ღონისძიებები

სამშაბათი, 12 სექტემბერი, 2023

ლატვიის იუსტიციის სამინისტროს წარმომადგენლებმა ქართველ კოლეგებს ოლაინის პენიტენციური დაწესებულების მუშაობის სპეციფიკა გააცნეს

განსაკუთრებული ყურადღება გამახვილდა მსჯავრდებულთა გათავისუფლებისთვის მომზადების, ნარკოდამოკიდებულებასთან ბრძოლისა და სტრესის მართვის პროგრამებზე. საქართველოს დელეგაცია, ასევე, გაეცნო სამარტოო საკანსა და დეესკალაციის ოთახში მსჯავრდებულთა მოთავსების სტანდარტებს და პენიტენციური სამსახურის სასწავლო ცენტრის მშენებლობა დაათვალიერა.

საქართველოს პენიტენციურ სისტემაში ევროპული სტანდარტების შესაბამისი რესოციალიზაცია-რეაბილიტაციის პროგრამების დანერგვა საქართველოს იუსტიციის სამინისტროს პრიორიტეტია.

ორშაბათი, 11 სექტემბერი, 2023

საქართველოს იუსტიციის მინისტრი ევროპის საბჭოს მინისტერიალში მონაწილეობს

რატი ბრეგაძე რიგაში ოფიციალური ვიზიტით იმყოფება ლატვიის მიერ ორგანიზებულ კონფერენციაზე, რომელსაც ევროპის საბჭოს წევრი ქვეყნების იუსტიციის მინისტრები ესწრებიან.

მინისტერიალის ფარგლებში საქართველოს იუსტიციის მინისტრმა ორმხრივი შეხვედრები გამართა დიდი ბრიტანეთისა და ჩრდილოეთ ირლანდიის გაერთიანებული სამეფოს, აგრეთვე ევროკავშირის წევრი ქვეყნების – ხორვატიის, კვიპროსისა და ფინეთის – იუსტიციის მინისტრებთან.

რატი ბრეგაძემ კოლეგებთან საქართველოს ევროინტეგრაციის პროცესში თანამშრომლობის გაღრმავების კონკრეტული ინიციატივები განიხილა. კერძოდ, ქვეყნის კანონმდებლობის ევროკავშირის სამართალთან დაახლოების პროცესში საქართველოს გამოცდილებას ევროპელი ექსპერტები გაუზიარებენ.

საქართველოს იუსტიციის მინისტრმა პარტნიორებს პენიტენციურ სისტემასა და სახელმწიფო სერვისების მიმართულებით განხორციელებული რეფორმებიც გააცნო.

საუბარი შეეხო, აგრეთვე, ნოემბერში საქართველოში დაგეგმილ საერთაშორისო კონფერენციას, რომლის თემა პატიმართა და პრობაციონერთა რეაბილიტაციის პროცესში ინოვაციური მიდგომები იქნება.

საქართველოს დელეგაციაში იუსტიციის მინისტრის მოადგილე ბექა ძამაშვილი და ლატვიაში საქართველოს ელჩი ირაკლი ყურაშვილი არიან.

ხუთშაბათი, 07 სექტემბერი, 2023

სტრასბურგის სასამართლომ ნიკანორ მელიას დაკავება და აღკვეთის ღონისძიების სახით პატიმრობის შეფარდება კანონიერად მიიჩნია

დღევანდელი გადაწყვეტილებით სტრასბურგის სასამართლომ დაადასტურა, რომ ნიკანორ მელიას დაკავება და მის მიმართ აღკვეთის ღონისძიების სახით პატიმრობის შეფარდება იყო კანონიერი და ევროპული კონვენციის სტანდარტებთან სრულ შესაბამისობაში. ამასთანავე, სასამართლომ ცალსახად დაადგინა, რომ ნიკანორ მელიას დაკავებაში არ იკვეთებოდა პოლიტიკური მოტივები და არ გაიზიარა მომჩივნის არგუმენტები.

როგორც საზოგადოებისთვის ცნობილია, 2019 წლის ივნისის აქციის მსვლელობისას ნიკანორ მელიას ხელმძღვანელობითა და უშუალო მონაწილეობით მიტინგზე შეკრებილი მოქალაქეების ნაწილი ეცადა პარლამენტში შეჭრას. აღნიშნულის გათვალისწინებით, მას ბრალი წარედგინა ჯგუფური ძალადობის ორგანიზების, ხელმძღვანელობისა და მასში მონაწილეობისათვის და აღკვეთის ღონისძიების სახით შეეფარდა გირაო 30,000 ლარის ოდენობით. სასამართლომ დააწესა მისი ელექტრონული მეთვალყურეობა.

