ფორუმი ქართული და ბრიტანული იურიდიული პროფესიის წარმომადგენლებს შორის გამოცდილებისა და პრაქტიკის გაზიარებას, პროფესიული კავშირების გაღრმავებასა და სამომავლო თანამშრომლობის მიმართულებების განხილვას დაეთმო. ყურადღება გამახვილდა ისეთ საკითხებზე, როგორიცაა ტრანსსასაზღვრო ბიზნესსაქმიანობა, ინგლისური სამართლის გამოყენების პრაქტიკა და დავების გადაწყვეტის მექანიზმები, მათ შორის საერთაშორისო არბიტრაჟი.

ღონისძიების ფარგლებში ბექა ძამაშვილმა მონაწილეებს იუსტიციის მინისტრის მიმართვა გადასცა და ხაზი გაუსვა საქართველოსა და გაერთიანებულ სამეფოს შორის იურიდიული პროფესიის წარმომადგენლებს შორის რეგულარული დიალოგის მნიშვნელობას. მისი განცხადებით, მსგავსი ფორმატის შეხვედრები ხელს უწყობს გამოცდილების გაზიარებას და საერთაშორისო სამართლებრივ საკითხებზე პრაქტიკული თანამშრომლობის გაძლიერებას.

ფორუმის დასრულების შემდეგ, იუსტიციის სამინისტროში ბრიტანელ იურისტებთან ორმხრივი შეხვედრა გაიმართა. შეხვედრაზე მინისტრის პირველმა მოადგილემ სტუმრებს იუსტიციის სამინისტროს საქმიანობა, პრიორიტეტული მიმართულებები და სამომავლო გეგმები გააცნო.

საუბარი შეეხო საერთაშორისო სასამართლოებსა და საერთაშორისო არბიტრაჟებში სახელმწიფოს ინტერესების დაცვის მიმართულებით სამინისტროს საქმიანობას. აღინიშნა სამინისტროს როლი როგორც საერთაშორისო დავების მართვისა და სახელმწიფოს წარმომადგენლობის, ისე შესაძლო დავების პრევენციისა და სამართლებრივი რისკების შემცირების მიმართულებით.

ბექა ძამაშვილმა ასევე ისაუბრა სასამართლო სისტემის მიმართულებით განხორციელებულ რეფორმებზე და ადამიანის უფლებათა დაცვის სფეროში მიღწეულ პროგრესზე. აღინიშნა, მათ შორის, ადამიანის უფლებათა ევროპულ სასამართლოში საქართველოს წინააღმდეგ განსახილველი საქმეების რაოდენობის შემცირების ტენდენცია. საუბარი შეეხო დავების გადაწყვეტის ალტერნატიული მექანიზმების, მათ შორის მედიაციისა და არბიტრაჟის, შემდგომი განვითარების მნიშვნელობას.

იუსტიციის სამინისტროში გამართულ შეხვედრას ასევე ესწრებოდნენ საქართველოს ადვოკატთა ასოციაციის თავმჯდომარე ირაკლი ყანდაშვილი, იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის უფროსის მოადგილე ანა ივანიშვილი და არბიტრაჟებსა და უცხო ქვეყნის სასამართლოებში სახელმწიფო წარმომადგენლობის დეპარტამენტის უფროსი მარიამ ანთია.

საქართველოს იუსტიციის მინისტრის მოადგილე გიორგი დგებუაძემ იუსტიციის სამინისტროს დელეგაციასთან ერთად გაერთიანებული ერების ორგანიზაციის (გაერო) დანაშაულის პრევენციისა და სისხლის სამართლის მართლმსაჯულების მე-15 კონგრესში მიიღო მონაწილეობა.

კონგრესის ფარგლებში სიტყვით გამოსვლისას გიორგი დგებუაძემ ყურადღება გაამახვილა დანაშაულის პრევენციისა და მსჯავრდებულთა რეაბილიტაცია-რესოციალიზაციის მიმართულებით საქართველოში გატარებულ რეფორმებზე, მათ შორის, განრიდებისა და მედიაციის პროგრამებზე, არასრულწლოვანთა რეაბილიტაციისა და მხარდაჭერის მხრივ განხორციელებულ ინიციატივებზე.

