საქართველოს იუსტიციის მინისტრი პაატა სალია აღმასრულებელთა საერთაშორისო კავშირის პრეზიდენტ მარკ შმიცს შეხვდა.

მინისტრმა შეხვედრისას ისაუბრა უწყების მნიშვნელოვან როლზე კანონის უზენაესობის განმტკიცებაში, ადამიანის უფლებების დაცვასა და ეფექტური და ხელმისაწვდომი საჯარო სერვისების მიწოდების უზრუნველყოფაში. პაატა სალიამ აღნიშნა, რომ აღსრულების ეროვნული ბიურო, რომელიც სასამართლო გადაწყვეტილებების აღსრულებას უზრუნველყოფს, მუშაობს ფუნდამენტური პრინციპების დაცვით, როგორებიცაა კანონიერება, პროპორციულობა, მხარეთა ინტერესების ბალანსი, გამჭვირვალობა და საზოგადოების ნდობის გაძლიერება.

მხარეებმა თანამშრომლობის შემდგომი გაღრმავებისთვის მზადყოფნა დაადასტურეს.

შეხვედრას, რომელიც აღმასრულებელთა საერთაშორისო კონფერენციის ფარგლებში გაიმართა, იუსტიციის მინისტრის პირველი მოადგილე ბექა ძამაშვილი, აღსრულების ეროვნული ბიუროს თავმჯდომარე ლაშა მოძღვრიშვილი და იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი ესწრებოდნენ.

იუსტიციის მინისტრის მოადგილე გიორგი დგებუაძემ გაერო-ს მიერ ორგანიზებულ მიგრაციის მიმოხილვის საერთაშორისო ფორუმის ფარგლებში ოპერაციების საკითხებში მიგრაციის საერთაშორისო ორგანიზაციის გენერალური დირექტორის მოადგილე უგოჩი დენიელსთან შეხვედრისას აღნიშნა, რომ მიგრაციის საერთაშორისო ორგანიზაცია ყოველთვის იყო საქართველოს საიმედო პარტნიორი მიგრაციისა და ტრეფიკინგის წინააღმდეგ ბრძოლის სფეროში.

გიორგი დგებუაძემ ხაზი გაუსვა კოორდინირებული მიდგომების მნიშვნელობას, აგრეთვე, მიგრაციის მართვისას გლობალური პრინციპებისა და ეროვნული კონტექსტის კომპლექსურ გათვალისწინებას გამოწვევებზე რეაგირების პროცესში.

აღინიშნა, რომ 2020 წელს საქართველომ მიიღო 2021-2030 წლების ყოვლისმომცველი მიგრაციის სტრატეგია; 2025 წელს კი ქვეყანამ მასშტაბური საკანონმდებლო პაკეტის მიღებით განახორციელა მიგრაციისა და თავშესაფრის სისტემის ყოვლისმომცველი რეფორმა, რომლის მიზანიც ეროვნული მიგრაციისა და თავშესაფრის სისტემის გაძლიერებაა.

ნიუ-იორკში საქართველოს დელეგაციას იუსტიციის მინისტრის მოადგილე გიორგი დგებუაძე ხელმძღვანელობს. დელეგაციის შემადგენლობაში არიან იუსტიციის, საგარეო საქმეთა, შინაგან საქმეთა ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრების მოადგილეები, აგრეთვე, სხვადასხვა რანგის თანამდებობის პირები.

კონფერენცია „აღმასრულებლის როლის ტრანსფორმაცია თანამედროვე მართლმსაჯულების სისტემაში“ იუსტიციის სამინისტროს აღსრულების ეროვნული ბიუროსა და აღმასრულებელთა საერთაშორისო კავშირის (UIHJ) ორგანიზებით იმართება.

ღონისძიება იუსტიციის მინისტრმა პაატა სალიამ გახსნა. მან სასამართლო გადაწყვეტილებების ეფექტიანი აღსრულების მნიშვნელობაზე ისაუბრა და ხაზი გაუსვა სისტემის ციფრული ტრანსფორმაციის როლს ამ პროცესში. პაატა სალიამ კონფერენციის დელეგატებს ინფორმაცია მიაწოდა საქართველოში აღსრულების სფეროში დანერგილი ავტომატიზებული სისტემების, მათ შორის, „ელექტრონული ასისტენტის“ შესახებ და აღნიშნა, რომ უწყება უკვე მუშაობს მობილურ აპლიკაციაზე, რომელიც სააღსრულებო სერვისებს უფრო ხელმისაწვდომს გახდის.