2020 წლის 1-ელ ნოემბერს მიმდინარე აქციაზე, ნიკანორ მელიამ პროტესტის ნიშნად მოიხსნა ელექტრონული მონიტორინგის სამაჯური, რითაც დაარღვია გირაოს პირობები. შესაბამისად, თბილისის საქალაქო სასამართლომ გირაოს თანხა გაზარდა 40,000 ლარით. ვინაიდან ნიკანორ მელიამ გირაოს გადახდაზე უარი განაცხადა, სასამართლოს გადაწყვეტილებით, მას აღკვეთის ღონისძიება - გირაო შეეცვალა პატიმრობით. გირაოს თანხის შეტანის შემდეგ, იგი 2021 წლის 10 მაისს გათავისუფლდა.

ევროპულმა სასამართლომ სრულად გაიზიარა იუსტიციის სამინისტროს არგუმენტაცია (წარდგენილ მტკიცებულებებთან ერთად) და მიიჩნია, რომ მომჩივნის მიმართ არ დარღვეულა ევროპული კონვენციის არც ერთი მუხლი.

სამშაბათი, 05 სექტემბერი, 2023

ნოტარიუსთა საკვალიფიკაციო გამოცდის შედეგები ცნობილია

იუსტიციის სასწავლო ცენტრში ნოტარიუსთა საკვალიფიკაციო გამოცდის მეორე ეტაპი დასრულდა. ნოტარიუსობის მსურველებიდან მინიმალური კომპეტენციის ზღვარი, 75 ქულა და მეტი, 79-მა აპლიკანტმა გადალახა.

ნოტარიუსთა საკვალიფიკაციო გამოცდა ორეტაპიანი იყო. გამოცდის პირველი ნაწილი ზოგად უნარებში 1 აგვისტოს ჩატარდა და მინიმალური კომპეტენციის ზღვარი 144-მა მონაწილემ გადალახა. მეორე ეტაპი კი პროფესიულ გამოცდას დაეთმო.

ნოტარიუსთა საკვალიფიკაციო გამოცდის ჩაბარების მსურველთა საბუთების მიღება იუსტიციის სასწავლო ცენტრში 2023 წლის 26 ივლისის ჩათვლით მიმდინარეობდა. თავდაპირველად, ნოტარიუსთა საკვალიფიკაციო გამოცდის ჩაბარების სურვილი 185-მა პირმა გამოთქვა.

მონაწილეებს, რომლებმაც პროფესიული ეტაპი წარმატებით გაიარეს, სერტიფიკატები გადაეცემათ.

იუსტიციის მინისტრის პირველმა მოადგილემ სახალხო დამცველს უწყებაში მიმდინარე რეფორმები გააცნო

სამუშაო შეხვედრას იუსტიციის მინისტრის პირველი მოადგილე თამარ ტყეშელაშვილი უძღვებოდა. მინისტრის პირველმა მოადგილემ საკუთრების უფლების მნიშვნელობაზე ისაუბრა და ამ კონტექსტში ხაზი გაუსვა იუსტიციის სამინისტროსა და საჯარო რეესტრის როლს ადამიანის ფუნდამენტური უფლებების რეალიზაციის პროცესში.

მიწის სისტემური რეგისტრაციის, დამისამართებული საქართველოსა და ბიზნესსუბიექტების ხელახალი რეგისტრაციის რეფორმების შედეგების შესახებ შუალედური პრეზენტაცია ლევან იოსელიანს საჯარო რეესტრის ეროვნული სააგენტოს თავმჯდომარე დავით დევიძემ წარუდგინა.

შეხვედრაზე განხილულ იქნა, აგრეთვე, საჯარო რეესტრის ეროვნული სააგენტოს ინსტიტუციურ შესაძლებლობები გენდერული ბალანსისა და შშმ პირთა უფლებების დაცვის მიმართულებებით.

საუბარი შეეხო იუსტიციის სამინისტროში დასაქმებულთა შრომით უფლებებს. აღინიშნა, რომ სამინისტრო თანამშრომლების ინტერესებსზე ორიენტირებული უწყებაა და მუდმივად ზრუნავს მათი პირობების გაუმჯობესებაზე.

იუსტიციის სამინისტრო სახალხო დამცველის ოფისთან მჭიდრო თანამშრომლობას მომავალშიც გააგრძელებს.

