საქართველოს იუსტიციის მინისტრი პაატა სალია ადვოკატთა ასოციაციის საიუბილეო დღისადმი მიძღვნილ საერთაშორისო კონფერენციას დაესწრო. ღონისძიების მთავარი თემაა ხელოვნური ინტელექტის ეპოქაში საადვოკატო საქმიანობის განვითარება.

იუსტიციის მინისტრმა კონფერენციის მონაწილეებს სიტყვით მიმართა. პაატა სალიამ აღნიშნა, რომ ადვოკატის პროფესიასთან ცხოვრების მნიშვნელოვანი ნაწილი აკავშირებს, რაც დღემდე განსაზღვრავს მის დამოკიდებულებას ამ პროფესიაში მყოფი ადამიანების მიმართ.

„ადვოკატის საქმიანობის ცენტრში ყოველთვის ადამიანია - თავისი უფლებებით, პრობლემებითა და სამართლიანობის მოლოდინით. თითოეული საქმე, რომელიც მაღალი პროფესიონალიზმით და კეთილსინდისიერებით არის წარმართული, აძლიერებს რწმენას, რომ ადამიანს შეუძლია საკუთარი უფლებების დაცვა და მისი ხმა მართლმსაჯულების პროცესში სათანადოდ იქნება გაგონილი“, - განაცხადა იუსტიციის მინისტრმა.

პაატა სალიამ იუსტიციის სამინისტროსა და ადვოკატთა კორპუსის თანამშრომლობის მნიშვნელობაზეც ისაუბრა. მისი თქმით, ხარისხიანი და განჭვრეტადი კანონმდებლობა, სამართლებრივი უსაფრთხოება და იურიდიულ დახმარებაზე ხელმისაწვდომობა ის მიმართულებებია, რომლებზე მუშაობის პროცესშიც უფლებადამცველების პრაქტიკული გამოცდილების გათვალისწინებას უდიდესი მნიშვნელობა ენიჭება.

„იუსტიციის სამინისტრო მომავალშიც გააგრძელებს ასოციაციასთან მჭიდრო თანამშრომლობას. ამ ურთიერთობის საფუძველი უნდა იყოს ერთმანეთის როლისა და დამოუკიდებლობის პატივისცემა, მოსაზრებების ღია გაცვლა და საერთო საკითხებზე თანმიმდევრული მუშაობა… ჩვენი საერთო ძალისხმევის შედეგი ადამიანმა საკუთარი უფლებების უკეთ დაცვაში უნდა იგრძნოს“, - აღნიშნა პაატა სალიამ.

ღონისძიებაში მონაწილეობდნენ საქართველოს საკანონმდებლო და აღმასრულებელი ხელისუფლების წევრები, საერთაშორისო ორგანიზაციებისა და პარტნიორი ქვეყნების ადვოკატთა ასოციაციების ხელმძღვანელები.

საქართველოს იუსტიციის მინისტრის მოადგილე ლანა მორგოშია უცხოელ კოლეგებს შეხვდა. შეხვედრები საჯარო მმართველობის ინოვაციების გაერო-ს სამიტის ფარგლებში გაიმართა, რომელშიც მსოფლიოს 100-ზე მეტი ქვეყნის მაღალი რანგის დელეგაციები მონაწილეობენ.

გაერო-ს საჯარო მმართველობის ექსპერტთა კომიტეტის წევრ როლფ ალტერთან იუსტიციის მინისტრის მოადგილე ლანა მორგოშიამ კიდევ ერთხელ დაადასტურა საქართველოს ერთგულება გაერო-ს მდგრადი განვითარების პრინციპებისადმი და აღნიშნა, რომ გაერო-ს ექსპერტთა კომიტეტსა და პარტნიორ ქვეყნებთან თანამშრომლობის გაღრმავება მნიშვნელოვანი მექანიზმია თანამედროვე და ინკლუზიური საჯარო ინსტიტუტების ჩამოყალიბების პროცესში.

საბერძნეთის შინაგან საქმეთა მინისტრის მოადგილე პარასკევ ხარალამპოგიანთან ლანა მორგოშიამ ციფრული ტრანსფორმაცია და ხელოვნური ინტელექტის პასუხისმგებლიანი გამოყენების მიმართულებით განხორციელებული რეფორმები განიხილა. ყურადღება გამახვილდა საქართველოს იუსტიციის სამინისტროს წარმატებულ ინოვაციებზე, რომლებმაც მოქალაქეებისთვის საჯარო სერვისები უფრო ხელმისაწვდომი გახადა.