საქართველოს იუსტიციის მინისტრის მოადგილემ მონაწილეობა მიიღო, ასევე, სისხლის სამართლის სფეროში საერთაშორისო თანამშრომლობის გაძლიერებისადმი მიძღვნილ სხდომაში, სადაც მან ისაუბრა საერთაშორისო სამართლებრივი ურთიერთდახმარების, ექსტრადიციისა და მსჯავრდებულთა სასჯელის შემდგომი მოხდის მიზნით გადაცემის მნიშვნელობასა და ქვეყნებს შორის მჭიდრო თანამშრომლობის საჭიროებაზე ტრანსნაციონალური დანაშაულის წინააღმდეგ ეფექტიანი ბრძოლისათვის.

კონგრესის პარალელურად, საქართველოს დელეგაციამ, თანამშრომლობის გაღრმავების მიზნით, ორმხრივი შეხვედრები გამართა თურქეთის, აზერბაიჯანის, სომხეთის, იტალიისა და იაპონიის დელეგაციებთან, ასევე, გაეროს დანაშაულის პრევენციისა და სისხლის სამართლის პროგრამის ქსელის (PNI) მონაწილე სისხლის სამართლის მართლმსაჯულებისა და ადამიანის უფლებების საერთაშორისო ინსტიტუტის (SII) წარმომადგენლებთან.

საქართველოს იუსტიციის სამინისტროს დელეგაციის შემადგენლობაში იმყოფებოდნენ, ასევე, ანალიტიკური დეპარტამენტის უფროსი გიორგი ლომთაძე; სსიპ - დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსი გიორგი საჯაია და ამავე სააგენტოს ანალიტიკური დეპარტამენტის უფროსი იასონ ნაჭყებია.

საქართველოს იუსტიციის სამინისტროს ეროვნულ არქივში XI საერთაშორისო სამეცნიერო კონფერენცია „არქივთმცოდნეობა, წყაროთმცოდნეობა — ტენდენციები და გამოწვევები“ გაიხსნა. წლევანდელი ღონისძიება საქართველოში ქრისტიანობის სახელმწიფო სარწმუნოებად გამოცხადებიდან 1700 წლის იუბილეს ეძღვნება.

ქრისტიანობის მიღებითა და სახელმწიფო რელიგიად გამოცხადებით ქვეყანამ აირჩია სულიერი გზა, რომელმაც განსაზღვრა ქართული კულტურა, აზროვნება, სახელმწიფოებრივი განვითარება და ფასეულობები. იგი გამოვლინდა არქიტექტურაში, მხატვრობაში, საგალობელსა თუ ლიტერატურაში.

კონფერენცია გახსნეს იუსტიციის მინისტრის მოადგილემ თამარ ზოდელავამ და ეროვნული არქივის გენერალურმა დირექტორმა თეონა იაშვილმა. ღონისძიების მონაწილეებს მიესალმნენ ვენის უნივერსიტეტის პროფესორი, ავსტრიის მეცნიერებათა აკადემიის წევრი კლაუდია რაპი და ეროვნული არქივის სამეცნიერო განყოფილების უფროსი ქეთევან ასათიანი.

ღონისძიებაში 40-ზე მეტი ქართველი და უცხოელი მეცნიერი მონაწილეობს. ისინი წარადგენენ უახლეს სამეცნიერო კვლევებს სამხრეთ კავკასიაში ქრისტიანობის გავრცელებისა და სახელმწიფო რელიგიად გამოცხადების შესახებ, რომისა და სასანიანთა იმპერიებში მიმდინარე პარალელური პროცესებისა და მსოფლიოში არსებული ნარატივების ჭრილში. მოხსენებები ეთმობა განმანათლებელთა მოღვაწეობას, მონასტიციზმის განვითარებას, ქართული ეკლესიის ორგანიზაციულ ტრანსფორმაციას, ლიტურგიკას, წმინდანებისა და დღესასწაულების ისტორიას. განსაკუთრებული ყურადღება გამახვილდება ქრისტიანობის, როგორც წიგნიერი სარწმუნოების, როლზე, ასევე ქრისტიანულ ხელოვნებასა და კულტურაზე, შუა საუკუნეების ისტორიოგრაფიასა და რელიგიის გააზრებაზე გვიან შუა საუკუნეებსა და მოდერნულ ეპოქაში.

კონფერენცია საქართველოს ეროვნულ არქივში 3 ოქტომბრის ჩათვლით გაიმართება.

საკოორდინაციო საბჭოს სხდომას, რომელსაც იუსტიციის მინისტრის მოადგილე თამარ ზოდელავა ხელმძღვანელობდა, საბჭოს წევრი სამინისტროებისა და სხვა სახელმწიფო უწყებების წარმომადგენლები ესწრებოდნენ. მთავრობის დადგენილებით შექმნილი საკოორდინაციო საბჭოს მიზანი ქვეყანაში ეროვნული სივრცითი მონაცემების ინფრასტრუქტურის შექმნის, ფუნქციონირებისა და განვითარების მხარდაჭერაა.