ორშაბათი, 04 სექტემბერი, 2023

საქართველოსა და შვეიცარიას შორის მიგრაციის სფეროში 2022 წელს ხელმოწერილი მემორანდუმის იმპლემენტაციის მიზნით კონსულტაციათა მეორე რაუნდი გაიმართა

შვეიცარიის დელეგაციას საქართველოს მიგრაციის საკითხთა სამთავრობო კომისიის სახელით იუსტიციის მინისტრის პირველმა მოადგილე თამარ ტყეშელაშვილმა უმასპინძლა.
„საქართველოსა და შვეიცარიაში მიგრაციის მართვის სისტემები, პრაქტიკულად, იდენტურია, რაც ორმხრივი თანამშრომლობის წარმატების გარანტია“, – აღნიშნა თამარ ტყეშელაშვილმა შვეიცარიის მიგრაციის საკითხთა სახელმწიფო სამდივნოს საერთაშორისო თანამშრომლობის საკითხთა განყოფილების უფროს ქრისტინა პრობსტ-ლოპესთან შეხვედრისას.


მხარეებმა ორმხრივ კონსულტაციებზე განიხილეს ისეთი საკითხები, როგორიცაა: არალეგალური მიგრაციის პრევენცია, თავშესაფრის საკითხები, საპროექტო თანამშრომლობა და მემორანდუმით გათვალისწინებული სხვა მიმართულებები.

იუსტიციის სამინისტროს გარდა, სამუშაო შეხვედრაში ჩართული იყვნენ მიგრაციის საკითხთა სამთავრობო კომისიის სხვადასხვა წევრი სახელმწიფო უწყების წარმომადგენლები.

სამშაბათი, 22 აგვისტო, 2023

იუსტიციის მინისტრის მოადგილეები გერმანიის ჩრდილოეთ რაინ-ვესტფალიის ფედერალური მიწის იუსტიციის მინისტრს შეხვდნენ

გერმანული დელეგაცია თბილისში საქართველო-გერმანიის თანამშრომლობის 2022-2025 წლების პროგრამის ფარგლებში იმყოფება, რომელსაც გასულ წელს ბერლინში საქართველოს და გერმანიის იუსტიციის მინისტრებმა მოაწერეს ხელი.

იუსტიციის მინისტრის პირველმა მოადგილე თამარ ტყეშელაშვილმა შეხვედრაზე აღნიშნა, რომ უწყების ერთ-ერთი პრიორიტეტია პენიტენციური სისტემა საქართველოში, რომელიც შეესაბამება საუკეთესო ევროპულ და საერთაშორისო სტანდარტებს და ამ მხრივ ორ ქვეყანას შორის გამოცდილების გაზიარება ძალზედ ღირებულია.

იუსტიციის სამინისტროს მიერ პენიტენციური სისტემის რეფორმის ახალი ტალღის დაწყებიდან დღემდე საქართველოს უკვე აქვს მნიშვნელოვანი ხელშესახები შედეგები: ინფრასტრუქტურული პროექტების, რეაბილიტაცია-რესოციალიზაციის პროგრამების, მსჯავრდებულთა დასაქმების შესაძლებლობების გაფართოების, თანამშრომელთა და პატიმართა პირობების გაუმჯობესების, პენიტენციური ჯანდაცვის შემდგომი განვითარების, პენიტენციურ სისტემაში IT ინფრასტრუქტურის გაძლიერების და თანამშრომელთა პროფესიული შესაძლებლობების ზრდის კუთხით.

იუსტიციის სამინისტრომ, ასევე, შეიმუშავა ახალი პენიტენციური სტრატეგია და ახალი პენიტენციური კოდექსი, რომლის ერთ-ერთი მნიშვნელოვანი მიმართულება მსჯავრდებულთა რეაბილიტაცია-რესოციალიზაციის მიდგომების დახვეწაა. ამასთან, შემუშავდა სპორტის მართვის სტრატეგია, რომელიც აყალიბებს პლატფორმას მსჯავრდებულთა სპორტულ აქტივობებში ჩართვისთვის, რაც ცხოვრების ჯანსაღ წესსა და რეინტეგრაცია-რესოციალიზაციას უწყობს ხელს.

პენიტენციურ სისტემაში ახალი და ინოვაციური სერვისი „ონლაინ კლინიკა“ დაინერგა, რაც მსჯავრდებულებისთვის ჯანდაცვის სერვისებზე სწრაფ ხელმისაწვდომობას უზრუნველყოფს.

დაგეგმილია მცირე ზომის ახალი პენიტენციური დაწესებულებების მშენებლობა. მიმდინარე წლის სექტემბერში გაიხსნება მცირე ზომის ლაითურის დაწესებულება, დაწყებულია მშენებლობა ქ. რუსთავში.