სლოვაკეთის რესპუბლიკის ინვესტიციების, რეგიონული განვითარებისა და ინფორმატიზაციის სამინისტროს გენერალურ მდივან იან გაიდოშთან შეხვედრის ძირითადი თემა იყო ორ ქვეყანას შორის თანამშრომლობის გაღრმავება ინსტიტუციური მოდერნიზაციისა და ციფრული მმართველობის მიმართულებით. საუბარი შეეხო ქართულ ინოვაციებს - იუსტიციის სახლებს, მობილურ იუსტიციის სახლს, მომსახურების ერთიან პორტალს, აგრეთვე, ინოვაციურ სერვისს „გონიერი კონტრაქტი“.

შეხვედრებს ესწრებოდნენ იუსტიციის სახლის თავმჯდომარე ვახტანგ ჟვანია, იუსტიციის სახლისა და სახელმწიფო სერვისების განვითარების სააგენტოს ხელმძღვანელი პირები, აგრეთვე, საქართველოს ელჩი აზერბაიჯანის რესპუბლიკაში გიორგი ზაქარაშვილი.

საქართველოს დელეგაცია იუსტიციის მინისტრის მოადგილე ლანა მორგოშიას ხელმძღვანელობით გაერო-ს ინოვაციების სამიტში მონაწილეობს, რომლის მთავარი თემა საჯარო მმართველობისა და სერვისების ტრანსფორმაციაა. ლანა მორგოშიამ ღონისძიების ფარგლებში გამართული დისკუსიის მონაწილეებს საქართველოში საჯარო ინსტიტუტების მოდერნიზაციის მიმართულებით გატარებული რეფორმები გააცნო.

იუსტიციის მინისტრის მოადგილემ ყურადღება გაამახვილა ციფრული ტრანსფორმაციის პროცესში ადამიანის ფუნდამენტური უფლებებისა და სამართლის უზენაესობის დაცვის მნიშვნელობაზე. ლანა მორგოშიამ აღნიშნა, რომ ინოვაციების წარმატება დამოკიდებულია არა მხოლოდ ტექნოლოგიების დანერგვაზე, არამედ მათ ეფექტურ გამოყენებაზე.

„ეფექტიანი ლიდერობა გულისხმობს არა მხოლოდ ახალი გადაწყვეტილებების პრაქტიკაში დანერგვას, არამედ პრობლემების გამოვლენასაც, ინსტიტუტების მოქალაქეთა საჭიროებებზე მორგებას და იმის უზრუნველყოფას, რომ არავინ დარჩეს ყურადღების მიღმა. ტრანსფორმაციის წარმატება არ უნდა იზომებოდეს იმით, თუ რამდენ რეფორმას განვახორციელებთ ან რამდენად განვითარებული გახდება ჩვენი ტექნოლოგიები. მთავარი საზომი უნდა იყოს ის, რეალურად აუმჯობესებს თუ არა ეს ცვლილებები ადამიანების ცხოვრებას. მომავლის პერსპექტივიდან გამომდინარე, მტკიცედ გვჯერა, რომ მთავრობებმა ხელი უნდა შეუწყონ უწყვეტი სწავლის, თანამშრომლობისა და პასუხისმგებლიანი ინოვაციების კულტურის დამკვიდრებას. ლიდერებმა მუდმივად უნდა გადახედონ დამკვიდრებულ პრაქტიკას, მოუსმინონ მოქალაქეთა საჭიროებებს და შეიმუშაონ ისეთი გადაწყვეტილებები, რომლებიც ახალ გამოწვევებს უპასუხებს. გვწამს, რომ სწორედ ამ მიდგომების საფუძველზეა შესაძლებელი მდგრადი საზოგადოებრივი ღირებულებების და უფრო ინკლუზიური საზოგადოებების ჩამოყალიბება“, – განაცხადა ლანა მორგოშიამ.