უწყებათშორის შეხვედრაზე მხარეებმა ეროვნული სივრცითი მონაცემების ინფრასტრუქტურის განვითარების 4-წლიანი სტრატეგია, 1-წლიანი სამოქმედო გეგმა და 9 დარგობრივი რეგლამენტის პროექტი განიხილეს. დოკუმენტები, რომლებიც მთავრობას დასამტკიცებლად წარედგინება, კოორდინატორმა უწყებამ - იუსტიციის სამინისტროს საჯარო რეესტრის ეროვნულმა სააგენტომ საკოორდინაციო საბჭოს წევრ უწყებებთან მჭიდრო თანამშრომლობით მოამზადა.

საუკეთესო საერთაშორისო გამოცდილების გათვალისწინებით შექმნილი რეგულაციები სივრცითი მონაცემების წარმოებისა და გაზიარების ერთიან სტანდარტს დაადგენს. შედეგად, სხვადასხვა უწყების მონაცემები ერთმანეთთან თავსებადი იქნება, რაც გამორიცხავს დუბლირებას და დაზოგავს როგორც დროს, ისე ფინანსურ რესურსებს. გარდა ამისა, მონაცემები თავსებადი იქნება ევროკავშირის სივრცითი მონაცემების ინფრასტრუქტურასთან (INSPIRE) და მარტივად გაზიარდება ეროვნული გეოპორტალის საშუალებით.

რეფორმის მიზანი სივრცითი მონაცემების მართვისა და გაზიარების თანამედროვე სტანდარტების დანერგვაა. ამ პროცესში, მსოფლიო ბანკის მხარდაჭერით, საქართველოს მდგრადი სოფლის მეურნეობის ირიგაციისა და მიწის პროექტის (GRAIL) ფარგლებში, საჯარო რეესტრმა პირველი მულტიფუნქციური გეოპორტალი — NSDI.GOV.GE შექმნა. ეროვნულ გეოპორტალზე უკვე განთავსებული და საჯაროდ ხელმისაწვდომია 30-მდე უწყების 160-ზე მეტი მეტამონაცემი.

ზუსტი გეოგრაფიული მონაცემები სახელმწიფო და კერძო სექტორს ინფორმირებული გადაწყვეტილებების მიღებაში ეხმარება, რაც მნიშვნელოვანია როგორც ინფრასტრუქტურული პროექტებისა და ბიზნესის დასაგეგმად, ისე კრიზისულ სიტუაციებზე სწრაფი და ეფექტური რეაგირებისთვის.

ნოტარიუსთა პალატის წევრთა რიგგარეშე საერთო კრება იუსტიციის მინისტრის მოადგილე ლანა მორგოშიამ გახსნა. მან აღნიშნა, რომ წესდების ცვლილებების შემუშავებისა და განხილვის პროცესში მნიშვნელოვანია ნოტარიუსთა ჩართულობა და მათი მოსაზრებების გათვალისწინება. ნოტარიუსებს შესაძლებლობა ჰქონდათ, წარმოედგინათ საკუთარი წინადადებები და შენიშვნები.

წესდებაში შეტანილი ცვლილებების თანახმად, გამგეობის თავმჯდომარის მოადგილისა და გამგეობის წევრობის კანდიდატი ვალდებულია, საერთო კრების ჩატარებამდე არაუგვიანეს 10 კალენდარული დღისა, პალატას წარუდგინოს განცხადება და სამოქმედო პროგრამა. განხილვის შედეგად, წესდებაში შესატანი ცვლილებები ხმათა უმრავლესობით დამტკიცდა.

რიგგარეშე კრებაზე, პალატის წესდებაში შესატან ცვლილებებთან ერთად, ნოტარიუსებმა ასევე „სანოტარო მოქმედებათა შესრულების წესის შესახებ“ ინსტრუქციაში შესატან ცვლილებებზეც იმსჯელეს, რომლის თანახმადაც გამგეობის წევრთა რაოდენობა 11-დან 7-მდე შემცირდება. გამგეობაში თითო წევრი წარმოდგენილი იქნება აფხაზეთისა და აჭარის ავტონომიური რესპუბლიკებიდან, თითო წევრი - დასავლეთ და აღმოსავლეთ საქართველოს მუნიციპალიტეტებიდან და 3 წევრი - თბილისში მოქმედი ნოტარიუსებისგან.