კონფერენციის მონაწილეებს მისასალმებელი სიტყვით მიმართეს, აგრეთვე, აღმასრულებელთა საერთაშორისო კავშირის (UIHJ) პრეზიდენტმა მარკ შმიცმა და აღსრულების ეროვნული ბიუროს თავმჯდომარე ლაშა მოძღვრიშვილმა.

ღონისძიების მიზანია აღსრულების სისტემაში მიმდინარე რეფორმებისა და თანამედროვე გამოწვევების ანალიზი ტექნოლოგიური განვითარების ფონზე, პროფესიული წრის წარმომადგენელთა შორის დისკუსიის გახსნა და საუკეთესო პრაქტიკის გაზიარება. მასში 30-ზე მეტი ქვეყნის 100-ზე მეტი დელეგატი მონაწილეობს, მათ შორის, აღმასრულებლები, საჯარო და კერძო სააღსრულებო პალატის წევრები, საერთაშორისო ორგანიზაციების ექსპერტები.

კონფერენციის ფარგლებში იუსტიციის მინისტრი შეხვედრას გამართავს აღმასრულებელთა საერთაშორისო კავშირის პრეზიდენტთან.

საქართველო, როგორც აღმასრულებელთა საერთაშორისო კავშირის (UIHJ) წევრი ქვეყანა, საერთაშორისო კონფერენციას მეორედ მასპინძლობს. 2022 წელს ღონისძიება ბათუმში გაიმართა.

პაატა სალიამ არაბთა გაერთიანებული საამიროების საგარეო საქმეთა სახელმწიფო მინისტრთან ინოვაციებისა და ციფრული მმართველობის განვითარების სფეროში თანამშრომლობის საკითხები განიხილა.

იუსტიციის მინისტრი პაატა სალია არაბთა გაერთიანებული საამიროების საგარეო საქმეთა სახელმწიფო მინისტრ საიდ ბინ მუბარაქ ალ ჰაჯერის შეხვდა. მხარეებმა ორ ქვეყანას შორის ურთიერთობის გაღრმავების პერსპექტივებზე იმსჯელეს.

პაატა სალიამ საიდ ბინ მუბარაქ ალ ჰაჯერის ქართული რეფორმები გააცნო. მინისტრმა აღნიშნა, რომ იუსტიციის სამინისტრომ დანერგა „გონიერი კონტრაქტის“ ინოვაციური სერვისი, რომელიც საქართველოს მოქალაქეებს საშუალებას აძლევს, მსოფლიოს მასშტაბით დისტანციურად განახორციელონ უძრავი ქონების ტრანზაქციები უსაფრთხო ციფრული ხელმოწერის, ინტეგრირებული იპოთეკური სერვისების, გადახდების დამუშავების და ელექტრონული საკუთრების გაცემის გზით. მომავალში ეს სერვისი გაფართოვდება და მოიცავს ბიზნესის დისტანციურ რეგისტრაციასა და სხვა მოწინავე ციფრულ სერვისებს.

აღინიშნა გასული წლის შემოდგომაზე განხორციელებული ნაყოფიერი ვიზიტი, ასევე, მიმდინარე წელს ხელმოწერილი მემორანდუმი PRYPCO Technologies-თან, რომელიც ითვალისწინებს თანამშრომლობას უძრავი ქონების სექტორში მოწინავე ტექნოლოგიების დანერგვის მიმართულებით; მათ შორის, უძრავი ქონების ტოკენიზაციის სფეროში, რაც რეალური აქტივების ელექტრონულ ერთეულებად გარდაქმნას გულისხმობს.

შეხვედრას ესწრებოდნენ იუსტიციის მინისტრის პირველი მოადგილე ბექა ძამაშვილი და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი.

იუსტიციის მინისტრის მოადგილე თამარ ზოდელავა ამერიკის შეერთებულ შტატებში სამუშაო ვიზიტის ფარგლებში მსოფლიო ბანკის წარმომადგენლებს შეხვდა. შეხვედრაზე მხარეებმა იუსტიციის სამინისტროსა და მსოფლიო ბანკის პარტნიორობის მიმართულებები, პროექტების პროგრესი და სამომავლო თანამშრომლობის პერსპექტივები განიხილეს.

მინისტრის მოადგილემ, საჯარო რეესტრის ეროვნული სააგენტოს წარმომადგენელთან ერთად, პროექტ GRAIL-ის მიმდინარეობასა და სამომავლო გეგმებზე ისაუბრა. შეხვედრაზე ყურადღება გამახვილდა ეროვნული სივრცითი მონაცემების ინფრასტრუქტურის (NSDI) განვითარებაზე, მიწის ადმინისტრირების სერვისების გაუმჯობესებასა და ციფრული მმართველობის სისტემების შემდგომ გაძლიერებაზე.
მხარეებმა პროექტების სტრატეგიულ მნიშვნელობაზე, მიღწეულ პროგრესზე და სამომავლო ნაბიჯებზე იმსჯელეს.