მინისტრის მოადგილემ აღნიშნა, რომ ციფრული ტრანსფორმაციის მთავარი მიზანი მოქალაქეების საჭიროებებზე ეფექტიანი რეაგირება და მათთვის სწრაფი და ხელმისაწვდომი მომსახურების მიწოდებაა. ამის მაგალითად მან იუსტიციის სახლები დაასახელა, რომლებიც მთელი ქვეყნის მასშტაბით უზრუნველყოფენ 600-ზე მეტი სერვისის მიწოდებას. ლანა მორგოშიამ ისაუბრა, აგრეთვე, ელექტრონულ სერვისებსა და მობილური იუსტიციის სახლის პროექტზე, რომლის მიზანი რაიონული ცენტრებიდან მოშორებით და მაღალმთიან რეგიონებში მცხოვრები მოქალაქეების შესაბამისი სერვისებით უზრუნველყოფაა.

ღონისძიებას ესწრებოდა, აგრეთვე, საქართველოს ელჩი აზერბაიჯანში გიორგი ზაქარაშვილი.

საჯარო მმართველობის ინოვაციების სამიტი გაერო-ს ეკონომიკურ და სოციალურ საქმეთა დეპარტამენტისა და აზერბაიჯანის პრეზიდენტთან არსებული სახელმწიფო სერვისებისა და სოციალური ინოვაციების სააგენტოს ორგანიზებით ქ. ბაქოში ტარდება. ღონისძიებაში 100-ზე მეტი ქვეყნის მაღალი რანგის დელეგაციები მონაწილეობენ.

ადამიანის უფლებათა ევროპულმა სასამართლომ საქმეზე „სრულიად საქართველოს მუსლიმთა უმაღლესი სასულიერო სამმართველო საქართველოს წინააღმდეგ“ განჩინება გამოაქვეყნა.

სასამართლომ სრულად გაიზიარა იუსტიციის სამინისტროს სამართლებრივი პოზიცია, მომჩივნის საჩივარი აშკარად დაუსაბუთებლად მიიჩნია და ერთხმად დაუშვებლად ცნო.

საქმე მარნეულის მუნიციპალიტეტის 2022 წლის ბიუჯეტიდან მარნეულისა და ჰუჯაბის ეპარქიისთვის დაფინანსების გამოყოფას ეხებოდა. მომჩივანი ორგანიზაციის მტკიცებით, ადგილობრივი ბიუჯეტის სახსრების მხოლოდ ეპარქიისთვის გამოყოფა რელიგიური ნიშნით დისკრიმინაციას წარმოადგენდა.

სტრასბურგის სასამართლოში წარდგენილ პოზიციაში მთავრობა უთითებდა, რომ მომჩივანი ორგანიზაცია და ეპარქია შესადარებელ მდგომარეობაში არ იმყოფებოდნენ. ამ მხრივ მთავრობამ ყურადღება გაამახვილა მართლმადიდებელი ეკლესიის კონსტიტუციითა და კონსტიტუციური შეთანხმებით აღიარებულ სტატუსზე, მის ისტორიულ და კულტურულ როლზე, ასევე მრევლისა და რელიგიური ნაგებობების რაოდენობაზე. შესაბამისად, მთავრობის შეფასებით, სადავო დაფინანსება დისკრიმინაციულ ხასიათს არ ატარებდა.

საქმესთან დაკავშირებით სტრასბურგის სასამართლომ აღნიშნა, რომ მუნიციპალური ბიუჯეტიდან რელიგიური ორგანიზაციების დაფინანსება მუნიციპალიტეტების დისკრეციულ უფლებამოსილებას განეკუთვნება. სასამართლომ ყურადღება გაამახვილა იმ გარემოებაზე, რომ მარნეულის მუნიციპალიტეტში კულტურული მემკვიდრეობის სტატუსის მქონე 55 ეკლესია და მონასტერი საქართველოს ეკლესიას ეკუთვნოდა და მარნეულისა და ჰუჯაბის ეპარქიის მართვაში იყო. ამ ქრისტიანული კულტურული მემკვიდრეობის მოვლა-პატრონობაზე პასუხისმგებლობა სწორედ ეპარქიას ეკისრებოდა. მუნიციპალიტეტში იმავე სტატუსის მქონე ორი მეჩეთიც არსებობდა. თუმცა მომჩივანმა ორგანიზაციამ ვერ დაადასტურა, რომ რომელიმე მათგანს ფლობდა, მართავდა ან მის მოვლაზე იყო პასუხისმგებელი. ევროპულმა სასამართლომ გაიზიარა ეროვნული სასამართლოების შეფასება, რომ მომჩივან ორგანიზაციას ამ ობიექტებთან არც სამართლებრივი და არც ფაქტობრივი კავშირი არ ჰქონდა.

