მსჯავრდებულთა და თანამშრომელთა უფლებების მაქსიმალური რეალიზაციის მიზნით იუსტიციის მინისტრმა რატი ბრეგაძემ ქსანში №10 პენიტენციურ დაწესებულებაში ახალაშენებული ინფრასტრუქტურა გახსნა.

დაწესებულებაში მოეწყო იუსტიციის სახლი, ადვოკატებთან შეხვედრის ოთახები, აშენდა საამანათო, ხანგრძლივი და მოკლევადიანი პაემნების, საშვების და ვიდეოპაემნის სივრცეები.

დაწესებულებაში გახსნილი იუსტიციის სახლის სახელმწიფო და კერძო სექტორის სერვისებით როგორც პატიმრები, ისე თანამშრომლები შეუზღუდავად ისარგებლებენ. ეს რიგით მე-6 იუსტიციის სახლია, რომელიც პენიტენციურ სისტემაში გაიხსნა. აღნიშნული პროექტი უპრეცედენტოა და მას მსოფლიოში ანალოგი არ აქვს.

დაწესებულებაში მყოფ მსჯავრდებულებს შეეძლებათ, ისარგებლონ სრულიად ახალი და კომფორტული ინფრასტრუქტურით, რომელიც ხანგრძლივი და ხანმოკლე პაემნებისთვის მოეწყო. სივრცეები აღჭურვილია ყველა საჭირო ტექნიკით და ინვენტარით. მსჯავრდებულებს პაემნის სივრცეებით უფასოდ სარგებლობის საშუალებას 2024 წელს ამოქმედებული პენიტენციური კოდექსი აძლევს.

№10 პენიტენციურ დაწესებულებაში ახალი ინვენტარით და ტექნიკით აღიჭურვა საამანათო სივრცეც, რომელიც მინიმუმამდე ამცირებს დაწესებულებაში აკრძალული ნივთების მოხვედრის შესაძლებლობას.

საშვების სივრცეში დამონტაჟდა ახალი სკანერი, რომლითაც დაწესებულებაში შემსვლელ პირთა შემოწმება ხორციელდება. ასევე, მოეწყო ცალკე ოთახი დაწესებულებაში მისული ვიზიტორების ფიზიკური შემოწმებისთვის.

ახალი ინფრასტრუქტურის გახსნის ღონისძიებას იუსტიციის მინისტრის მოადგილე ერეკლე ღვინიანიძე, სპეციალური პენიტენციური სამსახურის ხელმძღვანელი ნიკა ცხვარაშვილი და სსიპ „იუსტიციის სახლის“ თავმჯდომარე ლაშა ლობჯანიძე ესწრებოდნენ.

პროექტის ფარგლებში შემუშავდა რეკომენდაციები კანონშემოქმედებით პროცესში ნორმატიული აქტების დასაბუთების სტანდარტის შესახებ. პროექტის ავტორებმა შეისწავლეს ევროკავშირის წევრი ქვეყნების პრაქტიკა კანონპროექტების განმარტებითი ბარათის დასაბუთების ფორმების და მექანიზმების შესახებ და წარმოადგინეს კვლევა.

პროექტის მიზანია საქართველოში საკანონმდებლო პროცესის კიდევ მეტად სრულყოფა და განმარტებითი ბარათის სტანდარტის დაახლოება ევროკავშირის ქვეყნების პრაქტიკასთან. რეკომენდაციებზე იმუშავეს თბილისის სახელმწიფო უნივერსიტეტის ასოცირებულმა პროფესორმა ვასილ გონაშვილმა და პროფესორმა ნანა ჭიღლაძემ.

საგრანტო პროექტის შედეგების პრეზენტაციას კვლევის ავტორებთან ერთად სამინისტროს შესაბამისი სტრუქტურული ერთეულების ხელმძღვანელი პირები და აკადემიური წრის წარმომადგენლები ესწრებოდნენ.