გერმანული მხარისთვის საინტერესო აღმოჩნდა საქართველოში დანერგილი ინოვაციები – იუსტიციის სახლები პენიტენციურ დაწესებულებებში, ონლაინ უნივერსიტეტი და ,,რე-მარკეტი“. გერმანიის ჩრდილოეთ რაინ-ვესტფალიის ფედერალური მიწის იუსტიციის მინისტრმა ბენიამინ ლიმბახმა აღნიშნა, რომ საქართველოს მიერ ბოლო წლებში პენიტენციურ სისტემაში განხორციელებული რეფორმები აშკარად იგრძნობოდა უშუალოდ პენიტენციურ დაწესებულებებში ვიზიტის დროს და მისასალმებელია საქართველოს მისწრაფება გაიზიაროს საუკეთესო ევროპული გამოცდილება.

ოთხშაბათი, 16 აგვისტო, 2023

გაერო-ს ბავშვის უფლებათა კომიტეტში საქართველოდან წარსადგენი კანდიდატის შესარჩევი კონკურსი გამოცხადდა

გაერო-ს ბავშვის უფლებათა კომიტეტში საქართველოდან წარსადგენი კანდიდატის შესარჩევი კონკურსი გამოცხადდა
გაერთიანებული ერების ორგანიზაციის ბავშვის უფლებათა კომიტეტში წარსადგენი კანდიდატის შესარჩევი კონკურსი გამოცხადდა, რომელიც საქართველოს იუსტიციის მინისტრის 2023 წლის 14 აგვისტოს №923 ბრძანებით დამტკიცებული კონკურსის ჩატარების წესის შესაბამისად წარიმართება.
დაინტერესებულმა პირებმა განაცხადები უნდა წარმოადგინონ 2023 წლის 30 აგვისტომდე. კონკურსის თაობაზე დეტალური ინფორმაცია განთავსებულია შემდეგ მისამართზე: https://hr.gov.ge/JobProvider/UserOrgVaks/Details/80551?active=1
კონკურსის შედეგად საქართველოდან წარდგენილი კანდიდატი მონაწილეობას მიიღებს გაერო-ს ბავშვის უფლებათა კომიტეტის არჩევნებში, რომელიც 2024 წელს გაიმართება.
ბავშვის უფლებათა კომიტეტი მონიტორინგს უწევს ხელშემკვრელი სახელმწიფოების მიერ „ბავშვის უფლებების შესახებ“ კონვენციითა და მისი დამატებითი ოქმებით გათვალისწინებული ვალდებულებების ეფექტიან შესრულებას.

სამშაბათი, 08 აგვისტო, 2023

იუსტიციის მინისტრმა აგვისტოს ომის გმირების ხსოვნას პატივი მიაგო

იუსტიციის მინისტრი რატი ბრეგაძე საქართველოს პრემიერ-მინისტრ ირაკლი ღარიბაშვილსა და მინისტრთა კაბინეტის წევრებთან ერთად მუხათგვერდის ძმათა სასაფლაოზე იმყოფებოდა. მთავრობის მეთაურმა და მინისტრებმა 2008 წლის აგვისტოს ომში დაღუპულთა ხსოვნის პატივისცემის ნიშნად გმირთა მემორიალი გვირგვინით შეამკეს.

საქართველოში რუსეთის სამხედრო ინტერვენციიდან 15 წელი გავიდა. საქართველოს იუსტიციის სამინისტრო, საკუთარი კომპეტენციის ფარგლებში, საერთაშორისო სასამართლოებში იცავს საქართველოს სამართლებრივ უსაფრთხოებას და ამზადებს სამართლებრივ საფუძველს ქვეყნის შემდგომი დეოკუპაციისათვის.

კერძოდ,

  • სტრასბურგის სასამართლოში მოგებულია სახელმწიფოთაშორისი დავა რუსეთის წინააღმდეგ აგვისტოს ომის საქმეზე;
  • რუსეთის ფედერაციას დაკისრებული აქვს 130 მილიონამდე ევროს გადახდის ვალდებულება ომის დროს დაზარალებული 24 000-მდე საქართველოს მოქალაქის სასარგებლოდ;
  • მოგებულია ყველა (3.300-მდე) საქმე საქართველოს წინააღმდეგ აგვისტოს ომთან დაკავშირებით, რომლებიც ცხინვალის რეგიონში მცხოვრებთა მხრიდან რუსეთის კოორდინაციით შევიდა.
  • აქტიურ ფაზაშია რუსეთის წინააღმდეგ საქმისწარმოება განგრძობადი ოკუპაციის საქმეზე;
  • ჰააგის სასამართლოში დასრულებულია რუსეთ-საქართველოს ომის საქმის გამოძიება; გამოცემულია დაკავების ორდერები საქართველოს მოსახლეობის მიმართ დანაშაულის ჩამდენ სამ პირზე.

ღონისძიებები

აპრილი , 2024
  • ორ
  • სა
  • ოთ
  • ხუ
  • პა
  • შა
  • კვ
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 1
  • 2
  • 3
  • 4
  • 5
  • 6