ზემოხსენებული განსხვავებების გათვალისწინებით, ევროპულმა სასამართლომ სრულად გაიზიარა იუსტიციის სამინისტროს პოზიცია და დაასკვნა, რომ დაფინანსების საკითხში სრულიად საქართველოს მუსლიმთა უმაღლესი სასულიერო სამმართველო და ეპარქია ერთნაირ მდგომარეობაში არ იმყოფებოდნენ. სასამართლოს მოსაზრებით, ამ შედეგზე გავლენას ვერ ახდენდა ვერც მუნიციპალიტეტის მოსახლეობის რელიგიური შემადგენლობა და ვერც ის ფაქტი, რომ ორივე ორგანიზაცია რელიგიურ საქმიანობას ეწეოდა. შედეგად, სტრასბურგის სასამართლომ დისკრიმინაციის შესახებ საჩივარი აშკარად დაუსაბუთებლად მიიჩნია და დაუშვებლად გამოაცხადა.

საქართველოს იუსტიციის მინისტრის მოადგილე ლანა მორგოშიასა და აზერბაიჯანის სახელმწიფო სერვისებისა და სოციალური ინოვაციების სააგენტოს თავმჯდომარე ულვი მეჰდიევის შეხვედრა ბაქოში დაგეგმილი საჯარო მმართველობის ინოვაციების გაერო-ს სამიტის ფარგლებში გაიმართა. ღონისძიებაში, რომელიც საჯარო მმართველობისა და სერვისების ტრანსფორმაციის საკითხებს ეძღვნება, 200-მდე ქვეყნის მაღალი რანგის დელეგაციები მონაწილეობენ.

შეხვედრაზე ხაზი გაესვა საერთაშორისო თანამშრომლობის მნიშვნელობას მოქალაქეთა საჭიროებებზე ორიენტირებული სერვისების განვითარებისათვის.

ლანა მორგოშიამ ულვი მეჰდიევს მიაწოდა ინფორმაცია ქართული ინოვაციური პროექტების – იუსტიციის სახლების, მობილური იუსტიციის სახლის, სერვისების ერთიანი პორტალისა და „გონიერი კონტრაქტის“ შესახებ. საუბარი შეეხო სამომავლო გეგმებსაც. აღინიშნა, რომ საქართველოს იუსტიციის სამინისტრო აქტიურად მუშაობს ხელოვნური ინტელექტის გამოყენებით საჯარო მმართველობის შემდგომ გაუმჯობესებაზე, რაც მნიშვნელოვნად აფართოებს შესაძლებლობებს. უწყება მომხმარებელთა მომსახურების ხელშეწყობის მიზნით განიხილავს ხელოვნურ ინტელექტზე დაფუძნებული რობოტიზებული სისტემების დანერგვას იუსტიციის სახლის ფილიალებში.

საჯარო მმართველობის ინოვაციების გაერო-ს სამიტი ქ. ბაქოში 5-6 ნოემბერს ტარდება. ვიზიტის ფარგლებში, საქართველოს იუსტიციის მინისტრის მოადგილეს შეხვედრები აქვს დაგეგმილი უცხოელ კოლეგებთან.

საქართველოს დელეგაციის შემადგენლობაში არიან იუსტიციის სახლის თავმჯდომარე ვახტანგ ჟვანია, იუსტიციის სამინისტროს საერთაშორისო ურთიერთობებისა და სამართლებრივი თანამშრომლობის დეპარტამენტის, იუსტიციის სახლისა და სახელმწიფო სერვისების განვითარების სააგენტოს ხელმძღვანელი პირები.

№16 პენიტენციური დაწესებულების მსჯავრდებულების მონაწილეობით კოტე მარჯანიშვილის სახელობის სახელმწიფო დრამატულ თეატრში სპექტაკლი „დარისპანის გასაჭირი“ გაიმართა. წარმოდგენა სპეციალური პენიტენციური სამსახურის ორგანიზებით, საქართველოს კულტურის სამინისტროს სსიპ „შემოქმედებითი საქართველოს“ საგრანტო პროექტის ფარგლებში, ა(ა)იპ „ინოვაციური შემოქმედების ცენტრის“ მხარდაჭერით დაიდგა.

პროექტის მიზანია მსჯავრდებულთა შემოქმედებითი პოტენციალის გამოვლენა, მათი უნარებისა და შესაძლებლობების განვითარება და კულტურულ ცხოვრებაში აქტიური ჩართულობის ხელშეწყობა.