საგრანტო კონკურსს იუსტიციის სამინისტრო ყოველწლიურად აცხადებს. მისი მიზანი ინოვაციური სერვისების დანერგვის ხელშეწყობა, ადამიანის უფლებათა დაცვის გაძლიერება და სამართლებრივი უსაფრთხოების განმტკიცებაა. წელს იუსტიციის სამინისტრო საგრანტო კონკურსში გამარჯვებულ 17 პროექტს აფინანსებს. საგრანტო პროგრამების მიზანი იუსტიციის სამინისტროს სისტემის საქმიანობაში სამოქალაქო საზოგადოების მონაწილეობის ხელშეწყობა და სამოქალაქო ინიციატივების მხარდაჭერაა.

იუსტიციის მინისტრმა რატი ბრეგაძემ მცხეთა-მთიანეთის მხარეში სახელმწიფო რწმუნებულ დავით ნოზაძესთან, იუსტიციის მინისტრის მოადგილე ერეკლე ღვინიანიძესა და იუსტიციის სახლის თავმჯდომარე ლაშა ლობჯანიძესთან ერთად ახალი ფილიალის მშენებლობის ადგილას სიმბოლური კაფსულა ჩაუშვა.

უახლოეს ხანში მცხეთის მოსახლეობას საშუალება ექნება, იუსტიციის სახლის 500-მდე სერვისი კომფორტულ და თანამედროვე გარემოში მიიღოს.

მცხეთის იუსტიციის სახლში ქორწინების მსურველი წყვილებისთვის ქორწინების სახლიც განთავსდება. ნებისმიერ წყვილს საშუალება ექნება, ქორწინების რეგისტრაცია დახვეწილი დიზაინის მქონე ქორწინების სახლში საზეიმო ცერემონიალის თანხლებით დაგეგმოს, სადაც მათ სპეციალური საქორწინო-სადღესასწაულო დეკორაციით გაფორმებული სივრცე დახვდებათ.

იუსტიციის სახლის ფილიალი მორგებული იქნება შეზღუდული შესაძლებლობის მქონე პირთა საჭიროებებზე. ფილიალში 20-მდე პირი დასაქმდება.

მცხეთის იუსტიციის სახლში იუსტიციის სამინისტროს მმართველობის სფეროში მოქმედი სსიპ-ების ოფისებიც განთავსდება.

მცხეთის იუსტიციის სახლი მცხეთა-მთიანეთის რეგიონში რიგით მეექვსე ფილიალი იქნება. აღნიშნულ რეგიონში უკვე ფუნქციონირებს ყაზბეგის, თიანეთის, მუხრანის, დუშეთისა და ფასანაურის იუსტიციის სახლები.

მცხეთის იუსტიციის სახლის მშენებლობა არქიტექტორ მიხეილ გიორგობიანის პროექტით განხორციელდება და ფილიალის საერთო ფართი 976.9 კვადრატული მეტრი იქნება. იუსტიციის სახლი ქალაქ მცხეთაში სამხედრო ქუჩა №9-ის მიმდებარედ აშენდება.

იუსტიციის სამინისტროსათვის პრიორიტეტულ მიმართულებად რჩება სახელმწიფო სერვისების ხელმისაწვდომობა. მთელი ქვეყნის მასშტაბით უკვე ფუნქციონირებს 121 იუსტიციის სახლი.

იუსტიციის სახლი პირველი საჯარო უწყებაა, რომელიც ბიზნესს მომსახურებას საჭიროებებისა და სპეციფიკის გათვალისწინებით მიაწვდის.

„ბიზნესასისტენტი“ სპეციალურად ბიზნესსექტორის წარმომადგენელთათვის შექმნილი პროდუქტია და საქმიან წრეებს სახელმწიფო სერვისებზე უფრო სწრაფ და კომფორტულ წვდომას სთავაზობს.

მაქსიმალური ეფექტიანობის უზრუნველსაყოფად პროექტი რამდენიმე თვის განმავლობაში საპილოტე რეჟიმში მუშაობდა და მასში საქართველოში მოქმედი 13 მსხვილი კომპანია იყო ჩართული, დღეს კი, კონცეფცია ბიზნესსექტორის წარმომადგენლებს იუსტიციის მინისტრმა რატი ბრეგაძემ გააცნო.