კრებას ნოტარიუსები და ნოტარიუსთა პალატის თანამშრომლები ესწრებოდნენ.

საქართველოს იუსტიციის სახლის პროექტს „მობილური იუსტიციის სახლი“ ევროპის საჯარო სექტორის დაჯილდოების (European Public Sector Award – EPSA) ფარგლებში კარგი პრაქტიკის სერტიფიკატი (Good Practice Certificate) გადაეცა.

სერტიფიკატის გადაცემის ოფიციალური ცერემონია ნიდერლანდების ქალაქ მაასტრიხტში, EPSA 2025-2026-ის ფარგლებში გაიმართა. დაჯილდოების ცერემონიას ესწრებოდნენ საქართველოს იუსტიციის მინისტრის მოადგილე ლანა მორგოშია, იუსტიციის სახლის თავმჯდომარე ვახტანგ ჟვანია, მისი მოადგილე დავით ვარდოსანიძე.

EPSA-ს საჯარო ადმინისტრირების ევროპული ინსტიტუტი (European Institute of Public Administration – EIPA) უწევს ორგანიზებას. კონკურსი 2009 წლიდან ორ წელიწადში ერთხელ ტარდება და საჯარო სექტორში დანერგილ ინოვაციურ და ეფექტიან პრაქტიკებს წარმოაჩენს.

მე-10 საიუბილეო კონკურსზე ევროპის სხვადასხვა ქვეყნიდან 134 პროექტი იყო წარდგენილი. დამოუკიდებელი საერთაშორისო ექსპერტების შეფასებით, „მობილური იუსტიციის სახლის“ პროექტი გამორჩეულ ინოვაციურ პრაქტიკად აღიარეს. შეფასებისას განსაკუთრებული ყურადღება გამახვილდა პროექტის მნიშვნელოვან წვლილზე საჯარო სექტორის რეფორმირებისა და ინოვაციური განვითარების მიმართულებით.

„მობილური იუსტიციის სახლის“ მეშვეობით სერვისებზე ხელმისაწვდომობამ საქართველოში უპრეცედენტო მასშტაბი შეიძინა. „მობილური იუსტიციის სახლი“ სახელმწიფო სერვისებს აწვდის იმ მოქალაქეებს, რომლებიც ადმინისტრაციული ცენტრებიდან მოშორებულ სოფლებში ან მაღალმთიან დასახლებებში ცხოვრობენ. მათ საშუალება ეძლევათ, 500-ზე მეტი სახელმწიფო სერვისი საცხოვრებელ ადგილთან ახლოს მიიღონ.

„მობილური იუსტიციის სახლისთვის“ კარგი პრაქტიკის სერტიფიკატის მინიჭება პროექტის ევროპულ დონეზე აღიარებას და მისი წარმატებული საქმიანობის საერთაშორისო შეფასებას წარმოადგენს. ეს კიდევ ერთი საერთაშორისო აღიარებაა იუსტიციის სამინისტროს გუნდისთვის, რომელმაც მოქალაქეებისთვის სახელმწიფო სერვისებზე ხელმისაწვდომობის გაზრდისა და მომსახურების ხარისხის გაუმჯობესების მიზნით ინოვაციური მოდელი შექმნა.

საქართველოს იუსტიციის სამინისტროს დელეგაცია ნიდერლანდების ქალაქ მაასტრიხტში ოფიციალური ვიზიტით იმყოფება, სადაც ევროპის საჯარო სექტორის დაჯილდოების (EPSA) 2025-2026 წლების ღონისძიებაში მონაწილეობს.

ვიზიტის ფარგლებში, იუსტიციის მინისტრის მოადგილე ლანა მორგოშია, იუსტიციის სახლის თავმჯდომარე ვახტანგ ჟვანია და მისი მოადგილე დავით ვარდოსანიძე საჯარო ადმინისტრირების ევროპული ინსტიტუტის (EIPA) გენერალური დირექტორის მოვალეობის შემსრულებელს, დოქტორ კლაუდიო მატერას შეხვდნენ. მხარეებმა საჯარო ადმინისტრირების სფეროში თანამშრომლობის გაღრმავების, გამოცდილების გაზიარებისა და სამომავლო ერთობლივი პროგრამების განხორციელების შესაძლებლობები განიხილეს. კლაუდიო მატერა გაეცნო საქართველოს იუსტიციის სამინისტროსა და იუსტიციის სახლის მიმდინარე და დაგეგმილ პროექტებს. საუბარი შეეხო იუსტიციის სახლის თანამშრომლებისთვის ევროპულ ქვეყნებში სასწავლო ვიზიტების, პროფესიული გაცვლითი პროგრამებისა და მათ საჭიროებებზე მორგებული ტრენინგების ორგანიზებას. მხარეებმა, ასევე, განიხილეს EIPA-ს ექსპერტების საქართველოში ვიზიტის შესაძლებლობა, რათა ისინი ადგილზე გაეცნონ იუსტიციის სახლის საქმიანობასა და ინოვაციურ სერვისებს.

