულფასოვანი უმაღლესი განათლება დისტანციური სწავლების მეთოდით და დაეუფლონ მათთვის სასურველ პროფესიას. „სასჯელის მიზანია სამართლიანობის აღდგენა, ახალი დანაშაულის თავიდან აცილება და დამნაშავის რესოციალიზაცია. ეს დიდწილად მსჯავრდებულის მიერ სათანადო გააზრებითა და ცოდნით მიიღწევა“, – განაცხადა რატი ბრეგაძემ.