პროექტი „ბიზნესასისტენტი“ იუსტიციის სამინისტროს ახალი კონცეფციაა, რომელიც მომხმარებელს სთავაზობს სრულყოფილ სამართლებრივ დისტანციურ კონსულტაციას; სპეციალურ სივრცეს თბილისის ცენტრალურ იუსტიციის სახლში; გასვლით მომსახურებას სასურველ მისამართზე თბილისის მასშტაბით.

მომსახურება 5 განსხვავებულ, სხვადასხვა საჭიროებაზე მორგებულ პაკეტს მოიცავს.

2012-2024 წლებში იუსტიციის სახლების ფილიალების რაოდენობა 12-დან 121-მდე გაიზარდა. მიმდინარეობს 11 იუსტიციის სახლის მშენებლობა. 2024 წელს სერვისების რაოდენობა 500-მდე გაიზარდა. 2021 წლიდან „მობილური იუსტიციის სახლის“ მეშვეობით იუსტიციის სახლის სერვისების ხელმისაწვდომობამ უპრეცედენტო მასშტაბი შეიძინა. სერვისების ხელმისაწვდომობა უწყების ერთ-ერთი მთავარი პრიორიტეტია და სიახლეების დანერგვისა და გაფართოების კუთხით მუშაობა გამუდმებით მიმდინარეობს.
პრეზენტაციას ესწრებოდნენ იუსტიციის მინისტრის მოადგილეები, იუსტიციის სახლის თავმჯდომარე ლაშა ლობჯანიძე, საქართველოს ბიზნეს ასოციაციის აღმასრულებელი დირექტორი ლევან ვეფხვაძე და ბიზნესსექტორის წარმომადგენლები.

სამეცნიერო კონფერენცია საქართველოს კულტურისა და სპორტის სამინისტროს ორგანიზებით გაიმართა. ღონისძიება თეა წულუკიანმა, რატი ბრეგაძემ, პარლამენტის წევრებმა: ელისო ბოლქვაძემ, თენგიზ შარმანაშვილმა და ბექა ოდიშარიამ გახსნეს.

საქართველოს იუსტიციის მინისტრმა ისაუბრა 1924 წლის აჯანყების როლის შესახებ ეროვნული ცნობიერების ფორმირების საქმეში და აღნიშნა, რომ ეროვნული არქივის ვებგვერდზე უკვე ხელმისაწვდომია მოძრაობის ამსახველი დოკუმენტები და მასალები.

ეროვნული არქივის მიერ მომზადებულ ექსპოზიციაში ასახულია ანტისაბჭოთა ეროვნული მოძრაობის ფორმები (ლოკალური აჯანყებები, მშვიდობიანი დემონსტრაციები, მიმართვები საერთაშორისო თანამეგობრობას და სხვ.), საქართველოს ემიგრანტული მთავრობის როლი ამ მოძრაობაში, 1924 წლის აჯანყების მომზადების ეტაპები, აჯანყების მარცხი და რეპრესიების მორიგი ტალღა. საარქივო მასალა ინფორმაციას გვაწვდის საბჭოთა ხელისუფლების მიერ განხორციელებული რეპრესიების მასშტაბის შესახებ. გამოფენაზე ასევე წარმოდგენილია წიგნები ტიერი ბერიშვილის პირადი კოლექციიდან.

კონფერენციის დაწყებამდე ქართული დელეგაციის წევრებმა პატივი მიაგეს საქართველოს პირველი რესპუბლიკის ემიგრაციული მთავრობის წარმომადგენელთა ხსოვნას და მათი საფლავები ყვავილებით შეამკეს.

იუსტიციის მინისტრის მოადგილე ბექა ძამაშვილი ადამიანებით ვაჭრობის (ტრეფიკინგის) წინააღმდეგ ბრძოლის ექსპერტთა ჯგუფის (GRETA) დელეგაციას შეხვდა.