შეხვედრაზე ასევე განიხილეს საქართველოს გამოცდილების საერთაშორისო დონეზე გაზიარების შესაძლებლობები, მათ შორის მიწის რეფორმისა და სივრცითი მონაცემების სისტემების განვითარების მიმართულებით. საუბარი შეეხო ქართული მოდელების სხვა ქვეყნებში დანერგვის პოტენციალსა და ტექნიკური თანამშრომლობის გაღრმავების შესაძლებლობებს.

იუსტიციის სამინისტროში საქართველოსა და შვეიცარიას შორის მიგრაციის სფეროში პარტნიორობის ფარგლებში ექსპერტთა მორიგი სამუშაო შეხვედრა გაიმართა.

ღონისძიება იუსტიციის მინისტრის მოადგილე გიორგი დგებუაძემ გახსნა. მინისტრის მოადგილემ მიგრაციის მართვის პროცესში მიღწეულ პროგრესზე ისაუბრა და ხაზი გაუსვა პარტნიორ ქვეყნებთან თანამშრომლობის როლს არალეგალური მიგრაციის პრევენციის, თავშესაფრის პროცედურების ბოროტად გამოყენების წინააღმდეგ ბრძოლისა და მიგრაციის მმართველობის გაძლიერების მიმართულებით.

სამუშაო შეხვედრაზე ქართულმა და შვეიცარიულმა მხარეებმა დისკუსიის რეჟიმში განიხილეს მიგრაციის გამოწვევები, თანამშრომლობის გაძლიერების კონკრეტული წინადადებები და სამომავლო გეგმები.

ორ ქვეყნას შორის გაფორმებული მემორანდუმის ფარგლებში მიგრაციის სფეროს ექსპერტთა დისკუსიები 2022 წლიდან რეგულარულად იმართება. წლევანდელ რიგით მე-4 შეხვედრაში მონაწილეობდნენ იუსტიციის; საგარეო საქმეთა; შინაგან საქმეთა; ოკუპირებული ტერიტორიებიდან იძულებით გადაადგილებულ პირთა, შრომის, ჯანმრთელობისა და სოციალური დაცვის სამინისტროების, აგრეთვე, მიგრაციის საკითხთა სამთავრობო კომისიის სამდივნოს წარმომადგენლები.

იუსტიციის მინისტრის მოადგილე გიორგი დგებუაძე შუა აღმოსავლეთსა და კავკასიაში Stirling Foundation-ის რეგიონულ დირექტორ ბრიტნი სტირლინგს შეხვდა.

შეხვედრაზე მხარეებმა განიხილეს არსებული თანამშრომლობა და სამომავლო გეგმები, განსაკუთრებული ყურადღება დაეთმო ერთობლივი ინსტიტუციური და აკადემიური პროექტების განვითარებას.

აღინიშნა იუსტიციის სამინისტროს სსიპ “იუსტიციის სასწავლო ცენტრსა” და იუტას ბრიგჰემ იანგის უნივერსიტეტს შორის ერთობლივი საგანმანათლებლო ინიციატივების განხორციელების მნიშვნელობა, რომელიც Stirling Foundation-თან პარტნიორობის ფარგლებში იგეგმება.

შეხვედრას ესწრებოდა სსიპ “იუსტიციის სასწავლო ცენტრის” დირექტორი გვანცა ვარამაშვილი.

სრულიად საქართველოს კათოლიკოს-პატრიარქის, ილია II-ის მრავალწლიან სულიერ, საზოგადოებრივ და ეროვნულ მოღვაწეობას მიეძღვნა გამოფენა „პატრიარქი ილია II“, რომელიც საქართველოს ეროვნული არქივის საგამოფენო პავილიონში დღეს საქართველოს იუსტიციის მინისტრმა პაატა სალიამ გახსნა.

გამოფენა ასახავს პატრიარქის მრავალმხრივ მოღვაწეობას: ეკლესიის აღორძინებას, სასულიერო განათლების განვითარებას, მის კულტურულ, საგანმანათლებლო და საზოგადოებრივ საქმიანობას.

საგამოფენო პავილიონში წარმოდგენილია საქართველოს საპატრიარქოდან დროებით საექსპოზიციოდ არქივისათვის გადაცემული ორი შესამოსელი. მათგან ერთ-ერთი ილია მეორეს ინტრონიზაციის დღეს, 1977 წლის 25 დეკემბერს, ეცვა; ასევე საპატრიარქო მანტია, რომელსაც ილია II ღვთისმსახურებისას სიცოცხლის ბოლომდე ატარებდა. გამოფენის გახსნის დღეს დარბაზში წარმოდგენილი იყო საქართველოს პატრიარქების – ეფრემ II-ისა და ილია II-ის – კუთვნილი ჯვარი.