შეხვედრა შედგა უნგრეთის ციფრული სააგენტოს აღმასრულებელი დირექტორის მრჩეველ პიტერ ვიდოსთანაც, სადაც მხარეებმა ინოვაციური მიდგომების დანერგვაზე ისაუბრეს. პიტერ ვიდოსი გაეცნო იუსტიციის სამინისტროსა და იუსტიციის სახლის პროექტებს, მათ შორის, იუსტიციის სახლში ხელოვნური ინტელექტისა და თანამედროვე ტექნოლოგიების გამოყენების შესაძლებლობებს. მხარეები ურთიერთთანამშრომლობასა და გრძელვადიანი პარტნიორობის განვითარებაზე შეთანხმდნენ.

ევროპის საბჭოს მინისტრთა კომიტეტმა სექტემბრის სხდომაზე „საქართველო რუსეთის წინააღმდეგ“ სახელმწიფოთაშორის საქმეებზე ევროპული სასამართლოს გადაწყვეტილებების აღსრულების საკითხი განიხილა.

საქართველოს ინიციატივითა და აქტიური ჩართულობით, კომიტეტმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის მხარდაჭერა საერთაშორისოდ აღიარებულ საზღვრებში და მოუწოდა რუსეთის ფედერაციას:

• შეასრულოს საერთაშორისო ვალდებულებები და გაიყვანოს სამხედრო ძალები აფხაზეთიდან და ცხინვალის რეგიონიდან;
• შეწყვიტოს ე.წ. ბორდერიზაცია, უზრუნველყოს მოსახლეობის თავისუფალი და უსაფრთხო გადაადგილება, საკუთრებაზე წვდომა და ქართულ ენაზე განათლების მიღების შესაძლებლობა ოკუპირებულ რეგიონებში;
• შექმნას დევნილებისთვის საკუთარ სახლებში უსაფრთხო, ნებაყოფლობითი და ღირსეული დაბრუნების პირობები და აღკვეთოს მკვლელობების, გატაცებების, წამების, უკანონო დაკავებებისა და სხვა მძიმე დარღვევების პრაქტიკა.

საქართველომ რუსეთის წინააღმდეგ სტრასბურგში უკვე მიაღწია ისტორიულ გამარჯვებებს - მათ შორის, ე.წ. დეპორტირებულების, 2008 წლის აგვისტოს ომისა და „განგრძობადი ოკუპაციის“ საქმეებზე.

საქართველოს ხელისუფლება აქტიურად მუშაობს, რომ ყველა სამართლებრივი და დიპლომატიური მექანიზმის გამოყენებით, სტრასბურგის სასამართლოს მიერ მიღებული გადაწყვეტილებები სრულად აღსრულდეს და აღდგეს სამართლიანობა დაზარალებულებისთვის.

იუსტიციის მინისტრის მოადგილედ ლაშა მაღრაძე დაინიშნა. ლაშა მაღრაძე პროფესიით იურისტია. დამთავრებული აქვს ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი და კოლუმბიის უნივერსიტეტის სამართლის სკოლა.

სხვადასხვა დროს მუშაობდა წამყვან თანამდებობებზე, როგორც საჯარო, ისე კერძო სექტორში;

აქვს 20-წლიანი გამოცდილება ისეთ სფეროებში, როგორიც არის: სისხლის სამართლის მართლმსაჯულება; სააღსრულებო სისტემა; სასამართლო სისტემა; სამოსამართლო სწავლება; ანტიკორუფციული, კანონის უზენაესობა და ადამიანის უფლებები. მართლმსაჯულების სექტორის ინსტიტუციური და პროგრამული რეფორმის განსახორციელებლად აქტიურად თანამშრომლობდა საერთაშორისო პარტნიორებთან.

იუსტიციის მინისტრის მოადგილის თანამდებობაზე დანიშვნამდე იკავებდა პირველი მოადგილის თანამდებობას სახელმწიფო უსაფრთხოების სამსახურში.