მინისტრის მოადგილის თქმით, ტრეფიკინგის წინააღმდეგ ბრძოლა საქართველოს ხელისუფლების ერთ-ერთი მნიშვნელოვანი პრიორიტეტია და სახელმწიფო მუდმივად ახორციელებს საერთაშორისო სტანდარტებთან შესაბამის ღონისძიებებს. ამას მოწმობს არაერთი საერთაშორისო შეფასება, რომლის თანახმადაც საქართველო ევროკავშირის წევრი ქვეყნების გვერდით იკავებს მოწინავე პოზიციებს.

კერძოდ, ადამიანით ვაჭრობის (ტრეფიკინგის) თაობაზე აშშ-ის სახელმწიფო დეპარტამენტის 2024 წლის ანგარიშით, ადამიანით ვაჭრობის (ტრეფიკინგის) წინააღმდეგ განხორციელებული ღონისძიებებით საქართველო კვლავ უმაღლეს საფეხურზეა და მსოფლიოს მასშტაბით 186 ქვეყანას შორის უკვე მე-9 წელია ინარჩუნებს ადგილს ე.წ. „პირველ კალათაში“. წელს შეფასების უმაღლეს სკალაში მხოლოდ 33-მა ქვეყანამ დაიკავა ადგილი.

საერთაშორისო ორგანიზაციამ - „Walk Free Foundation“, რომელიც მონობის გლობალურ ინდექსს (Global Slavery Index) ზომავს, ბოლო, 2023 წლის ანგარიშით, საქართველოს მთავრობის მიერ ადამიანით ვაჭრობის (ტრეფიკინგის) წინააღმდეგ გადადგმული ნაბიჯებით საქართველოს, 160 ქვეყანას შორის, მე-14 ადგილი მიაკუთვნა.

მინისტრის მოადგილემ აღნიშნა, რომ ტრეფიკინგის წინააღმდეგ ბრძოლა აქტიურად გაგრძელდება, რომლის ფარგლებშიც მხედველობაში იქნება მიღებული GRETA-ს რეკომენდაციები.

აღსანიშნავია, რომ GRETA-ს დელეგაცია საქართველოს მეოთხედ სტუმრობს. დამოუკიდებელი და მიუკერძოებელი ექსპერტისგან შემდგარი ჯგუფის ძირითადი ფუნქციაა, შეაფასოს, თუ როგორ ასრულებენ სახელმწიფოები „ადამიანით ვაჭრობის (ტრეფიკინგის) წინააღმდეგ ბრძოლის შესახებ” ევროპის საბჭოს კონვენციით აღებულ ვალდებულებებს.

ვიზიტის ფარგლებში ექსპერტთა ჯგუფი, ასევე, შეხვდება სხვა სამთავრობო უწყებებს, საქართველოს პარლამენტს, სახალხო დამცველის აპარატს, სასამართლო ხელისუფლებას, ადგილობრივ არასამთავრობო და საერთაშორისო ორგანიზაციებს.

სხდომაზე კომისიის წევრებს მოუსმინეს მედიამონიტორინგის შედეგად მიღებულ ინფორმაციაზე რეაგირების შესახებ; აგრეთვე, განიხილეს სადამკვირვებლო მისიების წერილობითი განცხადებები.

სხდომას იუსტიციის მინისტრის მოადგილე თორნიკე ჭეიშვილი უძღვებოდა. კომისიის მუშაობაში მონაწილეობდნენ წევრი საჯარო უწყებების ხელმძღვანელი პირები; საერთაშორისო და ადგილობრივი სადამკვირვებლო ორგანიზაციების, აგრეთვე, პოლიტიკური პარტიის წარმომადგენლები.

საარჩევნო კოდექსის შესაბამისად შექმნილი უწყებათაშორისი კომისიის მიზანი საჯარო მოსამსახურეების მიერ საარჩევნო კანონმდებლობის დარღვევის პრევენცია და დარღვევებზე რეაგირებაა. მას იუსტიციის მინისტრი რატი ბრეგაძე ხელმძღვანელობს.

კომისიისათვის მის კომპეტენციაში შემავალ საკითხებზე ინფორმაციის მიწოდება შესაძლებელია ელექტრონული ფოსტის მეშვეობით შემდეგ მისამართზე: iatf@justice.gov.ge; აგრეთვე, ცხელ ხაზზე: (+995) 599 85 00 11.