გამოფენის ერთ-ერთი მნიშვნელოვანი ხაზი არის საქართველოს ეროვნული არქივისა და პატრიარქის მრავალწლიანი ურთიერთობა. ილია II ეროვნულ არქივს სამჯერ ეწვია. მისი ლოცვა-კურთხევით 2006 წელს რესტავრაცია ჩაუტარდა ერთ-ერთ უმნიშვნელოვანეს ქართულ ხელნაწერს — ანჩის სახარებას (XII ს.). ეს ურთიერთობა ნათლად წარმოაჩენს მის განსაკუთრებულ დამოკიდებულებას ეროვნული მემკვიდრეობის დაცვისა და შესწავლისადმი.

ექსპოზიციაზე წარმოდგენილია საქართველოს ეროვნულ არქივსა და საოჯახო არქივებში დაცული მასალა; ასევე ცნობილი ქართველი ფოტოგრაფების – რამაზ ნაცვლიშვილის, იური მეჩითოვის, გოგა ჩანადირის, დავით ხიზანიშვილის, ლუარსაბ ტოგონიძის, გიგლა ბენაშვილის, ბადრი და ირაკლი ვადაჭკორიების, ბესო გულიაშვილის, გიორგი აბდალაძისა და გიორგი მეურმიშვილის – ნამუშევრები.
ფოტომასალის ნაწილს ფართო საზოგადოება პირველად ნახავს.

გამოფენა მიზნად ისახავს საზოგადოებას კიდევ ერთხელ შეახსენოს პატრიარქის განსაკუთრებული როლი საქართველოს სულიერ, კულტურულ თუ საზოგადოებრივ ცხოვრებაში.

პატრიარქის ღვაწლზე და უწმინდესისადმი მიძღვნილი ექსპოზიციის შესახებ ისაუბრეს ეროვნული არქივის გენერალურმა დირექტორმა თეონა იაშვილმა და ისტორიკოსმა სერგო ვარდოსანიძემ. გამოფენის გახსნას ასევე ესწრებოდნენ იუსტიციის მინისტრის მოადგილეები, საგანმანათლებლო და კულტურული დაწესებულებების წარმომადგენლები და სხვა მოწვეული სტუმრები. ღონისძიებაზე საგალობლები შეასრულა პატრიარქის ნათლულების მგალობელთა გუნდმა.

ეროვნული არქივის საგამოფენო პავილიონი ექსპოზიციას მაისის ბოლომდე უმასპინძლებს.

დათვალიერება თავისუფალია.

საქართველოს იუსტიციის მინისტრმა ჩინეთის სახალხო რესპუბლიკის კიბერსივრცის მართვის მინისტრთან ორ ქვეყანას შორის ციფრულ სფეროში თანამშრომლობის განვითარების საკითხები განიხილა.

პაატა სალიასა და ჟუანგ რონგვენს შორის გამართულ შეხვედრაზე აღინიშნა, რომ საქართველოს იუსტიციის სამინისტრო ქვეყანაში სახელმწიფო და კერძო სექტორის სერვისების ერთ-ერთი ყველაზე მსხვილი მიმწოდებელია. შესაბამისად, თანამშრომლობის გაძლიერება ჩინეთის კიბერსივრცის სამინისტროსთან გააღრმავებს ორივე ქვეყნის პოტენციალს კიბერუსაფრთხოებისა და ინოვაციების სფეროში.

საქართველოს იუსტიციის მინისტრმა ჩინეთის კიბერსივრცის მართვის მინისტრს კიბერუსაფრთხოების ცნობიერების ამაღლების სტრატეგიის პრინციპები გააცნო. საუბარი შეეხო, აგრეთვე, ხელოვნური ინტელექტის გამოყენებას, მობილური აპლიკაციების დანერგვისა და ციფრული იდენტობის (Digital ID) პროექტებს.

იუსტიციის მინისტრმა ჩინელი კოლეგა გაერო-ს საჯარო სერვისების ფორუმზე მოიწვია, რომელსაც თბილისი მიმდინარე წლის 23-25 ივნისს უმასპინძლებს.

შეხვედრას ესწრებოდნენ იუსტიციის მინისტრის პირველი მოადგილე ბექა ძამაშვილი, მინისტრის მოადგილე თამარ ზოდელავა და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი ქეთევან სარაჯიშვილი.