№16 პენიტენციურ დაწესებულებაში სპექტაკლზე მუშაობა რამდენიმე თვის განმავლობაში მიმდინარეობდა. წარმოდგენის რეჟისურა, მუსიკალური და მხატვრული გაფორმება, ასევე, რეკვიზიტები თავად მსჯავრდებულებმა შექმნეს. კომედიური ჟანრის ერთმოქმედებიან სპექტაკლში 12 მსჯავრდებული და 6 პროფესიონალი მსახიობი მონაწილეობს.

მსგავსი ინიციატივები ხელს უწყობს ბრალდებულთა/მსჯავრდებულთა რესოციალიზაციას, გარე სამყაროსთან კონტაქტის შენარჩუნებას და გათავისუფლების შემდეგ საზოგადოებაში სრულფასოვან ინტეგრაციას.

წარმოდგენის დასრულების შემდეგ მსჯავრდებულებს საქართველოს საპატრიარქოსგან საჩუქრად ჯვრები და სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტ შიო III-ის ხელმოწერით სიგელები გადაეცათ.

ღონისძიებას იუსტიციის მინისტრი პაატა სალია, მინისტრის მოადგილეები, სპეციალური პენიტენციური სამსახურის ხელმძღვანელი, მოწვეული სტუმრები და მსჯავრდებულთა ოჯახის წევრები დაესწრნენ.

საქართველოს იუსტიციის მინისტრმა პაატა სალიამ კომისიის თავმჯდომარესა და დელეგაციის წევრებთან საქართველოს ეროვნული ნარკოპოლიტიკის პრიორიტეტები და მიდგომები განიხილა.

პაატა სალიამ აღნიშნა, რომ საქართველოს ნარკოპოლიტიკა 4-სვეტოვან სტრატეგიას ეფუძნება და მისი მიზანია დანაშაულის პრევენცია, მკურნალობა-რეაბილიტაცია, ზიანისა და მიწოდების შემცირება.

მინისტრმა ECECACD-ის წარმომადგენლებს ინფორმაცია მიაწოდა ნარკოპოლიტიკის საკითხებზე მომუშავე უწყებათაშორისი საკოორდინაციო საბჭოს საქმიანობასა და იმ სტრატეგიულ დოკუმენტებზე, რომლებითაც საბჭო ხელმძღვანელობს. საუბარი ასევე, შეეხო ნარკოვითარების მონიტორინგის ეროვნული ცენტრის საქმიანობას და მის როლს მტკიცებულებებზე დაფუძნებული ნარკოპოლიტიკის ფორმირების პროცესში.

ყურადღება გამახვილდა საერთაშორისო თანამშრომლობის მნიშვნელობაზე, განსაკუთრებით ისეთ ორგანიზაციებთან, როგორიცაა: გაერო-ს ნარკოტიკებისა და დანაშაულის წინააღმდეგ ბრძოლის ოფისი (UNODC); ევროპის საბჭოს პომპიდუ ჯგუფი (Pompidou Group) და ევროკავშირის ნარკოტიკების სააგენტო (EUDA).

შეხვედრას ესწრებოდნენ, აგრეთვე, იუსტიციის მინისტრის პირველი მოადგილე ბექა ძამაშვილი და საერთაშორისო ურთიერთობებისა და სამართლებრივი თანამშრომლობის დეპარტამენტის უფროსი, ქეთევან სარაჯიშვილი.

იუსტიციის მინისტრმა პაატა სალიამ სპეციალური პენიტენციური სამსახურის ახალი ხელმძღვანელი რამაზ თათარაშვილი სამსახურის თანამშრომლებს წარუდგინა.

პაატა სალიამ რამაზ თათარაშვილს ახალ თანამდებობაზე წარმატებები უსურვა.

რამაზ თათარაშვილს შინაგან საქმეთა სამინისტროს სისტემაში მუშაობის 28-წლიანი გამოცდილება აქვს, ძირითადად, მენეჯერულ პოზიციებზე. სპეციალური პენიტენციური სამსახურის ხელმძღვანელად დანიშვნამდე იგი შიდა ქართლის პოლიციის დეპარტამენტის დირექტორის თანამდებობას იკავებდა, მანამდე კი, იმერეთის პოლიციის დეპარტამენტს ხელმძღვანელობდა.

რამაზ თათარაშვილი პოლიციის პოლკოვნიკია.