ინიციატივის მიზანია, ხელი შეუწყოს ეროვნული და საერთაშორისო საუნივერსიტეტო თანამშრომლობის განვითარებას; გამოკვეთოს დარგის განვითარებაში დოქტორანტთა და ახალგაზრდა მეცნიერთა როლი და მნიშვნელობა; აჩვენოს ადამიანის უფლებათა დაცვის სფეროში არსებული პრობლემები და მათი გადაჭრის თანამედროვე მეთოდები.

პირველი საერთაშორისო სამეცნიერო სიმპოზიუმი „ადამიანის უფლებათა დაცვის მულტიდისციპლინური ასპექტები გლობალური გამოწვევების ფონზე“ იუსტიციის მინისტრის მოადგილე თორნიკე ჭეიშვილმა გახსნა. ღონისძიება პანელური დისკუსიების ფორმატში წარიმართა და ადმინისტრაციული სამართლის, სამართლის ისტორიის და სამართლის მეთოდების, კერძო სამართლის, კონსტიტუციური სამართლის, საერთაშორისო სამართლისა და სისხლის სამართლის აქტუალურ საკითხებს მიეძღვნა ადამიანის უფლებების დაცვის ჭრილში.

სიმპოზიუმში მონაწილეობდნენ თსუ-ს იურიდიული ფაკულტეტის დეკანი თამარ ზარანდია; მისი მოადგილე, პროექტის ხელმძღვანელი გიორგი დგებუაძე; აგრეთვე, აკადემიური წრეების წარმომადგენლები და დოქტორანტები, მათ შორის, უცხოეთის ქვეყნების უმაღლესი სასწავლებლებიდან.

საერთაშორისო სიმპოზიუმი ყოველწლიურად გაიმართება, რაც შესაძლებლობას შექმნის ინტენსიური საერთაშორისო საუნივერსიტეტო თანამშრომლობისათვის.

პროექტი იუსტიციის სამინისტროს საგრანტო კონკურსის ფარგლებში დაფინანსდა, რომელსაც უწყება სისტემის საქმიანობაში სამოქალაქო საზოგადოების მონაწილეობის ხელშეწყობისა და სამოქალაქო ინიციატივების მხარდაჭერის მიზნით ყოველწლიურად აცხადებს. მიმდინარე წელს იუსტიციის სამინისტრო 17 გამარჯვებულ პროექტს აფინანსებს.

იუსტიციის მინისტრის მოადგილემ, ბექა ძამაშვილმა და ლარს იოჰან ლონბაკმა მიგრაციის საერთაშორისო ორგანიზაციასთან დარგობრივი თანამშრომლობის მიმართულებებზე იმსჯელეს.

მხარეებმა მიგრაციის მართვისა და ადამიანით ვაჭრობასთან (ტრეფიკინგი) ბრძოლის მიმართულებით სახელმწიფოს პოლიტიკა და მიღწეული პროგრესი განიხილეს.

მინისტრის მოადგილემ ყურადღება გაამახვილა ადამიანით ვაჭრობასთან ბრძოლისა და მიგრაციის საკითხებში იუსტიციის სამინისტროს ხელმძღვანელობით მოქმედი უწყებათაშორისი მექანიზმების როლზე. აღინიშნა, რომ ეს საკითხები საკვანძო როლს ასრულებს ევროკავშირისა და საქართველოს ურთიერთობებში, მათ შორის, ვიზალიბერალიზაციის მიმართულებით.

მხარეებმა, ასევე, ისაუბრეს სამომავლო თანამშრომლობის კონკრეტულ ინიციატივებზე.

შეხვედრას, აგრეთვე, ესწრებოდნენ სახელმწიფო სერვისების განვითარების სააგენტოს თავმჯდომარე, ქეთევან ბეთლემიძე, მიგრაციის საკითხთა სამთავრობო კომისიის აღმასრულებელი მდივანი, გიორგი ჯაში და იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის საერთაშორისო სამართლებრივი თანამშრომლობის სამმართველოს უფროსი, ანა ღვინჯილია.